အုတ်ဖို၊ စက်တင်ဘာ ၈၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ ကန်သာယာကျေးရွာမှာ အုပ်ချုပ်ရေမှူး ၁ ဦး ပစ်ခတ်ခံရပြီး သေဆုံးခဲ့တယ်လို့ သာယာဝတီခရိုင် တပ်ရင်း (၃၈၀၂)၊ တပ်ခွဲ ၅၊ပြန်ကြားရေးတာဝန်ခံ ရိုးမမြေဆီက သိရပါတယ်။

ပစ်သတ်ခံရသူက ကန်သာယာအုပ်စု အုပ်ချုပ်ရေးမှူး အသက် ၆၀ ကျော်အရွယ် ဦးထွန်းသိန်း ဖြစ်ပြီး စက်တင်ဘာ ၆ ရက် ည ၇ နာရီခွဲမှာ ပျူစောထီး ခေါင်းဆောင် ကိုလှရွှေရဲ့နေအိမ်ရှေ့မှာ စကားပြောနေကြစဉ် သာယာဝတီခရိုင် တပ်ရင်း ၃၈၀၂ တပ်ခွဲ ၅ Black Tiger ပျောက်ကြားအဖွဲ့က ပစ်ခတ်ခဲ့တာလို့ဆိုပါတယ်။

“အုပ်ကြီးက ပျူခေါင်းဆောင်လှရွှေအိမ်ရှေ့မှာ နှစ်ယောက် စကားပြောနေတာကို ဝင်ပစ်တာ၊ အုပ်ကြီးထွန်းသိန်းခေါင်းကို ကျည် ၃ ချက်မှန်ပြီးသေတယ်။ အုပ်ကြီးက ခေတ်အဆက်ဆက် စစ်တပ်ထောက်တိုင်လုပ်လာတာ”လို့ တာဝန်ခံရိုးမမြေက ပြောပါတယ်။

ပစ်ခတ်ချိန်အတွင်း ပျူစောထီးခေါင်းဆောင် ကိုလှရွှေကတော့ ထွက်ပြေးလွတ်မြောက်သွားပြီး အုပ်ချုပ်ရေးမှူး ဦးထွန်းသိန်းနေအိမ်ကနေ စစ်မှုထမ်းစာရွက်တွေနဲ့ အခြားစာရွက်စာတမ်းတွေကို ယူဆောင်ကာ ကာကွယ်ရေးအဖွဲ့ဝင်တွေက မီးရှို့ခဲ့တယ်လို့လဲ ဆိုပါတယ်။

“ပျူခေါင်းဆောင်လှရွှေက ထွက်ပြေးသွားပြီး စတွေဆီ ဖုန်းဆက်အကြောင်းကြားလို့ လက်နက်ကြီး ၂ လုံးနဲ့ စတွေရွာထဲကို ပစ်တယ်။ အုပ်ကြီးအိမ်ထဲဝင်ရှာတော့ စစ်မှုထမ်းရမယ့် လူငယ်တွေနာမည်စာရင်းပါတဲ့ စာရွက်နဲ့ တခြားစာရွက်စာတမ်းတွေသိမ်းရတာ တခါထဲမီးရှို့ပစ်တယ်” လို့ တာဝန်ခံရိုးမမြေက ပြောပါတယ်။

အုတ်ဖိုမြို့နယ်၊ စစ်တောကျေးရွာရာအိမ်မှူး အသက် ၅၀ ကျော်အရွယ် ဦးသန်းစိုးကိုလည်း စက်တင်ဘာ ၇ ရက် မနက် ၁၁ နာရီခွဲမှာ သူ့နေအိမ်ကနေ လယ်တဲကိုဘေးတွဲဆိုင်ကယ်နဲ့အလာမှာ တော်လှန်ရေးတပ်ဖွဲ့ဝင်တွေက လမ်းမှာစောင့်ပြီး ပစ်ခတ်ရာသေဆုံးခဲ့ပါသေးတယ်။

