မြေလတ်အသံ၊ ဇန်နဝါရီ ၂၂၊ ၂၀၂၆။

စစ်ကိုင်းတိုင်း၊ အင်းတော်မြို့နယ်၊ မော်လူးမြို့ရှိ မြို့နယ်ပြည်သူ့ကာကွယ်ရေးအဖွဲ့(ပကဖ)ရုံး လေကြောင်းကနေဗုံးကြဲခံရလို့ ပကဖအဖွဲ့ဝင် ၄ ဦးအပါ လူ ၇ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

ဇန်နဝါရီ ၂၁ ရက် မနေ့ည ၁၁ နာရီကျော်မှာ မော်လူးမြို့၊ မာန်ဟဲရွာထိပ်မှာရှိတဲ့ ပကဖရုံးကို တိုက်လေယာဥ်နဲ့ ဗုံး ၂ လုံးကြဲချတိုက် ခိုက်ခဲ့တာလို့ ဆိုပါတယ်။

“ဗုံးကြဲခံရတာက ပေါင် ၂၅၀၊ ၃၀၀ (ဗုံး) လောက်တော့ရှိမယ် ၂ လုံးကြဲတာ။ ပကဖ သူတို့ရုံးပေါ့လေ။ ရုံးဘေးမှာရှိတဲ့ နေအိမ် ၂လုံးပျက်စီးတယ်။”လို့ မြေပြင်အခြေအနေသိရှိသူ ဒေသခံအမျိုးသားတဦးက ပြောပါတယ်။

ဗုံးကြဲခံရတာကြောင့် ပကဖရုံးအတွင်းမှာရှိနေတဲ့ ပကဖအဖွဲ့ဝင် ၄ ဦး၊ နောက်ထပ်တော်လှန်ရေးတပ်ဖွဲ့ဝင် ၁ ဦး ရုံးအနီးနေအိမ်မှာနေထိုင်တဲ့ ရွာခံအမျိုးသား ၂ ဦး စုစုပေါင်း ၇ ဦး သေဆုံးပြီး ရွာခံအမျိုးသား၊ အမျိုးသမီး ၁၀ ဦးခန့် ထိခိုက်ဒဏ်ရာရရှိခဲ့တယ်လို့ ဆိုပါတယ်။

သေဆုံးသူတွေရဲ့ရုပ်အလောင်းတွေကို ဇန်နဝါရီ ၂၂ ရက် ဒီကနေ့မနက်ပိုင်းမှာ ဈာပနအခမ်းအနားပြုလုပ်ကာ မီးသင်္ဂြိုဟ်​ပြီးဖြစ်ကြောင်းသိရှိရပြီး သေဆုံးသူတွေရဲ့ အသေးစိတ်အချက်အလက်တွေကိုတော့ မသိရသေးပါဘူး။

မော်လူးမြို့ကို PDFအပါအဝင် တော်လှန်ရေးပူးပေါင်းတပ်တွေက ၂၀၂၃ ဒီဇင်ဘာ ၁၃ရက်မှာ သိမ်းပိုက်ရရှိခဲ့ပြီးတဲ့နောက် လက်ရှိကာလအထိ အမျိုးသားညီညွတ်ရေးအစိုးရလက်အောက်တပ်ဖွဲ့တွေက ထိန်းချုပ်ထားတာလည်း ဖြစ်ပါတယ်။

ပြီးခဲ့တဲ့ဇန်နဝါရီ ၂ ရက်ကလည်း မော်လူးမြို့နယ်၊ ပဲခူးကျေးရွာရှိ အမျိုးသားညီညွတ်ရေးအစိုးရ-NUG ဖွင့်လှစ်ထားတဲ့ စာသင်ကျောင်းကို စစ်တပ်က ဗုံးကြဲတိုက်ခိုက်ခဲ့တာကြောင့် G-12 ကျောင်းသူ ၁ ဦးသေဆုံးခဲ့တာလည်း ဖြစ်ပါတယ်။

