မင်းအောင်လှိုင်

မြေလတ်အသံ၊ ဧပြီ ၃၊ ၂၀၂၆။

အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် ကို ဒီကနေ့ကျင်းပတဲ့ ပြည်ထောင်စုလွှတ်တော် လျှို့ဝှက်မဲခွဲမှာ မဲအများဆုံးနဲ့ သမ္မတ တင်မြှောက်လိုက်ပါတယ်။

မတ်လ ၃၀ ရက်မှာ ဗိုလ်ချုပ်ကြီး ရဲဝင်းဦးကို ကာကွယ်ရေးဦးစီးချုပ်လွှဲအပ်ခဲ့ပြီး မတ်လ ၃၁ ရက်မှာ ပြည်သူ့လွှတ်တော်ကနေ ဒုသမ္မတအမည်စာရင်းတင်သွင်းခဲ့တဲ့ ဗိုလ်ချုပ်မှူးကြီး မင်းအောင်လှိုင်ဟာ ဒီကနေ့ ပြည်ထောင်စုလွှတ်တော်ကမဲခွဲပွဲမှာတော့ မဲအများဆုံးရရှိပြီး သမ္မတရာထူးကို ရယူခဲ့တာပဲ ဖြစ်ပါတယ်။

အဆိုပါ မဲခွဲပွဲမှာ ပြည်သူ့လွှတ်တော်ကရွေးချယ်တဲ့ ဗိုလ်ချုပ်မှူးကြီးမင်းအောင်လှိုင်က ၄၂၉ မဲရရှိကာ သမ္မတဖြစ်လာသလို တပ်မတော်သားလွှတ်တော်ကိုယ်စားလှယ်တွေရွေးချယ်တဲ့ ဗိုလ်ချုပ်ကြီး(ဟောင်း) ညိုစောက ၁၂၆ မဲနဲ့ ဒုသမ္မတ(၁)၊ အမျိုးသားလွှတ်တော်ကရွေးချယ်တဲ့ ဒေါ်နန်းနီနီအေးက ၂၉ မဲနဲ့ ဒုသမ္မတ(၂) ဖြစ်လာတာလည်း ဖြစ်ပါတယ်။

၂၀၂၀ ရွေးကောက်ပွဲမှာ မဲမသာမှုရှိခဲ့လို့ဆိုပြီး သမ္မတ ဦးဝင်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကို ဖမ်းဆီးပြီးအာဏာသိမ်းခဲ့တဲ့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ဟာ အာဏာသိမ်းပြီး ၅ နှစ်အကြာမှာ စစ်တပ်ကချုပ်ကိုင်ထားတဲ့ အတုအယောင်ရွေးကောက်ပွဲကို ဖန်တီးပြီး ၎င်းလိုချင်နေတဲ့ သမ္မတရာထူးကို ရယူခဲ့တာဖြစ်ပါတယ်။

လူမျိုးတုန်းသတ်ဖြတ်မှုအပါအဝင် စစ်ရာဇဝတ်မှုအမြောက်အမြားအတွက် တာဝန်ရှိသူ ဗိုလ်ချုပ်မှူးကြီး မင်းအောင်လှိုင်ကို အပြည်ပြည်ဆိုင်ရာတရားရုံး(ICJ)က လူမျိုးတုန်းသတ်ဖြတ်မှုနဲ့ တရားစွဲထားပြီး လက်ရှိ တရားရင်ဆိုင်နေရဆဲအခြေအနေဖြစ်ပါတယ်။

မြေလတ်အသံ၊ မတ် ၃၁၊ ၂၀၂၆။

ပြည်သူ့လွှတ်တော်အစုအဖွဲ့က အမည်စာရင်းတင်သွင်းတဲ့ ဒုသမ္မတလောင်း ၂ ဦးကို ဒီကနေ့ မတ်လ ၃၁ ရက် ပြည်သူ့လွှတ်တော်အစည်းအဝေးမှာ ဆန္ဒမဲပေးအဆုံးအဖြတ်နဲ့ ရွေးချယ်ခဲ့ရာ စစ်ခေါင်းဆောင် မင်းအောင်လှိုင် ပြည်သူ့လွှတ်တော်ကိုယ်စားပြု ဒုသမ္မတအဖြစ် ရွေးချယ်ခံရတယ်လို့ သိရပါတယ်။

