ဟုမ္မလင်း၊ ဧပြီ ၂၉၊ ၂၀၂၃။
စစ်ကိုင်းတိုင်း၊ ဟုမ္မလင်းမြို့နယ်နဲ့ ဖောင်းပြင်မြို့နယ် အစပ်မှာ ယမန်နေ့ ဧပြီလ ၂၈ ရက်နေ့ကတည်းက ပျူစောထီး၊ ပြည်သူ့စစ်အဖွဲ့တွေနဲ့ ပြည်သူ့ကာကွယ်ရေးအဖွဲ့တွေ တိုက်ပွဲဖြစ်ပွားနေပြီး ဒီကနေ့မနက်မှာတော့ စစ်ကောင်စီဘက်က လေကြောင်းနဲ့ ပစ်ခတ်သွားတယ်လို့ သိရပါတယ်။
ချင်းတွင်းမြစ်ရဲ့ နှစ်ဖက်မှာရှိနေတဲ့ စစ်ကောင်စီကင်းစခန်းငယ်တွေကို တိုက်ခိုက်နေတာဖြစ်ပြီး မြစ်ရဲ့ညာဘက်ခြမ်းမှာတော့ ဧပြီလ ၂၈ ရက် မနေ့က နေ့လည် ၃ နာရီခွဲမှာ တိုက်ပွဲတကြိမ်၊ ၄ နာရီခွဲမှာ တိုက်ပွဲတကြိမ် ဖြစ်ပွားခဲ့တယ်လို့ ဆိုပါတယ်။
ဒါ့အပြင် ဒီကနေ့ မနက် ၇ နာရီဝန်းကျင်မှာလည်း မြစ်ရဲ့ဘယ်ဘက်မှာရှိတဲ့ ပြည်သူ့စစ်ယာယီကင်းစခန်းတွေကို နောက်ထပ်စစ်ကြောင်းတခုက ဝင်ရောက်တိုက်ခိုက်ခဲ့ပြီး ၈ နာရီခွဲမှာတော့ စစ်ကောင်စီဘက်က လေကြောင်းနဲ့ ပစ်ခတ်သွားတယ်လို့ သိရပါတယ်။
“ယာယီပွိုင့်ကုန်းထိုးတဲ့နေရာတွေကို တပြိုင်ထဲတိုက်တာဗျ၊ သူတို့ဘက်က ၂ ယောက်ကျပြီးတော့ အလောင်းပြန်ကောက်တဲ့အချိန်မှာ နောက်တကြိမ် ထပ်ဖြစ်တယ်။ ကျတော်တို့သိထားတာ ၇ ယောက် ကျတယ်။ ၁ ယောက်ကတော့ အလောင်းလာမကောက်သေးဘူး။ မြစ်ဘယ်ဘက်ခြမ်းက တိုက်ပွဲအခြေနေကတော့ သေချာမသိရသေးဘူး။ လောလောဆယ်ဆယ်တော့ စစ်ဆိုင်ထားတုန်းပဲ။” လို့ Homalin People’s Defence force-HPDF ရဲဘော်တဦး က ပြောပါတယ်။
တိုက်ပွဲအတွင်း ပျူစောထီးနဲ့ပြည်သူ့စစ်အဖွဲ့ဝင် ၇ ဦးသေဆုံးကာ၊ M 79 တလက်၊ 79 အဆံ ၃လုံး၊ ခါးချိုး ၅ လက် သိမ်းဆည်းထားနိုင်တယ်လို့ ပူးပေါင်းတပ်ဖွဲ့တွေက ဆိုပေမယ့် သေဆုံးစာရင်းကိုတော့ မြေလတ်အသံက သီးခြားအတည်မပြုနိုင်သေးပါဘူး။
လက်ရှိမှာတော့ ရွှေပြည်အေးမြို့နဲ့ တုံဟဲရွာဘက်မှာ စစ်ကောင်စီဘက်က အင်အားစုနေပြီး စစ်ကြောင်းပြန်ထိုးဖို့ ပြင်ဆင်နေတဲ့အတွက် ဒီကနေ့အတွင်း တိုက်ပွဲဆက်လက်ဖြစ်ပွားနိုင်တယ်လို့လည်း သူကဆက်ပြောပါတယ်။
အဲဒီတိုက်ပွဲတွေကို နယ်မြေခံကာကွယ်ရေးတပ်ပေါင်းစုအဖွဲ့တွေက ဖော်ဆောင်ခဲ့တာဖြစ်ပြီး ပြီးခဲ့တဲ့ ဖေဖော်ဝါရီလလယ်ပိုင်းလောက်ကလည်း PDF ပူးပေါင်းတပ်ဖွဲ့တွေ တပ်ထိုင်ထားတဲ့ နတ်နန်းကို စစ်ကြောင်းထိုးလာတဲ့အတွက် တိုက်ပွဲ ဖြစ်ပွားခဲ့ပါသေးတယ်။
စာတည်း – 007