ဘုတလင်၊ ဇွန် ၁၈၊ ၂၀၂၅။

စစ်ကိုင်းတိုင်း၊ ဘုတလင်မြို့နယ်အတွင်းမှာ ဒေါ်အောင်ဆန်းစုကြည်ရဲ့ အသက် ၈၀ မွေးနေ့အကြို အထိမ်းအမှတ်အဖြစ် ပန်းသပိတ်နှိုးဆော်တဲ့စာစောင်တွေဖြန့်ဝေခဲ့တယ်လို့ ဒေါင်းရာဇာပင်မ သပိတ်စစ်ကြောင်း-ဘုတလင်မြို့ ဆီက သိရပါတယ်။

ဇွန် ၁၆ ရက်က‌နေ ဒီကနေ့ ၁၈ ရက်အထိ ဘုတလင်မြို့နယ်ထဲကကျေးရွာတွေမှာ စာစောင်ဖြန့်ဝေတာ၊ စာစောင်တွေကို ဓါတ်တိုင်တွေကပ်တာတွေကို လူအင်အား ၃၀ ဝန်းကျင်လောက်နဲ့ လုပ်ခဲ့တာလို့ ဒေါင်းရာဇာပင်မသပိတ်စစ်ကြောင်း-ဘုတလင်မြို့ အတွင်းရေးမှူးက ပြောပါတယ်။

စစ်ကိုင်း၊ မတ် ၂၉၊ ၂၀၂၃။

စစ်ကိုင်းတိုင်း၊ ဘုတလင်မြို့နယ်က အမျိုးသား ၆ ဦးကို စစ်ကောင်စီတပ်သားတွေက မတ်လ ၂၉ ရက်ဒီနေ့လယ် ၁၂ နာရီလောက်မှာ ကြိုးတုပ်ပြီးဖမ်းခေါ်လာတာကို တွေ့လိုက်ရတယ်လို့ ဒေသခံတွေက ပြောပါတယ်။

အင်အား ၄၀ ကျော်ပါတဲ့ စစ်ကောင်စီတပ်သားတွေဟာ သပြေကန်၊ ရွှေတောင်၊ ရှမ်းတဲ၊ လွဲတဲ၊ မျောက်တောကြီး၊ မျောက်ကျီ စတဲ့ကျေးရွာတွေ ကို စစ်ကြောင်းထိုးခဲ့ပြီးနောက် အမျိုးသား ၆ ဦးကို ဖမ်းဆီးလာပြီး ဘုတလင်မြို့ထဲကို ခေါ်သွားတယ်လို့ ဘုတလင်မြို့နယ်သတင်းမှန်ပြန်ကြားရေးမှ တာဝန်ခံက ပြောပါတယ်။

“စကစတွေ စစ်ကြောင်းထိုးခဲ့တဲ့ရွာတွေက မြို့ရဲ့တောင်ဖက်မှာ ရှိတာ။ မြို့နဲ့ သိပ်မဝေးပါဘူး။ ဖမ်းလာတဲ့အမျိုးသား ၆ ယောက်ကိုတော့ ၂ ယောက်တတွဲစီ ကြိုးတုပ်ပြီးတော့ မြို့ထဲကို ခေါ်သွားတာ။ သူတို့ဘယ်ရွာက ဆိုတာကိုတော့ မသိရှိရသေးဘူး” လို့ ဆိုပါတယ်။

အဖမ်းခံရသူတွေဟာ အသက် ၂၀ နဲ့ ၃၀ နှစ်အရွယ်တွေဖြစ်ပြီး၊ သူတို့နဲ့ပတ်သက်တဲ့ အသေးစိတ်အချက်အလက်တွေကို မသိရှိရသေးပေမယ့် စစ်ကြောင်းထိုးခံရတဲ့ ကျေးရွာတွေက ဒေသခံတွေ ဖြစ်နိုင်တယ်လို့ အထက်ပါတာဝန်ရှိသူက ခန့်မှန်းပါတယ်။

