မြေလတ်အသံ၊ သြဂုတ် ၃၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ အိုင်ကြီးဒေါင့်ကျေးရွာကို စစ်ကောင်စီတပ်က သြဂုတ် ၂ ရက်ည ၇ နာရီကျော်မှာ ဒရုန်းနဲ့ဗုံးကြဲတိုက်ခိုက်ခဲ့ကြောင့် အမျိုးသမီး ၁ ဦးဒဏ်ရာပြင်းထန်ရခဲ့တယ်လို့ ဒေသခံတွေဆီက သိရပါတယ်။

အသက် ၅၀ အရွယ် ဒေါ်ညွန့်ဝင်းရဲ့ ဆီးခုံနဲ့ဗိုက်ကို ဗုံးစထိမှန်ပြီး အူပွင့်ထွက်တာလည်းရှိတာကြောင့် ဆေးရုံကိုပို့ဆောင်ကုသနေရတယ်လို့ ဆိုပါတယ်။

“သူတို့အိမ်က ရွာရဲ့အစွန်ဆုံးမှာရှိတာ။ အဲဒီအိမ် ၁ လုံးကိုပဲကြဲသွားတာ ဒရုန်းနဲ့။ အမျိုးသမီးကို ကျေးရွာဘုန်းကြီးကနေပြီးတော့ ပြည်ဆေးရုံကိုလိုက်ပို့တယ်။ လောလောဆယ်တော့ သေဆုံးမှုမရှိသေးဘူးလို့သိရတယ်”လို့ ဒေသခံအမျိုးသားတဦးက ပြောပါတယ်။

ဒေါ်ညွန့်ဝင်းမှာ အမျိုးသားနဲ့ သားသမီး ၅ ဦးရှိပြီး နေအိမ်ကိုဗုံးကြဲခံရချိန်မှာ သူဟာအိမ်နောက်ဖေးမှာ နွားမီးဖိုနေပြီး ဒရုန်းသံကြောင့် သားသမီးတွေရဲ့ သတိပေးအော်ခေါ်သံကိုမကြားတဲ့အတွက် အခုလိုထိမှန်ခဲ့တာလို့ သူကဆိုပါတယ်။

အဲ့ဒီဒေသအတွင်းမှာ တိုက်ပွဲဖြစ်ပွားတာမရှိဘဲ ဘန့်ဘွေးကုန်းကျေးရွာ စစ်ကောင်စီအထိုင်စခန်းကနေ ဒရုန်း ၂ စီးနဲ့ အိုင်ကြီးဒေါင့်ကျေးရွာကို တိုက်ခိုက်ခဲ့တာလို့ အထက်ပါအမျိုးသားက ဆက်ပြောပါတယ်။

အိမ်ခြေ ၂၀၀ ကျော်ရှိတဲ့ အိုင်ကြီးဒေါင့်ကျေးရွာဟာ ဘန့်ဘွေးကုန်းကျေးရွာနဲ့ ၄ မိုင်ခန့်ကွာဝေးပြီး ရွာထဲမှာ တော်လှန်ရေးတပ်ဖွဲ့တွေ ဝင်ရောက်နေထိုင်တာတွေလည်းမရှိဘူးလို့ သိရပါတယ်။

ပြီးခဲ့တဲ့ဇူလိုင် ၂၄ ရက်ကလည်း အင်အား ၇၀ ခန့်ပါတဲ့ စစ်ကြောင်းဟာ ဆယ်ရွာကနေဒေသခံတွေကို ဖမ်းဆီးပြီး ဘန့်ဘွေးကုန်းရွာစခန်းကိုတပ်ပြန်ဆုတ်လာချိန် မြို့ချောင်း-စိန်ကန့်လန့် ရိုးမဖြတ်လမ်းအနီး ကားလမ်းမှာတိုက်ခိုက်ခံရတာကြောင့် စစ်ကောင်စီဘက်က ထိခိုက်သေဆုံးမှုရှိခဲ့တယ်လို့ သာယာဝတီခရိုင် တပ်ရင်း ၃၈ဝ၂ တပ်ခွဲ ၅ က ထုတ်ပြန်ထားပါတယ်။