မြေလတ်အသံ၊ ဇန်နဝါရီ ၂၊ ၂၀၂၅။

စစ်ကိုင်းတိုင်း၊ အင်းတော်မြို့နယ်၊ ပဲခူးရွာရှိ အမျိုးသားညီညွတ်ရေးအစိုးရ – NUG ဖွင့်လှစ်ထားတဲ့ အထက်တန်းကျောင်း ဗုံးကြဲတိုက်ခိုက်ခံရပြီး ကျောင်းသူ ၁ ဦးသေဆုံးပြီး ၂ ဦး ဒဏ်ရာရရှိခဲ့တယ်လို့ တော်လှန်ရေးတပ်ဖွဲ့ဝင်တဦးက ပြောပါတယ်။

ဇန်နဝါရီ ၂ ရက်ဒီမနက်ပိုင်း ၁ နာရီကျော်မှာ ပဲခူးကျေးရွာမှာရှိတဲ့ အထက်တန်းကျောင်းကို ဗုံးကြဲတိုက်ခိုက်ခဲ့တာဖြစ်ပြီး အသက် ၁၇ နှစ်အရွယ် ၁၂ တန်းကျောင်းသူ ၁ ဦးသေဆုံးကာ နောက်ထပ်ကျောင်းသူ ၂ ဦး ဒဏ်ရာရရှိခဲ့တာပါ။

“သေဆုံးတဲ့ကျောင်းသူက တောင်ဖီလာရွာက။ ဒဏ်ရာရသူကျောင်းသူ ၂ ဦးကတော့ ဘယ်ရွာဆိုတာ မသိရ။ သူတို့တွေက Grade 12 တွေ။ အသက်က ၁၇ နှစ်၊ ၁၈ နှစ်လောက်ရှိမယ်။ ပဲခူးက အရင်ကတော့ အထက်တန်း မဟုတ်လောက်ဘူး။ အခု NUG ပညာရေးကသင်တော့ NUG အထက်တန်းကျောင်းပေါ့” လို့ တော်လှန်ရေးတပ်ဖွဲ့ဝင်တဦးက ပြောပါတယ်။

အဆိုပါ ပဲခူးကျေးရွာရှိအထက်တန်းကျောင်းမှာ ပညာသင်ယူနေကြတဲ့ကျောင်းသူ၊ ကျောင်းသားတွေဟာ ကျောင်းမှာပဲ နေထိုင်စားသောက်နေကြတာလို့ ဆိုပါတယ်။

ဗုံးကြဲမှုအတွင်း ကျောင်းဆောင်တွေ၊ လူနေအိမ်တွေ ပျက်စီးမှုရှိခဲ့ပေမယ့် အသေးစိတ်အခြေအနေတွေ ကိုတော့ မသိရှိရသေးဘူးလို့ အထက်ပါတော်လှန်ရေးတပ်ဖွဲ့ဝင်ကပြောပါတယ်။

ပြီးခဲ့တဲ့ ၂၀၂၅ မေလ ၁၂ ရက်ကလည်း အင်းတော်မြို့နယ်၊ ဟဲန္နကျေးရွာရှိ မူလွန်စာသင်ကျောင်းကို စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် အမျိုးသား ၂ ဦးသေဆုံးပြီး ၇ ဦးဒဏ်ရာ ရရှိခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ အောက်တိုဘာ ၁၇၊ ၂၀၂၅။

စစ်ကိုင်းတိုင်း၊ အင်းတော်မြို့နယ်က အမျိုးသားတဦးကို ဆိုင်ကယ်ခိုးမှုနဲ့ ကျေးရွာပကဖအဖွဲ့တခုက ဖမ်းဆီးစစ်ဆေးနေချိန် သေဆုံးခဲ့တယ်လို့ ဒေသခံတွေဆီက သိရပါတယ်။