ပြည်သူ့လွှတ်တော်ကနေ အမည်စာရင်းတင်သွင်းတဲ့ ဒုသမ္မတလောင်း ၂ ဦးဖြစ်တဲ့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်နဲ့ ဒေါက်တာကျော်ဆွေ တို့ကို ကိုယ်စားလှယ် ၂၆၀ က မဲပေးခဲ့ရာ မင်း အောင်လှိုင် က ၂၄၇ မဲနဲ့ ဒုသမ္မတအဖြစ် တင်မြှောက်ခံရတာလို့ စစ်ကော်မရှင်သတင်းထုတ်ပြန်ရေး တယ်လီဂရမ် News Of Myanmar က ရေးပါတယ်။

တချိန်တည်းမှာပြုလုပ်နေတဲ့ အမျိုးသားလွှတ်တော်အစုအဖွဲ့ က ဒုသမ္မတတင်မြှောက်တာမှာလည်း ဒုသမ္မတအဖြစ် ကြံ့ခိုင်ရေးပါတီက ဒေါ် နန်းနီနီအေး ရွေးချယ်ခံရတယ်လို့ သိရပါတယ်။

ပြည်သူ့လွှတ်တော်နဲ့ အမျိုးသားလွှတ်တော်က ဒုသမ္မတ ၁ ဦးစီ ရွေးချယ်ပြီးနောက် စစ်တပ်က တင်မြှောက်တဲ့ ဒုသမ္မတညိုစော တို့ ၃ ဦးကနေ သမ္မတ ပြန်လည်ရွေးချယ်မှာဖြစ်ပြီး စစ်ခေါင်းဆောင် မင်းအောင်လှိုင် ပဲ သမ္မတဖြစ်လာဖွယ်ရှိနေပါတယ်။

■ ရုပ်ရှင်ရုံတွေမှာ နိုင်ငံတော်အလံအလေးမပြု၊ နိုင်ငံတော်သီချင်းမဆိုတာတွေကိုတွေ့ရပြီး တိုင်းချစ်ပြည်ချစ်စိတ် အားနည်းနေတယ်လို့ ဆို

မြေလတ်အသံ၊ ဖေဖော်ဝါရီ ၄၊ ၂၀၂၆။

နိုင်ငံ့လူဦးရေရဲ့အများစုဟာ ကိုယ့်ကိုယ်ကိုယ်တိုးတက်အောင်ဆောင်ရွက်နိုင်မှုမရှိတဲ့အတွက် ဆင်းရဲမွဲတေမှုများနေတယ်လို့ အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် က ပြောဆိုလိုက်ပါတယ်။

ဖေဖော်ဝါရီ ၃ ရက် ယမန်နေ့က နေပြည်တော်၊ နိုင်ငံတော်ကာကွယ်ရေးတက္ကသိုလ် သင်တန်းသားအရာရှိကြီးတွေကို စစ်ခေါင်းဆောင်က Video Conferencing နဲ့ ပြောကြားမှုမှာ ပညာရေးကဏ္ဍနဲ့ပတ်သက်ပြီး ပြောကြားရာမှာ အခုလိုထည့်သွင်းပြောဆိုခဲ့တာပါ။

” နိုင်ငံ့လူဦးရေရဲ့အများစုဟာ မိမိတို့ကိုယ်ကိုဖွံ့ဖြိုးတိုးတက်ရေးကို ဆောင်ရွက်နိုင်မှုမရှိတဲ့အတွက် ဆင်းရဲမွဲတေမှုလည်း များပြားကြောင်း၊ ဆင်းရဲမွဲတေမှုများရှိနေသမျှကာလပတ်လုံး ပုဂ္ဂိုလ်ရေးခံစားချက်များရှိပြီး မနာလိုခြင်း၊ မကျေနပ်ခြင်းများ ဖြစ်ပေါ်နိုင်ကြောင်း” ဆိုကာ ပြောပါတယ်။

နိုင်ငံရဲ့သမိုင်းကြောင်းမှာ ဖြစ်ပေါ်ခဲ့တဲ့ နိုင်ငံမတည်ငြိမ်မှုဖြစ်စဥ်တွေဟာ ပညာရေးဆိုင်ရာ အားနည်းချက်ကြောင့်ဖြစ်တာကို တွေ့ရှိရတယ်လို့လည်း သူက ဆိုပါတယ်။

