မင်းလှ

၁ ဦးပြန်ဖမ်းခံထားရပြီး စစ်ကောင်စီတပ်ကစစ်ဆေးမှုတင်းကျပ်ရှာဖွေနေ

မြေလတ်အသံ၊ သြဂုတ် ၄၊ ၂၀၂၅။

ပဲခူးတိုင်း၊ မင်းလှမြို့နယ်က ပေါ်တာဆွဲဖမ်းဆီးခံထားရတဲ့ အမျိုးသား ၁၉ ဦးထွက်ပြေးခဲ့တာကြောင့် စစ်ကောင်စီဘက်က မင်းလှမြို့ပေါ်နဲ့အနီးဝန်းကျင်ကိုစစ်ဆေးမှုတွလုပ်နေတယ်လို့ ဒေသခံတွေဆီက သိရပါတယ်။

သြဂုတ် ၂ ရက်ည ၈ နာရီကျော်မှာ မင်းလှမြို့၊ ထွေအုပ်ရုံး ထိန်းသိမ်းခန်းမှာ ဖမ်းဆီးခံထားရတဲ့ အမျိုးသား ၁၉ ဦးစလုံးထွက်ပြေးခဲ့ကြတာဖြစ်ပြီး အဲ့ဒီက ၁၈ ဦးသာလွတ်မြောက်ခဲ့ကာ ၁ ဦးကတော့ မြို့ပေါ်မှာပြန်အဖမ်းခံလိုက်ရတယ်လို့ ဆိုပါတယ်။

“မနေ့(သြဂုတ် ၂)က မြို့ထဲမှာပတ်ရှာနေတာ။ အစစ်အဆေးလည်းကြမ်းတယ်။ ပုံတွေနဲ့တိုက်စစ်နေတာ။ ၂ ရက်နေ့ညက ပြန်မိတာ ၁ ယောက်က။ ဘယ်နေရာမိလည်းတော့အတိအကျမသိရဘူး။ မြို့ထဲမှာပဲ မိတယ်လို့ ပြောတယ်”လို့ မြေပြင်အခြေအနေကိုသိရှိတဲ့ တော်လှန်ရေးတပ်ဖွဲ့ဝင်တဦးကပြောပါတယ်။

ထွေအုပ်ရုံးရှိ စစ်ကောင်စီတပ်ဖွဲ့ဝင်တွေ မင်းလှမြို့၊ အနောက်ခြမ်းရှိကျေးရွာတွေကို ပေါ်တာသွားဆွဲနေတုန်း အလစ်အငိုက်မှာထွက်ပြေးခဲ့ကြတာဖြစ်ပြီး သူတို့နဲ့ပတ်သက်တဲ့ အသေးစိတ်အချက်အလက်တွေကိုတော့ မြေလတ်အသံကအတည်မပြုနိုင်သေးပါဘူး။

သြဂုတ် ၃ ရက်နဲ့ ၄ ရက်ဒီကနေ့မနက်အချိန်ထိ မင်းလှမြို့ပေါ်မှာ စစ်ကောင်စီတပ်က လွတ်မြောက်သွားသူ ၁၈ ဦးရဲ့ဓာတ်ပုံတွေကိုကိုင်ဆောင်ပြီး စစ်ဆေးမှုတွေလုပ်နေသလို မြို့အနီးရှိကျေးရွာတွေကိုပါ စစ်ကြောင်းထိုးပြီး လိုက်လံရှာဖွေနေတယ်လို့ သိရပါတယ်။

ပြီးခဲ့တဲ့ဇူလိုင် ၈ ရက်နဲ့ ၁၂ ရက်ကလည်း မင်းလှမြို့နယ်၊ ညောင်ပင်သာနဲ့ ငလှစမ်းကျေးရွာတို့ကို စစ်ကြောင်းထိုးဝင်ရောက်ပြီး ရွာခံတွေဖြစ်ကြတဲ့ ကိုမိုးဒီ၊ ကိုညီညီမိုးခန့်၊ ကိုဖိုးကုလား၊ ကိုဝင်းထွဋ်နောင်၊ ကိုမင်းဇော်၊ ကိုစန်းမင်းအောင်တို့ကို ဖမ်းဆီးခဲ့တယ်လို့ ဒေသခံတွေဆီက သိရပါတယ်။

