သပိတ်ကျင်း၊ ဇွန် ၆၊ ၂၀၂၅။

မန္တလေးတိုင်း၊ သပိတ်ကျင်းမြို့နယ်၊ ကျက်ရိုးပင်ကျေးရွာဘုန်းကြီးကျောင်းကို စစ်ကောင်စီတပ်က ဇွန် ၅ ရက်ညနေ ၅ နာရီကျော်မှာ ဗုံးကြဲတိုက်ခိုက်ခဲ့တာကြောင့် သံဃာတော် ၁ ပါးပျံလွန်ခဲ့တယ်လို့ သိရပါတယ်။

တိုက်ခိုက်ရေးလေယာဥ် ၁ စီးနဲ့ ဘုန်းကြီးကျောင်းဝန်းအတွင်းကို ဗုံးသီး ၁ လုံးချတိုက်ခိုက်ခဲ့တာကြောင့် ကျောင်းမှာရှိနေတဲ့ သက်တော် ၆၇ နှစ်ရှိ သံဃာတော် ဦးအရိယ ပျံလွန်ပြီး အရပ်သား ၄ ဦးဒဏ်ရာရရှိခဲ့တာလို့ဆိုပါတယ်။

“ဆရာတော်က ကျောင်းထိုင်ဟုတ်၊ မဟုတ်မသိရပါဘူး။ ဒဏ်ရာရသူတွေက ဘုန်းကြီးကျောင်းထဲ နေထိုင်တာမဖြစ်နိုင်ဘူး။ ကျောင်းထဲမှာရှိနေချိန် အကြဲရတာပုံစံဖြစ်နိုင်တယ်”လို့ ပြင်ဦးလွင်ခရိုင် ပြည်သူ့ကာကွယ်ရေးအဖွဲ့မှ တာဝန်ရှိသူတဦးက ပြောပါတယ်။

တိုက်ပွဲဖြစ်ပွားတာမရှိဘဲ စစ်ကောင်စီတပ်ကဗုံးလာကြဲခဲ့တာဖြစ်ပြီး ဗုံးကြဲမှုကြောင့် ဘုန်းကြီးကျောင်းဝန်းရှိ ကျောင်းဆောင် ၁ ခုလုံး ပြိုကျပျက်စီးခဲ့တယ်လို့ သူကဆိုပါတယ်။

အလားတူ ဇွန် ၃ ရက်မှာလည်း စဉ့်ကူးမြို့ပေါ် ရှိ မြသိန်းတန် ဘုရားနဲ့ဘုန်းကြီးကျောင်းကို တိုက်ခိုက်ရေး လေယာဥ်နဲ့ ဗုံးကြဲခဲ့တာကြောင့် ကျောင်းဆောင် ၂ ခုပျက်စီးခဲ့တယ်လို့သိရပါတယ်။

စစ်အာဏာသိမ်းချိန်ကနေ ၂၀၂၅၊ ဇွန် ၅ ရက်အထိ စစ်ကောင်စီတပ်တွေနဲ့ ၎င်းတို့ရဲ့လက်အောက်ခံတွေကြောင့် သေဆုံးခဲ့တဲ့ပြည်သူစုစုပေါင်း ၆,၇၇၅ ဦးရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေး အသင်း – AAPP ရဲ့အစီရင်ခံစာအရသိရပါတယ်။

စာတည်း – လင်း

မြေလတ်အသံ၊ ဇွန် ၂၊ ၂၀၂၅။

မန္တလေးတိုင်း၊ သပိတ်ကျင်းနဲ့ စဉ့်ကူးမြို့နယ်က စာသင်ကျောင်း၊ ဟိုတယ် နဲ့ လူနေအိမ်တွေကို စစ်ကောင်စီတပ်က ဇွန် ၁ ရက်မှာ တိုက်ခိုက်ရေးလေယာဥ်နဲ့ဗုံးကြဲတိုက်ခိုက်ခဲ့တယ်လို့ ဒေသခံတွေဆီကသိရပါတယ်။

