သုံးဆယ်

ပဲခူး၊ မေ ၂၂၊ ၂၀၂၃။

ပဲခူးတိုင်းဒေသကြီး၊ သာယာဝတီမြို့နယ်၊ သုံးဆယ်မြို့၊ ရွာသစ်ရွာက စစ်ကောင်စီခန့်ရာအိမ်မှူးနဲ့ ဇနီးဖြစ်သူ ပစ်သတ်ခံခဲ့ရတယ်လို့ သိရပါတယ်။

မေလ ၂၁ ရက် ည ၈ နာရီ ၄၀ မိနစ်ခန့်မှာ နေအိမ်မှာရှိနေတဲ့ ရာအိမ်မှူး သန်းထွန်းအောင် ၄၅ နှစ် နဲ့ ဇနီးဖြစ်သူ မစိန်မြင့်အသက် ၄၀ ကျော်တို့ကို ဝင်ရောက်ပစ်ခတ်ရှင်းလင်းခဲ့တာလို့ သာယာဝတီဂဠုန်တပ်ဖွဲ့ တာဝန်ရှိသူက ပြောပါတယ်။

“သူတို့ကတော့ NLD ထောက်ခံသူတွေကို PDF လို့ စွပ်စွဲပြီး ရဲခေါ်ဖမ်းဆီး စစ်ဆေးခိုင်းတာ၊ သန်းထွန်းအောင်က ကျေးရွာ မြစိမ်းရောင် (မြစိမ်းရောင်ချေးငွေအသင်း) ဥက္ကဌဆိုတော့ သူ့မိန်းမကလည်း သူနဲ့အမြင်မကြည်သူရှိရင် ချေးငွေ မချေးပေးတာတွေလုပ်တယ်။ စကစ အားကိုးနဲ့ ရွာသားတွေအပေါ် နိုင်ထက်စီးနင်းလု​ပ်တာတွေရှိတယ်။ သူတို့ကိုရှင်းချိန် ပြန်ခုခံတာတွေမရှိဘူးလို့ သိရတယ်” လို့ ပြောပါတယ်။

သေနတ်နဲ့ပစ်ခံရလို့ ရာအိမ်မှူးသန်းထွန်းအောင်မှာ နေရာတွင်သေဆုံးပြီး ဇနီးဖြစ်သူကတော့ ဆေးရုံအပို့ လမ်းမှာတင် သေဆုံးသွားတယ်လို့ သိရပါတယ်။

သူတို့နှစ်ဦးပစ်သတ်ခံရပြီးနောက် မေလ ၂၂ ရက် ဒီကနေ့မနက်ပိုင်းမှာ စစ်ကောင်စီအဖွဲ့တွေက ရွာသစ်ရွာဘက်ကို ဆင်းလာတယ်လို့ သိရကာ၊ ရွာကိုတော့ မရောက်သေးဘူးလို့ ဆိုပါတယ်။

ဒီပစ်ခတ်မှုကို သာယာဝတီဂဠုန်တပ်ဖွဲ့ဝင်တွေနဲ့ မင်းလှ PDF အဖွဲ့တွေက ပူးပေါင်းရှင်းလင်းခဲ့တာ ဖြစ်တယ်လို့ သိရပါတယ်။

သာယာဝတီမြို့နယ်၊ ချမ်းသာကုန်းနဲ့ညောင်လေးပင်ရွာကြားမှာ လောင်းကစားဝိုင်းကို PDF တွေက မိုင်းခွဲသတိပေးချိန် PDF တွေကို စကေဘာနဲ့ပြေးထိုးတဲ့ ပျူစောထီး ဘိုကျောက်ဆိုသူလည်း ပြီခဲ့တဲ့ ဖေဖော်ဝါရီလ ၁၄ ရက်ညမှာ သေနတ်နဲ့ပစ်ခံရပြီး ဒဏ်ရာပြင်းထန်ရရှိခဲ့ပါသေးတယ်။