စာတည်း – လင်း

မြေလတ်အသံ၊ ဇူလိုင် ၃၊ ၂၀၂၅။

ပဲခူးတိုင်း၊ မင်းလှမြို့နယ်ကို နှစ်ပတ်အကြာ စစ်‌ကြောင်းထိုးနေတဲ့ စစ်တပ်က ဇရစ်မျှောင်ရွာခံ အမျိုးသမီး ၅ ဦးကို ဖမ်းဆီးထားတယ်လို့ မင်းလှမြို့နယ်ပကဖထံက သိရပါတယ်။

ဇူလိုင် ၂ ရက်‌နေ့ မနက် ၁၁ နာရီကျော်မှာ ဇရစ်မျှောင်ရွာက နေအိမ်တွေကို စစ်တပ်ကဝင်ရောက် မီးဝင်ရှို့ချိန် ရွာထဲကို ပြန်လာတဲ့ မသင်းသင်းဦး၊ မပါပါ၊ မအသေး၊ မမိချိုနဲ့ အမည်မသိရသူအမျိုးသမီး ၁ ဦးတို့ကို ဖမ်းဆီးခဲ့တာလို့ ဆိုပါတယ်။

“သူတို့(အမျိုးသမီးတွေ)ကရွာကို ပြန်လာတုန်းဖမ်းခံရတာ။ စခတွေရုတ်တရက်ရောက်လာတော့ ပိတ်မိပြီးဖမ်းခံရတာ။ သူတို့ဖုန်းတွေလည်းသိမ်းထားတယ်”လို့ မင်းလှမြို့နယ်ပကဖပြန်ကြားရေးတာဝန်ခံ ရဲ ဘော်မိုးထက်က ပြောပါတယ်။

ဒီအမျိုးသမီး ၅ ဦးကို ဖမ်းဆီးခဲ့တဲ့ စစ်ကြောင်းမှာ အင်အား ၄၀ ကျော်ပါပြီး ၎င်းတို့ကို ဇရစ်မျှောင်ဘုန်းတော်ကြီးကျောင်းမှာ ထိန်းသိမ်းထားကာ ဇူလိုင် ၃ ရက်‌နေ့ ဒီနေ့အထိ ပြန်မလွှတ်ပေးသေးဘူးလို့ သူကဆိုပါတယ်။

ဇွန် ၂၀ ရက်ကစပြီး ဇူလိုင် ၃ ရက် ဒီနေ့အထိ မင်းလှမြို့နယ်ထဲကို စစ်​ကြောင်းထိုးဝင်ရောက်နေတဲ့ စစ်ကောင်စီတပ်သားတွေက ကျွဲမကိုင်း၊ တာကလေး၊ ဘန့်ဘွေးကုန်း၊ ဇရစ်မြောင် စတဲ့ကျေးရွာတွေရှိ ဘုန်းကြီး ကျောင်းတွေမှာ ဝင်ရောက်တပ်စွဲထားပါတယ်။

ပြီးခဲ့တဲ့ဇူလိုင် ၁ ရက်‌နေ့ ညနေ ၅ နာရီမှာ ဘန့်ဘွေးကုန်းရွာဘုန်းကြီးကျောင်းမှာ တပ်စွဲနေတဲ့ စစ်ကောင်စီတွေက တော်လှန်ရေးတပ်ဖွဲ့တွေရှိတဲ့ ရိုးမပေါ်ကို လက်နက်ကြီးနဲ့ ပစ်ခတ်ရာ တော်လှန်ရေးတပ်ဖွဲ့တွေဆီမရောက်ခဲ့ဘဲ ကျွဲမကိုင်းရွာက စကစတပ်စခန်းကို ကျရောက်ပေါက်ကွဲခဲ့တယ်လို့ ဆိုပါတယ်။

“စကစစခန်းကို လက်နက်ကြီးကျတာ စကစ ၇ ကောင်သေတယ်လို့ သိရတယ်။မနေ့ကညအထိ တာကလေးရွာစခန်းကလည်း ရွာတွေဘက်ကို လက်နက်ကြီးတွေနဲ့ထုနေတာ”လို့ ရဲဘော်မိုးထက်က ပြောပါ တယ်။

စစ်တပ်ကဇွန် ၂၀ ရက်ကနေ ဒီနေ့အထိ စစ်အင်အား ၅၀၀ ခန့်နဲ့ စစ်ကြောင်း ၃ ခုခွဲဖြန့်ကာ မင်းလှမြို့နယ်ကို စစ်ကြောင်းထိုးဝင် ရောက်နေပါတယ်။

