ပါရာမော်တာ

ကနီ၊ ဩဂုတ် ၂၊ ၂၀၂၆။

စစ်ကိုင်းတိုင်း၊ ကနီမြို့နယ်၊ ယာကြီးရွာက ဓာတ်ဆီဆိုင်ကို လေကြောင်းတိုက်ခိုက်ခဲ့လို့ အမျိုးသား ၁ ဦးသေဆုံးပြီး၊ ကား ၂ စီး မီးလောင်သွားတယ်လို့ ဒေသခံတွေဆီက သိရပါတယ်။

ဩဂုတ်လ ၁ ရက်နေ့ နေ့လယ် ၃ နာရီခန့်က ယာကြီးကျေးရွာကို စစ်ကော်မရှင်တပ်က တိုက်ခိုက်ရေး ဂျတ်လေယာဉ်အပါဝင် ပါရာမော်တာတွေနဲ့ပါ လေကြောင်းက တိုက်ခိုက်ခံခဲ့ရတာလို့ ရွာခံတွေက ပြောပါတယ်။

“မြတ် ဘီယာဆိုင်ရဲ့ မြောက်ဘက်က ဓာတ်ဆီဆိုင်မှာ ကျတာ၊ ပထမက ဖိုက်တာက ဂန့်ဂေါကနေ သွားဝဲပြီး အပြန်မှာ ချသွားတယ်။ ချသွားပြီးတော့ ပါရာမော်တာ တက်တယ်။ ပါရာမော်တာကလည်း အဲဒီနားလေးပဲ ချတာ၊ တနေရာတည်းပဲ၊ ပြည်သူ ၁ ယောက် သေတယ်။” လို့ ရွာခံအမျိုးသားတဦးက ပြောပါတယ်။

သေဆုံးသူဟာ ရင်ဘတ်နဲ့ မျက်နှာတွေ ပွင့်ထားတဲ့ ဒဏ်ရာနဲ့ သေဆုံးသွားကာ ဆီဆိုင်ဘေးက ဆီတင်ကား ၁ စီးနဲ့ အခြားကုန်တင်ကား ၁ စီး မီးလောင်သွားတယ်လို့ ရွာခံအမျိုးသမီးတဦးဆီက သိရပါတယ်။

“ရင်ဘက်နဲ့ မျက်နှာ ပွင့်သွားတယ်တဲ့၊ ဗုံးစ ထိတဲ့လူတွေလည်း ရှိတယ်။ အရေအတွက် သေချာတော့ မသိရသေးဘူး။” လို့ အမျိုးသမီးတဦးက ပြောပါတယ်။

သေဆုံးသူအမျိုးသားက အသက် ၅၀ အရွယ် ဆယ်ရွာချောင်ကျေးရွာက ဦးပေါသီးဆိုသူ အမျိုးသားဖြစ်ပြီး၊ ကားရပ်နားချိန် စျေးဆင်းဝယ်ရာက ပြန်အထွက်မှာ ဗုံးထိမှန် သေဆုံးခဲ့တာလို့ ရွာခံအမျိုးသမီးတဦးက မြေလတ်အသံကို ပြောပါတယ်။

တိုက်ခိုက်ရေးလေယာဉ်နဲ့ ဗုံးကြဲပြီးနောက် ပါရာမော်တာနဲ့ ၂ ကြိမ် ဗုံးကြဲခဲ့ပြီး၊ ၁ ကြိမ်သာ ပေါက်ကွဲခဲ့တာကြောင့် အနီးအနားက နေအိမ်တွေလည်း ထိခိုက်ပျက်စီး သွားတယ်လို့ သိရပါတယ်။

ယာကြီးရွာဟာ မုံရွာ-ယာကြီး-မင်းကင်း-ကလေးဝ လမ်းပိုင်းမှာ ရှိတာဖြစ်ပြီး၊ စည်ကားတဲ့ ရွာကြီးတရွာလည်း ဖြစ်ပါတယ်။