သပိတ်ကျင်းမြို့နယ်၊ ၄ မိုင်ကံသာကျေးရွာရှိ နှစ်ထပ်ဆောင်စာသင်ကျောင်းကို ညနေ ၇ နာရီကျော်မှာ ပေါင် ၅၀၀ ဗုံး ၁ လုံးကြဲချခဲ့တာလို့ဆိုပါတယ်။

“စာသင်ကျောင်းဖွင့်လှစ်ပြီးသင်ကြားနေတာတော့မရှိဘူးဗျ။ မရှိလို့ လူထိခိုက်တာမရှိတာဗျ။ တိုက်ပွဲဖြစ်တာကတော့ လုံးဝကိုမရှိတာဗျ”လို့ ပြင်ဦးလွင်ခရိုင်ပြည်သူ့ကာကွယ်ရေးအဖွဲ့မှ တာဝန်ရှိသူတဦးကပြောပါတယ်။

ဗုံးကြဲခံရတဲ့ စာသင်ကျောင်းဆောင်မှာ အခြေခံပညာအထက်တန်းကျောင်းဖြစ်ပြီး ကျောင်းအဆောက်အဦ ၁ ခုလုံးပြိုကျပျက်စီးခဲ့တယ်လို့ ဆိုပါတယ်။

ဒါ့အပြင် နေ့လယ် ၁ နာရီနဲ့ ၂ နာရီကျော်မှာတော့ စဉ့်ကူးမြို့နယ်၊ နတ်တောင်ကျေးရွာရှိ Lucky 7 ဟိုတယ်နဲ့ နွယ်ရုံကျေးရွာတို့ကို ပေါင် ၃၀၀ ဗုံး ၁ လုံးစီ ကြဲချတိုက်ခိုက်ခံရတယ်လို့ အထက်ပါ တာဝန်ရှိသူကပြောပါတယ်။

Lucky7 ဟိုတယ်ဗုံးကြဲခံရမှုမှာ အနီးပတ်ဝန်းကျင်ရှိ အသက် ၂၀ နဲ့ ၃၀ ကျော်အရွယ်အမျိုးသမီး ၃ ဦးထိခိုက်ဒဏ်ရာရရှိခဲ့ပြီး နွယ်ရုံကျေးရွာမှာတော့ နေအိမ် ၂ လုံးပျက်စီးခဲ့ပေမယ့် လူအထိအခိုက်မရှိခဲ့ဘူးလို့ သူကဆက်ပြောပါတယ်။

အခုလိုစစ်ကောင်စီတပ်က လေကြောင်းကနေဗုံးကြဲတိုက်ခိုက်ခဲ့ချိန် သပိတ်ကျင်းနဲ့ စဉ့်ကူးမြို့နယ်တို့မှာ တိုက်ပွဲဖြစ်ပွားတာ လုံးဝမရှိဘူးလို့သိရပါတယ်။

ပြီးခဲ့တဲ့ ဧပြီ ၁ ရက်ကနေ မေ ၁၇ ရက်အထိ စစ်ကောင်စီတပ်က မတ္တရာမြို့နယ်၊ စဉ့်ကူးမြို့နယ်နဲ့ သပိတ်ကျင်းမြို့နယ်တို့ကို လေကြောင်းတိုက်ခိုက်မှု ၅၇ ကြိမ်ပြုလုပ်ခဲ့တာကြောင့် ပြည်သူ ၇၂ ဦး သေဆုံးကာ ၁၄၁ ဦး ထိခိုက်ဒဏ်ရာရရှိခဲ့တယ်လို့ ပြည်သူ့ကာကွယ်ရေးတပ်မတော် (မန္တလေး)ရဲ့ မှတ်တမ်းအရသိရပါတယ်။