စစ်‌‌ကြောင်း စတင်ဝင်ရောက်လာပြီး တပတ်အတွင်း တောင်ပြတ်ရွာသစ်၊ ရွေးကုန်း၊ ဦးတိုကျွဲလမ်းစု၊ ဗိုလ်တထောင်၊ ဆားချောင်း၊ ဆင်အိုင်ချောင်းပေါက်၊ ဂန့်ဂေါ်ပင်၊ ငလှစမ်း၊ စမ်းဘုတ်၊ ခွက်မ၊ ကျွဲမကိုင်းစတဲ့ ကျေးရွာတွေကို မီးရှို့ခဲ့တာကြောင့် လူနေအိမ် ၁၈၅ လုံးပြာကျပျက်စီးခဲ့တယ်လို့ သိရပါတယ်။

စာတည်း – မြတ်

၅ ရက်အတွင်း နေအိမ် ၂၀၀ နီးပါး မီးရှို့ဖျက်ဆီးခံရ

မြေလတ်အသံ၊ ဇူလိုင် ၂၊ ၂၀၂၅။

ပဲခူးတိုင်း၊ မင်းလှမြို့နယ်က ကျေးရွာ ၂ ရွာကို ဇူလိုင် ၂ ရက်ဒီမနက်မှာ စစ်ကောင်စီစစ်ကြောင်းက မီးထပ်ရှို့နေတယ်လို့ မင်းလှမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ဇရစ်မျှောင်ရွာနဲ့ ရွှေပေါက်ပင်ရွာကို မီးရှို့ခဲ့တာဖြစ်ပြီး စစ်ကောင်စီတပ်ဖွဲ့ဝင်တချို့ကတော့ ကျေးရွာတွေကနေဆုတ်ခွာသွားတာရှိတယ်လို့ ဆိုပါတယ်။

“ဇရစ်မျှောင်ရွာကို ဒီကနေ့(ဇူလိုင်လ ၂ ရက် ) မနက်၁၁နာရီခန့်မှာ စခတွေ မီးတင်ရှို့နေတယ်ဗျ။ ရွှေပေါက်ပင်ရွာကိုလည်း ရှို့နေတယ်။ စကစတွေက တချို့တပ်ဆုတ်သွားခဲ့တာရှိတယ်။ တချို့က ရွာတွေထဲမှာ တပ်စွဲကျန်ခဲ့ကြတာ”လို့ မင်းလှမြို့နယ်ပကဖမှ တာဝန်ရှိသူတဦးကပြောပါတယ်။

ဒီကျေးရွာတွေအတွင်း နေအိမ်ပျက်စီးမှုအခြေအနေတွေကိုတော့ ဆက်လက်စုံစမ်းနေပါတယ်။

အဆိုပါကျေးရွာအပြင် မင်းလှမြို့နယ်အတွင်းရှိ နောက်ထပ်ကျေးရွာ ၁၁ ရွာက နေအိမ် ၁၈၅ လုံးကိုလည်း စစ်ကောင်စီစစ်ကြောင်းကမီးရှို့ဖျက်ဆီးခဲ့ပါတယ်။

အဆိုပါအရေအတွက်ဟာ ဇွန် ၂၀ ရက်ကနေ ဇွန် ၂၅ ရက်အထိ စစ်ကောင်စီတပ်ဖွဲ့ဝင်တွေ မီးရှို့မှုကြောင့်ပျက်စီးခဲ့ရတဲ့အိမ်ခြေအရေအတွက်ကို မင်းလှမြို့နယ်ပြည်သူ့ကာကွယ်ရေးအဖွဲ့က ထုတ်ပြန်ထားတဲ့ စာရင်းဖြစ်ပါတယ်။

စစ်အင်အား ၅၀၀ ခန့်နဲ့ စစ်ကြောင်း ၃ ခုခွဲဖြန့်ကာ မင်းလှမြို့နယ်ကို စစ်ကြောင်းထိုးဝင်ခဲ့ချိန် ၅ ရက်အတွင်း တောင်ပြတ်ရွာသစ်၊ ရွေးကုန်း၊ ဦးတိုကျွဲလမ်းစု၊ ဗိုလ်တထောင်၊ ဆားချောင်း၊ ဆင်အိုင်ချောင်းပေါက်၊ ဂန့်ဂေါ်ပင်၊ ငလှစမ်း၊ စမ်းဘုတ်၊ ခွက်မ၊ ကျွဲမကိုင်းစတဲ့ ကျေးရွာတွေကို မီးရှို့ခဲ့တာပါ။