မြေလတ်အသံ၊ စက်တင်ဘာ ၂၃၊၂၀၂၅ ။

စစ်ကိုင်းတိုင်း၊ ကနီမြို့နယ်၊ သမင်ခြံရွာကို စစ်ကော်မရှင်တပ်က ပါရာမော်တာနဲ့ ဗုံးကြဲချတိုက်ခိုက်ခဲ့လို့ ၄ ဦး ဗုံးစထိမှန်သေဆုံးခဲ့တယ်လို့ ဒေသခံတွေထံက သိရပါတယ်။

စက်တင်ဘာ ၂၂ မနေ့ ညနေ ၆ နာရီခန့်မှာ နမခစစ်ဌာနချုပ်ကလာတဲ့ ပါရာမော်တာနဲ့ ဗုံး ၂ ကြိမ်ကြဲချ တိုက်ခိုက်ခဲ့ရာ ကျေးရွာတွင်းနေအိမ်တွေပေါ်ကျရောက် ပေါက်ကွဲခဲ့တာလို့ ဆိုပါတယ်။

” စစ်ရှောင်ရာကနေ အိမ်ပြန်ရတာမှ မကြာသေးဘူး ပါရာမော်တာလာပစ်ခံရတယ်။ ၂ လအတွင်းကို ၅ယောက်သေဆုံးပြီးပြီ” လို့ ရွာခံတဦးက မြေလတ်အသံကို ပြောပါတယ်။

ဗုံးပေါက်ကွဲမှုကြောင့် သမင်ခြံကျေးရွာနေ ဦးကြည်အေး ၇၁ နှစ်၊ မသန်းသန်းပို ၃၃ နှစ်၊ ဒေါ်ပြား ၆၈ နှစ်၊ ကိုကျော်သူ ၃၆ နှစ်တို့ ၄ ဦး ဗုံးစထိမှန်ဒဏ်ရာတွေနဲ့သေဆုံးခဲ့ပြီး နေအိမ် ၂ လုံးပျက်စီးခဲ့ကာ ခြံဝန်းအတွင်းရှိ နွား ၆ ကောင်လည်းသေဆုံးခဲ့တယ်လို့ သိရပါတယ်။

သမင်ခြံရွာကို စစ်ကော်မရှင်တပ်က လေကြောင်းကနေ မကြာခဏဗုံးကြဲတိုက်ခိုက်နေတာနဲ့ စက်တင်ဘာလပထမပတ်အတွင်းဖြစ်ပွားခဲ့တဲ့ ချောင်းမရွာအနီးတိုက်ပွဲတွေကြောင့် ရွာခံတွေက စစ်ရှောင်တိမ်းနေထိုင်ရာက တိုက်ပွဲတွေပြီးဆုံးသွားပြီးနောက် ကျေးရွာတွင်းပြန်လည်နေထိုင်တာ ၇ ရက်ခန့်သာ ရှိသေးတယ်လို့ ဆိုပါတယ်။

သမင်ခြံရွာကို သြဂုတ်လအတွင်းကလည်း လေကြောင်းကနေဗုံးကြဲတိုက်ခိုက်ခဲ့တာကြောင့် အသက် ၁၈ နှစ်အရွယ်ကျောင်းသားတဦး သေဆုံးခဲ့တာလည်း ဖြစ်ပါတယ်။

စာတည်း – ဟိန်းစံ

မြေလတ်အသံ၊ ဇွန် ၂၉၊ ၂၀၂၅ ။

စစ်ကိုင်းတိုင်း၊ ဆားလင်းကြီးမြို့နယ်အတွင်း ချင်းတွင်းမြစ်ကမ်းဘေးကျေးရွာတွေကို စစ်ကောင်စီတပ်က လေကြောင်းကနေဗုံးကြဲတိုက်ခိုက်တာကြောင့် ဒေသခံအရပ်သား ၄ ဦးသေဆုံးခဲ့တယ်လို့ ဆားလင်းကြီးမြို့နယ် ပြည်သူ့အုပ်ချုပ်ရေးအဖွဲ့ (ပကဖ) ထံက သိရပါတယ်။