သေဆုံးသူမှာ မှော်တိတ်ကျေးရွာမှ ၃၈ နှစ်အရွယ် ကိုဇော်ထွေးဖြစ်ပြီး သူ့ကို ရွာသာယာကျေးရွာပကဖအဖွဲ့က အောက်တိုဘာ ၁၁ ရက်ည ၈ နာရီကျော်မှာဖမ်းဆီးခဲ့ပြီးနောက် အောက်တိုဘာ ၁၂ ရက်မနက် ၁ နာရီကျော် လူကြုံနဲ့တဆင့် မိသားစုကို အလောင်းလာယူဖို့ အကြောင်းကြားခဲ့တာလို့ ဆိုပါတယ်။

“ကိုဇော်ထွေးကို ဆိုင်ကယ်ပျောက်တဲ့အမှုနဲ့ စစ်မေးစရာရှိတယ်ဆိုပြီး ဖမ်းခေါ်သွားတာ။ သူ့မှာ ခန္ဓာကိုယ်တခုလုံး ညိုမဲနေတာ။ မျက်နှာကလည်း ညိုမဲနေတယ်။ ခေါင်းမှာလည်း ရိုက်ခံထားရတဲ့ ဒဏ်ရာအကြီးကြီးတချက် တွေ့တယ်။ အဆုတ်တည့်တည့်မှာလည်း သေနတ်တွေနဲ့ထောင်းထားလို့ ဒဏ်ရာဖြစ်နေတဲ့ သုံးနေရာလောက်တွေ့တယ်”လို့ ကိုဇော်ထွေးရဲ့ မိသားစုဝင်အမျိုးသားတဦးက ပြောပါတယ်။

မိသားစုဝင်တွေက ကိုဇော်ထွေးရဲ့ ရုပ်အလောင်းကို ရွာသာယာကျေးရွာပကဖအဖွဲ့ဆီကနေ အောက်တိုဘာ ၁၂ ရက်မနက် ၁၀ နာရီကျော်မှာသွားယူခဲ့တာလို့လည်း အထက်ပါအမျိုးသားကပြောပါတယ်။

ဒါ့အပြင် ကိုဇော်ထွေးမှာ ဇနီးဖြစ်သူနဲ့ အသက် ၅ နှစ်နဲ့ ၈နှစ်အရွယ်သားလေး ၂ ဦး ကျန်ရစ်ခဲ့ပြီး ဒီသေဆုံးမှုနဲ့ ပတ်သက်ပြီး ရွာသာယာကျေးရွာပကဖအဖွဲ့ဝင်တွေကို သက်ဆိုင်ရာတာဝန်ရှိအဖွဲ့တွေက အောက်တိုဘာ ၁၇ ရက်ဒီကနေ့အထိအရေးယူမှုတစုံတရာ မရှိသေးဘူးလို့လည်း အထက်ပါအမျိုးသားက ဆိုပါတယ်။

အဆိုပါသေဆုံးမှုဖြစ်စဥ်ကြောင့် ရွာသာယာကျေးရွာပကဖ အပေါ်ဘယ်လိုဆောင်ရွက်သွားမယ်ဆိုတာနဲ့ပတ်သက်ပြီး အင်းတော်မြို့နယ်ပကဖအဖွဲ့ကို မြေလတ်အသံက လူမူကွန်ရက်မက်ဆင်ဂျာကတဆင့် ဆက်သွယ်မေးမြန်းထားပေမယ့် တစုံတရာအကြောင်းပြန်လာတာမရှိသေးပါဘူး။

ပြီးခဲ့တဲ့ ၂၀၂၃ နှစ်စပိုင်းကလည်း အင်းတော်မြို့နယ်ပလဖဆီမှာ မူးယစ်ဆေးဝါးမှုနဲ့ အချုပ်ကျနေတဲ့ အချုပ်သားတဦး ထွက်ပြေးနေတယ်ဆိုပြီး ပလဖတာဝန်ခံရဲ့ဘော်ဒီကပ်ဖြစ်သူရဲဘော် အမျိုးသမီးက ပွိုင့်ဖိနပ်နဲ့ရင်ဘတ်ကို ဆောင့်ကန်လိုက်ချိန် သေဆုံးခဲ့တယ်လို့ဒေသခံတွေဆီက သိရပါတယ်။