“ဒီနေ့မှာ တိုက်ပွဲလည်း မရှိဘူးဗျ။ စကစတွေက ရွာတွေကို ဝင်ပြီးစစ်ဆေးတာတွေ နေ့တိုင်းလိုလိုလုပ်နေတာ။ ဒီနေ့အဖမ်းခံရသူတွေကလည်း စကစတွေ ဝင်စစ်ခဲ့တဲ့ ရွာခံသားတွေ ဖြစ်နိုင်တယ်” လို့ ဆိုပါတယ်။

ဒီဖြစ်စဥ်နဲ့ပတ်သက်ပြီး နောက်ဆက်တွဲအချက်အလက်တွေကိုတော့ မြေလတ်အသံက ဆက်လက်စုံစမ်းနေဆဲပါ။

အဲ့ဒီစစ်ကြောင်းဟာ ပြီးခဲ့တဲ့မတ်လ ၂၅ ရက်မှာလည်း အိမ်ခြေ ၃၀၀ ခန့်ရှိတဲ့ ဆုံကုန်းကျေးရွာကို ဝင်ရောက်မီးရှို့ခဲ့ပြီး၊ ကျေးရွာထဲ ပိတ်ကျန်ခဲ့တဲ့ မျက်မမြင် အဘွားအို ၂ ဦးနဲ့ လေဖြတ်နေတဲ့ အဘွားအို ၂ ဦးအပါအဝင် ၇ ဦး မီးလောင်သေဆုံးခဲ့ကာ အိမ်ခြေ ၁၇၅ လုံးလည်း ပြာကျပျက်စီးခဲ့တယ်လို့ ဒေသခံဆီက သိရပါတယ်။

စာတည်း – လင်း

ဘုတလင်၊ မတ် ၂၇၊ ၂၀၂၃။

စစ်ကိုင်းတိုင်း၊ ဘုတလင်မြို့နယ်ထဲက စစ်ရှောင်စာသင်ကျောင်းကို နွေဦးတော်လှန်ရေးသပိတ်အင်အားစုနဲ့ ကနီဒေသခံတွေပူးပေါင်းပြီး ကျောင်းသုံးပစ္စည်းနဲ့ စားသောက်ကုန်ပစ္စည်းတွေကို မတ်လ ၂၄ ရက်က လှူဒါန်းခဲ့တယ်လို့ သိရပါတယ်။

ကျောင်းသား၊သူပေါင်း ၂၀၇ ဦးရှိတဲ့ ဘုတလင်မြို့နယ်ထဲက စစ်ရှောင်စာသင်ကျောင်းကို ကျောင်းသုံးစာအုပ် ၁၈ ဒါဇင်၊ ခဲတံ ၆ ဘူး၊ ဖောင်တိန် ၇ ဘူး၊ ခဲဖျက် ၃ ဘူး၊ ဆန် ၅ အိတ်၊ ကြက်သွန် ၈ အိတ်၊ ပဲ ၂ အိတ်၊ ဆီဘူး ၃၀၊ အဝတ်အထည် ၃ အိတ်နဲ့ ဟင်းချက်စရာများကိုလှူဒါန်းခဲ့တာလို့ နွေဦးတော်လှန်ရေးသပိတ်မှ တာဝန်ရှိသူတဦးက ပြောပါတယ်။

“အဲဒီကျောင်းမှာ KG တန်းကနေ Grade 8 အထိရှိတယ်။ CDM ဆရာမက ၄ ဦးရှိတယ်။ စေတနာ့ဝန်ထမ်း ၂၃ ဦးရှိတယ်။ သူတို့ကျောင်းကိုဖွင့်ထားတာ ၃ လလောက်ပဲ ရှိသေးတယ်။ သူတို့လေးတွေ တောထဲမှာနေရတာ တနှစ်ကျော်ပြီ။ ကျနော်တို့ သပိတ်အင်အားစုကို အကူညီတောင်းလို့သွားရောက်လှူဒါန်းခဲ့တာ” လို့ ဆိုပါတယ်။