စာတည်း – လင်း

ပဲခူး၊ မေ ၆၊ ၂၀၂၃။

ပဲခူးတိုင်း၊ သာယာဝတီခရိုင်၊ သုံးဆယ်မြို့၊ ဗေဒင်ကုန်းရပ်ကွက်မှာ နေထိုင်ကြတဲ့ မိသားစု ၁၈ စုရဲ့ နေအိမ် ၁၈ လုံးကို သမဝါယမအသင်းစုရဲ့မြေနဲ့ မလွတ်ကင်းလို့ဆိုပြီး မေလ ၁၀ ရက်နေ့ နောက်ဆုံးထား ဖြိုဖျက်ဖယ်ရှားပေးဖို့ ခြိမ်းခြောက်ပြောဆိုလာတဲ့အတွက် ဖျက်ပေးနေရတယ်လို့ ဒေသခံတွေက ပြောပါတယ်။

ယနေ့ မေလ ၆ ရက်နေ့မှာတော့ ဖယ်ရှားခိုင်းခံရသူတွေထဲက မိသားစုဝင် ၇ စုက နေအိမ်တွေကို စတင်ဖျက်သိမ်းနေပြီး လက်ရှိမှာတော့ ၂ အိမ်ဖျက်ပြီးသွားပြီလို့ သိရပါတယ်။

“သူတို့တွေက ဒီနေရာမှာနေလာတာ နှစ်ပေါင်း ၅၀ ကျော်ရှိပြီ။ သူတို့နေအိမ်တွေကို သမဝါယပိုင်မြေထဲမှာ ပါနေတယ်။ ဖယ်ရှားပေးရမယ်။ မဖယ်ရှားရင်ဖမ်းဆီးပြီး ထောင်ချလိုက်မယ်။ ထောင်တွေကို ချဲ့ပေးရမလားလို့ ပြောခဲ့တယ်။ လက်မှတ်ကိုလည်း အတင်းအဓမ္မထိုးခိုင်းလို့ထိုးခဲ့ရတယ်”လို့ ဖယ်ရှားခံရသူတွေနဲ့နီးစပ်သူ တဦးက ဆိုပါတယ်။

လက်ရှိမှာ အဆိုပါနေရာကနေ ဖယ်ရှားပေးရမယ့် မိသားစုတွေမှာ နစ်နာကြေးပိုက်ဆံတပြားမှမရရှိသလို အိမ်တွေကိုပါ ဖြိုဖျက်ပေးရမှာဖြစ်လို့ အခက်အခဲတွေအများကြီးဖြစ်လာနိုင်တယ်လို့ သူကဆက်ပြောပါတယ်။
စစ်ကောင်စီတပ်သား ၄ ဦး၊ သုံးဆယ်မြို့မရဲစခန်းမှူး၊ မြေစာရင်းဦးစီး၊ သမဝါယမအသင်းစု ဥက္ကဋ္ဌ၊ ထွေ/အုပ်ဦးစီးမှူး၊ ရပ်ကွက်အုပ်ချုပ်ရေးမှူးတို့က ဧပြီလ ၂၆ ရက်နေ့မှာ မိသားစု ၁၈ စုကို မြို့နယ်ထွေအုပ်ရုံးကို ခေါ်ကာ ဖယ်ရှားဖို့လက်မှတ်ထိုးခိုင်းပြီး ဖိအားပေးခြိမ်းခြောက်ပြောဆိုခဲ့တာဖြစ်တယ်လို့ ပြောကြပါတယ်။

“ကျနော်တို့က လက်လုပ်လက်စားတွေပါ။ တနေ့လုပ်မှ တနေ့စားနေရတာ။ အိမ်တွေဖြိုဖျက်ပြီး ဖယ်ပေးလိုက်ရင် တော်တော်လည်း ဒုက္ခတွေဖြစ်သွားမယ်။ မဖယ်ရှားရင်လည်း အသရော်ရွာက သမချေးငွေပြန်မဆပ်တဲ့ ကလေးတွေနဲ့အမျိုးသမီးတွေ ဖမ်းဆီးခံရတာကို နမူနာကြည့်ထားဆိုပြီး ခြိမ်းခြောက်ပါတယ်” လို့ ဆိုပါတယ်။

လက်ရှိဖယ်ရှားပေးရမယ့်မိသားစုတွေဟာ ၁၉၅၂ ခုနှစ်ကတည်းက သုံးဆယ်မြို့ သူဌေးဦးတင်စွမ် ဆန်စက်မှာ အလုပ်သမားတွေအဖြစ် လုပ်ကိုင်ခဲ့ကြတာကြောင့် လုပ်သားတန်းလျားအဖြစ်ထားပြီး နေခဲ့ကြသူတွေ ဖြစ်တယ်လို့ သိရပါတယ်။

