လမ်းလယ်ကျွန်း

ကျောက်တံခါး၊ ဧပြီ ၁၁၊ ၂၀၂၃။

ရန်ကုန်-မန္တလေးအမြန်လမ်း၊ ပဲခူးတိုင်း၊ ကျောက်တံခါးမြို့နယ်အတွင်းမှာ လင်မယား ၂ ဦးလိုက်ပါလာတဲ့ကား အရှိန်လွန်ပြီး လမ်းလယ်ကျွန်းကို တိုက်မိတာကြောင့် အမျိုးသမီးဖြစ်သူ သေဆုံးသွားတယ်လို့ သိရပါတယ်။

ဧပြီလ ၁၁ ရက်နေ့ ဒီကနေ့မနက် ၁၁ နာရီ ၁၅ မိနစ်ခန့်မှာ ရန်ကုန်ဘက်ကနေ နေပြည်တော်ဘက်ကို မောင်းနှင်လာတဲ့ wish အိမ်စီးကားဟာ အမြန်လမ်းမိုင်တိုင်အမှတ် (၈၉/၀) နဲ့ (၈၉/၁)ကြားအရောက်မှာ အရှိန်မထိန်းနိုင်ဘဲ လမ်းလယ်ကျွန်းကို ဝင်တိုက်ခဲ့တာလို့ ဒေသခံတဦးက ပြောပါတယ်။

“ကားပေါ်မှာက လင်မယား၂ယောက်ပဲ ပါတယ်။ လမ်းလယ်ကျွန်းတိုက်ပြီး နေရာမှာပဲ အမျိုးသမီးက သေဆုံးသွားတယ်။ ကျနော်တို့သိရသလောက် ခါးပတ်မပတ်တာလည်း ပါမယ်ထင်တယ်။ တိုက်တဲ့အရှိန်ကလည်း များတယ်။ ကားခေါင်းနဲ့တည့်တိုက်တဲ့ ပုံစံပဲ” လို့ ပြောပါတယ်။

ယာဥ်တိုက်မှုကြောင့် ယာဥ်ပေါ်ပါ အသက် ၃၀ နှစ်ခန့်ရှိ အမျိုးသမီးဖြစ်သူမှာ နေရာမှာသေဆုံးပြီး အမျိုးသားမှာ ဒဏ်ရာပြင်းထန်လို့ မြို့ချောင်းတိုက်နယ်ဆေးရုံကို တင်ပို့ထားရတယ်လို့ ဆိုပါတယ်။

ယာဥ်တိုက်မှုဖြစ်ပွားခဲ့တဲ့ကားနဲ့ မောင်းနှင်လာတဲ့ လင်မယားဟာ ရန်ကုန်မြို့၊ တောင်ဥက္ကလာပ၊ ၁၁ ရပ်ကွက်နေသူတွေ ဖြစ်တယ်လို့လည်း သိရပါတယ်။

ဧပြီလ ၁၀ ရက် မနေ့ မနက်ပိုင်းမှာလည်း မန္တလေးဘက်ကနေ နေပြည်တော်ဘက်ကို မောင်းနှင်လာတဲ့ Honda Civic အမျိုးအစား အိမ်စီးကားဟာ အမြန်လမ်းမကြီး၊ မိုင်တိုင်အမှတ်(၃၂၅/၆)နဲ့(၃၂၅/၇)ကြားမှာ လမ်းလယ်ကျွန်း ဝင်တိုက်မိလို့ ကားမီးလောင်ပြီး အမျိုးသား ၃ ဦး သေဆုံးသွားတယ်လို့ သိရပါတယ်။

စာတည်း – ရင်ငြိမ်း

မြင်းခြံ၊ ဧပြီ ၁၀၊ ၂၀၂၃။

မန္တလေးတိုင်း၊ မြင်းခြံမြို့နယ်၊ ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ် ၃၂၅/၆ နဲ့ ၃၂၅/၇ ကြားမှာ ကား ၁ စီး အရှိန်လွန်ပြီး လမ်းလယ်ကျွန်း ဘလောက်တုံးကို ဝင်တိုက်မိရာက ကားမီးလောင်ပြီး ကားပေါ်ပါ အမျိုးသား ၃ ဦး သေဆုံးခဲ့တယ်လို့ သိရပါတယ်။

ဧပြီလ ၁၀ ရက်မနက် ၁၁ နာရီ ၃၀ မိနစ်ခန့်မှာ မန္တလေးဘက်ကနေ နေပြည်တော်ဘက်ကို မောင်းနှင်လာတဲ့ Honda Civic ကားဟာ အရှိန်မထိန်းနိုင်ဘဲ လမ်းလယ်ကျွန်းကို တိုက်မိပြီး မီးလောင်ခဲ့တာလို့ ဒေသခံတဦးက ပြောပါတယ်။

“သိရသလောက်က ကားက မန္တလေးဘက်က လာတာ။ ကားမီးလောင်တော့ ကားထဲက အမျိုးသား ၃ ဦးပါ မီးလောင်သေဆုံးသွားတယ်။ ကားတိုက်တဲ့ အရှိန်နဲ့ လူတွေ မထွက်နိုင်ခင် ကားက မီးလောင်သွားတာဆိုတော့ အကုန်မီးလောင် သေဆုံးသွားတာ ဖြစ်နိုင်တယ်” လို့ ပြောပါတယ်။

ကားပေါ်ပါ ပစ္စည်းတွေလည်း မီးလောင်ပျက်စီးခဲ့ပြီး၊ ရုပ်အလောင်းတွေလည်း မီးလောင်ကျွမ်းနေတာကြောင့် သေဆုံးသူတွေဟာ ဘယ်သူဘယ်ဝါဆိုတာကို မသိရှိရသေးဘူးလို့ ဆိုပါတယ်။

ကားမီးလောင်ရာကို အမြန်လမ်းမီးသတ်တပ်ဖွဲ့က မီးငြိမ်းသတ်ပေးခဲ့ပြီး ရုပ်အလောင်းတွေကို နွားထိုးကြီးမြို့နယ်ဆေးရုံကို ပို့ထားပေးရတယ်လို့လည်း ဒေသခံတဦးက ပြောပါတယ်။

၂၀၂၂ ခုနှစ်၊ ဖေဖော်ဝါရီလ ၆ ရက်နေ့လယ် ၁ နာရီခွဲခန့်မှာလည်း ရန်ကုန်-မန္တလေး အမြန်လမ်း၊ မိုင်တိုင်အမှတ် ၃၁၉/၅ နဲ့ ၃၁၉/၆ အကြားမှာ ယာဥ်တိမ်းမှောက်ရာမှ ကားမီးလောင်မှုဖြစ်ပြီး၊ ယာဥ်ပေါ်ပါ အမျိုးသားတဦးနဲ့ အမျိုးသမီးတဦး မီးလောင်သေဆုံးခဲ့ပါသေးတယ်။

စာတည်း – လင်း