ဇွန် ၂၈ ရက် ယမန်နေ့မနက် ၉ နာရီဝန်းကျင်မှာ ချင်းတွင်းမြစ်နံဘေးက သရက်ကိုင်း၊ အောင်ချမ်းသာ၊ နှောကူးကျေးရွာတွေကို စက်တပ်လေထီး(ပါရာမိုတာ)၂ စီးနဲ့ ဗုံး ၅ လုံးထက်မနည်း ကြဲချခဲ့တာဖြစ်ပြီး ကျေးရွာနေအိမ်တွေပေါ် ကျရောက်ပေါက်ကွဲခဲ့တယ်လို့ ဆိုပါတယ်။

“ သိလို့ဆိုပြီး မြစ်ကမ်းနားကရွာတွေကို လူသားစာနာတာဝန်ခံက သက်ကြီးရွယ်အိုတွေနဲ့ကလေးတွေ ရှောင်ကြဖို့ ရမ်းသမ်းပစ်ခတ်ရင်ထိခိုက်မှာစိုးလို့ လုံလုံခြုံခြုံနေကြဖို့ လိုက်လံအော်ပြီးတော့ ကားနဲ့ကယ်ထုတ်တာ တချို့က လိုက်မလာကြတာပေါ့။” လို့ ဆားလင်းကြီးမြို့နယ် ပြည်သူ့အုပ်ချုပ်ရေးအဖွဲ့ဝင်တဦးက မြေလတ်အသံကို ပြောပါတယ်။

ဗုံးကျရောက်ပေါက်ကွဲတာကြောင့် သရက်ကိုင်းကျေးရွာနေ အသက် ၆၀ နှစ်ခန့်အမျိုးသား ၂ ဦးနဲ့ အသက် ၂၀ နှစ်ခန့်အမျိုးသား ၁ ဦး နေအိမ်မှာ သေဆုံးခဲ့ပြီး နောက်ထပ် အသက် ၆၀ ဝန်းကျင်ရှိအမျိုးသား ၁ ဦးမှာ ဒဏ်ရာပြင်းထန်လို့ ဆေးရုံပို့ဆောင်ကုသစဉ် ထပ်မံသေဆုံးခဲ့တာကြောင့် သေဆုံးသူ ၄ ဦးရှိခဲ့တယ်လို့ သိရပါတယ်။

စစ်ကောင်စီစက်တပ်လေထီးတွေ တိုက်ခိုက်ချိန်ဟာ ဆားလင်းကြီးမြို့နယ် ချင်းတွင်းမြစ်အတွင်း စစ်ကောင်စီသင်္ဘော ၁၄ စီး ဖြတ်သန်းမောင်းနှင်နေချိန်ဖြစ်ပြီး ၎င်းသင်္ဘောတွေတိုက်ခိုက်ခံရမှာကြောင့် မြစ်နံဘေးကျေးရွာတွေကို လေကြောင်းကနေဗုံးကြဲတိုက်ခိုက်ခဲ့တာလို့ အထက်ပါပအဖအဖွဲ့ဝင်က သုံးသပ်ပြောပါတယ်။

“ဧရာဝတီကနေဆန်လာတဲ့ စစ်သင်္ဘောတွေက မနေ့(ဇွန် ၂၇)ညတုန်းက ဆင်ဖြူရှင်တံတားနားလေးမှာ အိပ်တာ။ မနက်ကျ ချင်းတွင်းမြစ်တိုင်း အထက်ကိုဆန်လာတာပေါ့၊ ဆန်လာတဲ့အချိန်ကို စစ်သင်္ဘော ၃ စီးနဲ့ ဖလပ် ၁၁ စီး အားလုံးပေါင်း ၁၄ စီး ဆန်လာတာ။ မုံရွာကနေ ၄ စီးနဲ့လည်း လာကြိုတယ်။ အဲ့အချိန်ကို ပါရာမော်တာ ၂ စီးကနေပြီးတော့ ရွာ ၃ ရွာပေါ်မှာ လေကြောင်းတိုက်ခိုက်မှုလုပ်သွားတာ” လို့ ၎င်းက ဆက်ပြောပါတယ်။

