ငဖဲ၊ စက်တင်ဘာ ၂၃၊ ၂၀၂၅။

အာရက္ခတပ်တော်-AA နဲ့ စစ်ကော်မရှင်တပ်ဖွဲ့တွေအကြား တိုက်ပွဲတွေဖြစ်ပွားနေတဲ့ မကွေးတိုင်း၊ ငဖဲမြို့နယ်၊ နတ်ရေကန်တောင်ကြောတဝိုက်ကို စစ်ကော်မရှင်တပ်က လေကြောင်းကနေ ဗုံးအလုံး ၃၀ နီးပါးကြဲချတိုက်ခိုက်သွားတယ်လို့ ဒေသခံတွေဆီက သိရပါတယ်။

စက်တင်ဘာ ၂၃ ရက် ဒီကနေ့ မနက် ၁၁ နာရီမှာ တိုက်လေယာဥ် ၁ စီးနဲ့ ဗုံး ၂ လုံး၊ Y 12 လေယာဥ်နဲ့ ဗုံးအလုံး ၂၀ ကျော်ကို မိနစ်ပိုင်းသာခြားပြီး ကြဲချတိုက်ခိုက်ခဲ့တာလို့ ဆိုပါတယ်။

” နတ်ရေကန်တောင်ဘက်က ကော်ဖီခြံဘက်တွေ မြိုင်၊ လှိုင်ဘက် တို့ကို ၁ ခါကြဲရင် ၃ လုံးကြဲချတာ၊ နတ်ရေကန်ကြောနားမှာက အရှိုချင်းရွာတွေရှိတယ်။ ဒေသခံတွေ တောင်ယာလုပ်ကိုင်စားတဲ့ စိုက်ပျိုးရေးခြံ၊ ကော်ဖီခြံတွေရှိတယ်” ငဖဲဒေသခံတဦးက မြေလတ်အသံကို ပြောပါတယ်။

ရက္ခိုင်ရိုးမပေါ် မကွေးတိုင်းနဲ့ ရက္ခိုင်ပြည်နယ်အစပ်ရှိ နတ်ရေကန်တောင်စစ်ကောင်စီစခန်းဟာ ဗျူဟာစခန်းကြီးဖြစ်ပြီး အဲ့ဒီစခန်းနဲ့အနီးတဝိုက်ကို အာရက္ခတပ်တော်-AA က ထိုးစစ်ဆင်တိုက်ခိုက်နေသလို စခန်းမကျရှုံးရေး စစ်ကော်မရှင်တပ်ကလည်း အင်အားအလုံးအရင်းနဲ့ မြေပြင်၊ ဝေဟင်ကနေ ခုခံတိုက်ခိုက်နေတယ်လို့ သိရပါတယ်။

” နတ်ရေကန်စခန်းကြီးမကျရေးအတွက် ကာနေတာ၊ စစ်ကော်မရှင်ဘက်က အတုံးအရုံးသေဆုံးတာများတယ်။ နတ်ရေကန်တောင်ကြောက ကမ္ဘာလုံးစခန်းရဲ့ပတ်ပတ်လည်မှာက AAနဲ့ စစ်ကော်မရှင်တပ်ဖွဲ့ဝင်တွေတိုက်ပွဲက နေ့ကော ညကော ဖြစ်နေတာ၊ နားတဲ့ရက်ဆိုတာ မရှိဘူး” လို့ အထက်ပါဒေသခံ ပြောပါတယ်။

နတ်ရေကန်တောင်ဗျူဟာစခန်းကုန်းမှာ စစ်ကော်မရှင်တပ်က တပ်မ ၉၉ နဲ့ စကခ ၁၇ လက်အောက် တပ်ရင်းတွေနဲ့ တိုက်ခိုက်နေတာဖြစ်ပြီး ပြီးခဲ့တဲ့ စက်တင်ဘာပထမပတ်အတွင်း ငဖဲမြို့နယ်၊ စွန်တက်ရွာအနီးကို ထိုးစစ်ဆင်လာတဲ့ စကခ ၁၇ စစ်ကြောင်းကို တန်ပြန်တိုက်ခိုက်ခဲ့လို့ စစ်ကော်မရှင်တပ်ဖွဲ့ဝင် ၆၀ ထက်မနည်းသေဆုံးကာ တပ်လန်ပြန်ဆုတ်ခွာသွားရတယ်လို့ အာရက္ခတပ်တော်-AA က စက်တင်ဘာ ၁၀ ရက်မှာ ထုတ်ပြန်ထားပါတယ်။