“ပညာရေးကဏ္ဍမြှင့်တင်ရေးကို မဖြစ်မနေဆောင်ရွက်ရမှာဖြစ်ကြောင်း၊ အခြေခံပညာကျောင်းများမှ စတင်၍ နိုင်ငံတော်အလံ အလေးပြုခြင်းများကို နေ့စဥ်ဆောင်ရွက်ရခြင်းအားဖြင့် နိုင်ငံချစ်စိတ်များဖြစ်ပေါ်လာမှာဖြစ်ကြောင်း၊ အဲ့ဒီလိုမဆောင်ရွက်ရသူများအနေဖြင့် နိုင်ငံချစ်စိတ် တစထက်တစလျော့နည်းလာမှာဖြစ်ကြောင်း၊ ဒ့ါကြောင့် ကျောင်းနေအရွယ်ကလေးငယ်များအားလုံး ကျောင်းနေစေရေး နိုင်ငံသားအားလုံး ဝိုင်းဝန်းဆောင်ရွက်သွားကြရန်လိုကြောင်း” ဆိုကာ ပြောပါတယ်။

စစ်ခေါင်းဆောင်ဟာ လက်ရှိဖြစ်ပေါ်နေတဲ့ နိုင်ငံမတည်ငြိမ်မှုတွေဟာ ပညာရေးအားနည်းတာကြောင့် ဆိုကာ မကြာခဏပြစ်တင်ဝေဖန်လေ့ရှိတာပါ။

ဒါ့အပြင် ရုပ်ရှင်ရုံတချို့မှာ နိုင်ငံတော်အလံကို အလေးမပြုတာ၊ နိုင်ငံတော်သီချင်းသီဆိုမှုမရှိတာတွေ သိရှိရပြီး အဲ့ဒီအပြုအမှုတွေကတဆင့် တိုင်းချစ်ပြည်ချစ်စိတ် အားနည်းနေတာကို တွေ့ရတယ်လို့ ပြောဆိုပါတယ်။

” နိုင်ငံသားတိုင်းအနေဖြင့် နိုင်ငံတော်ရဲ့ဖြစ်တည်မှု၊ ပထဝီဝင်အနေအထားနဲ့ အမျိုးသားရေးစရိုက်လက္ခဏာများ နိုင်ငံတော်နဲ့သက်ဆိုင်တဲ့ အထိမ်းအမှတ်တံဆိပ်များ၊ နိုင်ငံတော်အလံ၊ နိုင်ငံတော်သီချင်းတို့အပါအဝင် အထွဋ်အမြတ်ထားရမှာများကို လေးစားတန်ဖိုးထား ချစ်မြတ်နိုးကြရန်လိုကြောင်း၊ ဆိုရှယ်မီဒီယာပလက်ဖောင်းများမှာ ဖော်ပြချက်များအရ အချို့ရုပ်ရှင်ရုံများမှာ နိုင်ငံတော်အလံကိုပင်အလေးမပြုကြသူများနဲ့ နိုင်ငံတော်သီချင်းသီဆိုခြင်းမရှိကြသည်ကို စိတ်မကောင်းဖြစ်ဖွယ်သိရှိရကြောင်း၊ အဲ့ဒီလိုအပြုအမှုများကို ကြည့်ခြင်းအားဖြင့် နိုင်ငံသားတိုင်းအနေဖြင့် တိုင်းချစ်ပြည်ချစ်စိတ်အားနည်းနေတာကို တွေ့ရကြောင်း” လို့ ပြောပါတယ်။

မြေလတ်အသံ၊ ဒီဇင်ဘာ ၂၁၊ ၂၀၂၅ ။

ရွေးကောက်ပွဲမှာ ဆန္ဒမဲမပေးတာဟာ ဒီမိုကရေစီစနစ်ကို မထောက်ခံတာဖြစ်တယ်လို့ စစ်အာဏာသိမ်းခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောဆိုလိုက်ပါတယ်။

ဒီဇင်ဘာ ၂၀ ရက်မှာ မကွေးတိုင်း၊ မင်းဘူးမြို့ကို ရောက်ရှိလာတဲ့ စစ်ခေါင်းဆောင်က ၎င်းရဲ့လက်အောက်စစ်ကော်မရှင်အဖွဲ့ဝင်တွေနဲ့ မြို့ခံတွေကိုတွေ့ဆုံပြောဆိုရာမှာ အခုလို ထည့်သွင်းပြောဆိုခဲ့တာပါ။