ဇွန် ၂၀ ရက်မှာ တောင်ပြတ်ရွာသစ်၊ ဇွန် ၂၂ ရက်မှာ ရွေးကုန်း၊ ဦးတိုကျွဲလမ်းစု၊ ဇွန် ၂၃ ရက်မှာ ဗိုလ်တထောင်၊ ဆားချောင်း၊ ဆင်အိုင်ချောင်းပေါက်၊ ဂန့်ဂေါ်ပင်၊ ငလှစမ်း၊ ဇွန် ၂၄ ရက်မှာ စမ်းဘုတ်၊ ဇွန် ၂၅ ရက်မှာ ခွက်မ၊ ကျွဲမကိုင်းစတဲ့ကျေးရွာတို့ အသီးသီးမီးရှို့ခံခဲ့ရတာဖြစ်ပါတယ်။

မီးလောင်ပြာကျခဲ့တဲ့ အိမ်ခြေ ၁၈၅ လုံးမှာ တောင်ပြတ်ရွာသစ်မှ ၂၅လုံး၊ ရွေးကုန်းမှ ၅လုံး၊ ဦးတိုကျွဲလမ်းစုမှ ၄လုံး၊ ဗိုလ်တထောင်မှ ၂၀လုံး၊ ဆားချောင်းမှ ၈လုံး၊ ဆင်အိုင်ချောင်းပေါက်မှ ၈လုံး၊ ဂန့်ဂေါ်ပင်မှ ၅ လုံး၊ ငလှစမ်းမှ ၅၀လုံး၊ စမ်းဘုတ်မှ ၅ လုံး၊ ခွက်မမှ ၁၅ လုံး၊ ကျွဲမကိုင်းမှ ၄၀ လုံးတို့ဖြစ်တယ်လို့ သိရပါတယ်။

စာတည်း – လင်း

အမျိုးသား ၁ ဦးကိုလည်း စစ်ကောင်စီတပ်ကသတ်ခဲ့

မြေလတ်အသံ၊ ဇွန် ၂၆၊ ၂၀၂၅။

ပဲခူးတိုင်း၊ မင်းလှမြို့နယ်ကို စစ်ကြောင်းထိုးနေတဲ့ စစ်ကောင်စီစစ်ကြောင်းဟာ တပတ်အတွင်း ကျေးရွာ ၁၂ ရွာကိုမီးရှို့ပြီးဒေသခံတွေကိုလည်းဖမ်းဆီးသတ်ဖြတ်ခဲ့တယ်လို့ ဒေသခံတော်လှန်ရေး အင်အားစုတွေဆီက သိရပါတယ်။

ဇွန် ၂၆ ရက်ဒီကနေ့မနက်မှာ အိမ်ခြေ ၁၀၀ ကျော်ရှိတဲ့ ကျွဲမကိုင်းနဲ့ ခွက်မကျေးရွာကို မီးရှို့ခဲ့တာကြောင့် ၇ ရက်အတွင်းမီးရှို့ခံရတဲ့ကျေးရွာ ၁၂ ရွာအထိရှိလာခဲ့တာလို့ ဆိုပါတယ်။

“အဲ့ ၂ ရွာက ရွာနီးစပ်တွေပေါ့။ သူတို့ (စကစ)က မနေ့ကတည်းကမီးရှို့တာ။ မီးမလောင်ခဲ့တော့ ဒီနေ့ ပြန်လာပြီးမီးရှို့တာပါ။ အိမ်ဘယ်လောက်လောင်သွားလည်းဆိုတာတော့ မသိရဘူး။ စကစတွေ ကင်းပုန်းတွေချထားတော့မသွားရဲကြသေးဘူး”လို့ မြေပြင်အခြေအနေကိုသိရှိတဲ့ PDF တပ်ဖွဲ့ဝင်တဦးက ပြောပါတယ်။