နတ်ရေကန်နဲ့အနီးတဝိုက်မှာ AA ရဲ့တိုက်ခိုက်မှုကြောင့် စစ်ကော်မရှင်တပ်ဖွဲ့ဝင်အရာရှိအဆင့်တွေအပါ ထိခိုက်သေဆုံးမှုများပြားနေကာ စွန်တက်ရွာအနီး တိုက်ခိုက်ခံရတာကြောင့် စကခ ၁၇ လက် အောက် ခမရ ၅၂၅ တပ်ရင်းမှူးအပါ ၅၀ ကျော် ထွက်ပြေးနေတယ်လို့ စက်တင်ဘာ ၉ ရက်မှာ မင်းဘူးခရိုင်တပ်ရင်း ၂ ထံ ဘက်ပြောင်းခိုလှုံလာတဲ့ ခမရ ၅၂၀ တပ်ရင်းက စစ်မှုထမ်းသင်တန်းဆင်းစစ်ကော်မရှင်တပ်သားတွေကလည်း ပြောဆိုထားပါတယ်။

စစ်ကော်မရှင်တပ်ရဲ့ လေကြောင်းဗုံးကြဲတိုက်ခိုက်မှုတွေကြောင့် နတ်ရေကန်တောင်ဘက်ခြမ်း အိမ်ခြေ ၆၀ ကနေ ၂၀၀ ကြားရှိ ဘုံးဘော၊ စရံ၊ ပပွေး၊ စွန်တက်၊ လင်းတဲ၊ ဝက်စားကျင်း၊ ပစီ၊ လိုင်ရွာ၊ နောင်ရွာ၊ တင်ပြင်း၊ ပန်းပဲ၊ ဝန်ရွာ၊ ဇင်ပြွန်း၊ မကျီးကုန်း စတဲ့ရွာတွေက ဒေသခံ ၃ ထောင်နီးပါး စစ်ဘေးရှောင်နေရတယ်လို့ သိရပါတယ်။

စာတည်း – ဟိန်းစံ

မြေလတ်အသံ၊ စက်တင်ဘာ၂၃၊ ၂၀၂၅။

စစ်ကိုင်းတိုင်း၊ ခင်ဦးနဲ့ရွှေဘိုမြို့နယ်အစပ်မှာ စစ်ကော်မရှင်စစ်ကြောင်းတိုက်ခိုက်ခံရပြီး ဗိုလ်ကြီး ၁ ဦး အပါ ၃ ဦး သေဆုံးခဲ့ကာ တပ်သား ၂ ဦးကို အရှင်ဖမ်းမိခဲ့တယ်လို့ ခင်ဦးမြို့ နယ်ပကဖထံက သိရပါတယ်။

ခင်ဦးမြို့နယ်၊ မကျီးတုံရွာပျူစောထီးစခန်းကနေ ထွက်ခွာလာတဲ့ အင်အား ၉၀ ခန့်ပါစစ်ကြောင်းဟာ ရွှေဘိုမြို့နယ်အတွင်း ဝင်ရောက်လာချိန် စက်တင်ဘာ ၂၂ ရက် မနက် ၇ နာရီကျော်မှာ တော်လှန်ရေးပူးပေါင်းတပ်ဖွဲ့တွေက ဝိုင်းဝန်းပိတ်ဆို့ တိုက်ခိုက်ခဲ့တာလို့ ဆိုပါတယ်။

” သူတို့သွားမယ့်လမ်းကြောင်းကို မိုင်းပိတ်တယ်။ သူတို့ထွက်လာတဲ့အချိန်မှာ မိုင်း ၂ လုံးမိတယ်။ ၄ ယောက်လောက်ထိတယ်။ အဲ့အချိန်မှာ ကိုယ့်လူတွေကပစ်ကောင်းမယ့်နေရာရောက်တော့ ဝင်လုံးတာ။ သူတို့(လေ့ကျင့်ရေး ၈)ဘက်ကနေ လက်နက်ကြီးစစ်ကူတွေပေးတာ။ လက်နက်ကြီးအလုံး လေး၊ ငါးဆယ်ပစ်တယ်။ ကိုယ့်လူတွေက ကံကောင်းတာပေါ့ဘာမှမထိခဲ့ဘူး” လို့ ခင်ဦးမြို့နယ်ပကဖတာဝန်ရှိသူတဦးက ပြောပါတယ်။