စာတည်း – လင်း

အုတ်ဖို၊ စက်တင်ဘာ ၈၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ ချင်းစု၊ ကိုင်းကြီး၊ ဒေါင်းကြီး၊ ကြို့ကိုးပင်ကျေးရွာတွေကို စစ်ကော်မရှင်တပ်က စက်တပ်လေထီးနဲ့ဗုံးကြဲတိုက်ခိုက်ခဲ့တာကြောင့် ပြည်သူ ၃ ဦးသေဆုံးကာ ၂ ဦးဒဏ်ရာရတယ်လို့ သာယာဝတီခရိုင်စစ်ဆင်ရေးတာဝန်ခံဆီက သိရပါတယ်။

စက်တင်ဘာ ၇ ရက် ညနေ ၅ နာရီကျော်မှာ ကြို့ပင်ကောက်မြို့ဘောလုံးကွင်းကနေတက်လာတဲ့ စက်တပ်လေထီး ၅ စီးက အထက်ပါကျေးရွာတွေကို တိုက်ပွဲဖြစ်တာမရှိဘဲ မိနစ်ပိုင်းလောက်သာခြားပြီး ဗုံးသီးတွေကြဲချခဲ့တာလို့ဆိုပါတယ်။

“ကိုင်းကြီးမြောက်ကျောင်း ဘုန်းကြီးကျောင်းပေါ်ကျတယ်။ ဘုန်းကြီးကျောင်းပျက်စီးတယ်။ ချင်းစုရွာမှာက ဆေးဆိုင်တည့်တည့်ကိုကျတာ။ ပြည်သူတွေကတော့လက်လုပ်လက်စားတွေဘဲ။ လေထီးကိုမမြင်ဘူးတော့ ခြံထဲကနေ ဓာတ်ပုံရိုက်တာ။ အဲ့မှာတည့်တည့်လည်းကျကော မရှောင်သာမတိမ်းသာဘဲထိတာ”လို့ သာယာဝတီခရိုင် စစ်ဆင်ရေးတာဝန်ခံ ကိုသစ္စာကပြောပါတယ်။

ဗုံးသီးကျရောက်ပေါက်ကွဲတာကြောင့် ချင်းစုကျေးရွာနေ အသက် ၃၆ နှစ်အရွယ် ကိုချစ်ကောင်း၊ အသက် ၁၅ နှစ်အရွယ် G7 ကျောင်းသား ခန့်ကျော်သူ၊ ကိုင်းကြီးကျေးရွာဘုန်းကြီးကျောင်းနံဘေးရှိနေတဲ့ အသက် ၃၅ နှစ်အရွယ် ကိုတင်မျိုးမင်းတို့ ၃ ဦးနေရာမှာတင်သေဆုံးခဲ့ကြပါတယ်။

ဒါ့အပြင် ဒေါင်းကြီးကျေးရွာနေအိမ်ထဲရှိနေတဲ့ အသက် ၃၇ နှစ်အရွယ် ဦးအယ်စေးမှာ ပေါင်နဲ့လက် ပြင်းထန်ဒဏ်ရာရသလို သမီးဖြစ်သူ အသက် ၁၄ နှစ်အရွယ် မြမြသင်းဆိုသူမှာလည်း နဖူးထိခိုက်ဒဏ်ရာရခဲ့ကာ ကြို့ကိုးပင်ကျေးရွာမှာတော့ လူထိခိုက်တာမရှိဘူးလို့ သိရပါတယ်။

ဗုံးထိမှန်မိပြီး ချင်းစုရွာက နေအိမ် ၂ လုံး၊ ကိုင်းကြီးကျေးရွာက ဘုန်းကြီးကျောင်း ၁ ကျောင်း၊ ဒေါင်းကြီးရွာက နေအိမ် ၁ လုံးတို့ပျက်စီးပြီး နွား ၁ ကောင်သေဆုံးခဲ့ပါတယ်။

စစ်ကော်မရှင်ဘက်က စက်တပ်လေထီးနဲ့ဗုံးကြဲတာကြောင့် ဒေသခံတွေမှာ ထိတ်လန့်ကြောက်ရွံနေကြပေမယ့် ကျေးရွာကနေ ထွက်ပြေးတိမ်းရှောင်တာမျိုးတော့မရှိဘူးလို့ သိရပါတယ်။