စာတည်း – လင်း

သပိတ်ကျင်း၊ မေ ၂၀၊ ၂၀၂၅။

မန္တလေးတိုင်း၊ သပိတ်ကျင်းမြို့နယ်၊ လိပ်ကျရွာအနီးရှိရွှေလုပ်ကွက်ကို စစ်ကောင်စီက လေယာဥ်နဲ့ ဗုံးကြဲတိုက်ခိုက်လို့ အမျိုးသား ၁ ဦးသေဆုံးပြီး ၂ ဦးဒဏ်ရာရရှိခဲ့တယ်လို့ ပြင်ဦးလွင်ခရိုင်ပြည်သူ့ကာကွယ်ရေးအဖွဲ့ဆီကနေ သိရပါတယ်။

မေ ၁၉ ရက် မနက် ၁၀ နာရီ ၂၀ မိနစ်အချိန်မှာ စစ်ကောင်စီတပ်တိုက်လေယာဥ် ၁ စီးနဲ့ ရွှေလုပ်ကွက်ပေါ်ကို ပေါင် ၃၀၀ ဗုံး ၂ လုံးကို ကြဲချခဲ့ပြီး ရွှေလုပ်ကွက်အတွင်းရှိ နေအိမ်ပေါ် ကျရောက်ပေါက်ကွဲခဲ့တာလို့ ဆိုပါတယ်။

” ရွှေလုပ်ကွက်ထဲက အိမ်ပေါ်ကိုကျတာ။ ဒဏ်ရာရသူနှစ်ယောက်က တစ်ယောက်က လက်ထိတယ်။ တစ်ယောက်က ပေါင်ထိတယ်ဗျ။ လက်နဲ့ပေါင် ထိထားတာဆိုတော့ အရမ်းကြီး သေစေနိုင်လောက်ထိတော့ မစိုးရိမ်ရဘူး” လို့ ပြင်ဦးလွင်ခရိုင်ပြည်သူ့ကာကွယ်ရေးအဖွဲ့သတင်းတာဝန်ခံတဦးက မြေလတ်အသံကို ပြောပါတယ်။

ဗုံးကြဲတိုက်ခိုက်မှုကြောင့် ရွှေလုပ်ကွက်က လုပ်သားတွေဖြစ်တဲ့ အသက် ၁၅ နှစ်အရွယ် အမျိုးသား ၁ ဦးနေရာမှာဘဲ သေဆုံးခဲ့ပြီး အသက် ၁၅ နှစ်နဲ့ အသက် ၃၀ အရွယ် အမျိုးသား ၂ ဦးတို့ ဒဏ်ရာရခဲ့တယ်လို့ ဆေးကုသမှုပေးနေကာ သေဆုံးအမျိုးသားရဲ့ ရုပ်အလောင်းကိုတော့ မေ ၁၉ ရက်နေ့ ညနေပိုင်းမှာဘဲ သင်္ဂြိုဟ်လိုက်ပြီလို့ သိရပါတယ်။

စစ်ကောင်စီဟာ ရွှေလုပ်ကွက်ပေါ်ကို လေကြောင်းသုံး ဗုံးကြဲချခဲ့တာကြောင့် ပြည်သူပိုင်လူနေအိမ် ၃ လုံးနဲ့ ကား ၁ စီး၊ ဆိုင်ကယ် ၁ စီးလည်း ဗုံးထိမှန်ပျက်စီးသွားခဲ့တယ်လို့ သိရပါတယ်။

မေ ၁၈ ရက်ညပိုင်းမှာ သပိတ်ကျင်းမြို့နယ်၊ လိပ်ကျရွာကို တိုက်လေယာဥ်နဲ့ ဗုံးကြဲခဲ့လို့ အမျိုးသား ၂ ဦး ဒဏ်ရာရခဲ့ပြီး ဧပြီလအတွင်းမှာလည်း လိပ်ကျရွာလယ်စျေးကို လေယာဥ်နဲ့ ဗုံးကြဲခံရလို့ အရပ်သား ၁၃ ဦးသေဆုံးမှုရှိခဲ့ပါတယ်။