စာတည်း – လင်း

မြေလတ်အသံ၊ ဇူလိုင် ၂၃၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ ကြို့ကိုးပင်ရွာကို စစ်ကောင်စီတပ်က ဇူလိုင် ၂၂ ရက် မနေ့ညနေ ၆ နာရီကျော်မှာ ဝင်ရောက်မီးရှို့ပြီး ရွာခံအမျိုးသား ၆ ဦးကို ဖမ်းဆီးထားတယ်လို့ ဒေသခံတွေဆီကသိရပါတယ်။

ဝိုင်းကျေးရွာစခန်းကနေ စစ်ကြောင်းထိုးထွက်ခွာလာတဲ့ အင်အား ၁၀၀ ခန့်ရှိ စစ်ကောင်စီတပ်ဖွဲ့ဝင်တွေက ကြို့ကိုးပင်ရွာကို ဝင်ရောက်မီးရှို့ပြီး ဇူလိုင် ၂၃ ရက် ဒီကနေ့အထိ တပ်စွဲထားတယ်လို့ဆိုပါတယ်။

“စကစတွေပြန်ဆုတ်တာတော့ မရှိသေးဘူး။ စာသင်ကျောင်းမှာ ပထမနေတယ်။ နောက်တော့ ရွာထဲက ဖိုးသဲတို့ အိမ်တိုက်မှာ နေတယ်။ မနေ့ညကဆိုရင် လက်နက်ကြီး၊ လက်နက်ငယ်ပစ်ခတ်သံတွေကြားရတယ်။ တချို့က နှစ်ဖက်ပစ်တယ်ပြောတယ်”လို့ အုတ်ဖိုဒေသခံတော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

ဖမ်းဆီးခံရသူတွေမှာ ကျေးရွာအတွင်းထွက်မပြေးဘဲကျန်ခဲ့သူတချို့နဲ့ ထွက်ပြေးပြီးနောက် ရွာအတွင်းပြန်ဝင်လာသူတချို့ပါဝင်ပြီး ဇူလိုင် ၂၃ ရက်အထိ ဖမ်းဆီးထားတဲ့အပြင် ကျေးရွာအတွက် တပ်စွဲထားဆဲဖြစ်တာကြောင့် ၎င်းတို့ရဲ့ အသေးစိတ်အချက်အလက်တွေနဲ့ မီးရှို့ခံနေရတဲ့ အိမ်ခြေ ၃၀၀ ခန့်ရှိ ကြို့ကိုးပင်ကျေးရွာနေအိမ်တွေရဲ့ အခြေအနေတွေကို မသိရသေးပါဘူး။

ဇူလိုင် ၂၀ ရက်မနက်ပိုင်းမှာ ကြို့ကိုးပင်ကျေးရွာထိပ်ကို ရောက်ရှိလာတဲ့ အင်အား ၁၀၀ ခန့်ပါ စစ်ကြောင်းကို စောင့်ကြိုတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၅ ဦးသေဆုံးပြီး ၃ ဦးဒဏ်ရာရရှိခဲ့တယ်လို့ သာယာဝတီခရိုင် တပ်ရင်း ၃၈ဝ၂၊ တပ်ခွဲ ၆ Black Dragon GBK – PDF ကထုတ်ပြန်ထားပါတယ်။ အဲ့ဒီနောက် ယမန်နေ့ ညနေပိုင်းမှာ ကျေးရွာတွင်း ဝင်ရောက်စစ်ကြောင်းထိုးလာတာလည်း ဖြစ်ပါတယ်။

ပြီးခဲ့တဲ့ဇွန် ၈ ရက်ကလည်း အင်အား ၁၅၀ ခန့်ရှိတဲ့ စစ်ကောင်စီတပ်သားတွေကအုတ်ဖိုမြို့နယ်က ကိုင်းကြီး၊ ကိုင်းကလေး၊ ဒေါင်းကြီး၊ ဒေါင်းလေး၊ ဒေါင်းစပါးကွင်းစတဲ့ကျေးရွာတွေ စစ်ကြောင်းထိုးခဲ့ပါသေးတယ်။