ဩဂုတ် ၂၈ ရက်ကလည်း အုတ်ဖိုမြို့နယ်၊ ဒေါင်းကြီးကျေးရွာကို စစ်ကော်မရှင်တပ်ဘက်က ဒရုန်းနဲ့ဗုံးချတိုက်ခိုက်လို့ သားအမိ ၂ ဦးသေဆုံးသွားသေးတယ်လို့သိရပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ စက်တင်ဘာ ၄ ရက်ထိ စစ်ကော်မရှင်တပ်နဲ့လက်အောက်ခံတွေကြောင့် သေဆုံးခဲ့တဲ့ပြည်သူစုစုပေါင်း ၇,၁၈၂ ဦးရှိပြီလို့ နိုင်ငံရေးအကျဥ်းသားများကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – လင်း

အုတ်ဖို၊ စက်တင်ဘာ ၈၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ စစ်တောကျေးရွာမှာ ရာအိမ်မှူးတဦး ပစ်ခတ်ခံရလို့ သေဆုံးခဲ့တယ်လို့ သာယာဝတီခရိုင် အမှတ် ၁ တပ်ရင်း (၃၈၀၁)၊ တပ်ခွဲ ၅၊ ကြို့ပင်ကောက် HERO ပြောက်ကျားတပ်ဖွဲ့ဆီက သိရပါတယ်။

ပစ်သတ်ခံရသူက စစ်တောကျေးရွာရာအိမ်မှူး အသက် ၅၀ ကျော်အရွယ် ဦးသန်းစိုးဖြစ်ပြီး စက်တင်ဘာ ၇ ရက် မနက် ၁၁ နာရီခွဲမှာ သူ့နေအိမ်ကနေ လယ်တဲကိုဘေးတွဲဆိုင်ကယ်နဲ့အလာမှာ တော်လှန်ရေးတပ်ဖွဲ့ဝင်တွေက လမ်းမှာစောင့်ပြီး ပစ်ခတ်ခဲ့တာလို့ဆိုပါတယ်။

“သူအိမ်နဲ့လယ်က တမိုင်လောက်ကွာတယ်။ သူကဆိုင်ကယ်နဲ့စီးလာတဲ့ အချိန် လမ်းမှာစောင့်ဆိုင်းပစ်ခတ်ခဲ့တာ။ ဦးခေါင်းကို တချက်၊ ရင်ဘတ်ကို နှစ်ချက်ပစ်ခဲ့လိုက်တာ”လို့ သာယာဝတီခရိုင် အမှတ် ၁ တပ်ရင်း(၃၈၀၁)၊ တပ်ခွဲ ၅၊ ကြို့ပင်ကောက် HERO ပြောက်ကျားတပ်ဖွဲ့ တာဝန်ခံမိုးသီးက ပြောပါတယ်။

ပစ်ခတ်ခံရလို့ ရာအိမ်မှူး ဦးသန်းစိုးဟာ နေရာမှာတင်သေဆုံးသွားပြီး သူ့ဆီမှာ ဗုံးသီး ၁ လုံး၊ ပစ္စတိုသေနတ် ၁ လက်ရှိတယ်လို့သတင်းရထားပေမယ့် ပစ်ခတ်ချိန်က လမ်းမှာဖြစ်နေတာကြောင့် အဆိုပါ ပစ္စည်းတွေတော့ သိမ်းဆည်းရမိတာမရှိဘူးလို့ဆိုပါတယ်။

ပစ်ခတ်မှုဖြစ်ပြီးနောက်ပိုင်း ညနေပိုင်းလောက်မှာ စစ်ကော်မရှင်အဖွဲ့တွေကျေးရွာထဲကို ရောက်လာပြီး ရာအိမ်မှူး ဦးသန်းစိုးနေအိမ်က လက်နက်တွေကိုပြန်သိမ်းသွားတာလို့သိရကြောင်း တာဝန်ခံမိုးသီးက ပြောပါတယ်။

ရာအိမ်မှူး ဦးသန်းစိုးဟာ ကျေးရွာထဲမှာ စစ်မှုထမ်းကြေးကို ဦးဆောင်လိုက်ကောက်နေပြီး ဒေသကာကွယ်ရေးအဖွဲ့တွေရဲ့ သတင်းကိုလိုက်လံစုံစမ်းနေသူဖြစ်တာကြောင့် ပစ်ခတ်ရှင်းလင်းရတာဖြစ်တယ်လို့ ကိုမိုးသီးကဆက်ပြောပါတယ်။