တိုက်ပွဲအတွင်း စစ်ကော်မရှင်တပ်က ဗိုလ်ကြီး မင်းထက်နဲ့ တပ်ကြပ် ၂ ဦး သေဆုံးခဲ့ပြီး တပ်သား ကျော်သန်းဦးနဲ့ တင်ကိုဦးတို့ကို အရှင်ဖမ်းဆီးနိုင်ခဲ့ကာ BA 100 ၆၀ မမ ကွန်မန်ဒိုစိန်ပြောင်း ၁ လက်၊ MA-3 ၄ လက်၊ MA-1 ၅ လက်၊ BA-63( G3 ၁ လက်)၊ ကာဘိုင် ၁ လက်၊ MA-5 ပစ္စတို ၁ လက်၊ ကျည်ဘောက်မျိုးစုံ ၁၂ ခု၊ မိုင်း ၆ လုံး၊ ၆၀ မမ ဗုံးသီးအပါ ဗုံးသီး ၇ လုံး၊ ကျည်ကာဦးထုပ် ၆ လုံး၊ ကျည်ဆန်မျိုးစုံ ၂၉၃ တောင့်၊ ငွေကျပ်သိန်း ၅၀ ကျော် သိမ်းဆည်းရရှိခဲ့တယ်လို့ သိရပါတယ်။

ဒီတိုက်မှုကိုတော့ အမှတ် ၂ ရွှေဘိုခရိုင်၊ အမှတ် ၃ တပ်ရင်း၊ ခင်ဦးမြို့နယ်ပကဖ၊ တိုက်နယ် ၁၊ ၂၊ ၃၊ ၄၊ ၅ ပကဖ၊ မြို့နယ် ပလဖတို့ ပူးပေါင်းလုပ်ဆောင်ခဲ့တာပါ။

စက်တင်ဘာ ၁၈ ရက်ကလည်း ရွှေဘိုမြို့နယ်၊ ဘုတ်ကုန်းရွာစခန်းက ထွက်လာတဲ့ အင်အား ၈၀ ခန့်ပါစစ်ကြောင်းဟာ မကျီးတုံကျေးရွာစခန်းဘက်ကိုထွက်ခွာလာချိန် တိုက်ခိုက်ခံခဲ့ရတယ်လို့ သိရပါတယ်။

စာတည်း – ဟိန်းစံ

ပေါက်၊ စက်တင်ဘာ ၂၃၊ ၂၀၂၅။

မကွေးတိုင်း၊ ပေါက်မြို့နယ်၊ စွန်ဆိပ်ကုန်းကျေးရွာနဲ့ သံပုရာအိုင်ကျေးရွာက ဒေသကာကွယ်ရေးစခန်း ၂ ခုကို စစ်ကော်မရှင်တပ်က တိုက်ခိုက်သိမ်းပိုက်သွားတယ်လို့ ဒေသကာကွယ်ရေးအဖွဲ့နဲ့နီးစပ်သူတွေထံက သိရပါတယ်။

စက်တင်ဘာ ၂၀ ရက် နေ့လယ် ၁၂ နာရီခန့်မှာ ယာကြီးပြင်ရွာပျူစောထီးစခန်းကနေ ထွက်လာတဲ့ စစ်ကော်မရှင်တပ်အင်အား ၂၀၀ ခန့်ပါစစ်ကြောင်းဟာ စွန်ဆိပ်ကုန်းကျေးရွာရှိ ဒေသကာကွယ်ရေးတပ်ဖွဲ့စခန်းတခုကို တိုက်ခိုက်ပြီးနောက် သိမ်းပိုက်ခံလိုက်ရတာလို့ ဆိုပါတယ်။

” ကျနော်တို့ဆီကို ရုတ်တရက်ဝင်လာပြီး ရွာကိုဝင်တယ်။ ပြီးတော့စခန်းကိုတန်းလာတယ်။ စခန်းကိုတော့ အင်အား ၅၀ လောက်နဲ့ဝိုင်းတယ်။ ပစ်ခတ်မှုက ၁၀ မိနစ်၊ ၁၅ မိနစ်လောက်ခံပစ်သေးတယ်။ ကျနော်တို့လည်း အင်အားမမျှတော့ ဆုတ်ပေးလိုက်ရတယ်”လို့ ပေါက်ဒေသကာကွယ်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

