မြေလတ်အသံ၊ ဧပြီ ၅၊ ၂၀၂၅။

မတ် ၂၈ ရက်မှာလှုပ်ခတ်ခဲ့တဲ့ ရစ်ချ်တာစကေး ၇.၇ ရှိ ပြင်းအားမြင့်ငလျင်ကြောင့် စစ်ကိုင်းတိုင်း၊ မန္တလေးတိုင်းနဲ့ ပဲခူးတိုင်းအပါအဝင် နိုင်ငံတဝန်း သေဆုံးသူ ၃,၁၀၀ ကျော်၊ ဒဏ်ရာရသူ ၄,၅၈၉ ဦးဒဏ်ရာ ရရှိခဲ့တယ်လို့ ဧပြီ ၃ ရက်ကထုတ်ပြန်တဲ့ Data For Myanmar ရဲ့အစီရင်ခံစာမှာဖော်ပြပါတယ်။

ဒီအရေအတွက်ဟာ ဧပြီ ၃ ရက်အထိ ကောက်ယူစုစည်းထားတဲ့အချက်အလက်ဖြစ်ပြီး အဲ့ဒီထဲမှာ စစ်ကိုင်းတိုင်းက သေဆုံးသူ ၄၇၇ ဦး၊ ဒဏ်ရာရသူ ၇၁၈၊ မန္တလေးတိုင်းမှာ သေဆုံးသူ ၂,၀၇၉ ဦး၊ ဒဏ်ရာရသူ ၂,၆၉၁၊ ပဲခူးတိုင်းမှာ ၄၄ ဦး၊ ဒဏ်ရာရသူ ၂၃၄၊ ရှမ်းပြည်နယ်မှာ ၆၆ ဦး၊ ဒဏ်ရာရသူ ၁၈ ဦးနဲ့ နေပြည်တော်မှာ သေဆုံးသူ ၅၅၁ ဦး၊ ဒဏ်ရာရသူ ၈၄၂ ဦး ဖြစ်တယ်လို့ ဆိုပါတယ်။

လက်ရှိမှာ စာရင်းကောက်ယူနိုင်မှုအားနည်းပြီး လက်လှမ်းမီသလောက်စုစည်းနေရတဲ့အတွက်ကြောင့် သေဆုံးသူအရေအတွက်ဟာ ခုအစီရင်ခံစာမှာပါရှိတာထက် မြေပြင်မှာပိုများနိုင်တယ်လို့ စစ်ကိုင်းဖက်ဒရယ်ယူနစ်မှ လွှတ်တော်ကိုယ်စားလှယ် အမျိုးသားတဦးကပြောပါတယ်။

“စကစမှာလည်း ဖရိုဖရဲတွေပေါ့ စနစ်တကျစာရင်းကောက်နိုင်တာမရှိဘူး။ မရှိတဲ့အခါကျတော့ လက်လှမ်းမီသလောက် စုစည်းထားတဲ့အခြေအနေတွေပဲဖြစ်တယ်။ မြေပြင်အခြေအနေအမှန်မှာက ဒီထက်ပိုပြီးများနိုင်တယ်”လို့ သူကပြောပါတယ်။

လက်ရှိအချိန်ထိလည်း ဆက်လက်ပြီး ရှာဖွေကယ်ဆယ်ရေးလုပ်ငန်းတွေ လုပ်ဆောင်နေဆဲဖြစ်တာကြောင့် သေဆုံးသူဦးရေလည်းတိုးလာဖွယ်ရှိတယ်လို့အစီရင်ခံစာမှာဖော်ပြပါတယ်။

ပုံစာ – ငလျင်ကြောင့်ပျက်စီးခဲ့သည့် စစ်ကိုင်းမြို့မှအဆောက်အဦတချို့။

စာတည်း – လင်း

မြေလတ်အသံ၊ မေ ၅၊ ၂၀၂၃။

မြေလတ်ဒေသတွေဖြစ်တဲ့ စစ်ကိုင်းတိုင်း၊ မကွေးတိုင်းနဲ့ ပဲခူးတိုင်းမှာ မေလ ၈ ရက်ကနေ ၁၃ ရက်အတွင်း လေပြင်းတိုက်ခတ်တာနဲ့ မိုးသည်းထန်စွာရွာသွန်းတာတွေ ဖြစ်ပေါ်လာနိုင်တယ်လို့ မိုးလေဝသခန့်မှန်းသူ ဦးဝင်းနိုင်က ပြောဆိုထားပါတယ်။