” ဆန္ဒမဲပေးခြင်း၊ မပေးခြင်းဟာ မဲဆန္ဒရှင်များရဲ့ဆန္ဒဖြစ်ပြီး မဲပေးနိုင်အောင်ဆောင်ရွက်ရမည်မှာ အစိုးရရဲ့တာဝန်ပင်ဖြစ်ကြောင်း၊ ရွေးကောက်ပွဲမှာဆန္ဒမဲပေးခြင်းဟာ ဒီမိုကရေစီစနစ်အပေါ်လျှောက်လှမ်းခြင်းကို ထောက်ခံခြင်းဖြစ်ပြီး မဲမပေးခြင်းဟာ ဒီမိုကရေစီစနစ်အပေါ် လျှောက်လှမ်းမှုကို မထောက်ခံခြင်းပင်ဖြစ်ကြောင်း” ဆိုကာ သူက ပြောပါတယ်။

ဒါ့အပြင် စစ်ခေါင်းဆောင်က ၂၀၂၀ ပြည့်နှစ်မှာ ကျင်းပခဲ့တဲ့ ရွေးကောက်ပွဲလို မဲမသမာမှုတွေမဖြစ်ပေါ်စေရေးနဲ့ ဆန္ဒမဲပေးခွင့်ရှိသူအားလုံး မဲပေးနိုင်ရေး လုပ်ဆောင်ကြဖို့ဆိုကာ ပြောဆိုပါတယ်။

စစ်ကော်မရှင်က ပြုလုပ်မယ့်ရွေးကောက်ပွဲကို လုံခြုံရေးအခြေအနေတွေအရ အပိုင်း ၃ ပိုင်းခွဲ ပြုလုပ်မှာဖြစ်ကြောင်း ထုတ်ပြန်ထားပြီး အပိုင်း ၁ ကို လာမယ့် ဒီဇင်ဘာ ၂၈ ရက်မှာ မြို့နယ် ၁၀၂ ခုမှာ ပြုလုပ်မယ်လို့ ဆိုထားပါတယ်။

စစ်ခေါင်းဆောင်ဟာ ယခင်နှစ်တွေကလည်း မင်းဘူး၊ မန်းရွှေစက်တော်ဘုရားပွဲကာလမတိုင်မီ အခုလို ဒီဇင်ဘာလမှာ မကွေးဒေသကိုလာရောက်ကာ ရွှေစက်တော်ကို သွားလေ့ရှိပေမယ့် အခုနှစ်မှာတော့ ရွှေစက်တော်အနီးတိုက်ပွဲတွေပြင်းထန်နေတာကြောင့် သွားရောက်တာမတွေ့ရပါဘူး။

မြေလတ်အသံ၊ နိုဝင်ဘာ ၉၊ ၂၀၂၅။

လေယာဥ်၊ ရဟတ်ယာဥ်တွေနဲ့ ဒရုန်းတွေ UAV တွေအပါအဝင် လေကြောင်းစွမ်းအားအရင်းအမြစ်တွေဟာ မရှိမဖြစ်လိုအပ်တယ်လို့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောဆိုလိုက်ပါတယ်။

စစ်ကော်မရှင်တပ်ကို တပ်တော်ဝင်လာတဲ့ သယ်ယူပို့ဆောင်ရေး လေယာဥ်၊ ရဟတ်ယာဥ် ၅ စီး ထုတ်ဖော်ပြသမှုကို နိုဝင်ဘာ ၇ ရက် မနေ့က နေပြည်တော်လေတပ်စခန်းဌာနချုပ်မှာပြုလုပ်ခဲ့ပြီး မိန့်ခွန်းပြောကြားရာမှာ စစ်ခေါင်းဆောင်က အခုလိုပြောဆိုခဲ့တာပါ။

” လတ်တလောကာလ နိုင်ငံတကာမှာဖြစ်ပွားခဲ့တဲ့ ပဋိပက္ခများသာမက ပြည်တွင်းမှာ ဖြစ်ပေါ်ကြုံတွေ့ ခဲ့ရတဲ့ အခြေအနေအရပ်ရပ်များမှာ လေယာဥ်၊ ရဟတ်ယာဥ်များ၊ ဒရုန်းနဲ့ UAV များအပါအဝင် လေကြောင်းစွမ်းအားအရင်းအမြစ်များဟာ မရှိမဖြစ်လိုအပ်လာသည်ကို တွေ့ရှိရကြောင်း” လို့ ပြောပါတယ်။

