ချောက်၊ ဩဂုတ် ၃၀၊ ၂၀၂၅။

မကွေးတိုင်း၊ ချောက်မြို့ရှိ ချောက်ခရိုင်အထွေထွေအုပ်ချုပ်ရေးဦးစီးဌာနရုံးမှ အုပ်ချုပ်ရေးအဖွဲ့ဝင်တဦးရဲ့ဇနီးကို ပေါ်တာဆွဲဖမ်းဆီးခဲ့တဲ့ ပျူစောထီးခေါင်းဆောင်တဦး ပြန်လည်ဖမ်းဆီးခံထားရတယ်လို့ အုပ်ချုပ်ရေးပိုင်းနဲ့နီးစပ်သူတဦးဆီက သိရပါတယ်။

သြဂုတ် ၂၃ ရက်မနက် ၁၀ နာရီခွဲလောက်က ချောက်မြို့မစျေးအနီးမှာ အထက်ပါအုပ်ချုပ်ရေးအဖွဲ့ဝင်အေးမင်းထွန်းရဲ့ ဇနီးဖြစ်သူ မနွယ်မာဝင်းကို ပျူစောထီးအဖွဲ့ ၁၅ ဦးလောက်က ပေါ်တာဆွဲ ဖမ်းဆီးခဲ့တာလို့ ဆိုပါတယ်။

“ပျူစောထီးခေါင်းဆောင်က ဈေးဝယ်လာတဲ့လူငယ်တွေကို ပတ်ဆွဲနေတာ၊ အဲ့ဒီနေ့က ရွာဘက်က ဈေးလာဝယ်တဲ့ လူငယ် ၁၀ ဦးကျော်လောက်လည်းဖမ်းသွားတယ်၊ ဘယ်ရွာကလို့တော့မသိဘူး၊ အုပ်ချုပ်ရေးအဖွဲ့ဝင်ရဲ့ မိန်းမကတော့ ဆိုင်ကယ်နဲ့ဈေးလာဝယ်တာ၊ ဆိုင်ကယ်စတန်း (Motorcycle stand) မှာ ဆိုင်ကယ်အပ်အပြီး ဈေးဘက်လာတဲ့အချိန် ပျူစောထီးအဖွဲ့နဲ့တွေ့တာမှာ ပေါ်တာဆွဲခံလိုက်ရတာ”လို့ ဖြစ်စဥ်ကို သိရှိတဲ့ အုပ်ချုပ်ရေးပိုင်းနဲ့နီးစပ်သူက ပြောပါတယ်။

ဖမ်းဆီးပြီးနောက် မနွယ်မာဝင်းကို နေ့ချင်းပြန်လွှတ်ပေးခဲ့မယ့် ဖမ်းဆီးခဲ့တဲ့ ပျူစောထီးတွေထဲက ချောက်မြို့၊ အမှတ် ၁၅၊ စစ်ကွင်းရပ်ကွက်နေ အသက် ၄၀ အရွယ် ပျူစောထီးခေါင်းဆောင်အောင်ဇော်ဦးကို အေးမင်းထွန်းကပြန်လည်တရားစွဲတာကြောင့် ဩဂုတ် ၂၅ ရက်မှာ သူ့နေအိမ်မှာပဲ ဖမ်းဆီးခံခဲ့ရတာလို့ ဆိုပါတယ်။

“ချောက်ရဲစခန်းကို အေးမင်းထွန်းကအမှုဖွင့်တာ၊ ဘယ်လိုပုဒ်မတပ်ပြီး ဖွင့်တယ်ဆိုတာတော့ မသိဘူး၊ အမှုဖွင့်လို့ ချောက်ရဲစခန်းက ရဲတွေကသွားဖမ်းရတာ၊ ချောက်ရဲစခန်းမှာ ၁ ရက်ထားတယ်၊ နောက်ရက်မှ နေပြည်တော်ကို ပို့လိုက်တာ၊” လို့ အထက်ပါ အုပ်ချုပ်ရေးပိုင်းနဲ့နီးစပ်သူကပြောပါတယ်။

အဖမ်းခံရတဲ့ပျူစောထီးဟာ ယခင်ကျောင်းဆရာတဦးဖြစ်ပြီး လူမှုရေးကိစ္စတွေကြောင့် တာဝန်ကရပ်နားခံထားရသူဖြစ်ကာ စစ်အာဏာသိမ်းပြီးနောက်မှာ ပျူစောထီးဖြစ်လာပြီး ချောက်မြို့ပေါ်မှာလည်း ဒေသခံတွေကို ပေါ်တာဆွဲတာ၊ ငွေတောင်းပြီး လူပြန်ရွေးခိုင်းတာတွေအပြင် မပေးရင်စစ်မှုထမ်းထဲ ထည့်တာတွေ လုပ်နေသူဖြစ်တယ်လို့ ဆိုပါတယ်။

