ရန်ကုန်၊ မတ် ၁၃၊ ၂၀၂၃။

ရန်ကုန်တိုင်း၊ ဥက္ကံမြို့ လျှပ်စစ်ဓါတ်အားပေးစက်ရုံမှာ တပ်စွဲထားတဲ့ စစ်သားတွေဆီက သေနတ် ၂ လက် ယူဆောင်ခဲ့သူ ၂ ဦးကို ငွေသားချီးမြှင့်ခဲ့တဲ့အပြင် NUG အစိုးရက ဂုဏ်ပြုလက်မှတ်ပေးအပ်ဖို့အတွက်ပါ တင်ပြထားတယ်လို့ သာယာဝတီပကဖအဖွဲ့ဝင် တဦးက ပြောပါတယ်။

ရန်ကုန်တိုင်း၊ ဥက္ကံမြို့၊ ကျွန်းတောကုန်းအုပ်စု၊ သကြားစက်အနီး လျှပ်စစ်ဓာတ်အားပေးရုံးမှာ တပ်စွဲထားတဲ့ ဥက္ကံမြို့အခြေစိုက် အမှတ် ၂၀၁၇ လေကြောင်းရန် ကာကွယ်ရေးတပ် (လကတ ၂၀၁၇) တပ်ရင်းက ကပစ ထုတ် MA – 3 ချေမှုန်းရေး ရိုင်ဖယ် ၂ လက်နဲ့ 5.56 ကျည် ၄၀၀ လောက်ကို ပြီးခဲ့တဲ့ စက်တင်ဘာလ ၁၄ ရက်ညက ပြည်သူ ၂ ဦးက စစ်သားတွေ အိပ်ပျော်နေချိန်မှာ အရယူခဲ့တာလို့ ဆိုပါတယ်။

“ဟုတ်ပါတယ် အဲ့ဒီသေနတ် ၂ လက်ကို ဥက္ကံပြည်သူတွေက သာယာဝတီမြို့နယ် ပြည်သူ့ကာကွယ်ရေးအဖွဲ့ကို ပြီးခဲ့တဲ့ နှစ်ကုန်ပိုင်းက အပ်နှံပေးခဲ့တာပါ။ အခန့်မသင့်ရင် တပါတည်း မိမိအသက်ပါ ပေးဆပ်ရနိုင်တာကို သိသိနဲ့ အခုလိုအရဲစွန့်ပြီး သူနိုင်စွမ်းတဲ့ တော်လှန်ရေးတာဝန်ကို ထမ်းဆောင်ခဲ့တာပါပဲ” လို့ သာယာဝတီပကဖအဖွဲ့ဝင် ကိုလူအေး က ပြောပါတယ်။

လက်နက်တွေ အပ်နှံစဥ်က သူတို့ ၂ ဦးကို တဦးလျှင် ငွေကျပ် သိန်း ၆၀ စီ ပေးအပ်ခဲ့သလို လက်နက်တွေ စခန်းကို ရောက်ရှိအောင် စီစဥ်ပေးသူကိုလည်း ငွေကျပ် ၅ သိန်း ချီးမြှင့်ခဲ့တယ်လို့လည်း သူကဆက်ပြောပါတယ်။

အဲဒီသေနတ် ၂ လက်မှာ ကုဒ်နံပါတ် ∆G 631831 နဲ့ ∆AA 602998 ရေးသားထားပြီး လက်ရှိမှာ သာယာဝတီပကဖအဖွဲ့က တိုက်ပွဲတွေမှာ အသုံးပြုလျက်ရှိတယ်လို့ သိရပါတယ်။

စာတည်း – 007

ပုလဲ၊ မတ် ၇၊ ၂၀၂၃။

စစ်ကိုင်းတိုင်း၊ ပုလဲမြို့နယ်ထဲမှာ စစ်ကောင်စီတပ်တွေရဲ့ ဖမ်းဆီးသတ်ဖြတ်တာကို ခံခဲ့ရသူတွေနဲ့ တိုက်ပွဲတွင်း ကျဆုံးရဲဘော်တွေအတွက် အမျိုးသားညီညွတ်ရေးအစိုးရ – NUG၊ လူသားချင်း စာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက ထောက်ပံ့တဲ့ငွေကို ပုလဲမြို့နယ် လူသားစာနာအဖွဲ့ကတဆင့် သွားရောက်ထောက်ပံ့လှူဒါန်းပေးခဲ့တယ်လို့ သိရပါတယ်။