စာတည်း – ဟိန်းစံ

သပိတ်ကျင်း၊ မေ ၁၆၊ ၂၀၂၅။

မန္တလေးတိုင်း၊ သပိတ်ကျင်းမြို့နယ်ရှိ စစ်ဘေးရှောင်စခန်းတခု လေကြောင်းဗုံးကြဲခံရလို့ သက်ကြီးပိုင်းအရပ်သား ၂ ဦး သေဆုံးပြီး ၉ ဦး ဒဏ်ရာရခဲ့တယ်လို့ ဒေသခံတွေဆီက သိရပါတယ်။

မေ ၁၅ ရက် ယမန်နေ့မနက် ၉နာရီကျော်မှာ သပိတ်ကျင်းမြို့နယ် ၉ မိုင်ကျေးရွာနဲ့ လမ်းလယ်ကျစ်ရွာအကြားရှိ စစ်ဘေးရှောင်စခန်းကို တိုက်ခိုက်ရေးလေယာဥ် ၁ စီးနဲ့ ဗုံး ၂ လုံးကြဲချတိုက်ခိုက်ခဲ့တာလို့ ဆိုပါတယ်။

” စစ်ရှောင်စခန်းကအဆောင်ကြီး ၃ လုံးပျက်စီးတယ်။ ကျန်တဲ့အဆောင်ငယ်တွေလည်း ပျက်စီးတယ်”လို့ သပိတ်ကျင်းဒေသခံအမျိုးသားတဦးက ပြောပါတယ်။

လေယာဥ်ဗုံးကြဲခံရတာကြောင့် စစ်ရှောင်စခန်းမှာနေထိုင်နေတဲ့ အသက် ၆၀ နှစ်ဝန်းကျင်ရှိ အမျိုးသား ၁ ဦးနဲ့ အမျိုးသမီး ၁ ဦးတို့ သေဆုံးခဲ့ပြီး ၃ နှစ် အရွယ်ကလေး ၄ ဦး၊ အသက် ၆၀ ကျော်အရွယ်သံဃာ ၁ ပါး၊ အသက် ၅၀ အရွယ် အမျိုးသား ၃ ဦးနဲ့ အမျိုးသမီး ၁ ဦး စုစုပေါင်း ၉ ဦး ဒဏ်ရာရရှိခဲ့ကာ အဲ့ဒီထဲက အသက် ၅၀ အရွယ်ရှိ အမျိုးသား ၁ ဦးမှာ စိုးရိမ်ရတယ်လို့ ဆိုပါတယ်။

မေ ၇ ရက်နဲ့ ၁၀ ရက်နေ့တွေမှာ သပိတ်ကျင်းမြို့နယ်၊ ဇရပ်ကွင်းကျေးရွာနဲ့ ရေထွက်ကျေးရွာတွေကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သား ၂ ဦးသေဆုံးပြီး ၁၆ ဦး ဒဏ်ရာရရှိခဲ့သလို ဧပြီလအတွင်းမှာ ရေထွက်ရွာနဲ့ လိပ်ကျရွာကို လေယာဥ်ဗုံးကြဲခဲ့တာမှာ အရပ်သား ၄၀ ကျော်အထိ သေဆုံးမှုရှိခဲ့တာပါ။

သပိတ်ကျင်းမြို့နယ်မှာ စစ်ကောင်စီတပ်နဲ့ တော်လှန်ရေးတပ်ဖွဲ့တွေအကြား ပြီးခဲ့တဲ့မတ်လအတွင်းတိုက်ပွဲတွေပြင်းထန်ခဲ့ပြီးတဲ့နောက် လက်ရှိမှာတိုက်ပွဲတွေငြိမ်သက်နေပေမယ့် စစ်ကောင်စီကစစ်ရေးပစ်မှတ်မဟုတ်တဲ့ အရပ်သားတွေနေထိုင်ရာကျေးရွာတွေကို မကြာခဏလေကြောင်းကနေ ဗုံးကြဲတိုက်ခိုက်နေတာလည်း ဖြစ်ပါတယ်။