မေလ ၉ ရက်ကနေ ၁၃ ရက်အတွင်း ဘင်္ဂလားပင်လယ်အော်မှာ အင်အားကြီးဆိုင်ကလုန်း မုန်တိုင်းတခုဖြစ်ပေါ်ကာ မြန်မာနိုင်ငံသို့ဝင်ရောက်တိုက်ခတ်နိုင်ပြီး အဲ့ဒီမုန်တိုင်းအရှိန်ကြောင့် စစ်ကိုင်း၊မကွေး၊ပဲခူး အပါအဝင် ဒေသအတော်များများမှာ လေပြင်းတိုက်ခတ်တာနဲ့ မိုးသည်းထန်စွာ ရွာသွန်းနိုင်တယ်လို့ ဆိုပါတယ်။

“လမ်းကြောင်းက အိန္ဒိယကမ်းခြေဘက်ကို ယိမ်းသွားရင် မုန်တိုင်းဒဏ် တိုက်ရိုက်ခံရတာသက်သာပြီး၊ ဆန့်ကျင်ဘက်အနေနဲ့ မုန်တိုင်းလမ်းကြောင်းက ရခိုင်ကမ်းရိုးတန်းဘက်ကို ရွေ့လာရင်တော့ မြန်မာနိုင်ငံအတွက် မုန်တိုင်းလေပြင်းတိုက်တဲ့ ဒဏ်နဲ့မိုးများလွန်းလို့ နောက်ဆက်တွဲဖြစ်လာမယ့် သဘာ၀ ဘေးအန္တရာယ် ဆိုးကျိုးတွေကို ခံစားရမယ်” လို့ ပြောပါတယ်။

မုန်တိုင်းတိုက်ခတ်မယ့်ရက်က ဝေးနေသေးတဲ့အတွက် မုန်တိုင်းလမ်းကြောင်းအတိအကျကိုတော့ ပြောဆိုဖို့ခက်နေသေးပြီး လမ်းကြောင်းပြောင်းသွားနိုင်တဲ့အနေထားလည်း ရှိနေတယ်လို့ သိရပါတယ်။

မိုးလေဝသခန့်မှန်းသူ မစုစုစံကလည်း မေလ ၉ ရက်၊ ၁၀ ရက်နဲ့ ၁၁ ရက်တွေမှာ ဘင်္ဂလားပင်လယ်အော်အတွင်း အင်အားပြင်းဆိုင်ကလုန်းမုန်တိုင်းဖြစ်ပေါ်လာနိုင်ပြီး မေလ ၁၀ ရက်ကနေ ၁၂ ရက်အထိရက်တွေမှာ မကွေး၊ စစ်ကိုင်း၊ ပဲခူးတိုင်းတွေအပါအဝင် မြန်မာနိုင်ငံဒေသအတော်များများမှာ မုန်တိုင်းမိုးရွာသွန်းနိုင်ကာ မုန်တိုင်းဝင်ရောက်နိုင်မှုအခြေအနေကို ထပ်မံခန့်မှန်းဖော်ပြပေးသွားမယ်လို့ သူ့ရဲ့ လူမှုကွန်ယက်ကတဆင့် မေလ ၄ ရက်မှာ သတိပေးဖော်ပြထားပါတယ်။

ပြီးခဲ့တဲ့ ဧပြီလအတွင်းကလည်း မြေလတ်ဒေသအပါအဝင် တိုင်းနဲ့ပြည်နယ်နေရာအများအပြားမှာ မိုးကြီး၊လေပြင်းတိုက်ခတ်မှုတွေကြောင့် မိုးကြိုးထိမှန်တာနဲ့ သစ်ပင်ပိတာတွေကြောင့် လူသေဆုံးတာ၊ နေအိမ်အဆောက်အဦထိခိုက်ပျက်စီးတာတွေဖြစ်ပေါ်ခဲ့တယ်လို့ သိရပါတယ်။

စာတည်း-ရင်ငြိမ်း