မတ်လ ၇ ရက် ဒီမနက်ပိုင်းမှာ သွားရောက်လှူဒါန်းခဲ့တာလို့ ပုလဲမြို့နယ် ပြည်သူ့အုပ်ချုပ်ရေးအဖွဲ့ဝင်လည်းဖြစ် လူသားစာနာအဖွဲ့ရဲ့တာဝန်ခံလည်းဖြစ်သူ ကိုဇော်ထွန်းက ပြောပါတယ်။

“NUG က ထောက်ပံ့ဖို့ပေးတာကြောင့် သွားထောက်ပံ့ပေးတာ။ ကျဆုံး ၁ ဦးကို ၁ သိန်းနှုန်းထောက်ပံ့ပေးပြီး ဒဏ်ရာရသူ ၁ ဦး ကို ၅ သောင်းနှုန်းထောက်ပံ့ပေးခဲ့တယ်” လို့ ပြောပါတယ်။

ပုလဲမြို့နယ်အခြေစိုက် တပ်ရင်း ၈ နဲ့ တပ်ရင်း ၇ က ဒဏ်ရာရရဲဘော်တွေအပါအဝင် ဖမ်းဆီးအသတ်ခံရတဲ့ အရပ်သားပြည်သူ ၅ ဦး၊ ဒဏ်ရာရရဲဘော် ၅ ဦးနဲ့ ကျဆုံးရဲဘော် ၅ ဦးတို့အတွက် သက်ဆိုင်ရာ မိသားစုဝင်တွေဆီကို သွားရောက်ထောက်ပံ့ပေးခဲ့တာလို့လည်း ဆိုပါတယ်။

လက်ရှိ ပုလဲမြို့နယ်ထဲမှာ ၂ နှစ်တာကာလအတွင်း စစ်ကောင်စီတပ်တွေရဲ့ တိုက်ခိုက်မှုအပြင် လက်နက်ထုတ်လုပ်ရင်း ကျဆုံးခဲ့ရတဲ့ ရဲဘော် ၈၀ ဦးဝန်းကျင် ရှိပြီး၊ စစ်ကောင်စီတပ်တွေရဲ့ ဖမ်းဆီးသတ်ဖြတ်ခြင်းကို ခံရသူ အရပ်သား ၇၈ ဦးခန့် ရှိပြီလို့ သိရပါတယ်။

စာတည်း – လင်း

ဂန့်ဂေါ၊ ဖေဖော်ဝါရီ ၂၈၊ ၂၀၂၃။

မကွေးတိုင်း၊ ဂန့်ဂေါမြို့နယ်ထဲမှာ စစ်ကောင်စီတပ်တွေရဲ့ ဖမ်းဆီးသတ်ဖြတ်တာကို ခံခဲ့ရသူတွေနဲ့ တိုက်ပွဲတွင်း ကျဆုံးရဲဘော်တွေအတွက် အမျိုးသားညီညွတ်ရေးအစိုးရ – NUG၊ လူသားချင်း စာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက ထောက်ပံ့တဲ့ငွေကို ဂန့်ဂေါမြို့နယ် ပြည်သူ့အုပ်ချုပ်‌ရေးအဖွဲ့ကတဆင့် သွားရောက်ထောက်ပံ့ပေးခဲ့တယ်လို့ သိရပါတယ်။

ဖမ်းဆီးအသတ်ခံရတဲ့ အရပ်သားပြည်သူ ၄၉ ဦးနဲ့ ကျဆုံးရဲဘော် ၇၉ ဦးတို့အတွက် ဖေဖော်ဝါရီလ ၂၈ ရက် ဒီကနေ့မနက်ပိုင်းမှာ သက်ဆိုင်ရာ မိသားစုဝင်တွေဆီကို သွားရောက်ထောက်ပံ့ပေးခဲ့တာလို့ ဂန့်ဂေါမြို့နယ် ပြည်သူ့အုပ်ချုပ်‌ရေးအဖွဲ့မှ တာဝန်ရှိသူက ပြောပါတယ်။