စာတည်း – ဟိန်းစံ

မြေလတ်အသံ၊ ဇူလိုင် ၂၁၊ ၂၀၂၅။

ပဲခူးတိုင်း၊ အုတ်ဖိုမြို့၊ ကွေ့ချောင်းရပ်ကွက်အုပ်ချုပ်ရေးမှူး နဲ့ ဇနီးဖြစ်သူ ၂ ဦးတို့ ပစ်ခတ်ခံရပြီးသေဆုံးခဲ့တယ်လို့ ဇူလိုင် ၂၁ ရက်ဒီနေ့မှာ သာယာဝတီခရိုင်တပ်ရင်း ၃၈၀၂၊ တပ်ခွဲ ၄ က ထုတ်ပြန်ပါတယ်။

ပစ်ခတ်ခံရသူ ၂ ဦးဟာ စစ်ကောင်စီတပ်ကဖွဲ့စည်းထားတဲ့ ပြည်သူ့လုံခြုံရေးနှင့် အကြမ်းဖက်နှိမ်နင်းရေး အဖွဲ့ဝင်ဖြစ်တဲ့ အုပ်ချုပ်ရေးမှူး ကိုရဲအောင်နဲ့ ဇနီး မခင်မာရီတို့ဖြစ်ပြီး ဒီမနက် ၆ နာရီမှာ ပစ်ခတ်ခဲ့တာလို့ဆိုပါတယ်။

“ရဲအောင်က အုပ်ကြီးဖြစ်တာတော့ကြာပြီဗျ။ သူ့မိန်းမက သူ့ထက်ပိုဆိုးနေတာ ငွေရမှန်းသိတော့။ စကစအလိုကျလုပ်ပေးနေတာ။ အာဏာစသိမ်းထဲက လုပ်နေတာ။ သူတို့သေတော့ အဲ့ရပ်ကွက်က ပြည်သူတွေပျော်နေကြတာ။ သူတို့ပစ်ခံရပြီးတော့ စကစနဲ့ရဲတွေ ရောက်လာတယ်ဗျ။ နာရေးကူညီမှုကားနဲ့ တင်သွားတယ်လို့သိရတယ်ဗျ”လို့ သာယာဝတီခရိုင်တပ်ရင်း ၃၈၀၂၊ တပ်ခွဲ ၄ မှတာဝန်ရှိသူတဦးက ပြောပါတယ်။

ကိုရဲအောင်နဲ့ မခင်မာရီတို့ဆီကနေ လက်ပစ်ဗုံး ၁ လုံး၊ ဖျူး ၁ ခု၊ မိုလ်ဘိုင်းဖုန်း ၁ လုံး၊ မှတ်ပုံတင်ကတ် ၂ ခု၊ ပြည်သူ့လုံခြုံရေး နှင့်အကြမ်းဖက်နှိမ်နင်းရေးအဖွဲ့ (လုံကြမ်း) ကတ် ၁ ခု၊ ငွေသား ၈၅,၀၀၀ ကျပ်တို့ကို သိမ်းဆည်းရရှိခဲ့တယ်လို့ အထက်ပါတာဝန်ရှိသူက ဆိုပါတယ်။

ဒါ့အပြင်သူတို့ ၂ ဦးဟာ စစ်ကောင်စီတပ်ကပြုလုပ်မယ့် ရွေးကောက်ပွဲမှာ ကြံ့ခိုင်ရေးပါတီကို မဲထည့်ဖို့၊ ပါတီထဲဝင်ရောက်ပါက စစ်မှုထမ်းကင်းလွတ်ခွင့်ရမှာဖြစ်ကြောင်း လူငယ်တွေကိုစည်းရုံးတာ၊ ပြည်သူ တွေဆီက စစ်မှုထမ်းကြေးငွေကောက်ခံတာတို့ကို လုပ်ဆောင်နေသူတွေ ဖြစ်တယ်လို့လည်း ဆိုပါတယ်။

ဒါ့အပြင် ရဲအောင်မှာ ပြည်သူ့လုံခြုံရေးနှင့်အကြမ်းဖက်နှိမ်နင်းရေးအဖွဲ့ခေါင်းဆောင်တာဝန်ယူပြီး တော်လှန်ရေးအဖွဲ့တွေကို စုံစမ်းထောက်လှမ်းပြီး သတင်းပေးတာတွေကို လုပ်ဆောင်နေသူ ဖြစ်တယ်လို့လည်း သူကပြောပါတယ်။