ကနီသပိတ်အင်အားစုအနေနဲ့ သွားရောက်လှူဒါန်းခဲ့တဲ့ စာသင်ကျောင်းဟာ စစ်ကောင်စီတပ်နဲ့ သိပ်မဝေးတဲ့အတွက် အခက်အခဲတွေကြားက သွားရောက်လှူဒါန်းခဲ့ရတာဖြစ်ပြီး၊ ရှေ့ဆက်ပြီးတော့လည်း လှူဒါန်းနိုင်အောင်ကြိုးစားသွားမယ်လို့ အထက်ပါတာဝန်ရှိသူက ဆက်ပြောပါတယ်။

“သူတို့နေထိုင်တဲ့ရွာက စစ်ကောင်စီတွေတပ်ချထားတော့ ပြေးလွှားနေထိုင် နေရတယ်။ တကယ်ကိုလည်း အကူညီတွေလိုအပ်နေတဲ့အတွက် ကျနော်တို့တွေ သွားရောက်လှူဒါန်းရတယ်။ အဲဒီဒေသက ကျနော်တို့နဲ့လည်း အရမ်းဝေးတယ်။ ဘေးပတ်ပတ်လည်မှာလည်း စစ်ကောင်စီတပ်တွေက ရှိတယ်။ တော်တော်လေးကို သတိထားပြီး သွားရတာပါ” လို့ ဆိုပါတယ်။

လိုအပ်ချက်ရှိတဲ့နေရာတိုင်းကို သွားရောက်လှူဒါန်းချင်ပေမဲ့လည်း အလှူရှင်အားနည်းတဲ့အတွက် ချက်ချင်းလှူဒါန်းလို့မရသေးပေမယ့် သပိတ်အင်အားစုအနေနဲ့ ဆက်လက်လှူဒါန်းမှုကို ပြုလုပ်သွားဖို့ ရှိတယ်လို့ ဆိုပါတယ်။

ပြီးခဲ့တဲ့ မတ်လ ၂၆ ရက်ကလည်း ကနီမြို့နယ်ရှိ ပြည်သူ့အခြေပြု စာသင်ကျောင်းတကျောင်းက ကျောင်းသား ၁၈၂ ဦးကို ကနီသပိတ်အင်အားစုက တပတ်တိုင်တိုင် နေ့စဉ်သံဓာတ်အားတိုးဆေး တိုက်ကျွေးခဲ့ပါသေးတယ်။

စာတည်း – လင်း

ဘုတလင်၊ မတ် ၂၅၊ ၂၀၂၃။

စစ်ကိုင်းတိုင်း၊ ဘုတလင်မြို့နယ် ဆုံကုန်းရွာကို စစ်ကောင်စီတပ်သားတွေ တိုက်ပွဲမရှိပဲ စစ်ကြောင်းထိုးဝင်လာပြီး မသန်စွမ်းအမျိုးသမီးတဦးအပါအဝင် ပြည်သူ ၇ဦးကိုသတ်ပြီး ရွာကိုပါ မီးရှို့သွားခဲ့ပါတယ်။

အင်အား ၅၀ကျော်ပါတဲ့ စစ်ကြောင်းဟာ မတ်လ ၂၅ရက် ဒီနေ့မနက် ၇နာရီခွဲလောက်မှာ ဘုတလင်မြို့ရဲစခန်းကနေ အနောင်တောင်ဘက် ၅မိုင်လောက်အကွာမှာရှိတဲ့ ဆုံကုန်းရွာကို ဝင်လာပြီး အသက် ၅၀ ကျော် ၆၀ဝန်းကျင် အမျိုးသမီး ၅ဦးနဲ့ အမျိုးသား ၂ဦးကို သတ်သွားခဲ့တာဖြစ်တယ်လို့ ဒေသခံတဦးက ပြောပါတယ်။