စာတည်း – ဟိန်းစံ

သပိတ်ကျင်း၊ ဧပြီ ၂၉၊ ၂၀၂၅။

မန္တလေးတိုင်း၊ သပိတ်ကျင်းမြို့နယ်အတွင်း လေကြောင်းတိုက်ခိုက်ခံရမှုကြောင့် သေဆုံး၊ ဒဏ်ရာရရှိခဲ့သူတွေနဲ့ နေအိမ်ပျက်စီးခဲ့သူတွေအတွက် ပြည်သူ့စုပေါင်းလှူဒါန်းမှုကရရှိတဲ့ ကျပ်သိန်း ၂,၃၀၀ ကျော်ကို ထောက်ပံ့ပေးအပ်ခဲ့တယ်လို့ သပိတ်ကျင်းမြို့နယ် ပြည်သူ့ ကာကွယ်ရေးတပ်ဖွဲ့ထံက သိရပါတယ်။

ဧပြီလအတွင်း စစ်ကောင်စီရဲ့ လေယာဥ်ဗုံးဒဏ် အပြင်းအထန်ခံစားခဲ့ရတဲ့ သပိတ်ကျင်းမြို့နယ် ရေထွက်၊ လိပ်ကျ၊ ချောင်းကြီး၊ ဖက်ရှည်၊ ဝက်သေစတဲ့ ကျေးရွာတွေက သေဆုံး သူ ၄၂ ဦး၊ ဒဏ်ရာရသူ ၄၅ ဦးနဲ့ ပျက်စီးနေအိမ် ၄၂ လုံးစာအတွက် ထောက်ပံ့ပေးခဲ့တာလို့ ဆိုပါတယ်။

“ အခုထောက်ပံ့ပေးခဲ့တဲ့ ငွေကျပ်သိန်း ၂,၃၅၅ ထဲက သိန်း ၆၉၀မှာ မပန်ဆယ်လိုကတဆင့် ကူညီထောက်ပံ့ငွေ ဖြစ်ပါတယ်။ သိန်း ၁,၆၆၅ မှာ ပြည်သူလူထုမှ စုပေါင်းထောက်ပံ့ငွေ တွေဖြစ်ပါတယ်။ အဲဒါကို ကျနော်တို့က သွားပြီးပေးခဲ့တာ” လို့ သပိတ်ကျင်းမြို့နယ် ပြည်သူ့ကာကွယ်ရေးတပ်ဖွဲ့တာဝန်ရှိသူတဦးက ပြောပါတယ်။

သပိတ်ကျင်းလေယာဥ်ဗုံးသင့်ဒေသခံတွေကို သေဆုံးသူ ၁ ဦး အတွက် ကျပ်သိန်း ၂၀၊ ဒဏ်ရာရရှိသူ ၁ ဦးအတွက် ကျပ် ၁၅ သိန်းနဲ့ နေအိမ် ၁ လုံးအတွက် ငွေကျပ်သိန်း ၂၀ နှုန်း စုစုပေါင်းကျပ်သိန်း ၂,၃၃၅ ကို အသီးသီးထောက်ပံ့ပေးခဲ့တာလို့ သိရပါတယ်။

အဆိုပါထောက်ပံ့ငွေတွေကို သပိတ်ကျင်းမြို့နယ်ပြည်သူ့ကာကွယ်ရေးနဲ့ သပိတ်ကျင်းတိုက်နယ်ပြည်သူ့ကာကွယ်ရေးအဖွဲ့တို့ပူးပေါင်းကာ မြို့နယ်လေကြောင်းတိုက်ခိုက်မှုဘေးအန္တရာယ်သင့် ပြည်သူများကူညီထောက်ပံ့ရေးကော်မတီဖွဲ့စည်းပြီး စစ်ကောင်စီတပ်ရဲ့ လေကြောင်းတိုက်ခိုက်မှုဘေးအန္တရာယ် ကြုံတွေ့ခဲ့ရတဲ့ ပြည်သူတွေကို သွားရောက်ထောက်ပံ့နိုင်ခဲ့တာလို့ သိရပါတယ်။

“ ကျနော်တို့ကတော့ဗျာ လူထုနဲ့တသားတည်းရှိတယ်လို့ပြောချင်တာပါ” လို့ အထက်ပါတာဝန်ခံက ပြောပါတယ်။