စစ်ကြောင်းစထိုးတဲ့ဇွန် ၂၀ ရက်ကနေ ဇွန် ၂၆ ရက်အထိ မင်းလှမြို့နယ်ထဲက တောင်ပြတ်၊ ဦးတိုကျွဲလမ်းစု၊ ဗိုလ်တထောင်၊ ဆားချောင်း၊ ဆင်အိုင်ချောင်းပေါက်၊ ဂန့်ဂေါပင်၊ ငလှစမ်း၊ ကျွဲမကိုင်း၊ ခွက်မ၊ စမ်းဘုတ်၊ ရွေးကုန်း၊ ဘန့်ဘွေးပင်စတဲ့ ကျေးရွာတွေကို မီးရှို့ခဲ့တာလို့ ဆိုပါတယ်။

ဒါ့အပြင် ဇွန် ၂၃ ရက်မှာ ငလှစမ်းရွာက အမျိုးသား ၁၀ ဦး၊ ဇွန် ၂၄ ရက်မှာ ဘန့်ဘွေးပင်ရွာက အမျိုးသား ၁ ဦးနဲ့ အမျိုးသမီး ၁ ဦးတို့ကိုဖမ်းဆီးခဲ့ပြီး အဲဒီထဲက ငလှစမ်းရွာနေ အသက် ၃၅ နှစ်အရွယ် ကိုသန်းဇော်ဝင်း ကိုတော့သတ်ဖြတ်ခဲ့တယ်လို့ ဆိုပါတယ်။

“ကိုသန်းဇော်ဝင်းအလောင်းကို ရွာထဲက ဗုံးခိုကျင်းထဲမှာတွေ့ခဲ့ရတာ။ အလောင်းမှာ လက်တွေ၊ ခြေတွေကို ကြိုးတုပ်ထားတာတွေ့ရတယ်။ သူနဲ့အတူဖမ်းခံရတဲ့သူတွေကိုတော့ စစ်ကြောင်းထိုးရာ ဖမ်းခေါ်သွားတယ် ထင်တာပဲ။ ဘန့်ဘွေးပင်က ၂ ယောက်တော့ မောင်နှမတွေတဲ့”လို့ မျက်မြင်ဒေသခံ ပြောပြချက်ကို တပ်ဖွဲ့ဝင်ကပြန်ပြောပါတယ်။

ကိုသန်းဇော်ဝင်းရဲ့ရုပ်အလောင်းကိုတော့ ဇွန် ၂၅ ရက်မနက်ပိုင်းမှာ ငလှစမ်းရွာကို တော်လှန်ရေးတပ်ဖွဲ့တချို့က ရှင်းလင်းရေးဝင်ရောက်ခဲ့ချိန်တွေ့ရှိခဲ့ကြတာလို့ သူကဆက်ပြောပါတယ်။

စစ်ကောင်စီစစ်ကြောင်းဟာ စစ်ကွင်းတာဇုံရဲကင်းစခန်းကနေ မင်းလှမြို့နယ်ရှိကျေးရွာတွေကို ဇွန် ၂၀ ရက်ကစတင်ပြီး အင်အား ၅၀၀ ခန့်နဲ့ စစ်ကြောင်း ၃ ကြောင်းခွဲဖြန့်ကာ စစ်ကြောင်းထိုးဝင်ရောက်လာခဲ့တာလည်းဖြစ်ပါတယ်။

စစ်အာဏာသိမ်းချိန်ကနေ အခုနှစ် ဇွန် ၂၅ ရက်ထိ စစ်ကောင်စီနဲ့ ၎င်းတို့ရဲ့လက်ပါးစေတွေကြောင့် သေဆုံးခဲ့တဲ့ပြည်သူစုစုပေါင်း ၆,၈၁၉ ဦးရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP ရဲ့အစီရင်ခံစာအရ သိရပါတယ်။

စာတည်း – လင်း

မြေလတ်အသံ၊ဇွန် ၁၉၊ ၂၀၂၅။

ပဲခူးတိုင်း၊ သာယာဝတီခရိုင်၊ မင်းလှမြို့နယ်မှာ ရဲတပ်သားတွေ မိုင်းဆွဲတိုက်ခိုက်ခံရပြီးနောက် ရန်ကုန်-ပြည်လမ်းပိုင်းကို စစ်ကောင်စီတပ်က လုံခြုံရေးတိုးမြှင့်ချထားတယ်လို့ သာယာဝတီခရိုင် တပ်ရင်း ၃၈ဝ၂၊ တပ်ခွဲ ၄ မြေအောက်ပြောက်ကျားတပ်ဖွဲ့-အုတ်ဖိုဆီက သိရပါတယ်။