စစ်ကော်မရှင်တပ်ရဲ့ အင်အားသုံးဝင်စီးတာခံရလို့ ကာကွယ်ရေးအဖွဲ့ဝင်တွေထိခိုက်ကျဆုံးတာမရှိဘဲ ကာကွယ်ရေးအဖွဲ့ပိုင် ငွေသားကျပ်သိန်း ၂၀၀၊ လက်နက် ၃ လက်၊ ဒရုန်း ၂ စီး၊ အိုင်ကွန် ၁၆ လုံး၊ ကျည်ကာဦးထုပ် ၂၁ လုံး၊ မိုင်းမျိုးစုံ ၄၅ လုံး စစ်သုံးပစ္စည်းတွေနဲ့စားသောက်ကုန် စုစုပေါင်း ခန့်မှန်း ကျပ်သိန်း ၇၀၀ ခန့် ဆုံးရှုံးခဲ့တယ်လို့ ဆိုပါတယ်။

စစ်ကော်မရှင်တပ်စစ်ကြောင်းဟာ စွန်ဆိပ်ကုန်းစခန်းကို သိမ်းပိုက်ပြီးနောက် နေ့လယ် ၂ နာရီကျော်မှာ စွန်ဆိပ်ကုန်းနဲ့ ၁ မိုင်ကျော်အကွာရှိ သံပုရာအိုင်ကျေးရွာဒေသကာကွယ်ရေးစခန်းကို ထပ်မံဝင်ရောက်စီးနင်းပြီး ဆေးပစ္စည်းတွေနဲ့ရိက္ခာတွေကို မီးရှို့ဖျက်ဆီးခဲ့တယ်လို့ သိရပါတယ်။

အဲ့ဒီစစ်ကြောင်းဟာ ဒေသကာကွယ်ရေးစခန်းတွေကို စီးနင်းမီးရှို့ပြီးတဲ့နောက် ယာကြီးပြင်ကျေးရွာစခန်းကို နေ့ချင်းပြန်ဆုတ်ခွားသွားတယ်လို့ ဆိုပါတယ်။

စစ်ကော်မရှင်တပ်သားတွေ စစ်ကြောင်းထိုးဝင်လာလို့ စွန်ဆိပ်ကုန်း၊ သံပုရာအိုင်ကျေးရွာတွေက ဒေသခံ ၁,၅၀၀ ကျော် စစ်ဘေးရှောင်ခဲ့ရပြီး စက်တင်ဘာ ၂၃ ရက် ဒီကနေ့မှာ ဒေသခံအချို့နေရပ်ပြန်လည်ဝင်ရောက်နေထိုင်နေပြီလို့ သိရပါတယ်။

စစ်ကော်မရှင်ထောက်ခံတယ်လီဂရမ်တွေမှာတော့ စွန်ဆိပ်ကုန်းကျေးရွာနဲ့ သံပုရာအိုင်ကျေးရွာက PDF စခန်းတွေကိုသိမ်းဆည်းရမိပြီး လက်နက်၊ စစ်အသုံးအဆောင်ပစ္စည်းတွေနဲ့ ရိက္ခာ၊ ဆေးဝါးပစ္စည်းတွေကို သိမ်းဆည်းရမိတယ်လို့ ဓာတ်ပုံမှတ်တမ်းတွေနဲ့ ဖော်ပြထားပြီး မှတ်တမ်းဓာတ်ပုံတွေဟာ သိမ်းပိုက်ခံလိုက်ရတဲ့ စခန်းနဲ့ ကာကွယ်ရေးတပ်ဖွဲ့ပိုင်ပစ္စည်းတွေဖြစ်ကြောင်း မြေပြင်တပ်ဖွဲ့ဝင်တွေက အတည်ပြုပါတယ်။

ဩဂုတ်လ ၂၂ ရက်ကလည်း ပေါက်မြို့နယ်၊ ဆယ်ဝကျေးရွာမှာ စစ်ကောင်စီဘက်က လေကြောင်းကနေ ဗုံးကြဲခဲ့လို့ ရွာခံ ၂ ဦးသေဆုံးပြီး ၆ ဦးဒဏ်ရာရတယ်လို့ သိရပါတယ်။

စာတည်း – ဟိန်းစံ