ယင်းမာပင်၊ ဇူလိုင် ၃၁၊ ၂၀၂၅။
မိုးကုတ်ဗျူဟာ ၇ မိုင် စစ်ဆင်ရေးကပြန်လာတဲ့ ယင်းမာပင်ခရိုင် တပ်ရင်း ၁၆ ရဲ့ ရှေ့တန်းပြန် တပ်ဖွဲ့ဝင် တွေကို ဇူလိုင် ၂၈ ရက်က ဆားလင်းကြီးမြို့နယ်အတွင်းမှာ ဒေသခံပြည်သူတွေက ကြိုဆိုခဲ့ကြတယ်လို့ ယင်းမာပင်ခရိုင် တပ်ရင်း ၁၆ ဆီက သိရပါတယ်။
ကျေးရွာ ၅ ရွာက ဒေသခံပြည်သူတွေဟာ သပြေပန်း၊ မုန့်၊ ပိုက်ဆံတွေကိုလည်း ပေးအပ်ပြီး ကြိုဆိုခဲ့ကြတာပါ။
“ရွာ ၅ ရွာလောက်က ပြည်သူတွေက ကြိုကြတာပါ၊ ကျနော်တို့ပြန်လာတဲ့ လမ်းတလျှောက်က ရွာတွေကပါ၊ မိုးကုတ်ဗျူဟာ ၇ မိုင် စစ်ဆင်ရေးကို တပ်ရင်းက ရဲဘော် ၂၅ ဦး လွှတ်လိုက်ပါတယ်၊ ကျနော်တို့ရဲ့ ရဲဘော် ၂ ဦး ကျဆုံးခဲ့ပြီးတော့ စစ်ကြောင်းမှူး ဒဏ်ရာရခဲ့ပါတယ်”လို့ ယင်းမာပင်ခရိုင် တပ်ရင်း ၁၆ စစ်ရေးကြီး တာဝန်ခံက ပြောပါတယ်။
အဆိုပါ မိုးကုတ်ဗျူဟာ ၇ မိုင်စစ်ဆင်ရေးအတွက် ဧပြီလကနေ ဇူလိုင်လအတွင်း ၃ လခွဲကျော်တာဝန်ထမ်းဆောင်ခဲ့ပြီး တိုက်ပွဲအတွင်း မိုင်းဆွဲတိုက်ခိုက်မှုတွေကို အဓိက လုပ်ဆောင်ခဲ့တယ်လို့လည်း ဆိုပါတယ်။
“စစ်မြေပြင်အတွေ့အကြုံကတော့ ကျနော်တို့ အရင်တုန်းကဆိုရင် မိုင်းဆွဲတာပဲ အဓိကလုပ်တာ၊ အဲ့ဒီဘက်က စစ်ဆင်ရေးမှာဆိုရင်တော့ ထိပ်တိုက် တိုက်ပွဲတွေ၊ ရင်ဆိုင်တိုက်ပွဲတွေ တိုက်ခဲ့ရတာ၊ ရဲဘော်တွေ အနေနဲ့လည်း ရှေ့တန်းအတွေ့အကြုံတွေ အများကြီးရခဲ့ပါတယ်”လို့ သူက ဆက်ပြောပါတယ်။
တိုက်ပွဲအတွင်း ယင်းမာခရိုင်တပ်ရင်း ၁၆ က တပ်ဖွဲ့ဝင် ၂ ဦးကျဆုံးခဲ့ပြီး စျာပနအခမ်းအနားကိုတော့ တပ်ရင်းမှာပဲ ပြုလုပ်ခဲ့တယ်လို့ သိရပါတယ်။
တည်းဖြတ် – HP