ချောက်မြို့ပေါ်မှာ စစ်ကော်မရှင်တပ်နဲ့ ပျူစောထီးတွေက မကြာခဏပေါ်တာဆွဲဖမ်းဆီးတာတွေလုပ်နေပြီး ဩဂုတ် ၂၇ ရက်ကလည်း ချောက်မြို့ပေါ်ရှိ ဖုန်းဆိုင်တွေက ဝန်ထမ်းလူငယ်တွေကို စစ်ကော်မရှင်အဖွဲ့တွေက ပေါ်တာဆွဲဖမ်းဆီးမှုတွေပြုလုပ်ခဲ့သေးတယ်လို့ သိရပါတယ်။

စာတည်း – လင်း

ပဲခူး၊ ဧပြီ ၂၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်၊ စိန်ကန့်လန့်ရွာအခြေစိုက် ခလရ ၁ တပ်ရင်း က အချုပ်သား ၁ ဦးနဲ့ ကင်းသမား ၂ ဦး မတ်လ ၂၃ ရက် မနက်အစောပိုင်းက ထွက်ပြေးသွားလို့ အဲ့ဒီနေ့ တာဝန်ကျအရာရှိနဲ့ ဗဟိုကင်းတာဝန်ကျကင်းတွဲက စစ်ကောင်စီတပ်ဖွဲ့ဝင် ၂ ဦး ဖမ်းဆီးခံထားရတယ်လို့ သိရပါတယ်။

ဖမ်းဆီးခံရသူတွေဟာ အခင်းဖြစ်ပွားတဲ့နေ့က ဗဟိုကင်းတာဝန်ကျကင်းမှူး တပ်ကြပ်ကြီး ရဲလှိုင်ဝင်း၊ ဒု-ကင်းမှူး ဒုတပ်ကြပ် ဇော်လတ်နဲ့ တာဝန်မှူးအရာရှိ သန့်ဇင်တို့ဖြစ်ပြီး သူတို့ကို ကင်းတာဝန်ပေါ့လျော့မှုနဲ့ အဲ့ဒီနေ့မနက်ပိုင်းမှာဘဲ ဖမ်းဆီးထားခဲ့တာလို့ တပ်တွင်းသတင်းရင်းမြစ်တဦးက မြေလတ်အသံကို ပြောပါတယ်။

“ဖြစ်တာကသူတို့ ကင်းချိန်မှာဖြစ်တာတော့မဟုတ်ဘူး။ ကင်းမှူးနဲ့ဒုကင်းမှူးက ညဦးပိုင်းစောင့်ရတာ။ ထွက်ပြေးတာက အချုပ်သားနဲ့သူတို့အောက်က ကင်းကျတဲ့သူတွေထွက်ပြေးတာဆိုတော့ တာဝန်ပေါ့လျော့တယ်ဆိုပြီး သူတို့ကိုဖမ်းထားတာ” လို့ ပြောပါတယ်။

ဖမ်းဆီးထားတဲ့စစ်ကောင်စီတပ်ဖွဲ့ဝင် ၃ ဦးကို ထွက်ပြေးနေသူတွေနဲ့ ဆုံးရှုံးသွားတဲ့လက်နက်ခဲယမ်းတွေ ပြန်လည်မရရှိရင် သေဒဏ်ပေးမယ်လို့လည်း ခြိမ်းခြောက်ထားတယ်လို့ သူကပြောပါတယ်။

လက်နက်၊ခဲယမ်းတွေနဲ့အတူထွက်ပြေးနေတဲ့ စစ်ကောင်စီတပ်သားတွေထဲက ၂ ဦးဟာ လက်ရှိအထိ ထွက်ပြေးလွတ်မြောက်နေဆဲဖြစ်ပြီး ၎င်းတို့နဲ့အတူ သေနတ် ၃ လက်၊ ကျည်ဆံ ၂၀၀၀၊ လက်ပစ်ဗုံး ၂၀ လုံးကိုပါ သယ်ဆောင်ထွက်ပြေးနေတာလို့ ဆိုပါတယ်။

ထွက်ပြေးသွားတဲ့ စစ်ကောင်စီတပ်သား ၃ ဦးထဲက တပ်သား ဖိုးလပြည့်ဆိုသူကို မတ်လ ၂၄ ရက်နေ့မှာပဲ ပဲခူးရိုးမအတွင်းက ရှားတောပြန့်နဲ့ပျဉ်းကတိုးခင်းကျေးရွာအနီးမှာ ပြန်လည်ဖမ်းဆီးခံခဲ့ရပြီး သူ့ကို ခလရ ၁ စစ်ကောင်စီတပ်အရာရှိတွေက သတ်ဖြတ်လိုက်ပြီလို့လည်း တပ်တွင်းသတင်းရင်းမြစ်တွေက ပြောပါတယ်။