S & C

စစ်ကိုင်း၊ မေ ၁၁၊ ၂၀၂၃။

စစ်ကိုင်းတိုင်း ၊ ရွှေဘိုခရိုင်အတွင်းက ကျေးရွာတရွာမှာ မီးဘေးရှောင်နေရတဲ့ အိမ်ထောင်စု ၁၀၀ ကျော်အတွက် S & C မီးဘေးစစ်ဘေးပညာရေးကူညီစောင့်ရှောက်ရေးအဖွဲ့ က မေလ ၁၀ ရက်နေ့က အခြေခံစားသောက်ကုန်တွေကို လှူဒါန်းခဲ့ပါတယ်။

တနှစ်ကျော်တဲ့အထိ မီးဘေးရှောင်နေရတဲ့ပြည်သူတွေဟာ စားဝတ်နေရေးခက်ခဲလာတဲ့အတွက် သွားရောက်လှူဒါန်းရခြင်းဖြစ်ကြောင်း နဲ့ သွားရောက်လှူဒါန်းချိန်မှာလည်း နယ်မြေခံတွေနဲ့ညှိနှိုင်းတိုင်ပင်ပြီး ခက်ခက်ခဲခဲသွားရောက် လှူဒါန်းခဲ့ခြင်းဖြစ်ကြောင်းကိုလည်း S & C မှ တာဝန်ရှိသူက ပြောပါတယ်။

“အခုက မီးဘေးသင့်ပြည်သူတွေက နေထိုင်စားသောက်မှုအဆင်မပြေလို့ ကျနော်တို့က ဆန်၊ ဆီ ၊ ဆားတွေသွားရောက်လှူဒါန်းခဲ့တာပါ။ သယ်ယူပို့ဆောင်ရေးတွေခက်ခဲတဲ့ကြားရအောင်လှူဒါန်းခဲ့တာပါ။ များသောအားဖြင့်ကျေးလက်ဒေသတွေမှာ အခုကအခက်အခဲဖြစ်နေကြတယ်။ စားဖို့တောင်အနိုင်နိုင်ရုန်းကန်နေရတဲ့ အဆင့်ပေါ့နော် တချို့လည်းဆန်စပါးမီးလောင်သွားတာဖြစ်တဲ့အတွက် ဘယ်လိုမှပြန်ပြီးရပ်တည်လို့မလွယ်ဘူးပေါ့ အဲ့လိုအနေအထားမျိုးတွေကြောင့် ကျနော်တို့အခုလိုကူညီဖြစ်တာပါ။” လို့ ဆိုပါတယ်။

ထပ်မံလှူဒါန်းဖို့ကျန်ရှိနေတဲ့ မီးဘေးရှောင်၊ စစ်ဘေးရှောင်တွေကိုလည်း အိမ်ထောင်စု ၅၀၀၀ ပြည့်တဲ့အထိ ဆက်လက်လှူဒါန်းသွားမှာဖြစ်ကြောင်းနဲ့ မေလအတွင်းမှာပဲ မီးဘေးရှောင်၊ စစ်ဘေးရှောင်တွေအတွက် မီးရရှိရေးကို ဆက်လက်လုပ်ဆောင်သွားမယ်လို့လည်း အထက်ပါတာဝန်ခံက ဆိုပါတယ်။

“ကျနော်တို့ ပြီးခဲ့တဲ့လကတည်းက အိမ်ထောင်စု ၅၀၀၀ ဝေမယ်လို့ကျနော်တို့သတ်မှတ်ထားတာ အခုကျနော်တို့လှူရင်းလှူရင်းနဲ့ အိမ်ထောင်စု ၁၅၀၀ကျော်ခဲ့ပြီ၊ လှူဒါန်းမှုတွေကအများကြီးကျန်ရှိနေပါသေးတယ်။ ဘတ်ဂျက်အပေါ်ကြည့်ပြီးတော့ ထပ်ပြီးလှူဒါန်းအုံးမှာပါ။ ဒီလထဲမှာ အိမ်ခြေ ၁၀၀ အတွက်မီးလင်းရေးကို လုပ်ဆောင်သွားဖို့ရှိပါတယ်” လို့ဆိုပါတယ်။

မေလ ၉ ရက်နေ့ကလည်း S & C ကူညီစောင့်ရှောက်ရေးအဖွဲ့ဟာ ရွှေဘိုခရိုင်အတွင်းမှာရှိတဲ့ စစ်ရှောင်စာသင်ကျောင်း ၁၃ ကျောင်းမြောက်ကို အောင်မြင်စွာဆောက်လုပ်ပေးခဲ့ပါတယ်။ ထပ်မံပြီးတော့လည်း စစ်ရှောင်စာသင်ကျောင်း ပိုမိုဖွင့်လှစ်နိုင်ဖို့အတွက် ထပ်မံကြိုးစားသွားမယ်လို့လည်း သိရပါတယ်။

စာတည်း -007

စစ်ကိုင်း၊ မေ ၁၊ ၂၀၂၃။

စစ်ကိုင်းတိုင်းအတွင်း မီးရှို့ခံကျေးရွာ ၃၈ ရွာက မီးဘေးနဲ့ စစ်ဘေးရှောင်တွေအတွက် အိမ်အလုံး ၇၀၀ ကို ဆောက်လုပ်ပေးနိုင်ပြီလို့ S & C မီးဘေးစစ်ဘေးပညာရေး ကူညီစောင့်ရှောက်ရေးအဖွဲ့ထံက သိရပါတယ်။