အဲဒီနောက် ဦးတင်စွမ်က သမဝါယမအသင်းစုကို အဆိုပါမြေနေရာကို ရောင်းချခဲ့ပေမယ့် လုပ်သားတန်းလျားမှာ နေထိုင်ကြသူတွေဟာ မပြောင်းရွေ့ပဲ အဲဒီနေရာမှာဘဲ နေထိုင်ခဲ့ကြတာဖြစ်တယ်လို့ သိရပါတယ်။

ဒါ့အပြင် NLD လက်ထက်ကချေးယူခဲ့တဲ့ သမဝါယမငွေကို ပြန်မဆပ်နိုင်သေးလို့ဆိုကာ မေလ ၅ ရက်နေ့က သာယာဝတီမြို့နယ်၊ အသရော်ကျေးရွာက အမျိုးသမီး ၁၃ ဦးနဲ့ အမျိုးသား ၂ ဦးကို စစ်ကောင်စီတပ်သားတွေက ထော်လာဂျီနဲ့သာယာဝတီမြို့ပေါ်ကို ဖမ်းခေါ်ခဲ့တာမှာ မိခင်ဖြစ်သူနဲ့အတူ နို့စို့အရွယ်ကလေးငယ်တချို့လည်း ပါသွားခဲ့တယ်လို့ သိရပါတယ်။

စာတည်း – 007

ပဲခူး၊ ဧပြီ ၁၆၊ ၂၀၂၃။

ပဲခူးတိုင်းအနောက်ခြမ်း၊ သုံးဆယ်မြို့၊ ရန်ကုန်-ပြည်ကားလမ်းမဘေးရှိ WE LOVE THONZE သင်္ကြန်ရေကစားမဏ္ဍပ်အနီးမှာ ဧပြီ ၁၅ ရက်၊ ည ၉ နာရီခန့်က ဗုံးပေါက်ကွဲမှုဖြစ်ပွားခဲ့ရာ လုံခြုံရေးရဲ ၁ ဦးသေဆုံးပြီး ၄ ဦး ဒဏ်ရာရရှိခဲ့တယ်လို့ သိရပါတယ်။

အဆိုပါ တိုက်ခိုက်မှုကို သာယာဝတီဂဠုန်တပ်ဖွဲ့က ဖော်ဆောင်ခဲ့တာဖြစ်တယ်လို့ အဲဒီအဖွဲ့ရဲ့ စစ်ရေးတာဝန်ခံ ကိုဥက္ကာက ဆိုပါတယ်။

“အဲ့ဒီနေရာမှာ ရဲဂိတ်ပဲရှိတာ၊ သေတာလည်းရဲပဲ၊ သင်္ကြန်မဏ္ဍပ်နဲ့လှမ်းတဲ့နေရာကိုလုပ်တာဆိုတော့ ပြည်သူလူထုတော့ မထိခိုက်ပါဘူး။ မိုင်းကလက်လုပ်မိုင်းဆိုပေမယ့် အလုံးကြီးတယ်။ ပေါက်ကွဲအားပိုပြင်းတယ်” လို့ စစ်ရေးတာဝန်ခံ ကိုဥက္ကာကပြောပါတယ်။

သင်္ကြန်ရေကစားမဏ္ဍပ်တွင် ညပိုင်းဖျော်ဖြေရေးလုပ်နေတဲ့အချိန် ဗုံးပေါက်ကွဲခဲ့တာဖြစ်လို့ စစ်ကောင်စီဘက်က ရမ်းသမ်းပစ်တာတွေမျိုးတွေလုပ်ပြီး အနားမှာရှိတဲ့ ပြည်သူတချို့ကို ရိုက်နှက်ဖမ်းချုပ်တာတွေ လုပ်ဆောင်ခဲ့သေးတယ်လို့ သိရပါတယ်။

