PPDF

ပဲခူး၊ ဇွန် ၁၅၊ ၂၀၂၃။

ပဲခူးတိုင်း(အနောက်ခြမ်း)၊ ပေါင်းတည်မြို့နယ်၊ ပဲခူးရိုးမခြေရင်းမှာ စစ်ကြောင်းထိုးနေတဲ့စစ်ကောင်စီတပ်ကို ဇူလိုင်လ ၁၃ ရက် မနက်က ခြုံခိုတိုက်ခိုက်လို့ စစ်သားတဦး သေဆုံးသွားတယ်လို့ ပေါင်းတည်မြို့နယ်၊ ပြည်သူ့ကာကွယ်ရေးတပ်ဖွဲ့ PPDF ရဲ့ ပြန်ကြားရေးတာဝန်ခံဆီက သိရပါတယ်။

ပေါင်းတည်မြို့နယ်၊ ရွှေလေးကြိုးဝိုင်း၊ သစ်ဖြူချောင်းအနီးကို အင်အား ၃၅ ဦးလောက်နဲ့ စစ်ကြောင်းထိုးလာတာကို မနက် ၁၁ နာရီလောက်မှာ လက်နက်ငယ်နဲ့ တိုက်ခိုက်ခဲ့တာလို့ဆိုပါတယ်။

“ရင်ဘတ်ကို တချက်ထဲပဲထိတာ၊ စစ်သားက ခြင်းကြားကြီးနဲ့ အားလျားမှောက်ကြီးကို ပစ်ကျတာ၊ ကျန်တဲ့စစ်သားတွေလည်း ပုန်းတဲ့ကောင်ကပုန်း ရှောင်တဲ့ကောင်ရှောင်နဲ့ အလောင်းကို တရွတ်ဆွဲဘေးချပြီး ထုံးစံအတိုင်း ရမ်းပစ်တော့တာပဲ” လို့ PPDF ရဲ့သတင်းပြန်ကြားရေးတာဝန်ခံက ပြောပါတယ်။

အခု တိုက်ခိုက်မှုကို ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ ၃၆၀၁ PPDFနဲ့ တပ်ရင်း ၃၆၀၂ PDF တပ်ရင်းတို့က လုပ်ဆောင်ခဲ့တာဖြစ်ပြီး စစ်ကောင်စီတပ်သားသေဆုံးမှုနဲ့ပတ်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

ဇွန်လ ၁၅ ရက် ဒီနေ့နေ့လယ်လောက်မှာတော့ အဲဒီစစ်ကြောင်းဟာ ရွှေလေးကြိုးဝိုင်း၊ အကွက်အမှတ် ၄၀ ကနေ ဝဲကြီးဆည်ဘက်ကိုဦးတည် တပ်ဆုတ်နေတယ်လို့ ဆိုပါတယ်။

ပေါင်းတည်မြို့နယ်မှာ ပြီးခဲ့တဲ့ဇွန်လ ၁၁ ရက် ညနေ ၆ နာရီလောက်ကလည်း ရွှေလေးကြိုးဝိုင်း၊ တလားဂူလျှိုအနီးမှာ ခြုံခိုတိုက်ခိုက်ခဲ့လို့ စစ်သား ၁ ဦးသေကာ ၁ ဦးထိခိုက် ဒဏ်ရာရခဲ့ပါသေးတယ်။

ပေါင်းတည်မြို့နယ်ကို စစ်ကောင်စီက အခုနှစ် ဖေဖေါ်ဝါရီလ ၂ ရက်က စစ်အုပ်ချုပ်ရေးအမိန့် ထုတ်ပြန်ထားတာလည်း ဖြစ်ပါတယ်။

စာတည်း – 007

ပဲခူး၊ ဇွန် ၁၃၊ ၂၀၂၃။

ပဲခူးတိုင်းအနောက်ခြမ်း၊ ပေါင်းတည်မြို့နယ်၊ ပဲခူးရိုးမအစပ်မှာ စစ်ကြောင်းထိုးနေတဲ့ စစ်သားတွေကို ဇွန်လ ၁၁ ရက်က လက်နက်ငယ်နဲ့ ခြုံခိုတိုက်ခိုက်ခဲ့လို့ စစ်သား ၁ ဦးသေကာ ၁ ဦးထိခိုက်ဒဏ်ရာရသွားတယ်လို့ ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့ – PPDF ရဲ့ တာဝန်ရှိသူတဦးဆီက သိရပါတယ်။

