သေဆုံး

ရွှေဘို၊ မတ် ၆၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်မှာ ဆိုင်ကယ်စီးလာတဲ့ စစ်သားနဲ့ ပျူစောထီးတဦး မတ်လ ၅ ရက်က မိုင်းထိခဲ့တာကြောင့် ပျူစောထီးတဦးသေကာ စစ်သားတဦး ပြင်းထန်ဒဏ်ရာ ရရှိသွားတယ်လို့ ဗိုလ်ကျားရိုင်း-ရွှေဘို LPDF က သတင်းထုတ်ပြန်ထားပါတယ်။

ရွှေဘိုမြို့နယ် ညောင်ကိုင်းရွာကနေ စစ်တပ်စခန်းချထားတဲ့ ဇီးဖြူကုန်းရွာကို အပြန် မနေ့နေ့လယ် ၁၂ နာရီလောက်မှာ ဂျိုးမြေဇင်းရွာနဲ့ မြို့လှရွာကြားမှာ မိုင်းမိခဲ့တာ​လို့ သိရပါတယ်။

“ဆိုင်ကယ်က စုတ်ပြတ်သွားပြီးတော့ ပျူကတော့ ပွဲချင်းပြီး သေသွားတယ်။ စစ်သားကတော့ ခြေတဖက် ပြတ်သွားတယ်။ သေနတ်ဖောက်သံလည်း မကြားရဘူး။ တနာရီလောက်ကြာတော့မှ အလောင်းနဲ့ ဒဏ်ရာရစစ်သားကို လာကောက်သွားတယ်” လို့ ဗိုလ်ကျားရိုင်း – ရွှေဘိုရဲ့တာဝန်ခံ ရဲဘော်ဗလကြီးက ပြောပါတယ်။

ခြေတဖက် ပြတ်သွားသူဟာ တပ်ကြပ်ငစိုးဆိုသူ ဖြစ်ပြီး သေဆုံးတဲ့ ပျူစောထီးဟာ တည်သီးတောရွာသား ဝေဠုဆိုသူ ဖြစ်တယ်လို့ သူက ဆက်ပြောပါတယ်။

ဗိုလ်ကျားရိုင်း-ရွှေဘို (LPDF) အဖွဲ့ ၊ ဗိုလ်ဂျပန်ကြီး (T.T.T) – SHWEBO (LPDF) အဖွဲ့၊ မတစ်ထောင်(တစ်ကောင်ဘွား ) – ဒီပဲယင်းအဖွဲ့နဲ့ ရွှေဘိုမြို့နယ် တိုက်နယ် -၂ မဟာမိတ်အင်အားစုတွေက ပူးပေါင်းခဲ့တာလို့ သိရပါတယ်။

ဗိုလ်ကျားရိုင်း ရွှေဘိုနဲ့ပူးပေါင်းအဖွဲ့ဟာ ဖေဖေါ်ဝါရီလ ၂၁ ရက်ကလည်း ရွှေဘိုမြို့နယ်ကို စစ်သားနဲ့ပျူစောထီး အင်အား ၇၀ ကျော်လောက်က ပေါက်ချိုင်ကျေးရွာကို စစ်ကြောင်းထိုးမီးရှို့နေချိန် တိုက်မိုင်း၊ ဆွဲမိုင်း၊ လက်နက်ကြီးတွေ၊ ဒရုန်းတွေနဲ့ တိုက်ခိုက်ခဲ့လို့ စစ်သားနဲ့ပျူစောထီးတွေ သေ​ဆုံးဒဏ်ရာ ရခဲ့ပါသေးတယ်။

စာတည်း – 007

စစ်ကိုင်း၊ မတ် ၃၊ ၂၀၂၃။

စစ်ကိုင်းမြို့နယ်၊ ရွာသစ်ကြီးကျေးရွာမှာ နေထိုင်တဲ့ စစ်ကောင်စီလမ်းပြ ပျူစောထီးတပ်ဖွဲ့ဝင် တဦးကို သူနေထိုင်ရာ ရွာကအိမ်မှာပဲ ဒေသကာကွယ်ရေးပူးပေါင်းတပ်ဖွဲ့က သွားရောက်ပစ်ခတ်ခဲ့လို့ သေဆုံးသွားခဲ့တယ်လို့ သိရပါတယ်။