ဧပြီလတတိယပတ်အတွင်းမှာ သပိတ်ကျင်းမြို့နယ် လိပ်ကျနဲ့ ရေထွက်ရွာတွေကို စစ်ကောင်စီတပ်က ၃ ရက်ဆက်တိုက် လေယာဥ်ဗုံးကြဲတိုက်ခိုက်ခဲ့ပြီး အဆိုပါတိုက်ခိုက်မှုတွေအတွင်း ကျေးရွာ ၂ ခုပေါင်း သေဆုံးသူဒေသခံ ၄၀ နီးပါးအထိ ရှိခဲ့တာလည်း ဖြစ်ပါတယ်။

စာတည်း – ဟိန်းစံ

၂ ရက်အတွင်း လေယာဥ်ဗုံးကြောင့် သပိတ်ကျင်းနယ်ကျေးရွာ ၂ ရွာက လူ ၄၀ နီးပါး သေဆုံးထား

မြေလတ်အသံ၊ ဧပြီ ၁၉၊ ၂၀၂၅။

မန္တလေးတိုင်း၊ သပိတ်ကျင်းမြို့နယ်၊ ရေထွက်ရွာကို စစ်ကောင်စီတပ်က လေယာဥ်ဗုံးကြဲ တိုက်ခိုက်ခဲ့တာကြောင့် နောက်ဆုံးသိရတဲ့ သတင်းအချက်အလက်တွေအရ ကလေးငယ်တွေအပါ ၂၄ ဦး သေဆုံးခဲ့တယ်လို့ ဒေသခံတွေက ပြောပါတယ်။

ဧပြီ ၁၉ ရက် ဒီကနေ့ နေ့လယ် ၁ နာရီကျော်မှာ ရေထွက်ကျေးရွာကို လေကြောင်းတိုက်ခိုက်ခဲ့တာဖြစ်ပြီး လေယာဥ်ဗုံးဟာ စက်သုံးဆီဆိုင်တွေအနီးကျရောက်ပေါက်ကွဲကာ စက်သုံးဆီဆိုင်တွေပါ ပေါက်ကွဲမှုဖြစ်ပေါ်ခဲ့တာလို့ ဆိုပါတယ်။

” ဓာတ်ဆီဆိုင်နားကို ကြဲသွားတာ။အဲဒီဆိုင်တွေကလည်း ပေါက်ကွဲထွက်ကုန်တယ်။ သေတာ အများကြီးပဲ။ အလောင်းတွေကောက်နေတုန်း လေယာဉ်တွေထပ်လာတယ်”လို့ မြေပြင်ရှိနေသူတဦးက ပြောပါတယ်။

လေကြောင်းတိုက်ခိုက်မှုကြောင့် ကလေးငယ် ၂ ဦး အပါ ပြည်သူ ၁၃ ဦး သေဆုံးခဲ့တယ်လို့ သပိတ်ကျင်းမြို့နယ်ပကဖက သတင်းထုတ်ပြန်ထားပြီး ပြည်သူ ၂၀ ကျော် ဒဏ်ရာရခဲ့ကာ စိုးရိမ်ရဒဏ်ရာရသူတွေလည်းရှိတယ်လို့ သိရပါတယ်။

ယမန်နေ့ ဧပြီ ၁၈ ရက်ကလည်း သပိတ်ကျင်းမြို့နယ်၊ လိပ်ကျရွာကို ဗုံးကြဲတိုက်ခိုက်ခဲ့တာကြောင့် ပြည်သူ ၁၃ ‌‌ဦးသေဆုံးထားပြီး ရေထွက်ရွာကို ယမန်နေ့က တကြိမ်ဗုံးကြဲတိုက်ခိုက်ခဲ့သေးကာ ဒီကနေ့မှာလည်း ထပ်မံဗုံးကြဲတိုက်ခိုက်ခဲ့တာလို့ သိရပါတယ်။