စစ်ကော်မရှင်တပ်ကို Y-8 သယ်ယူပို့ဆောင်ရေးလေယာဥ် ၂ စီးနဲ့ Mi-38 ရဟတ်ယာဥ် ၃ စီး စုစုပါင်း ၅ စီး တပ်တော်ဝင်လာကြောင်း သတင်းထုတ်ပြန်လာတာပါ။

တရုတ်နိုင်ငံထုတ် Y-8 လေယာဥ်တွေဟာ သယ်ယူပို့ဆောင်ရေးလေယာဥ်တွေဖြစ်ပေမယ့် လက်ရှိမှာ စစ်ကော်မရှင်တပ်က ဗုံးကြဲတိုက်ခိုက်မှုတွေမှာပါ ထည့်သွင်းအသုံးပြုနေတာပါ။

Mi-38 ရဟတ်ယာဥ်တွေဟာ ရုရှားနိုင်ငံထုတ် ဘက်စုံသုံးရဟတ်ယာဥ်တွေဖြစ်ပြီး ယခင်က စစ်ကော်မရှင်တပ်မှာ အသုံးပြုခဲ့တာမရှိဘူးလို့ CDM တပ်မတော်သား ဗိုလ်ကြီး ဇင်ယော် က ပြောပါတယ်။

” လက်ရှိသုံးနေတဲ့ Mi-17 တွေထက် အကြမ်းဖျင်း ၂ ဆ ပိုသယ်နိုင်မှာဆိုတော့ လူနာကောက်၊ ရိက္ခာပို့၊ ခဲယမ်းပို့၊ ခြင်းကျားတောင်းပို့ဖို့ အဓိက သုံးမှာပေါ့” လို့ ဆိုပါတယ်။

စစ်ကော်မရှင်အနေနဲ့ရွေးကောက်ပွဲပြုလုပ်ပြီးရွေးကောက်ပွဲကနေပေါ်ထွက်လာတဲ့ အစိုးရကိုအာဏာလွှဲအပ်ဖို့ ကြိုးပမ်းနေပေမယ့် ပြည်တွင်းပြည်ပအဖွဲ့အစည်းတချို့အနေနဲ့ ရွေးကောက်ပွဲပျက်ပြားအောင် နည်းမျိုးစုံနဲ့လုပ်ဆောင်နေတယ်လို့ စစ်ခေါင်းဆောင်က ပြောပါတယ်။

ဒါ့အပြင် ၎င်းတို့စစ်ကော်မရှင်တပ်ကိုဆန့်ကျင်တိုက်ခိုက်နေတဲ့ တော်လှန်ရေးတပ်ဖွဲ့တွေကိုညွှန်းဆိုပြီး အရေးနိမ့်နေပြီလို့ သူက ပြောပါတယ်။

” ပြည်တွင်းပြည်ပအဖွဲ့အစည်းတချို့ဟာ ၎င်းတို့လိုလားချက်အတိုင်းမဟုတ်တဲ့အတွက် ရွေးကောက်ပွဲမဖြစ်မြောက်စေရန်ပျက်ပြားစေရန် နည်းလမ်းပေါင်းစုံဖြင့် စွက်ဖက်လုပ်ဆောင် ဟန့်တားလျက်ရှိကြောင်း၊ တဖက်မှာလည်း အကြမ်းဖက်သောင်းကျန်းသူများဟာ တပ်မတော်နဲ့ပြည်သူပူးပေါင်းလုပ်ဆောင်ချေမှုန်းမှုကြောင့် တဖြည်းဖြည်း အရေးနိမ့်လာလျက်ရှိကြောင်း” လို့ ဆိုပါတယ်။

လက်ရှိမှာ စစ်ကော်မရှင်တပ်က တရုတ်အကူအညီနဲ့ ရှမ်းမြောက်ဒေသက တော်လှန်ရေးတပ်တွေသိမ်းပိုက်ထားတဲ့ မြို့နယ်တချို့ကို ပြန်လည်ထိန်းချုပ်ထားနိုင်ခဲ့ပြီး မိုးကုတ်မြို့ကိုလည်း စစ်ကော်မရှင်ထံ ပြန်ပေးဖို့ TNLA ဘက်က သဘောတူထားပေမယ့် ကာကွယ်ရေးတပ်ဖွဲ့တွေဘက်က မိုးကုတ်မြို့ကို အစွမ်းကုန်ကာကွယ်သွားမယ်လို့ ထုတ်ပြန်ထားပါတယ်။