ရွာသစ်ကြီးရွာသား ပျူစောထီး ဦးအေးလွင်ဟာ စစ်ကောင်စီတပ်ဖွဲ့တွေနဲ့ ပူးပေါင်းပြီး သူနဲ့အဆင်မပြေတဲ့ ပြည်သူတွေကို ဖမ်းဆီးစေခိုင်းတာတွေ ပြုလုပ်နေလို့ ထွက်ပြေးနေရတဲ့ ပြည်သူတွေရှိသလို ဖမ်းဆီးခံရတဲ့ ပြည်သူတွေလည်း ရှိတယ်လို့လည်း ယက္ခညီနောင် PDF – Mandalay တပ်ဖွဲ့ဝင်တဦးက ပြောပါတယ်။

“ကျနော်တို့ ပျူစောထီး အေးလွင်ကိုပဲ ပစ်ခဲ့တာပါ။ ကျန်တဲ့သူတွေကို ဘာမှမလုပ်ခဲ့ပါဘူး။ ကျနော်တို့အနေနဲ့ကတော့ စစ်ကောင်စီဒေါက်တိုင် ပြည်သူတွေကို အမြဲဒုက္ခပေးနေတဲ့ ပျူတွေ၊ ဒလန်တွေကို နယ်စီးမခြားဘဲ တိုက်ခိုက်ရှင်းလင်းသုတ်သင်သွားပါမယ်” လို့ ဆိုပါတယ်။

ဖေဖော်ဝါရီ ၂၈ ရက်နေ့က ပြုလုပ်ခဲ့ပေမဲ့လည်း ရဲဘော်တွေ ဘေးကင်းရာကို မရောက်ရှိသေးတဲ့အတွက် မတ်လ ၃ ရက် ဒီကနေ့မှ ထုတ်ပြန်ရခြင်း ဖြစ်တယ်လို့လည်း ဆိုပါတယ်။

ယင်းပစ်ခတ်မှုကို ယက္ခညီနောင် ပြည်သူ့ကာကွယ်ရေးတပ်ဖွဲ့ ၊ PRFK (Kse)၊ Mahar (SGG) တို့က ပူးပေါင်းဆောင်ရွက်ခဲ့ကြတယ်လို့ သိရပါတယ်။

မတ်လ (၁) ရက်နေ့ကလည်း ယက္ခညီနောင် PDF-Mandalay တပ်ဖွဲ့ဟာ စစ်ကိုင်းမြို့နယ်ထဲက ကျေးရွာတရွာကို ဝင်ရောက်သောင်းကျန်းနေတဲ့ အင်အား (၈၀) နီးပါးရှိတဲ့ စစ်ကောင်စီတပ်ဖွဲ့ကို (၆၀)မမ လက်နက်ကြီးတွေနဲ့ သွားရောက်ပစ်ခတ်ခဲ့ပါသေးတယ်။

စာတည်း – 007

ဝက်လက်၊ မတ် ၃၊ ၂၀၂၃။

စစ်ကိုင်းတိုင်း၊ ဝက်လက်မြို့နယ်၊ ကျီးကန်ရွာ မီးရှို့ခံနေရလို့ မီးငြိမ်းသတ်သွားရာကနေ စစ်ကောင်စီတပ်သားတွေနဲ့ တွေ့ပြီး ရဲဘော် ၅ ဦး ကျဆုံးသလို ပြည်သူ ၅ ‌ဦး သေဆုံးခဲ့တယ်လို့ နွေမုန်တိုင်း ပကဖ အဖွဲ့ဆီက သိရပါတယ်။

မတ်လ ၂ ရက်နေ့ မနေ့ကနေ့လယ် ၁၁ နာရီခန့်က စစ်ကောင်စီတပ်သားတွေ မီးရှို့နေတဲ့ရွာကို မီးငြိမ်းဖို့သွားရာက စစ်သားတွေနဲ့ ထိပ်တိုက်တွေ့ချိန်မှာ အပြန်အလှန်ပစ်ခတ်ရင်း ရဲဘော် ၅ ဦးနဲ့ ပြည်သူ ၅ ဦး ကျဆုံးခဲ့တာလို့ နွေမုန်တိုင်း ပကဖ အဖွဲ့ ရဲဘော်တဦးက ပြောပါတယ်။