“ထောက်ပံ့လှူဒါန်းတဲ့ ငွေကျပ် ၁၂၈ သိန်းကို ပအဖအဖွဲ့ကနေ စစ်‌ကောင်စီက ဖမ်းဆီးသတ်ဖြတ်တဲ့ ပြည်သူနဲ့ တိုက်ပွဲမှာ ကျဆုံးတဲ့ ရဲဘော်တွေ ၁၂၈ ဦးကို ၁ ဦးကို ၁ သိန်းကျပ် ထောက်ပံ့ပေးခဲ့တာ” လို့ ပြောပါတယ်။

ပြီးခဲ့တဲ့ ဇန်နဝါရီလပိုင်းကလည်း ဂန့်ဂေါမြို့နယ်ထဲက စစ်ကောင်စီတပ်တွေရဲ့ ဖမ်းဆီးသတ်ဖြတ်တာကို ခံခဲ့ရသူ ၁၀ ဦးအတွက် NUG ရဲ့ လူသားချင်း စာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနကနေလှူဒါန်းတဲ့ငွေကို လှူဒါန်းတဲ့ငွေကို ဂန့်ဂေါ ပအဖ အဖွဲ့ဝင်တွေက တဆင့်ခံ သွားရောက်လှူဒါန်းပေးခဲ့ပါသေးတယ်။

လက်ရှိဂန့်‌ဂေါမြို့နယ်ထဲမှာ စစ်ကောင်စီတပ်တွေရဲ့ မီးရှို့ဖျက်ဆီးမှုတွေကြောင့် ဒေသခံ ၃ ထောင်ကျော် ရှိပြီး၊ ပျူစောထီးတွေ ရန်‌ကြောက်လို့ နေရပ်စွန့်ခွာလာသူက ၁၅၀၀ ဦးဝန်းကျင် ရှိတယ်လို့လည်း သိရပါတယ်။

မကွေး၊ ဒီဇင်ဘာ ၃၀၊ ၂၀၂၂။

မကွေးတိုင်း၊ ရေစကြိုမြို့နယ်ထဲက ကျွေးရွာတရွာမှာ ဖွင့်လှစ်ထားတဲ့ NUG လက်အောက်ခံ စာသင်ကျောင်းမှာ စနစ်သစ်ပုံနှိပ်စာအုပ်နဲ့ သင်ထောက်ကူပစ္စည်းတွေ လိုအပ်နေတာလို သိရပါတယ်။

KG တန်းမှစနစ်သစ် Grade-9 အထိ ကျောင်းသားကျောင်းသူ ၁၆၄ ဦးကို CDM ဆရာဆရာမ ၇ ဦး စေတနာ့ဝန်ထမ်း ၄ ဦးနဲ့ သင်ကြားပေးနေတာလို့ သိရပါတယ်။

“အခုက ဒီဇင်ဘာလ ၂၇ ကစပြီး ကျောင်းအပ်လက်ခံပါတယ်။ အလယ်တန်းအဆင့်ထိပါ ကျောင်းသားသူဦးရေ KG တန်းကနေ ၉ တန်းအထိ ကျောင်းသားသူ ၁၇၀ ရှိပါတယ်။ သင်ထောက်ကူပစ္စည်းလေးတွေနဲ့ စနစ်သစ်ဖတ်စာအုပ်တွေ ဆရာဆရာမတွေအတွက် သင်ရိုးသစ်လမ်းညွှန်တွေ လိုအပ်ပါတယ်” လို့ စေတနာ့ဝန်ထမ်း သင်ကြားပေးနေသူတဦးက ပြောပါတယ်။

အဲဒီကျောင်းမှာ KGတန်း ၂၄ ဦး၊ ပထမတန်း ၃၆ ဦး၊ ဒုတိယတန်း ၁၃ ဦး၊ တတိယတန်း ၁၆ ဦး၊ စတုတ္ထတန်း ၁၄ ဦး၊ ပဉ္စမတန်း ၁၅ ဦး၊ ဆဌမတန်း ၁၇ ဦး၊သတ္တမတန်း ၁၇ ဦးနဲ့အဌမတန်း ၁၂ ဦး စုစုပေါင်း ယောကျ်ားလေး ၇၄ ဦးနဲ့ မိန်းကလေး ၉၀ ဦး ပညာသင်ကြားနေတယ်လို့ သိရပါတယ်။