စစ်ကောင်စီသင်္ဘောတွေ ဆန်တက်လာတာကြောင့် မြို့နယ်အုပ်ချုပ်ရေးနဲ့လူသားစာနာအဖွဲ့မှ မြစ်ကမ်းတလျောက်ကျေးရွာတွေကို ယမန်နေ့မနက်အစောပိုင်းမှာ သတိပေးခေါ်ဆောင်တာမျိုးတွေလုပ်ဆောင်ခဲ့ပေမယ့် ကျေးရွာတွေအတွင်းကျန်နေသူတွေ သေဆုံးမှုရှိခဲ့တာဖြစ်ကာ သေဆုံးသူတွေရဲ့နာရေးကိစ္စအတွက် ၅ သိန်းကျပ် ထောက်ပံ့ပေးအပ်ခဲ့တယ်လို့လည်း သိရပါတယ်။

စာတည်း – ဟိန်းစံ

မြိုင်၊ ဇွန် ၁၅၊ ၂၀၂၅။

မကွေးတိုင်း၊ မြိုင်မြို့နယ်အနောက်မြောက်ရှိ သန်းနုတောရွာကို စစ်ကောင်စီတပ်က စက်တပ်လေထီးနဲ့ ဗုံးကြဲတိုက်ခိုက်ခဲ့တာကြောင့် ၆ ဦးထိခိုက်ဒဏ်ရာရပြီး အိမ် ၂ လုံးပျက်စီးခဲ့တယ်လို့ ဒေသတွင်းအခြေအနေတွေကိုသိရှိထားသူတွေဆီက သိရပါတယ်။

ဇွန် ၁၅ ရက်နေ့လယ် ၂ နာရီဝန်းကျင်မှာ စစ်ကောင်စီရဲ့စက်တပ်လေထီး ၂ စီးနဲ့ဗုံး ၂ လုံးကြဲချတိုက်ခိုက်ခဲ့တာကြောင့် သန်းနုတောရွာနေ အမျိုးသား ၂ ဦးနဲ့ အမျိုးသမီး ၄ ဦးသေဆုံးခဲ့တာလို့ ဆိုပါတယ်။

“အမျိုးသား ၂ ဦး အမျိုးသမီး ၄ ဦးဒဏ်ရာရတယ်၊ အမျိုးသမီး ၂ စိုးရိမ်ရ။ အိမ် ၂ လုံးပျက်တယ်။ စပါးကျီ ၁ လုံးပျက်တယ်။ ခိုင်းနွား ၂ ကောင်သေတယ်။”လို့ မြိုင်မြို့နယ်အတွင်းကအခြေအနေတွေကို တင်ပြပေးနေတဲ့ We Love Myaing အဖွဲ့မှ တာဝန်ရှိသူက ပြောပါတယ်။

သန်းနုတောကျေးရွာဟာ မြိုင်မြို့နဲ့ ၅ မိုင်ခန့်အကွာမှာရှိပြီး ခုလိုလေကြောင်းကနေဗုံးကြဲတိုက်ခိုက်ခံရတာ ပထမဆုံးအကြိမ်ဖြစ်တယ်လို့ သိရပါတယ်။

“ပါရာမော်တာ ၂ စီးနဲ့ ၂ လုံးကြဲတာ၊ အကြောင်းမဲ့ကြဲတာ။ မြိုင်အနောက်မြောက်ဘက် တအား မဝေးဘူး။ အဲ့ဒီရွာကိုတော့ ပထမဆုံးပေါ့။ အဲ့ဒီဘက်အပိုင်းကတော့ ပထမဆုံးမဟုတ်ဘူးဗျ။ မြိုင်နယ်က တနယ်လုံး ပတ်ကြဲခံနေရတာဆိုတော့။”လို့ အထက်ပါတာဝန်ရှိသူက ဆိုပါတယ်။