“စစ်ကောင်စီတပ်သား‌တွေ ထွက်ပြီဆိုပြီး ဖမ်းဆီးခံထားရတဲ့ ပြည်သူ‌တွေက ပြောတာ။ ဆိုက်ဝါးလွှတ်လိုက်တာလို့ ကျနော်တို့က ထင်တာပဲ။ ကျနော်တို့က မီးငြိမ်းဖို့ ရွာထဲပတ်တာ။ စစ်**တွေက ဝင်လာတာသိရဲ့သားနဲ့ ကျနော်တို့ကို မပစ်သေးဘူး။ ကျနော်တို့ကတဖြည်းဖြည်းတိုးရင်းနဲ့ အိမ်တွေထဲ ဝင်သွားတာ။ သူတို့က ပြည်သူတွေ ဖမ်းထားပြီးတော့ မရှိဘူးလို့ ပြောခိုင်းထားပုံ ထင်ပါတယ်။ ကျနော်တို့ကို ဝိုင်းထားတာ။ သူတို့ဘက်က သေနတ်တွေနဲ့ ကောက်ချိန်တဲ့အချိန်မှာ ခုန်ချရတယ်။ မှန်တဲ့သူတွေလည်း မှန်တယ်။ ကျနော်တို့က အကုန်ပြေးရတာ။ ၁၀ ယောက်ကတော့ အကျအဆုံး ရှိတယ်” လို့ ရဲဘော်က ဆိုပါတယ်။

ကျဆုံးတဲ့ ရဲဘော် ၅ ဦးက နွေမုန်တိုင်း ပကဖ အဖွဲ့ ကျီးကန်တောင်ရွာက ဖြစ်ပြီး ကျီးကန်ရွာက အမျိုးသား ၅ ဦးလည်း သေဆုံးခဲ့ပါတယ်။ ရဲဘော် ၂ လောင်းကတော့ သေနတ်ဒဏ်ရာနဲ့ သေပြီး ကျန်တဲ့ ရဲဘော် ၃ ဦးနဲ့ ပြည်သူ ၅ ဦးက ကြိုးတွေနဲ့ တုတ်ပြီး မီးရှို့အသတ်ခံလိုက်ရတယ်လို့ သိရပါတယ်။

“သေဆုံးသူ အ‌ကုန်လုံး သင်္ဂြိုဟ်ပြီးသွားပါပြီ။ ကောင်းတဲ့ရုပ်အလောင်းကိုတော့ သူ့မိသားစုတွေနဲ့ သင်္ဂြိုလ်ပေးလိုက်ပါတယ်။ ဒီနေ့ ၁၀ နာရီမှာ သင်္ဂြိုလ်ဖြစ်ခဲ့ပါတယ်” လို့ ဆိုပါတယ်။

နွေမုန်တိုင်း ပကဖ အဖွဲ့က ရဲဘော်မင်းမင်း၊ ရဲဘော်ဘိုသန်း၊ ရဲဘော်နိုင်မျိုးမင်း ရဲဘော်ကိုဦး၊ ကျီးကန်ရွာသား စိတ်ရောဂါဝေဒနာရှင် ဦးစိုးတင့် တို့ဖြစ်ကြပြီး ကျန်သူတွေကိုတော့ မသိရသေးဘူးလို့ ဆိုပါတယ်။

စာတည်း – 007

ပခုက္ကူ၊ မတ် ၃၊ ၂၀၂၃။

မကွေးတိုင်း၊ ပခုက္ကူမြို့မှ‌ ရေစကြိုမြို့ပေါ် ကျောင်းများအတွက် မေးခွန်းသယ်၍ ပြန်လာတဲ့ အိမ်စီးကား ၃ စီး ရေစကြို့မြို့အပြင် ဘက်စုံကွေ့အနား မိုင်းဆွဲခံရပြီး စစ်သားအချင်းချင်း ရမ်းသမ်းပစ်ခတ်မိခဲ့တယ်လို့ ပြည်သူ့ကာကွယ်ရေးတပ်ဖွဲ့-ရေစကြိုမြို့နယ် ဆီက သိရပါတယ်။