စာတည်း – လင်း

အင်းတော်၊ ဇွန် ၂၃၊ ၂၀၂၅။

စစ်ကိုင်းတိုင်း၊ အင်းတော်မြို့နယ်၊ နဘားကျေးရွာ နဘားလမ်းစုံက ဘုန်းကြီးကျောင်းကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ဘုန်းကြီးကျောင်းပျက်စီးပြီး အမျိုးသမီး ၁ ဦး ထိခိုက်ဒဏ်ရာရခဲ့တယ်လို့ Indaw Revolution-IR ဆီက သိရပါတယ်။

ဇွန် ၂၂ ရက် မနက်အစောပိုင်း ၅ နာရီ ၄၅ မိနစ်မှာ ၁ ကြိမ် ၅ နာရီ ၅၁ မိနစ်မှာ ၁ ကြိမ် တံတားဦးလေတပ်က ဂျက်ဖိုက်တာ ၁ စီးက ပေါင် ၂၀၀ ဗုံး ၂ လုံးကြဲချတာကြောင့် နဘားလမ်းစုံကဘုန်းကြီးကျောင်းပေါ်ကျရောက်ပေါက်ကွဲခဲ့တယ်လို့ ဆိုပါတယ်။

“ကြဲသွားတာက နဘားလမ်းစုံမှာ အောင်မင်္ဂလာဘုန်းကြီးကျောင်းဆိုတာရှိတယ်၊ အဲ့ဒီဘုန်းကြီးကျောင်းဝန်းထဲကို ကြဲသွားတာ၊ ဘုန်းကြီးကျောင်းဆောင်တွေကတော့ ထိခိုက်ပျက်စီးသွားတယ်၊ အမျိုးသမီးတဦးတော့ ထိခိုက်သွားတယ်၊ သူ့ရဲ့ အသက်အရွယ်တော့ မသိရဘူး၊ လမ်းသွားလာလာ အမျိုးသမီးတဦး မှန်စထိသွားတာ၊ ဘုန်းကြီးကျောင်းအဆောက်အဦက မှန်စက ခေါင်းကိုထိသွားတာ၊” လို့ Indaw Revolution-IR တာဝန်ရှိသူတဦးကပြောပါတယ်။

အဲ့ဒီဘုန်းကြီးကျောင်းဟာ စစ်ကောင်စီတပ်တွေအထိုင်ချဖူးတဲ့နေရာဖြစ်ပြီး အဲ့ဒီနေရာတဝိုက်ကို လေကြောင်းတိုက်ခိုက်မှုတွေလည်းရှိခဲ့တာကြောင့် ဘယ်သူမှနေထိုင်နေတာမရှိဘူးလို့ ဆိုပါတယ်။

နဘားလမ်းစုံဟာ အိမ်ခြေ ၇၀၀ ရှိတဲ့နဘားရွာနဲ့ဆို ၇ ဖာလုံလောက်ဝေးပြီး မန္တလေး-မြစ်ကြီးနား လမ်းမပေါ်မှာတည်ရှိတာဖြစ်ပါတယ်။

ပြီးခဲ့တဲ့နှစ် ဩဂုတ် ၁၆ ရက်မှာ စစ်ကိုင်းတိုင်း အင်းတော်မြို့နယ် နဘားလမ်းစုံက ကာကင်းစခန်းကို KIA တပ်တွေနဲ့ တော်လှန်ရေးတပ်တွေ တိုက်ခိုက်သိမ်းပိုက်ခဲ့တယ်လို့ သိရပါတယ်။

စာတည်း – လင်း

အင်းတော်၊ ဧပြီ ၂၊ ၂၀၂၅။

စစ်ကိုင်းတိုင်း၊ အင်းတော်မြို့ပေါ်ကို စစ်ကောင်စီက တိုက်ခိုက်ရေးလေယာဉ်နဲ့ ၂ ရက်ဆက်တိုက် ဗုံးကြဲတိုက်ခိုက်တာကြောင့် ဒေသခံ ၂ ဦးသေဆုံးပြီး ၈ ဦးဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။