ဇွန် ၁၈ ရက်မနက် ၁၁ နာရီကျော်က ရန်ကုန်- ပြည်လမ်းမရှိ စစ်ကွင်းတာဆုံရဲကင်းစခန်းကနေ ဆိုင်ကယ် ၅ စီးနဲ့ရဲ ၁၀ ဦးက မင်းလှမြို့ပေါ်ကိုပြန်လာချိန် ဂင်ဒိတ်ကုန်းကျေးရွာအဝင်မှာ မိုင်းဆွဲတိုက်ခိုက်ခဲ့တာကြောင့် ၁ ဦးသေဆုံးပြီး ၂ ဦးဒဏ်ရာရရှိခဲ့တယ်လို့ဆိုပါတယ်။

“ဆိုင်ကယ် ၄ စီးကရှေ့ကဗျ။ ၁ စီးက နောက်ကျကျန်နေတာ။ ၄ စီးကို အသင့်ထောင်ထားတဲ့မိုင်း ၁ လုံးနဲ့ ဆွဲတာဗျ။ မျက်မြင်တင် ထိုးလဲသွားတာ ၁ စီး။ ကျန်တဲ့အစီးတွေက ဖရိုဖရဲဖြစ်ပြီး ဆိုင်ကယ်တွေပါ လဲကုန်တာ။ အဲ့မှာ ၁ ကောင်က ပွဲချင်းပြီးသေတာ။”လို့ သာယာဝတီခရိုင် တပ်ရင်း ၃၈ဝ၂၊ တပ်ခွဲ ၄မှ ပြန်ကြားရေးတာဝန်ခံက ပြောပါတယ်။

သေဆုံးသူနဲ့ဒဏ်ရာရရှိခဲ့တဲ့ ရဲတပ်သားတွေကိုတော့ မင်းလှမြို့ပေါ်ကနေ စစ်ကား ၁ စီးနဲ့ သယ်ဆောင်လာပြီးနောက် ပြည်မြို့ဆေးရုံကိုပို့ဆောင်ခဲ့တယ်လို့ သူကဆိုပါတယ်။

အခုလိုမိုင်းဆွဲတိုက်ခိုက်ခံရပြီးနောက်ပိုင်းမှာတော့ စစ်ကောင်စီတပ်က ရန်ကုန်-ပြည်လမ်းပိုင်းရှိ မင်းလှမြို့နယ်ကနေ အုတ်ဖိုမြို့နယ်အထိ လမ်းတလျောက် စစ်အင်အား ၁၀၀ ကျော်ချခဲ့တယ်လို့ အထက်ပါတာဝန်ခံက ပြောပါတယ်။

အဆိုပါလမ်းပိုင်းမှာ စစ်ကောင်စီတပ်က လုံခြုံရေးတိုးမြှင့်ချထားတာကြောင့် တိုက်ပွဲ အချိန်မရွေးဖြစ်လာနိုင်တဲ့အတွက် ဒေသခံတွေအနေနဲ့ သွားလာမှုမပြုကြဖို့ကိုလည်း သူက သတိပေးလိုက်ပါတယ်။

ပြီးခဲ့တဲ့ဇွန် ၁၆ရက်ကလည်း မင်းလှမြို့နယ်၊ ဆင်အိုင်ချောင်းပေါက်ကျေးရွာအနီးမှာ ၁ ကြိမ်၊ ရန်ကုန် -ပြည်လမ်းပိုင်းရှိ စစ်ကွင်းတာဆုံ ရဲကင်းစခန်းကို ၁ ကြိမ်နဲ့ ရှမ်းတောကျေးရွာအနီး ၁ ကြိမ် စုစုပေါင်း ၃ ကြိမ်တိုက်ပွဲဖြစ်ပွားခဲ့ရာ စစ်ကောင်စီဘက်မှ ဗိုလ်မှူး ၁ ဦး၊ ခရိုင်ရဲမှူး ၁ ဦး၊ မြို့မရဲစခန်းမှူး ၁ ဦး အပါအဝင် စစ်ကောင်စီတပ်သား ၂၀ ဦးခန့် သေဆုံးခဲ့တယ်လို့ သိရပါတယ်။

ပုံစာ – စစ်ကောင်စီ စစ်ကြောင်းတခုအား တွေ့ရစဉ်။ (ပုံဟောင်း)

စာတည်း – လင်း