ပေါင်းတည်မြို့နယ်၊ ပဲခူးရိုးမ​အစပ်၊ ရွှေလေးကြိုးဝိုင်း၊ တလားဂူလျှိုနားကို အင်အား ၄၀ ကျော်နဲ့ စစ်ကြောင်းထိုးလာတာကို ညနေ ၆ နာရီလောက်မှာ တိုက်ခိုက်ခဲ့တာလို့ ဆိုပါတယ်။

“ရွာသားတွေ ယာလုပ်သွားတဲ့ လမ်းကြောင်းအတိုင်း စစ်ကြောင်းလာတာကို အသင့်စောင့်နေပြီးမှပစ်တာ။ တယောက်ကတော့ နေရာမှာပဲသေတာ၊ တယောက်က ဒဏ်ရာရသွားတာ။” လို့ PPDF ပြန်ကြားရေးတာဝန်ရှိသူက ပြောပါတယ်။

စစ်တပ်ဘက်က လက်နက်ငယ်နဲ့ ရမ်းသမ်းပစ်ခတ်နေတဲ့အတွက် တိုက်ခိုက်ရေးရဲဘော်တွေ တပ်ပြန်ဆုတ်လာတာမို့ စစ်ကြောင်း ဘယ်ကိုဆက်သွားတယ်ဆိုတာကိုမသိရဘူးလို့ သူကဆက်ပြောပါတယ်။

အဲဒီတိုက်ခိုက်မှုကို ပေါင်းတည်မြို့နယ် ပြည်သူ့ကာကွယ်ရေးတပ်ရင်း ၃၆၀၁ နဲ့ ၃၆၀၂ တို့ ပူးပေါင်းလုပ်ဆောင်ခဲ့တာလို့ သိရပါတယ်။

ပေါင်းတည်မှာ ဇွန်လ ၁၁ ရက် ညနေကလည်း ပဲခူးရိုးမအစပ်၊ သစ်ပုတ်အုပ်စု၊ လက်ပံခုံရွာက စစ်တပ်သတင်းပေးလို့ အမည်ထွက်နေသူ အသက် ၅၀ ကျော်အရွယ် ကိုတင်အောင်လေးကိုလည်း ပေါင်းတည် PPDFတပ်ဖွဲ့က ပစ်ခတ်ရှင်းလင်းခဲ့ပါသေးတယ်။

ဒါ့အပြင် ဇွန်လ ၃ ရက် မနက်အစောပိုင်းမှာ သစ်ပုတ်အုပ်စု မြေနီတောင်ကြောပေါ်တက်လာတဲ့ စစ်ကြောင်းကို တိုက်ခိုက်ခဲ့လို့စစ်သား ၁ ဦးသေကာ ၁ ဦးဒဏ်ရာရခဲ့ပြီး ဇွန်လ ၅ ရက် မနက် ၁၁ နာရီလောက်မှာလည်း ရွှေလေးတောင်ပေါ်ကို စစ်ကြောင်းထိုးလာတဲ့စစ်​သားတွေကို တိုက်ခိုက်ခဲ့လို့ စစ်သား ၁ ဦး သေဆုံးခဲ့ပါသေးတယ်။

ပေါင်းတည်မြို့နယ်၊ ပဲခူးရိုးမအစပ်မှာ စစ်ကောင်စီတပ်က နေ့စဉ်ဆိုသလို စစ်ကြောင်းထိုးနေတာတွေရှိကာ မကြာခဏဆိုသလို ပစ်ခတ်ခံရပြီး သေဆုံးဒဏ်ရာရသူတွေရှိနေပါတယ်။

မေလ ၂၈ ရက် နေ့လယ်မှာ ပေါင်းတည်မြို့နယ်၊ သစ်ပုတ်အုပ်စု၊ နွားသိုးတဲတိုက်အနီးကိုလာတဲ့ စစ်ကြောင်းကို ပေါင်းတည်မြို့နယ်ပြည်သူ့ကာကွယ်ရေးတပ်က တိုက်ခိုက်ခဲ့လို့ ၂ ပွင့်ဗိုလ်တဦး သေဆုံးခဲ့ပါတယ်။