အဆိုပါစစ်ကောင်စီတပ်ဖွဲ့ဝင်တွေကို ဖောက်ခွဲတိုက်ခဲ့တဲ့ သာယာဝတီဂဠုန်တပ်ဖွဲ့မှာ ဧပြီ ၁၃ ရက်က သုံးဆယ်မြို့မှာလုပ်တဲ့ လောင်ကစားဝိုင်းကိုမိုင်းခွဲတိုက်ခိုက်ခဲ့ပြီး၊ ဦးဆောင်လုပ်ကိုင်တဲ့ ပျူစောထီးတဦး ပြင်းထန်ဒဏ်ရာနဲ့ ဆေးကုသနေတယ်လို့ သိရပါတယ်။

စာတည်း – လင်းဇေ

ပဲခူး၊ ဧပြီ ၁၃၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ သုံးဆယ်မြို့နယ် သင်ကန်းကုန်းရွာနဲ့ မြောက်ပန်းဆွဲရွာအကြား ပျူစောထီးတွေ ဦးဆောင်လုပ်နေတဲ့ လောင်းကစားဝိုင်းကို ဧပြီ ၁၂ ရက် မနေ့ညပိုင်းမှာ မိုင်းဆွဲတိုက်ခိုက်ခဲ့တယ်လို့ သာယာဝတီဂဠုန်တပ်ဖွဲ့က ဒီမနက်ပိုင်းမှာ ထုတ်ပြန်ပါတယ်။

စစ်ကောင်စီတပ်က လုံခြုံရေးယူပေးပြီးလုပ်တဲ့ အဲ့ဒီလောင်းကစားဝိုင်းကို ထိုးသားပြန်တဲ့အချိန်ထိ စောင့်ဆိုင်းကာ ည ၁၀ နာရီခွဲဝန်းကျင်မှာ အ‌ဝေးထိန်းရှေ့ထွက်မိုင်းနဲ့တိုက်ခိုက်ခဲ့တာလို့ သာယာဝတီဂဠုန်တပ်ဖွဲ့ စစ်ရေးတာဝန်ခံ ကိုဥက္ကာက ပြောပါတယ်။

“စစ်ကောင်စီက လောင်းကစားဝိုင်းတွေနဲ့ ကျနော်တို့ပြည်သူတွေ နစ်မွန်းသထက် နစ်မွန်းအောင် ဒုက္ခပေးနေတယ်။ တော်လှန်ရေးမှာ အများပြည်သူတွေ မပါဝင်နိုင်အောင်အကြွေးဒုက္ခတွေနဲ့ လည်နေအောင် ဖျက်ဆီးနေတာ။ ထိုးသားပြည်သူတွေ ပြန်တဲ့အချိန်မှ ဦးဆောင်လုပ်တဲ့ပျူတွေကို မိုင်းဆွဲတိုက်ခိုက်တာပါ” လို့ ပြောပါတယ်။

မိုင်းခွဲတိုက်ခိုက်မှုကြောင့် လောင်းကစားဝိုင်းကင်းစောင့်ပေးနေတဲ့ ပျူစောထီး ကျော်လင်း(ခ) ကတုံး ဆို သူ ပြင်းထန်ဒဏ်ရာရရှိခဲ့ပြီး သာယာဝတီဆေးရုံကိုပို့ဆောင်ကုသနေရတယ်လို့ သူက ဆက်ပြောပါ တယ်။

သာယာဝတီဂဠုန်တပ်ဖွဲ့အနေနဲ့ လက်ပံတန်း၊ သာယာဝတီ တကြိမ်၊ သုံးဆယ်မြိုတွေမှာ လောင်းကစားဝိုင်းတွေကို ၄ ကြိမ်ထက်မနည်း အသံဗုံးခွဲ သတိပေးခဲ့ပေမယ့် မလိုက်နာဘဲ ဆက်လုပ်နေလို့ အခုလို မိုင်းခွဲတိုက်ခိုက်တာလည်းဖြစ်တယ်လို့ ဆိုပါတယ်။

ဒီကနေ့ ဧပြီလ ၁၃ ရက် မနက်အစောပိုင်းမှာလည်း လက်ပံတန်းမြို့ စစ်ကောင်စီသင်္ကြန်မဏ္ဍပ်နဲ့ မြို့မ ရဲစခန်းအနောက်ဘက်ဂိတ်တွေကိုလည်း ရွှေတန်းမြေ PDF အဖွဲ့က မိုင်းခွဲတိုက်ခိုက်ခဲ့သေးတယ်လို့ သိရပါတယ်။

စာတည်း – ရင်ငြိမ်း