ပြီးခဲ့တဲ့ မေ ၂၄ ရက်ကလည်း မြိုင်မြို့နယ်၊ အိုရင်းကျေးရွာကို တိုက်ပွဲဖြစ်ဖြစ်တာမရှိဘဲ ဂျက်ဖိုက်တာနဲ့ ဗုံးကြဲတိုက်ခိုက်ခဲ့ရာ ဒေသခံ ၁ ဦး ဒဏ်ရာရရှိပြီးနေအိမ် ၃ လုံးပျက်စီးခဲ့ပါတယ်။

စာတည်း – လင်း

ပခုက္ကူ၊ ဖေဖော်ဝါရီ ၂၆၊ ၂၀၂၅။

ဖေဖော်ဝါရီတတိယအပတ်အတွင်း ပခုက္ကူမြို့နယ်ထဲက ကျေးရွာ ၂၂ ရွာကို Paramotor – စက်တပ်လေထီး အသိပညာပေး လက်ကမ်းစာစောင်တွေဖြန့်ဝေပေးခဲ့တယ်လို့ ပခုက္ကူခရိုင်၊ ပြည်သူ့ကာကွယ်ရေးတပ်ဖွဲ့ဆီက သိရပါတယ်။

ဖေဖော်ဝါရီ ၂၄၊ ၂၅၊ ၂၆ နေ့တွေမှာ ကျေးရွာပေါင်း ၂၂ရွာကို ကွင်းဆင်းပြီး Paramotor – စက်တပ်လေထီး အသိပညာပေး လက်ကမ်းစာစောင်တွေဖြန့်ဝေခဲ့သလို သေချာဖတ်ရှုလေ့လာကြဖို့တိုက်တွန်းခဲ့တယ်လို့ ပခုက္ကူခရိုင်၊ ပြည်သူ့ကာကွယ်ရေးတပ်ဖွဲ့ဝင်တဦးက ဆိုပါတယ်။

“အာဏာသိမ်းစစ်တပ်ဟာ တနေ့ထက်တနေ့ နယ်မြေတွေ ဆုံးရှုံးတာ၊ စစ်ရှုံးလာရတာနဲ့အမျှ လေယာဉ်၊ လေထီး၊ လက်နက်ကြီးတွေကို ပိုမိုအသုံးပြုလာနေတာကြောင့် ပြည်သူတွေအနေနဲ့ စစ်ရေးသတိ၊ စစ်ရေးအသိရှိကြဖို့လည်း အသိပေးနှိုးဆော်ထားပါတယ်” လို့ သူကပြောပါတယ်။

စက်တပ်လေထီးနဲ့ပတ်သက်တဲ့ အသိပညာပေးလက်ကမ်းစာစောင်တွေကို ပခုက္ကူခရိုင်၊ ပြည်သူ့ကာကွယ်ရေးအဖွဲ့ကဦးဆောင်ကာ ကျေးရွာပေါင်း ၂၂ ရွာမှာရှိတဲ့ စာသင်ကျောင်း၊ ဈေးဆိုင်နဲ့ လူစည်ကားရာနေရာတွေမှာ ဖြန့်ဝေပေးခဲ့ကြပြီး စက်တပ်လေထီးတွေအကြောင်းနဲ့ အန္တရာယ်ပေးနိုင်တဲ့အခြေအနေတွေကို ရှင်းပြပြောဆိုတာ၊ ပညာပေးစာစောင်ပါအချက်အလက်တွေကို သေချာဖတ်ရှုလေ့လာဖို့တိုက်တွန်းတာတွေ လုပ်ဆောင်ခဲ့တယ်လို့ သိရပါတယ်။

လက်ရှိမှာတော့ ပခုက္ကူ၊ ပေါက်၊ ဆိပ်ဖြူ စတဲ့မြို့တွေမှာ စက်တပ်လေထီးတွေနဲ့ တိုက်ခိုက်ခံရပြီး ထိခိုက်သေဆုံးမှုတွေရှိနေပြီဖြစ်ပါတယ်။