ပေါင်းတည်၊ ဒီဇင်ဘာ ၂၀၊ ၂၀၂၅။
ပဲခူးတိုင်း၊ ပေါင်းတည်မြို့နယ်၊ ကွေ့မကျေးရွာမှာ နေအိမ်အတွင်းရှိနေတဲ့ ရာအိမ်မှူးတဦးကိုပစ်ခတ်ရာ သေဆုံးခဲ့တယ်လို့ ၃၆၀၁ တပ်ရင်း စစ်ထောက်လှမ်းရေးနဲ့ သတင်းပြန်ကြားတာဝန်ခံဆီက သိရပါတယ်။
ကွေ့မရွာ ရာအိမ်မှူး အသက် ၅၀ ဝန်းကျင်အရွယ်ရှိ ကိုထွန်း ကို ဒီဇင်ဘာ ၁၈ ရက် ည ၈ နာရီကျော်မှာပစ်ခတ်ခဲ့တာလို့ ဆိုပါတယ်။
“အိမ်မှာတော့ သူမိသားစုတွေရှိတယ်။ ဒါပေမယ့် မဆိုင်တဲ့သူတွေကို ဘာမှမလုပ်ခဲ့ဘူး။ သေနတ်နဲ့တော့ ၂ ချက်ပစ်ခတ်ရှင်းလင်းခဲ့တယ်။ သူကတော့ခုခံချိန်တောင်မရလိုက်ပါဘူး။”လို့ ၃၆၀၁ တပ်ရင်း စစ်ထောက်လှမ်းရေးနဲ့ သတင်းပြန်ကြားတာဝန်ခံ Shadow ကပြောပါတယ်။
သေနတ်နဲ့အနီးကပ်ပစ်ခံရလို့ ရာအိမ်မှူးကိုထွန်းမှာ ဦးခေါင်းနဲ့ရင်ဘတ်ကျည်ထိပြီး နေရာတင် သေဆုံးပြီး အလောင်းကိုတော့ ည ၁၀ နာရီကျော်မှာ စစ်ကော်မရှင်တပ်ဖွဲ့ဝင်နဲ့ရဲတွေက စစ်ဆေးယူသွားတယ်လို့ သူကပြောပါတယ်။
ရာအိမ်မှူး ကိုထွန်းဟာ စစ်မှူထမ်းလိုက်လံဖမ်းဆီးရာမှာ ပါဝင်တာ၊ ကျေးရွာအတွင်း စစ်မှုထမ်းကြေးကို ၁ လကို ကျပ် ၅ သောင်းကနေ ကျပ် ၁ သိန်းထိ ကိုယ်တိုင်လိုက်လံ ကောက်ယူနေတာ၊ ကျေးရွာမှာ လာရောက်တည်းခိုသူတွေကို ဧည့်စာရင်းမတိုင်ရင် ရိုက်နှက်တာတွေလည်းလုပ်တတ်တဲ့အတွက် ခုလို ပစ်ခတ်ခဲ့တာလို့ ဆိုပါတယ်။
ဒီဇင်ဘာ ၁၃ ရက်ကလည်း သဲကုန်းမြို့နယ်၊ ညောင်ပင်စုကျေးရွာက ကြက်ဝိုင်းမှာ ကျေးရွာနေ ရဲသတင်းပေးဖြစ်သူ သန်းဇော်ဆိုသူပစ်သတ်ခံရပြီး သေဆုံးခဲ့သေးတယ်လို့ သိရပါတယ်။
စာတည်း – လင်း