စာတည်း – လင်း

မြေလတ်အသံ၊ ဇူလိုင် ၇၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ ကိုင်းကြီးတိုက်နယ်ဆေးရုံရှိ စစ်ကောင်စီလက်အောက်ခံ ကျန်းမာရေးဝန်ထမ်းတွေ စစ်သင်တန်းတက်ရောက်ဖို့ခေါ်ဆောင်ခံရတယ်လို့ ဒေသခံတွေဆီက သိရပါတယ်။

ကိုင်းကြီးကျေးရွာရှိ ၂၅-ကုတင်ဆန့်ဆေးရုံက လက်ထောက်ဆရာဝန် ၁ ဦးနဲ့ ကျန်းမာရေး ဝန်ထမ်းအမျိုးသမီး ၃ ဦးတို့ကို ဇူလိုင် ၆ ရက်နေ့လယ်ပိုင်းမှာ အုတ်ဖိုမြို့နယ်ကျန်းမာရေးဦးစီးဌာနက ကား ၁ စီးနဲ့ ခေါ်ဆောင်သွားခဲ့တာလို့ဆိုပါတယ်။

“မနေ့က မြို့ကလာပြီး ဆရာမတွေကို အကုန်ပြန်ခေါ်သွားတယ်။ စစ်သင်တန်း တက်ဖို့လို့ပြောတယ်။ ကျန်းမာရေးဌာနကပဲ လာခေါ်တာ။ စကစ လာတာတော့မဟုတ်ဘူး။ စကစတွေလာရင် တိုက်ပွဲဖြစ်မှာမို့ မလာတာဖြစ်နိုင်တယ်။ အခုတော့ဆေးရုံကပိတ်ထားတယ်။ တံခါးတွေရော”လို့ မြေပြင်အခြေအနေကိုသိရှိထားတဲ့ တော်လှန်ရေးတပ်ဖွဲ့ဝင်တဦးကပြန်ပြောပါတယ်။

အားလုံးကို အုတ်ဖိုမြို့ပေါ်ကိုခေါ်ဆောင်သွားတယ်လို့သာ သိရပြီး ဘယ်နေရာမှာထားရှိတယ်ဆိုတာ မသိရဘူးလို့ဆိုပါတယ်။

အဆိုပါဆေးရုံမှာ လူနာ ၁၀ ဦးကျော်လာရောက်ဆေးကုသနေတာတွေရှိပြီး ၎င်းလူနာတွေထဲမှ ပိုက်ဆံတတ်နိုင်ပြီးတော့ ဆက်လက်ကုသမှုခံယူရမယ့်လူနာတွေဆိုရင် မြို့ပေါ်ဆေးရုံကိုပြောင်းရွေ့သွားရကာ ပိုက်ဆံမတတ်နိုင်တဲ့လူနာတွေကတော့ နေအိမ်တွေကို ပြန်သွားခဲ့ရတယ်လို့သူက ဆိုပါတယ်။

ကိုင်းကြီးတိုက်နယ်ဆေးရုံကို အမှီပြုပြီး ကျန်းမာရေးစောင့်ရှောက်မှုခံယူနေရတဲ့ ကျေးရွာ ၁၀ ကျော်အနေနဲ့ အခုလိုဆေးရုံပိတ်လိုက်ရတာကြောင့် ကျန်းမာရေးနဲ့သက်ဆိုင်တဲ့ကိစ္စတွေမှာ အခက်အခဲစိန်ခေါ်မှုတွေဖြစ်သွားနိုင်တယ်လို့ ကာကွယ်ရေးတပ်ဖွဲ့၀င်က ပြောပါတယ်။

“တချို့တရက်လုပ်မှတရက်စားရတဲ့ ဒေသခံတွေအနေနဲ့ နာမကျန်းဖြစ်ပြီး ဆေးကုရတော့မယ်ဆိုရင် မြို့ပေါ်ထိသွားဖို့မတတ်နိုင်ဘူးလေ။ ဒီဆေးရုံရှိနေတော့ ဘာပဲဖြစ်ဖြစ် အနီးအနားမှာဆိုတော့ ဖြစ်သလိုကုသလို့ ရတယ်။မြို့ဆေးရုံသွားရင် အဓိကပိုက်ဆံက ရှိဖို့လိုတယ်”လို့ အထက်ပါတပ်ဖွဲ့၀င်က ပြောပါတယ်။