သပိတ်ကျင်းမြို့နယ်၊ ၇ မိုင်ကျေးရွာအနီးမှာ တော်လှန်ရေးတပ်တွေနဲ့ စစ်ကောင်စီတပ်ဖွဲ့တွေအကြား တိုက်ပွဲတွေဖြစ်ပွားနေပြီး စစ်ကောင်စီတပ်ဘက်က သပိတ်ကျင်းမြို့နယ်ကို လေကြောင်းတိုက်ခိုက်မှုတွေ ဆက်တိုက်ပြုလုပ်နေတာပါ။

( ဧပြီလ ၁၉ ရက် ည ၈ နာရီအထိ သိရှိရသည့် နောက်ဆုံးအခြေအနေအား ဖြည့်စွက်ထားပါသည်။)

သပိတ်ကျင်း၊ ဧပြီ ၁၉၊ ၂၀၂၅။

မန္တလေးတိုင်း၊ သပိတ်ကျင်းမြို့နယ်၊ လိပ်ကျကျေးရွာကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့လို့ ပြည်သူ ၁၃ ဦး သေဆုံးပြီး ၃ ဦးအပြင်းအထန်ဒဏ်ရာရခဲ့တယ်လို့ ပြင်ဦးလွင်ခရိုင်ပကဖသတင်းတာဝန်ခံဆီက သိရပါတယ်။

ဧပြီ ၁၈ ရက် ယမန်နေ့ မနက် ၁၀ နာရီကျော်မှာ မန္တလေး-မိုးကုတ်ကားလမ်းဘေးရှိ လိပ်ကျကျေးရွာအလယ်စျေးကို ပေါင် ၃၀၀ ဗုံးနဲ့ ကြဲချတိုက်ခိုက်ခဲ့တာဖြစ်ပြီး လမ်းသွား၊ လမ်းလာတွေ ဗုံးစထိမှန်သေဆုံးသွားခဲ့တယ်လို့ ဆိုပါတယ်။

“ဆိုင်ကယ်စီးနေတဲ့သူတွေပါ ထိတာ။ လမ်းပေါ်မှာ တုံးလုံးပက်လက်ပဲ” လို့ သပိတ်ကျင်းဒေသခံတဦးက ပြောပါတယ်။

လေယာဥ်ဗုံးထိမှန်တာကြောင့် ဒေသခံအမျိုးသား ၈ ဦး ၊ အမျိုးသမီး ၃ ဦး၊ ကလေး ၁ ဦးအပါ ၁၃ ဦး သေဆုံးခဲ့ပြီး ယမန်နေ့ညနေပိုင်းအထိ သပိတ်ကျင်းမြို့နယ်တခုလုံးကို လေကြောင်းတိုက်ခိုက်မှုပြုလုပ်ခဲ့တဲ့အပြင် လက်ရှိအထိ တိုက်ပွဲနဲ့လေကြောင်းအန္တရာယ်တွေကြောင့် သေဆုံးသူတွေရဲ့ အသေးစိတ်အချက်အလက်ကို မသိရသေးဘူးလို့ ပြင်ဦးလွင်ခရိုင်ပကဖက ဆိုပါတယ်။

သပိတ်ကျင်းမြို့နယ်၊ ၇ မိုင်ကျေးရွာအနီးမှာ တော်လှန်ရေးတပ်တွေနဲ့ စစ်ကောင်စီတပ်ဖွဲ့တွေအကြား တိုက်ပွဲတွေဖြစ်ပွားနေပြီး စစ်ကောင်စီတပ်ဘက်က သပိတ်ကျင်းမြို့နယ်ကို လေကြောင်းတိုက်ခိုက်မှုတွေ ဆက်တိုက်ပြုလုပ်နေတာပါ။

ဧပြီ ၁၆ ရက်ကလည်း လိပ်ကျရွာကို လေကြောင်းတိုက်ခိုက်ခဲ့ပြီး အဲ့ဒီတိုက်ခိုက်မှုမှာ လူထိခိုက်သေဆုံးမှုမရှိခဲ့ပေမယ့် အဆောက်အဦတချို့ပျက်စီးမှုရှိခဲ့တယ်လို့ သိရပါတယ်။