ပြီးခဲ့တဲ့စက်တင်ဘာ ၅ ရက် ည ၆ နာရီကျော်မှာလည်း အုတ်ဖိုမြို့နယ်၊ ဖလန်ပင်ကျေးရွာမှာ နေထိုင်တဲ့ စစ်တပ်သတင်းပေး အသက် ၅၇ အရွယ် ဦးမြင့်ရွှေဆိုသူ ပစ်သတ်ခံခဲ့ရပါသေးတယ်။

စာတည်း – လင်း

မြေလတ်အသံ၊ စက်တင်ဘာ ၇၊ ၂၀၂၅။

ပဲခူးတိုင်း၊ သာယာဝတီခရိုင်၊ အုတ်ဖိုမြို့နယ်က စစ်ကော်မရှင်တပ်ကိုသတင်းပေးနေတဲ့ အမျိုးသား ၁ ဦးကို ပစ်ခတ်ရာ သေဆုံးခဲ့တယ်လို့ သာယာဝတီခရိုင်တပ်ရင်းအမှတ် ၃၈ဝ၂၊ တပ်ခွဲ ၆ က စက်တင်ဘာ ၇ ရက် ဒီနေ့မှာထုတ်ပြန်ပါတယ်။

သေဆုံးသူဟာ ဖလန်ပင်ကျေးရွာမှာနေထိုင်တဲ့ အသက် ၅၇ နှစ်အရွယ် ဦးမြင့်ရွှေဖြစ်ပြီး စက်တင်ဘာ ၅ ရက် ည ၆ နာရီကျော်မှာ ပစ်ခတ်ခဲ့တာလို့ ဆိုပါတယ်။

“လင်မယား ၂ ယောက်နဲ့ မြေး ၂ ယောက်က အိမ်ထဲမှာရှိနေလို့ မြင့်ရွှေ ကို အိမ်အပြင်ခေါ်ထုတ် ရှင်းလင်း လိုက်ပါတယ်။ သူက ရွာကလူငယ် ၂ ယောက်ကို မှတ်ပုံတင်လုပ်ပေးမယ်လို့ လိမ်ခေါ်သွားပြီး **တပ်ထဲ ထည့်လိုက်တာ။ နောက်ပြီး ဘယ်အဖွဲ့တွေလာလာ ဂရုမစိုက်ဘူးဆိုပြီး စိန်ခေါ်တယ်” လို့ သာယာဝတီခရိုင်တပ်ရင်းအမှတ် ၃၈ဝ၂၊ တပ်ခွဲ ၆ မှ တာဝန်ရှိသူတဦးက ပြောပါတယ်။

ဦးမြင့်ရွှေဟာ တော်လှန်ရေးတပ်ဖွဲ့ဝင်တွေရဲ့ သွားလာလှုပ်ရှားမှုတွေကို စစ်ကော်မရှင်တပ်ထံ သတင်းပေးတာ၊ ဘယ်တော်လှန်ရေးအဖွဲ့လာလာ ဂရုမစိုက်ဘူးဟုဆိုပြီး စိန်ခေါ်တာ၊ လူငယ်တွေကို စစ်တပ်ထဲကိုလိမ်လည်ထည့်ကာ ရောင်းစားတာတွေကို လုပ်ဆောင်နေသူဖြစ်တာကြောင့် အခုလိုအရေးယူလိုက်ရတာလို့ အထက်ပါတာဝန်ရှိသူက ဆိုပါတယ်။