မန္တလေးတိုင်းအတွင်းမှာ တော်လှန်ရေးတပ်တွေသိမ်းပိုက်ထားတဲ့ သပိတ်ကျင်းမြို့ကို စစ်ကော်မရှင်တပ်က ပြန်လည်ထိန်းချုပ်ထားနိုင်ပြီး နယ်မြေတဆက်တည်းရှိနေတဲ့ မတ္တရာ၊ စဥ့်ကူးနယ်ထဲမှာလည်း တိုက်ပွဲတွေပြင်းထန်နေကာ စစ်ကော်မရှင်တပ်ရဲ့ သာလွန်အင်အားတွေကြောင့် တော်လှန်ရေးတပ်တွေဘက်က နယ်မြေတွေကို ဆုတ်ခွာပေးနေရတာပါ။

အာရက္ခတပ်တော်-AA က ပြည်နယ်တခုလုံးနီးပါး သိမ်းပိုက်ထားနိုင်တဲ့ ရခိုင်ပြည်နယ်မှာတော့ စစ်ကော်မရှင်တပ်က ဆက်လက်စစ်ရှုံးနေပြီး မကွေးတိုင်း၊ ငဖဲမြို့နယ်နဲ့ ပဲခူးတိုင်း၊ ပန်းတောင်းမြို့နယ်တွေက လက်နက်စက်ရုံ ကပစတပ်တွေအနီးအထိ တိုက်ပွဲတွေရောက်ရှိနေတာလည်း ဖြစ်ပါတယ်။

တပ်မိသားစုဝင်တွေ လူမှုကွန်ယက်အသုံးပြုမှုကို စစ်ဆေးကြပ်မတ်ရမယ်လို့ ဆို

မြေလတ်အသံ၊ စက်တင်ဘာ ၂၀၊ ၂၀၂၅။

တပ်မတော် နာမည်ကောင်းကျန်အောင် ဝိုင်းဝန်းဆောင်ရွက်ကြဖို့နဲ့ တပ်မိသားစုဝင်တွေ လူမှုကွန်ယက်အသုံးပြုမှုကို စစ်ဆေးကြပ်မတ်ဖို့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် က မှာကြားလိုက်ပါတယ် ။

စက်တင်ဘာ ၁၉ ရက်မှာ တနင်္သာရီတိုင်း၊ မြိတ်မြို့ကိုရောက်ရှိနေတဲ့ စစ်ခေါင်းဆောင်က ၎င်းရဲ့ လက်အောက် ကမ်းရိုးတန်းဒေသတိုင်းစစ်ဌာနချုပ်ရှိ စစ်ကော်မရှင်တပ်ဖွဲ့ဝင်နဲ့မိသားစုတွေနဲ့ တွေ့ဆုံရာမှာ အခုလိုတိုက်တွန်းပြောဆိုခဲ့တာပါ။

” မိမိကိုယ်ကို ကောင်းအောင်ထိန်းသိမ်းဆောင်ရွက်ပြီး တပ်မတော်သားကောင်းများပီသစွာဖြင့် နိုင်ငံတော်နှင့်တပ်မတော်အပေါ်ကောင်းမွန်အောင် ကြိုးပမ်းဆောင်ရွက်သွားကြရန်၊ တပ်မတော်အတွက် နာမည်ကောင်းကျန်အောင် အားလုံးဝိုင်းဝန်းဆောင်ရွက်သွားကြရန်မှာကြားလိုကြောင်း ” ဆိုကာ စစ်ခေါင်းဆောင် က ပြောပါတယ်။

စစ်ကော်မရှင်တပ်ဖွဲ့ဝင်တွေနဲ့ ၎င်းတို့ရဲ့မိသားစုဝင်တွေအနေနဲ့ လူမှုကွန်ယက်အသုံးပြုရာမှာ အဖွဲ့အစည်းကို ထိခိုက်စေနိုင်မှုမရှိအောင် အသုံးပြုရန်လိုကြောင်းနဲ့ လူမှုကွန်ယက်အသုံးပြုမှုကို တာဝန်ရှိသူတွေက စစ်ဆေးကြပ်မတ်ကြဖို့ လိုအပ်တယ်လို့လည်း ဆိုပါတယ်။