အင်းတော်မြို့ပေါ်ရှိ မြို့မဘုန်းတော်ကြီးကျောင်းအနီးက ဘုရားကုန်းနဲ့ အနီးပတ်ဝန်းကျင်ကို ဧပြီ ၁ ရက် နေ့လယ် ၁၂ နာရီနဲ့ ဧပြီ ၂ ရက် မနက် ၁၀ နာရီတို့မှာ ဗုံးကြဲတိုက်ခိုက်နေတာလို့ဆိုပါတယ်။

“၁ ရက်နေ့က ၄လုံးကြဲတယ်။ ဒီနေ့(ဧပြီ ၂ရက်)မနက်လည်း ဆက်တိုက်ကြဲနေတယ်။ သေဆုံးသူတွေက ဘယ်သူလဲဆိုတာကို အတိကျမသိရဘူး။ ဘုရားကုန်းက စစ်တပ်ကုန်းနဲ့နီးတယ်။ အဲ့မှာရပ်တော်မူ ၁ ပါး ပျက်စီးသွားတယ်။”လို့ အင်းတော်မြို့ခံ အမျိုးသားတဦးက ပြောပါတယ်။

ဗုံးကြဲချိန်အတွင်းသေဆုံးခဲ့သူ ၂ ဦးရဲ့အချက်အလက်တွေကိုတော့ အတည်မပြုနိုင်သေးဘူးလို့ ဆိုပါတယ်။

အခုဗုံးကြဲတိုက်ခိုက်တဲ့နေရာဟာ ၂၀၂၄၊ သြဂုတ်က မြို့သိမ်းတိုက်ပွဲဖြစ်ခဲ့တဲ့နေရာတွေဖြစ်တာကြောင့် အဲဒီနေရာမှာ လက်ရှိနေထိုင်ကြတဲ့သူတွေဟာ စစ်တပ်ထောက်ခံသူတွေ၊ ဆက်စပ်သူတွေ၊ စစ်တပ်မိသားစုတွေ၊ ရဲမိသားစုတွေနေထိုင်ကြတယ်လို့ဆိုပါတယ်။

“တိုက်ပွဲဖြစ်တုန်းက မြို့ခံပြည်သူတွေထွက်ပြေးလာတဲ့အခါ သူတို့(စကစနဲ့ဆက်စပ်သူ)တွေက မထွက်ဘဲနဲ့ကျန်ခဲ့လိုက်တာ။ ပစ်မှတ်မှားတာလားမသိ။ အဲ့နေရာကလူတွေ ထိခိုက်သွားတာ။”လို့ အထက်ပါအမျိုးသားက ပြောပါတယ်။

ပြီးခဲ့တဲ့မတ် ၂၈ ရက်ကလည်း ချောင်းဦးမြို့နယ်အရှေ့မြောက်ခြမ်းမှာ ၁ ကြိမ်၊ ချောင်းဦးမြို့နယ်နဲ့ မြင်းမူမြို့နယ်၊ ရေပိုးစားရွာမှာ ၁ ကြိမ် စစ်ကောင်စီတပ်ဖွဲ့ဝင်တွေက စက်တပ်လေထီးနဲ့ ဗုံးကြဲချခဲ့တယ်လို့ သိရပါတယ်။

စစ်အာဏာသိမ်းချိန်ကနေ ၂၀၂၅ ဧပြီ ၁ ရက်ထိ စစ်ကောင်စီတပ်ဖွဲ့ဝင်တွေနဲ့ လက်းပါးစေတွေကြောင့် သေဆုံးခဲ့သူစုစုပေါင်း ၆,၄၇၆ ဦးရှိပြီလို့ နိုင်ငံရေးအကျဉ်းသားများကူညီစောင့်ရှောက်ရေးအသင်း – AAPP ကထုတ်ပြန်ပါတယ်

စာတည်း – လင်း