ONEFridayFights98

မြေလတ်အသံ၊ ဖေဖော်ဝါရီ ၂၈၊ ၂၀၂၅။

ဖေဖော်ဝါရီ ၂၈ ရက် ဒီနေ့ညမှာ ယှဉ်ပြိုင်နေတဲ့ ONE Friday Fights 98 မှာ မြန်မာကိုယ်စားပြုထိုးသတ်နေတဲ့ ဆွန်ရက်ဟာ အယ်ဂျီးနီးယား/ပြင်သစ်နွယ်ဖွား ဖိုက်တာ ဂျိုအာချင်အိုရာဂီကို အမှတ်အဆုံးအဖြတ်နဲ့ အနိုင်ရရှိခဲ့ပါတယ်။ 

ပွဲရဲ့ပထမအချီမှာ အိုရာဂီဟာ အောက်ခြေကန်ချက်ကို စတင်အသုံးပြုပြီး ဆက်တိုက်ကန်နေခဲ့သလို ဆွန်ရက်ကတော့ ဘယ်လက်သီးနဲ့တုံ့ပြန်တာမျိုး၊ အောက်ခြေပြန်ကန်တာမျိုးနဲ့ တုံ့ပြန်ခဲ့ပါတယ်။ ပထမအချီ တဝက်လောက်မှာတော့ အိုရာဂီရဲ့ မထင်မှတ်တဲ့ အမြင့်ကန်ချက်ကြောင့် ဆွန်ရက် ယိုင်ထွက်သွားခဲ့ပါတယ်။ အသာရပြီအထင်နဲ့ စွတ်တိုးခဲ့တဲ့ အိုရာဂီတယောက် ဆွန်ရက်ရဲ့ညာဝိုက်လက်သီးထိပြီး အမှတ်စဉ်အရေခံလိုက်ရသလို ဆွန်ရက်ကလည်း လက်သီးတွဲလုံးတွေဆက်တိုက်သုံးရင် ပထမအချီအဆုံးသတ်ခဲ့ပါတယ်။ 

ဒုတိယအချီမှာတော့ ဆွန်ရက်ဟာ အမြင့်ကန်ချက်နဲ့အနိမ့်ကန်ချက်တွေကို အလျဉ်းသင့်သလိုသုံးနေပြီး အိုရာဂီကတော့ အကွာအဝေးချိန်ထိုးကာ ညာဖြောင့်လက်သီးချက်တွေနဲ့ အလစ်ဝင်ဖို့ကြိုးစားခဲ့ပါတယ်။ အလစ်ချောင်းနေတဲ့ အိုရာဂီရဲ့တွဲလုံးဆက်တိုက်ထိပြီး ဆွန်ရက်မူးဝေသွားတာတွေ့ရပြီး လူချင်းပူးကပ်ကာ ထိန်းထားနိုင်ခဲ့ပါတယ်။ ဆွန်ရက် အားပျော့သွားသလိုတွေ့ရပြီး အိုရာဂီရဲ့အရပ်နဲ့လက်တံကွာဟတာကို အသုံးချတတ်မှုဟာ အတော်လေးအလုပ်ဖြစ်ခဲ့တာကို တွေ့ရပါတယ်။ 

တတိယအချီမှာတော့ အိုရာဂီဟာအနားကပ်မခံတော့ဘဲ အောက်ခြေကန်တာ ညာဖြောင့်လက်သီးထိုးတာတွေကိုသာ ဆက်တိုက်သုံးခဲ့ပြီး ဆွန်ရက်ကတော့ ဘယ်ညာတွဲလုံးအချို့နဲ့သာ တုံ့ပြန်နိုင်ခဲ့ပါတယ်။ တတိယအချီ တဝက်လောက်မှာ ဆွန်ရက်ရဲ့ကန်ချက် အိုရာဂီရဲ့ခါးအောက်ပိုင်းကိုထိခဲ့ပြီး ခဏနားခဲ့ရပါတယ်။ တတိယအချီမှာလည်း အိုရာဂီဟာ သူအားသာတဲ့ ညာဖြောင့်လက်သီးကို သေချာအသုံးပြုလာပြီး အနားကပ်မခံတော့တာကြောင့် ဆွန်ရက်တယောက် အခက်တွေ့ခဲ့ပြီး သူ့ရဲ့တွဲလုံးတွေလည်း အလုပ်မဖြစ်သလိုဖြစ်ခဲ့ပြီး ပွဲပြီးဆုံးခဲ့ပါတယ်။ 

တတိယအချီအထိ အနိုင်အရှုံးအဖြေမပေါ်တာကြောင့် ဒိုင်တွေရဲ့ဆုံးဖြတ်ချက်ကိုစောင့်စားခဲ့ရပြီး ပွဲအပြီးမှာ ဒိုင် ၃ ဦးစလုံးရဲ့ဆုံးဖြတ်ချက်နဲ့ ဆွန်ရက်ဟာအနိုင်ရခဲ့ပြီး ONE Friday Fights ပွဲစဉ်တွေမှာ နိုင်ပွဲ ၁ ပွဲထပ်တိုးနိုင်ခဲ့ပါတယ်။ 