ဒါ့အပြင် စစ်ကော်မရှင်တပ်ဖွဲ့ဝင်တွေအနေနဲ့ အသောက်အစား၊ အပျော်အပါးနဲ့ပတ်သက်ပြီး တဦးချင်းအနေနဲ့ အသိတရားနဲ့ ထိန်းသိမ်းနေထိုင်ကြရမယ်လို့လည်း ၎င်းက ပြောပါတယ်။

ဩဂုတ် ၁ ရက်မှာ စစ်ကောင်စီကို ဖျက်သိမ်းပြီး နိုင်ငံတော်လုံခြုံရေးနဲ့အေးချမ်းသာယာရေးကော်မရှင်(နလအ) ကို ဖွဲ့စည်းကာ နလအဥက္ကဌအဖြစ် အာဏာကိုဆက်လက်ချုပ်ကိုင်ထားပြီးတဲ့နောက် ပဲခူးတိုင်း၊ မကွေးတိုင်းက ၎င်းရဲ့စစ်ကော်မရှင်တပ်ဖွဲ့ဝင်တွေကို လိုက်လံတွေ့ဆုံနေကာ လက်ရှိမှာ ကမ်းရိုးတန်းဒေသတိုင်းစစ်ဌာနချုပ်ကို ရောက်ရှိနေတာလည်း ဖြစ်ပါတယ်။

မြေလတ်အသံ၊ မတ် ၂၇၊ ၂၀၂၅။

PDF တွေနဲ့ EAO တချို့ လက်နက်စွန့်ပြီး ပါတီနိုင်ငံရေးလမ်းကြောင်းကို ရွေးချယ်ကြဖို့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောဆိုလိုက်ပါတယ်။

မတ် ၂၇ ရက် ဒီကနေ့ ညနေပိုင်းမှာပြုလုပ်တဲ့ စစ်ကောင်စီရဲ့ နှစ် ၈၀ ပြည့် တပ်မတော်နေ့မိန့်ခွန်းမှာ အခုလိုထည့်သွင်းပြောဆိုခဲ့တာ ဖြစ်ပါတယ်။

PDF အဖွဲ့တွေနဲ့ တိုင်းရင်းသားအဖွဲ့တွေအနေနဲ့ လက်နက်ကိုင်လမ်းစဉ်ကို စွန့်လွှတ်ပြီး ပါတီနိုင်ငံရေးလမ်းကြောင်းနဲ့ ရွေးကောက်ပွဲလမ်းကြောင်းတွေကတဆင့် နိုင်ငံရေးပြသနာကို နိုင်ငံရေးလမ်းကြောင်းနဲ့သာဖြေရှင်းနိုင်မှာကြောင့် ငြိမ်းချမ်းရေးဆွေးနွေးမှုတွေကို အမြဲတမ်းကြိုဆိုလမ်းဖွင့်ထားကြောင်း ထပ်မံအသိပေးတယ်လို့ စစ်ခေါင်းဆောင်က ဆိုပါတယ်။

ဒါ့အပြင် လွတ်လပ်ပြီးတရားမျှတတဲ့ ပါတီစုံဒီမိုကရေစီ ရွေးကောက်ပွဲ အောင်မြင်အောင်ကျင်းပနိုင်ရေးနဲ့ ရွေးကောက်ပွဲကထွက်ပေါ်လာတဲ့ အစိုးရကို နိုင်ငံတော်အာဏာလွှဲအပ်နိုင်ရေး ဦးတည်ထားပြီး ရွေးကောက်ပွဲကို သတ်မှတ်ကာလအတွင်း ပြန်လည်ကျင်းပပေးဖို့ လုပ်ဆောင်နေပြီးဒေသအလိုက် လုံခြုံရေးအပေါ်မူတည်ကာ ရွေးကောက်ပွဲကို ကျင်းပသွားမှာ ဖြစ်တယ်လို့ စစ်ခေါင်းဆောင်က ပြောပါတယ်။

ဒီကနေ့ ပြုလုပ်တဲ့ စစ်ကောင်စီရဲ့နှစ် ၈၀ ပြည့် တပ်မတော်နေ့အခမ်းအနားကို ညနေပိုင်းမှာ ပြုလုပ်ခဲ့ပြီး အင်အား ၇,၀၀၀ ကျော်နဲ့ စစ်ရေးပြခဲ့တယ်လို့ စစ်ကောင်စီလက်အောက်ခံ မီဒီယာတွေမှာ ဖော်ပြထားပါတယ်။