“စစ်ကြောင်းလာရင် တရွာလုံးထွက်ပြေးနေကြ။ စစ်ကောင်စီတပ်တွေ အကြမ်းဖက်သတ်ဖြတ်သွားတဲ့သူတွေထဲမှာ အမျိုးသမီးနှစ်ဦးက မျက်မမြင်တဦးနဲ့ ကင်ဆာဝေဒနာ တဦးပါ” လို့ ဒေသခံ အမျိုးသားတဦးက ဆိုပါတယ်။

အဲ့ဒီလို့ မီးရှို့ သတ်ဖြတ်တာတွေ လုပ်ခဲ့တဲ့ စစ်ကြောင်းဟာ တနာရီအကြာမှာ ဘုတလင်မြို့ထဲပြန်ဝင်သွားခဲ့ပြီး မီးလောင်ကျန်ခဲ့တဲ့ရွာကိုတော့ ရွာသားတွေက ဝိုင်းဝန်းငြိမ်းသတ်ခဲ့ရတယ်လို့ ဆိုပါတယ်။

အာဏာသိမ်းပြီးချိန်စလို့ လက်ရှိအချိန်ထိ စစ်ကောင်စီတပ်ဟာ ဘုတလင်မြို့နယ်ထဲ ကျေးရွာစုစုပေါင်း ၂၂ရွာနဲ့ ပြည်သူနေအိမ်ပေါင်း ၇၀၀ ကျော်မီးရှို့ခဲ့တယ်လို့ သိရပါတယ်။

ဘုတလင်၊ မတ် ၇၊ ၂၀၂၃။

စစ်ကိုင်းတိုင်း၊ ဘုတလင်မြို့နယ်မှာ မတ်လ ၅ ရက်နဲ့ ၆ ရက်အတွင်း ဒေသခံပြည်သူ ၅ ဦး မိုင်းနင်းမိပြီး ထိခိုက်ဒဏ်ရာရခဲ့တယ်လို့ သိရပါတယ်။

မတ်လ ၅ ရက်က ဘုတလင်မြို့ရဲ့ အနောက်တောင်ခြမ်းရှိ တောတိုက် ၂ နေရာမှာ ဒေသခံအမျိုးသား ၂ ဦးနဲ့ အမျိုးသမီး ၁ ဦး၊ မတ်လ ၆ ရက်မှာတော့ ဘုတလင်မြို့၊ ကျွဲတဲရွာအနီးမှာ အမျိုးသား ၂ ဦးတို့ အသီးသီး မိုင်းနင်းမိပြီး ထိခိုက်ဒဏ်ရာ ရခဲ့ကြတာလို့ Myammar Defence Force ရဲ့ အဖွဲ့ဝင်တဦးက ပြောပါတယ်။

“မြို့အနီးက တောတိုက်တွေနဲ့ ပြည်သူတွေ သွားလာတဲ့လှည်းလမ်းတွေ၊ တောတိုက်တွေက ခြေလျင်လမ်းတွေမှာ နင်းမိုင်းတွေ ထောင်ထားတာပါ။ အလုံးရေက ရာဂဏန်းတော့ ရှိမယ်မှန်းတယ်။ မြို့သိမ်းတိုက်ပွဲ ဆင်နွှဲမယ်ဆိုတဲ့ သတင်းထွက်ပြီးကတည်းက နင်းမိုင်းတွေ စထောင်တာ” လို့ ပြောပါတယ်။

မိုင်းနင်းမိသူတွေအနေနဲ့ ထိခိုက်ဒဏ်ရာသာ ရရှိခဲ့တာကြောင့် လက်ရှိမှာ သူတို့ကို ဆေးကုသပေးနေကာ နာမည်နဲ့ နေရပ်ကိုတော့ လုံခြုံရေးအခြေအနေကြောင့် ထည့်သွင်းပြောကြားခဲ့ခြင်း မရှိပါဘူး။