ပြီးခဲ့တဲ့သြဂုတ် ၂၇ ရက်ကလည်း အုတ်ဖို မြို့နယ်၊ စဉ့်ကူးကျေးရွာမှ စစ်ကော်မရှင်တပ်ဆီ သတင်းပေးလုပ်နေသူ မျိုးမင်းသူ ဆိုသူကို သာယာဝတီခရိုင် တပ်ရင်း ၃၈၀၂၊ တပ်ခွဲ ၅ က ပစ်ခတ်ရှင်းလင်းပြီး ၎င်းထံမှ ဆိုင်ကယ် ၁ စီး သိမ်းဆည်းရရှိခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ သြဂုတ် ၈၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ တိမ်မြုပ်ရွာ အခြေစိုက် ခမရ ၆ မှ အရာခံဗိုလ်နဲ့ တပ်ကြပ်ကြီးတို့ သြဂုတ် ၇ ရက်မနက် ၉ နာရီကျော်မှာ ပစ်ခတ်ခံရပြီးသေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၄ က ပြောပါတယ်။

ပစ်ခတ်ခံရသူ ၂ ဦးဟာ အရာခံဗိုလ်လှကျော်နဲ့ တပ်ကြပ်ကြီး ညီညီမိုးတို့ဖြစ်ပြီး ၎င်းတို့ဟာ ခမရ ၆ ကနေ အရပ်ဝတ်နဲ့ဆိုင်ကယ်စီးပြီ ထွက်ခွာလာချိန် သဖန်းပင်ဆိပ်ရွာအနီးမှာ တော်လှန်ရေးတပ်ဖွဲ့ဝင်တွေကပစ်ခတ်ခဲ့တာလို့ ဆိုပါတယ်။

“သူတို့က ရဲဘော် ၂ ယောက်စီးလာတဲ့ ဆိုင်ကယ်ကိုရပ်ခိုင်းတာဗျ။ ရပ်ခိုင်းပြီး မင်းတို့ စစ်ထဲ၀င်မလား၊ တိုင်းပြည်အတွက် ဘာညာပြောနေတာ။ အဲ့အချိန် နောက်က ရဲဘော်က သေနတ်ထုတ်ပြီး ပစ်လိုက်တာဗျ။”လို့ သာယာဝတီ ခရိုင်တပ်ရင်း ၃၈၀၂ တပ်ခွဲ ၄ မှ ပြန်ကြားရေး တာဝန်ခံကပြောပါတယ်။

ပစ်ခတ်ပြီးနောက် လက်ပစ်ဗုံး ၁ လုံး၊ ငွေသားကျပ် ၂ သိန်း၊ စစ်မှုထမ်းကဒ် ၁ ခု၊ စစ်မှုထမ်း စိစစ်ရေးစာအုပ် ၁ အုပ်၊ မှတ်ပုံတင်ကဒ် ၁ ခု၊ လိုင်စင်ဓာတ်ပုံ ၆ ပုံ၊ မိုလ်ဘိုင်းဖုန်း ၂ လုံးတို့ကိုလည်း သိမ်းဆည်းရရှိခဲ့တယ်လို့ အထက်ပါပြန်ကြားရေးတာဝန်ခံကပြောပါတယ်။

အရာခံဗိုလ်လှကျော်နဲ့ တပ်ကြပ်ကြီး ညီညီမိုးတို့ ပစ်ခတ်သေဆုံးပြီးနောက် နာရီဝက်အကြာမှာ ရုပ်အလောင်းတွေကို ခမရ ၆ မှ စစ်ကောင်စီတပ်သားတွေက ကား ၁ စီးနဲ့ လာယူသွားခဲ့တယ်လို့ အထက်ပါတာဝန်ခံကဆက်ပြောပါတယ်။

ပြီးခဲ့တဲ့ဇူလိုင် ၂၁ ရက်ကလည်း အုတ်ဖိုမြို့၊ ကွေ့ချောင်းရပ်ကွက်လမ်းထိပ်မှာ စစ်ကောင်စီတပ်ကဖွဲ့စည်းထားတဲ့ ပြည်သူ့လုံခြုံရေးနှင့်အကြမ်းဖက်နှိမ်နင်းရေးအဖွဲ့ဝင်ဖြစ်တဲ့ အုပ်ချုပ်ရေးမှူး ရဲအောင်နဲ့ ဇနီးခင်မာရီတို့ကို သာယာဝတီခရိုင်တပ်ရင်း ၃၈၀၂၊ တပ်ခွဲ ၄က ပစ်ခတ်ရာသေဆုံးခဲ့တယ် လို့ သိရပါတယ်။