အုတ်ဖိုမြို့နဲ့ ၈ မိုင်ခန့်ဝေးတဲ့ ကိုင်းကြီးတိုက်နယ်ဆေးရုံကို ၂၀၁၅ ခုနှစ်မှာ တည်ဆောက်ခဲ့တာဖြစ်ပြီး ဆေးရုံမှာ လက်ထောက်ဆရာဝန် ၁ ဦး ဦးစီးပြီး နောက်ထပ်ကျန်းမာရေးဝန်ထမ်း ၄ ဦးနဲ့အတူ ကျန်းမာရေးစောင့်ရှောက်မှုပေးနေတာလည်း ဖြစ်ပါတယ်။

စာတည်း – လင်း

အုတ်ဖို၊ ဇွန် ၃ ၊၂၀၂၅။

ပဲခူးတိုင်း၊ အုတ်ဖိုမြို့နယ်မှာ စစ်ကောင်စီလက်အောက် ရာအိမ်မှူး ၁ ဦး သေနတ်ပစ်ခံရပြီး သေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၄ ထံက သိရပါတယ်။

သေဆုံးသူဟာ ထန်းပင်ကုန်းကျေးရွာနေ ရာအိမ်မှူး အောင်မိုးခိုင် ၅၂ နှစ် ဖြစ်ပြီး ချောင်းခွ(ကေ)ရွာနဲ့ သရက်နှစ်ဖျားလိန်ရွာကြားလမ်းပေါ်မှာ ဇွန် ၁ ရက်ညနေ ၆ နာရီကျော်က သေနတ်နဲ့ပစ်ခတ်ခံခဲ့ရတာလို့ ဆိုပါတယ်။

” ကျနော်တို့ရဲဘော်တွေ ကင်းပုန်း၀ပ်နေတဲ့အချိန်ဗျ။ သူလာမယ်ဆိုလို့ ကင်းပုန်း၀ပ်ပြီး စောင့်နေတာ၊ အောင်မိုးခိုင်တယောက်တည်းလာတာပါ။ ကျနော်တို့ကိုမြင်တော့ သူကအရင် လက်ပစ်ဗုံးနဲ့ စပစ်တာ၊ လက်ပစ်ဗုံးကကွဲတယ်ဗျ။ ကျနော်တို့ဘက်တော့မရောက်ဘူး၊ နေရာလွဲသွားတယ်” လို့ သာယာဝတီခရိုင်တပ်ရင်း ၃၈၀၂ တပ်ခွဲ ၄ မှ ပြန်ကြားရေးတာဝန်ခံက ပြောပါတယ်။

သေဆုံးသူရာအိမ်မှူးမှာ တိမ်မြုပ်ကျေးရွာအခြေစိုက် ခမရ ၆ တပ်ရင်းမှ ဆေးတပ်သားဟောင်းဖြစ်ပြီး စစ်အာဏာသိမ်းပြီးနောက် စစ်ကောင်စီလက်အောက်အုပ်ချုပ်ရေးအဖွဲ့ဝင်သတင်းပေးလုပ်ဆောင်ကာ လက်ပစ်ဗုံးကိုင်ဆောင်ထားသူဖြစ်တယ်လို့ သိရပါတယ်။

ရာအိမ်မှူး အောင်မိုးခိုင်ဟာ တော်လှန်ရေးတပ်ဖွဲ့တွေရဲ့အချက်အလက်တွေ စုံစမ်းထောက်လှမ်းတာ၊ ပြည်သူတွေထံ စစ်မှုထမ်းကြေးခြိမ်းခြောက်ကောက်ခံတာ၊ စစ်ကောင်စီတပ်ဖွဲ့တွေနဲ့အတူ လူငယ်တွေကို ပေါ်တာဆွဲဖမ်းဆီးတာ၊ စစ်ကောင်စီစစ်ကြောင်းတွေမှာ လမ်းပြလုပ်ဆောင်နေသူဖြစ်တယ်လို့ ဆိုပါတယ်။

အောင်မိုးခိုင် အသတ်ခံရပြီးနောက် ရုပ်အလောင်းကို ခမရ ၆ တပ်ရင်းမှ စစ်ကောင်စီတပ်ဖွဲ့ဝင်တွေက ကားတစီးနဲ့လာရောက် ကောက်ယူသွားတယ်လို့ သိရပါတယ်။

စာတည်း – ဟိန်းစံ