ဒေသခံ PDF တွေက မြို့သိမ်းတိုက်ပွဲဝင်မယ်ဆိုတဲ့ သတင်းတွေ ထွက်ပေါ်နေတာကြောင့် စစ်ကောင်စီတပ်တွေက ခုလိုမြို့တပတ်လည်မှာ မိုင်းတွေထောင်ထားတာလို့ ကာကွယ်ရေးတပ်ဖွဲ့ဝင်တွေက ခန့်မှန်းပေမယ့် ဒီမိုင်းတွေကို ဘယ်အဖွဲ့အစည်းက ထောင်ထားလဲ ဆိုတာကိုတော့ မြေလတ်အသံက သီးခြားအတည်မပြုနိုင်သေးပါဘူး။

ဒီနင်းမိုင်းတွေကို ဒေသခံလယ်သမားနဲ့ စျေးသည်တွေ သွားလာနေတဲ့ တောတိုက်တွေထဲက လှည်းလမ်းတွေနဲ့ ခြေလျင်လမ်းတွေမှာ ထောင်ထားတာဖြစ်ပြီး၊ လက်ရှိမှာ Myanmar Defence Force နဲ့ မဟာမိတ်တပ်ဖွဲ့တွေ ပေါင်းပြီး မိုင်းရှာဖွေမှုတွေ ပြုလုပ်နေတယ်လို့ ဆိုပါတယ်။

မတ်လ ၆ ရက် မနေ့ကမနက်၉ နာရီလောက်မှာလည်း ဘုတလင်မြို့ရဲ့အရှေ့ခြမ်း ၆ မိုင်အကွာလောက်က ကံသစ်ရွာအနီးမှာ အင်အား ၅၀ လောက်ရှိတဲ့ စစ်ကောင်စီတပ်နဲ့ ဒေသခံမဟာမိတ်တပ်တွေ ထိတွေ့တိုက်ပွဲ ဖြစ်ပွားခဲ့တယ်လို့ သိရပါတယ်။

စာတည်း – လင်း

မုံရွာ၊ ဖေဖော်ဝါရီ ၂၂၊ ၂၀၂၃။

စစ်ကိုင်းတိုင်း၊ မုံရွာခရိုင်၊ ဘုတလင်မြို့နယ်က ကျေးရွာ ၁ ရွာမှာ ဒီနေ့ ဖေဖော်ဝါရီလ ၂၂ ရက် မနက်ပိုင်းက ဖက်ဒရယ်အရေး၊ မကြောက်တရားနဲ့ ဖက်ဒရယ်ပညာရေးတို့ကို လိုက်လံ မျှဝေ ဟောပြောခဲ့တယ်လို့ ဆိုပါတယ်။

“ကျေးရွာ ၁ ရွာမှာ စုပေါင်းပြီး ဟောပြောပွဲ ပြုလုပ်ခဲ့တာပါ။ ကျေးရွာရပ်မိရပ်ဖတွေနဲ့အတူ ဒေသခံ လူဦးရေ ၅၀ ကျော်နီးပါး ဟောပြောပွဲမှာ လာရောက်ပါဝင်ခဲ့ကြပါတယ်” လို့ မုံရွာသပိတ်ကော်မတီဝင်တဦးက ပြောပါတယ်။

ဟောပြောပွဲကို မုံရွာလူထုသပိတ်တိုက်ပွဲ ဦးဆောင်ကော်မတီမှ ဦးခန့်ဝေဖြိုး၊ မုံရွာစီးပွားရေး တက္ကသိုလ်ကျောင်းသားများသမဂ္ဂ မှ ကိုရှင်းသန့်အပါအဝင် ကိုသန့်ကုဋေအောင်တို့မှ ဦးဆောင်ဟောပြောခဲ့တာလို့ ဆိုပါတယ်။