ပြီးခဲ့တဲ့ ၂၀၂၂ ခုနှစ် သြဂုတ်လ ၂၂ ရက်နေ့ကစပြီး မီးဘေးစစ်ဘေးရှောင်တွေအတွက်နေအိမ်တွေ ဆောက်လုပ်လှူဒါန်းပေးခဲ့ပြီး ယခင်က အိမ်အလုံးရေ ၁၀၀ အထိသာ ဆောက်လုပ်ပေးဖို့ ရည်မှန်းထားပေမယ့်လည်း ပြည်တွင်းပြည်ပ မှာရှိတဲ့ ပြည်သူတွေရဲ့ကူညီမှုကြောင့် အခုလို အိမ်အလုံးရေ ၇၀၀ အထိ ရောက်ရှိခဲ့တယ်လို့လည်း S & C တာဝန်ခံတဦးက ပြောပါတယ်။

“ကျနော်တို့ အခုဆောက်လုပ်ပေးထားတဲ့ နေရာတွေက သူတို့အိမ်နေရာတွေမှာပဲ ပြန်ဆောက်ထားပေးတယ်။ ဆောက်ပေးထားတဲ့ အိမ်တွေက ယာယီအိမ်မဟုတ်ဘူး၊ ပုံမှန်ကျနော်တို့ မီးရှို့မခံရဘူးဆိုရင် အနည်းဆုံး ၂ နှစ်ကနေ ၅ နှစ်အတွင်းနေလို့ရတဲ့အိမ်တွေ ခိုင်ခိုင်ခန့်ခန့်နဲ့သေချာလေး ကျကျနန ဆောက်လုပ်ထားပေးတဲ့အိမ်မျိုး ကျနော်တို့ဆောက်လုပ်ပေးတဲ့ အိမ်တွေဆိုရင် မိသားစု လေးငါးခြောက်ယောက်လောက် နေလို့ရတဲ့အိမ်မျိုး” လို့ ဆိုပါတယ်။

ဆက်လက်ပြီး စစ်ကိုင်းမြို့နယ်ထဲက ကျန်ရှိနေသေးတဲ့ မီးဘေး၊ စစ်ဘေးရှောင်တွေအတွက် နေအိမ် ၃၀၀ ကို ဆောက်လုပ်ပေးသွားဖို့ရှိပေမဲ့လည်း စစ်ကောင်စီစစ်ကြောင်းတွေ ထိုးစစ်ဆင်လာတဲ့အတွက် ရပ်နားထားရတယ်လို့ သူကဆက် ပြောပါတယ်။

“အိမ်အလုံး ၃၀၀ ပြည့်ဖို့ကတော့ အနည်းဆုံးအချိန် ၂ လလောက် ယူရမယ်ထင်တယ်။စစ်ကြောင်းတွေ ဘတ်ဂျက်တွေအပေါ်မူတည်ပြီးတော့ အိမ် ၁၀၀၀ target ပြည့်ဖို့အတွက်ကတော့ ကျနော်တို့ကြည့်ရမှာပေါ့။ တကယ်လို့ ကျနော်တို့သတ်မှတ်ထားတဲ့ target ပြည့်သွားရင်လည်း နောက်ထပ် ဆက်လုပ်ဖို့တွေရှိတယ်။ အခုလည်း ရေတွင်းတွေတူးဖော်နေတယ်”လို့ ဆိုပါတယ်။

ထပ်မံပြီးတော့လည်း မေလအတွင်းမှာ လျှပ်စစ်မီးမရတဲ့ မီးဘေးသင့်ပြည်သူတွေအတွက် Solar Power Station တွေနဲ့ မီးပေးနိုင်ဖို့အတွက် အိမ်အလုံး ၁၀၀ မီးလင်းရေး ဖော်ဆောင်ဖို့ကို လုပ်ဆောင်နေတယ်လို့လည်း ဆိုပါတယ်။

S & C မီးဘေးစစ်ဘေးပညာရေးကူညီစောင့်ရှောက်ရေးအဖွဲ့ဟာ ပြီးခဲ့တဲ့ ဧပြီ ၂၈ ရက်နေ့ကလည်း ရွှေဘိုခရိုင်အတွင်း မီးရှို့ခံရတဲ့ ကျေးရွာ ၅ ရွာက ပြည်သူတွေအတွက် အိမ်နဲ့တကွ လက်ယက္ကန်းစင် အလုံး ၂၀ ကိုလည်း ဆောက်လုပ်ပေးခဲ့ ပါသေးတယ်။

ဆောက်လုပ်ပေးနေတဲ့ နေအိမ်တွေရဲ့ တန်ဖိုးဟာ ၂ သိန်းကနေ ၂ သိန်းခွဲအထိရှိပြီး အသုံးပြုမယ့်ပစ္စည်းတွေ သယ်ယူရတဲ့နေရာအနီးအဝေးပေါ်မူတည်ပြီး ဈေးအနည်းငယ်ကွာဟနိုင်ပြီး အိမ်တွေကိုတော့ ထန်းလျက်၊ ဝါး၊ သစ်သားတွေနဲ့ အဓိကထား ဆောက်လုပ်တယ်လို့ အဲဒီအဖွဲ့ဆီကသိရပါတယ်။

စာတည်း-007