Photo – SS from One Championship Live 

မြေလတ်အသံ၊ ဖေဖော်ဝါရီ ၂၈၊ ၂၀၂၅။

ဖေဖော်ဝါရီ ၂၈ ဒီနေ့ညမှာ ယှဉ်ပြိုင်သွားကြမယ့် ONE Friday Fights 98 မှာ မြန်မာကိုယ်စားပြုထိုးသတ်နေတဲ့ ဆွန်ရက်ဟာ အယ်ဂျီးနီးယား/ပြင်သစ်နွယ်ဖွားဖိုက်တာ ဂျိုအာချင်အိုရာဂီနဲ့ ထိုးသတ်သွားရမှာ ဖြစ်ပါတယ်။ 

ဆွန်ရက်ဟာ ၂၀၂၄ ခုနှစ်အတွင်း ONE Friday Fights ပြိုင်ပွဲတွေမှာ ရှုံးပွဲမရှိထိုးသတ်နိုင်ခဲ့ပြီး ၄ ပွဲဆက် အနိုင်ရတဲ့ရလဒ်ကောင်းကို ပိုင်ဆိုင်ထားပါတယ်။ ဆွန်ရက်နဲ့ယှဉ်ပြိုင်ထိုးသတ်ရမယ့် အိုရာဂီဟာ ONE Friday Fights ပွဲတွေမှာတော့ ရလဒ်မကောင်းဘဲ နောက်ဆုံး ၃ ပွဲဆက်ရှုံးနိမ့်ထားတဲ့ ဖိုက်တာတယောက်ဖြစ်ပါတယ်။ 

ဆွန်ရက်ထက် အရပ်နဲ့လက်တံအသာရနေပြီး အရပ်အမောင်း ကောင်းပေမယ့် အောက်ခြေကန်ချက်ကို ပိုမိုအသုံးပြုကစားတတ်တာတွေ့ရပါတယ်။ ဘယ်ထောက်လက်သီးနဲ့ချိန်ဆကာ ခန္ဓာကိုယ်ကို ညာဖြောင့်လက်သီးထိုးသတ်တတ်ပြီး သူအနိုင်ရထားတဲ့ပွဲမှာလည်း အဲ့ဒီအချက်နဲ့အနိုင်ရထားတာကို တွေ့ရပါတယ်။ အားနည်းချက်အနေနဲ့ လူချင်းပူးကပ်ချိန် တံတောင်အသုံးပြုတာမျိုးတွေ့ရနည်းပြီး ထိုးသတ်နေချိန်မှာလည်း မျက်နှာကို ကာဗာလုပ်နိုင်တာနည်းပါတယ်။ 

ဆွန်ရက်ကတော့ ၂၀၂၄ ခုနှစ်အတွင်း ဒဏ်ရာလည်းကင်းသလို ရလဒ်လည်းကောင်းခဲ့တာကြောင့် ၄ ပွဲဆက်အနိုင်ကစားနိုင်ခဲ့ပြီး ထိုင်းဖိုက်တာတွေနဲ့တွေ့တိုင်းရှုံးနိမ့်ရတဲ့အစဉ်အလာကိုလည်း နောက်ဆုံးပွဲမှာ ခြေဖျက်နိုင်ခဲ့ပါတယ်။

ဘယ်ခြေ ဘယ်လက်အားပြုကစားတတ်တဲ့ဆွန်ရက်ဟာ နောက်ပိုင်းပွဲတွေမှာ စိတ်ရှည်ရှည်နဲ့ကစားတတ်လာပြီး ပြိုင်ဘက်ရဲ့အနေအထားကို အကဲခတ်ကစားလာတာမျိုးတွေ့ရပါတယ်။ အောက်ခြေကန်ချက်နဲ့ အနီးကပ်တံတောင်ရိုက်ချက်ကိုအသုံးပြုတတ်ပြီး ပြိုင်ဘက်ကိုအမှတ်စဉ်ရေတွက်စေနိုင်တဲ့ ပါဝါမျိုးပိုင်ဆိုင်ထားပါတယ်။ အားနည်းချက်ကတော့ လက်သီးတွဲလုံးတွေနဲ့ ခြေကန်ချက်တွေ လေးလံတာတွေ့ရပါတယ်။ 

အိုရာဂီဟာ ပြီးခဲ့တဲ့နှစ် ဩဂုတ်လကတည်းက ပွဲဝေးနေတာဖြစ်ပြီး ဆွန်ရက်ကတော့ ဆက်တိုက်ထိုးသတ်နေရတာကြောင့် ပြိုင်ပွဲကိုချည်းကပ်ပုံ ပိုမိုကောင်းမွန်လိမ့်မယ်လို့ မျှော်လင့်ရပါတယ်။

အိုရာဂီဟာ ဒီပွဲနိုင်မှ နောက်ထပ်ပွဲစဉ်တွေထိုးသတ်ခွင့်မျှော်လင့်နိုင်မှာဖြစ်ပြီး ဆွန်ရက်ကတော့ ဒီပွဲနိုင်ရင်  ဒေါ်လာ ၁ သိန်းတန်စာချုပ်ကိုမျှော်လင့်နိုင်မှာပဲဖြစ်ပါတယ်။ ဒီပွဲအနိုင်အရှုံးဟာ ဖိုက်တာ ၂ ယောက်စလုံးအတွက် ဦးတည်ချက်မတူပေမယ့် အရေးပါတဲ့ပွဲဖြစ်တာကြောင့် ပွဲကောင်း ၁ ပွဲဖြစ်မယ်လို့ ထင်ပါတယ်။ 

Photo – One Lumpinee FC