မတ်လ ၂ ရက် မနေ့က ညပိုင်း ၇ နာရီလောက်မှာ ပြည်သူ့ကာကွယ်ရေးတပ်ဖွဲ့-ရေစကြိုမြို့နယ်ပကဖ က မိုင်း ၆ လုံးနဲ့ တိုက်ခိုက်ခဲ့ပြီး စစ်သားအချင်းချင်း ရမ်းသမ်းပစ်ခတ်မိရာမှ စစ်သား ၂ ဦး သေဆုံးခဲ့တယ်လို့ ပြည်သူ့ကာကွယ်ရေးတပ်ဖွဲ့-ရေစကြိုမြို့နယ် ပကဖ တာဝန်ခံက ပြောပါတယ်။

“မေးခွန်းသယ်လာတဲ့ စစ်ကောင်စီ တပ်သားတွေ ပါလာတဲ့ Super Custom ၁ စီး Eurofect ကား ၁ စီး နဲ့ CRV ကား ၁ စီး ၃ စီးကို ရေစကြိုမြို့အပြင်ဘက် ဘက်စုံကွေ့အနားရောက်တဲ့အချိန် ပဒေသာမိုင်း ၃ လုံးတွဲ ၂ တွဲ ၆ လုံး နဲ့ မိုင်းဆွဲတိုက်ခိုက်ခဲ့တယ်” လို့ တာဝန်ခံက ပြောပါတယ်။

တိုက်ခိုက်မှုဖြစ်စဉ်နဲ့ပတ်သက်ပြီး “အဲဒီမှာ ရှေ့ဆုံးကား ၂ စီးက ပျက်စီးပြီး နေရာမှာတင် ထိုးရပ်သွားတယ်။ အထိအခိုက်ကတော့ ကျနော်တို့ ဆက်လက်စုံစမ်းနေတုန်းပါ။ မိုင်းဆွဲပြီးတဲ့အချိန်မှာ ရဲဘော်တွေက မပြေးသေးပဲနဲ့ ဝတ်ပြီး စောင့်ကြည့်နေခဲ့တယ်။ နောက်ကားက ပါလာတဲ့ စစ်ခွေးတွေ ရမ်းသမ်းပြီးပစ်တာ အချင်းချင်းပစ်မိပြီး ၂ ယောက် သေတယ်” လို့ ဆက်ပြောပါတယ်။

အဲ့ဒီစစ်သားတွေဟာ မေးခွန်းသယ်တဲ့ကားတွေကို လုံခြုံရေးယူတဲ့အနေနဲ့ လိုက်လာကြတာ ဖြစ်ပြီး၊ မိုင်းဆွဲခံရပြီး ကားတွေက မောင်းလို့ရတာနဲ့ ရေစကြိုမြို့ပေါ်ကို မောင်းသွားတယ်လို့ ဆက်ပြောပါတယ်။

ပြီးခဲ့တဲ့ ဖေဖော်ဝါရီလ ၂၄ ရက်ကလည်း ရေစကြိုမြို့‌နယ်၊ အောင်မိုးလမ်းခွဲအနီးက ပျူစောထီးရွာဖြစ်တဲ့ ဇီးတောရွာကို ဝင်ရောက်စီးနင်းတိုက်ခိုက်ခဲ့ပြီး စစ်ကူလာတဲ့ ခမရ ၂၅၈ တပ်က ကားကိုပါ ပြည်သူ့ကာကွယ်ရေးတပ်ဖွဲ့-ရေစကြိုမြို့နယ် ပကဖ အဖွဲ့က မိုင်းဆွဲတိုက်ခိုက်ခဲ့ရာ စစ်ကောင်စီဘက်က သေဆုံးမှုတွေ များခဲ့တယ်လို့ သိရပါတယ်။

စာတည်း – 007