စာတည်း – လင်း

မြေလတ်အသံ၊ သြဂုတ် ၃၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ အိုင်ကြီးဒေါင့်ကျေးရွာကို စစ်ကောင်စီတပ်က သြဂုတ် ၂ ရက်ည ၇ နာရီကျော်မှာ ဒရုန်းနဲ့ဗုံးကြဲတိုက်ခိုက်ခဲ့ကြောင့် အမျိုးသမီး ၁ ဦးဒဏ်ရာပြင်းထန်ရခဲ့တယ်လို့ ဒေသခံတွေဆီက သိရပါတယ်။

အသက် ၅၀ အရွယ် ဒေါ်ညွန့်ဝင်းရဲ့ ဆီးခုံနဲ့ဗိုက်ကို ဗုံးစထိမှန်ပြီး အူပွင့်ထွက်တာလည်းရှိတာကြောင့် ဆေးရုံကိုပို့ဆောင်ကုသနေရတယ်လို့ ဆိုပါတယ်။

“သူတို့အိမ်က ရွာရဲ့အစွန်ဆုံးမှာရှိတာ။ အဲဒီအိမ် ၁ လုံးကိုပဲကြဲသွားတာ ဒရုန်းနဲ့။ အမျိုးသမီးကို ကျေးရွာဘုန်းကြီးကနေပြီးတော့ ပြည်ဆေးရုံကိုလိုက်ပို့တယ်။ လောလောဆယ်တော့ သေဆုံးမှုမရှိသေးဘူးလို့သိရတယ်”လို့ ဒေသခံအမျိုးသားတဦးက ပြောပါတယ်။

ဒေါ်ညွန့်ဝင်းမှာ အမျိုးသားနဲ့ သားသမီး ၅ ဦးရှိပြီး နေအိမ်ကိုဗုံးကြဲခံရချိန်မှာ သူဟာအိမ်နောက်ဖေးမှာ နွားမီးဖိုနေပြီး ဒရုန်းသံကြောင့် သားသမီးတွေရဲ့ သတိပေးအော်ခေါ်သံကိုမကြားတဲ့အတွက် အခုလိုထိမှန်ခဲ့တာလို့ သူကဆိုပါတယ်။

အဲ့ဒီဒေသအတွင်းမှာ တိုက်ပွဲဖြစ်ပွားတာမရှိဘဲ ဘန့်ဘွေးကုန်းကျေးရွာ စစ်ကောင်စီအထိုင်စခန်းကနေ ဒရုန်း ၂ စီးနဲ့ အိုင်ကြီးဒေါင့်ကျေးရွာကို တိုက်ခိုက်ခဲ့တာလို့ အထက်ပါအမျိုးသားက ဆက်ပြောပါတယ်။

အိမ်ခြေ ၂၀၀ ကျော်ရှိတဲ့ အိုင်ကြီးဒေါင့်ကျေးရွာဟာ ဘန့်ဘွေးကုန်းကျေးရွာနဲ့ ၄ မိုင်ခန့်ကွာဝေးပြီး ရွာထဲမှာ တော်လှန်ရေးတပ်ဖွဲ့တွေ ဝင်ရောက်နေထိုင်တာတွေလည်းမရှိဘူးလို့ သိရပါတယ်။

ပြီးခဲ့တဲ့ဇူလိုင် ၂၄ ရက်ကလည်း အင်အား ၇၀ ခန့်ပါတဲ့ စစ်ကြောင်းဟာ ဆယ်ရွာကနေဒေသခံတွေကို ဖမ်းဆီးပြီး ဘန့်ဘွေးကုန်းရွာစခန်းကိုတပ်ပြန်ဆုတ်လာချိန် မြို့ချောင်း-စိန်ကန့်လန့် ရိုးမဖြတ်လမ်းအနီး ကားလမ်းမှာတိုက်ခိုက်ခံရတာကြောင့် စစ်ကောင်စီဘက်က ထိခိုက်သေဆုံးမှုရှိခဲ့တယ်လို့ သာယာဝတီခရိုင် တပ်ရင်း ၃၈ဝ၂ တပ်ခွဲ ၅ က ထုတ်ပြန်ထားပါတယ်။

စာတည်း – လင်း