ပေါင်းတည်မြို့နယ်၊ သစ်ပုတ်အုပ်စုထဲမှာ စစ်တပ်က မိုင်တဲတာဝါတိုင်ကိုစောင့်ကာ အင်အား ၁‌၅ ဦးလောက်နဲ့ လွန်ခဲ့တဲ့ ၁နှစ်ခွဲလောက်ကတည်းက စခန်းချထားပြီး စစ်ကောင်စီစစ်ကြောင်းတွေ ခေတ္တစခန်းချရာနေရာလည်း ဖြစ်ပါတယ်။

စာတည်း – ဇို

ပဲခူး၊ ဇွန် ၄၊ ၂၀၂၃။

ပဲခူးတိုင်းအနောက်ခြမ်း၊ ပေါင်းတည်မြို့နယ်၊ ပဲခူးရိုးမအစပ်မှာ စစ်ကြောင်းထိုးနေတဲ့ စစ်ကောင်စီတပ်ကို ဇွန်လ ၃ ရက် မနေ့ မနက် ၇ နာရီလောက်မှာ ပြည်သူ့ကာကွယ်ရေးတပ်ဖွဲ့က ခြုံခိုတိုက်ခိုက်ခဲ့တာကြောင့် စစ်ကောင်စီတပ်ဖွဲ့ဝင်တဦးသေကာ တဦး ပြင်းထန်ဒဏ်ရာရရှိသွားတယ်လို့ ပေါင်းတည်ပြည်သူ့ကာကွယ်ရေးတပ်ဖွဲ့ – PPDF ရဲ့ ပြောခွင့်ရသူတဦးက ပြောပါတယ်။

ပေါင်းတည်မြို့နယ်၊ သစ်ပုတ်အုပ်စု၊ လက်ပံခုံရွာအနီး မြေနီတောင်ကြောပေါ်မှာ အင်အား ၄၀ လောက်နဲ့ စစ်ကြောင်းထိုးလာတဲ့ စစ်ကောင်စီတပ်ကို တိုက်ခိုက်ခဲ့တာဖြစ်ပါတယ်။

“စစ်ကြောင်းက လက်ပံခုံရွာကနေ ထွက်လာတာကိုစောင့်ပြီး လက်နက်ငယ်နဲ့ တိုက်ခိုက်ခဲ့တာပါ။ သေတဲ့တကောင်ကို လက်ပံခုံရွာနားက ယာတဲမှာတင်ပြီး မီးရိူ့သွားတယ်။ အနားက ယာတဲ ၈ လုံးကိုလည်း မီးရိူ့သွားသေးတယ်” လို့ PPDFမှ တာဝန်ရှိသူတဦးက ဆိုပါတယ်။

ခြုံခိုတိုက်ခိုက်ခံရတာကြောင့် စစ်ကောင်စီစစ်ကြောင်းဟာ ရှေ့ဆက်မတိုးတော့ဘဲ ဒဏ်ရာရစစ်သားကို ပုခက်နဲ့ထမ်းကာ ပြန်လှည့်သွားတယ်လို့ သူကဆက်ပြောပါတယ်။

အဲ့ဒီတိုက်ခိုက်မှုကို ပေါင်းတည်မြို့နယ်၊ ပြည်သူ့ကာကွယ်ရေးတပ်ဖွဲ့၃၆၀၁ – PPDF တပ်ရင်းက တိုက်ခိုက်ခဲ့တာ ဖြစ်ပါတယ်။

အဲ့ဒီစကစကြောင်းဟာ ပြီးခဲ့တဲ့ ပဲခူးရိုးမအစပ်မှာ လူပ်ရှားနေတဲ့အင်အား ၄၁ ဦးပါ စစ်ကြောင်းဖြစ်ပြီး မေလ ၂၈ ရက်ကလည်း သစ်ပုတ်ကျေးရွာအုပ်စု၊ နွားသိုးတဲတိုက်အနီးမှာ ပေါင်းတည် ပြည်သူ့ကာကွယ်ရေးတပ်ဖွဲ့က ခြုံခိုတိုက်ခိုက်ခဲ့လို့ ၂ ပွင့်စစ်ဗိုလ်တဦးသေဆုံးခဲ့ပါသေးတယ်။

စာတည်း – လင်းဇေ