မြေလတ်အသံ၊ မေ ၁၇၊ ၂၀၂၂။
လာမဲ့ ၆လပိုင်းမှာ အာဏာသိမ်းစစ်ကောင်စီက အခြေခံပညာကျောင်းတွေကို ဖွင့်ဖို့စီစဥ်ထားပြီး CDM ပညာရေးဝန်ထမ်းတွေကို ပြန်ခေါ်နေပါတယ်။
အခုလ ၃၁ရက် နောက်ဆုံးထားပြီး သက်ဆိုင်ရာ ပညာရေးမှူးရုံးတွေကို အယူခံလွှာတင်ပြီး တာဝန်များကို ပြန်ထမ်းဆောင်နိုင်တယ်လို့ စစ်ကောင်စီက ထုတ်ပြန်ထားပေမယ့်လည်း ပြန်သွားဖို့ အစီစဥ်မရှိဘူးလို့ ဧရာဝတီတိုင်း ဝါးခယ်မမြို့က အထက်တန်းပြCDM ပညာရေးဝန်ထမ်းအမျိုးသမီးတဦးက ပြောပါတယ်။
” CDM စလုပ်ကတည်းကအခက်ခဲဆုံးတွေရင်ဆိုင်လာရမယ်ဆိုတာသိနေလျက်နဲ့လုပ်ခဲ့တာပါ ပြန်ဝင်ဖို့ဆိုတာတစ်ခါမှတောင်မစဥ်းစားမိဘူးသင်တန်းတွေတက်နေရတာနဲ့ အားတောင်မအားဘူး၊ ဝါသနာပါလို့ဆရာအလုပ်လုပ်ခဲ့ပေမယ့် ကိုယ့်အစိုးရပြန်မလာမချင်းပြန်မသွားနိုင်ပါဘူး စစ်ကျွန်ပညာရေးကိုခြေဦးလှည့်ဖို့ဆန္ဒမရှိပါဘူး” လို့ အထက်တန်းပြ ဆရာမက ပြောပါတယ်။
စစ်ကောင်စီက နိုင်ငံပုံမှန်လည်ပတ်နေသလိုမျိုး ကမ္ဘာကို ချပြဖို့နဲ့ NUG က ပြုလုပ်နေတဲ့ ပညာရေးအစီအစဉ်တွေကိုဖျက်ဆီးချင်တာကြောင့် CDM ဝန်ထမ်းတွေကို ပြန်ခေါ်နေတာဖြစ်တယ်လို့လည်း အထက်တန်းပြဆရာမက ဆက်ပြောကပါတယ်။
နောက်ထပ် ပညာရေးတက္ကသိုလ် ကထိကဆရာမ တဦးကတော့ စစ်ကောင်စီဟာ ပညာတတ်တွေ ပညာရှင်တွေကို ကြိုးဆွဲရာ ကခိုင်းဖို့ ကြိုးစားနေခြင်းသပ်သပ်သာ ဖြစ်တယ်လို့ ပြောပါတယ်။
” အာဏာကိုမစွန့်လွှတ်ဘဲ၊ အမျိုးမျိုးနဲ့ပညာရှင်၊ပညာတတ်တွေကို၊ ချိုးနှိမ်ပြီးကြိုးဆွဲရာကခိုင်းချင်နေတာ ရွံမုန်းစရာပဲ၊ သူတို့ရူးတိုင်းသာလိုက်ရူးရရင်၊ လူမဖြစ်တာကမှကောင်းအုံးမယ်၊ အမိန့်စာထုတ်နေတဲ့သူတွေကပညာရေးကိုနတစ်လုံးကန်းမှနားလည်တာမှမဟုတ်တာ၊ သူတို့ခိုင်းတာလုပ်နေရင် လူဖြစ်ရှုံးရုံပဲရှိမယ်” လို့ ပညာရေးတက္ကသိုလ် ကထိကဆရာမက ဆိုပါတယ်။
CDMers တွေအနေနဲ့လည်း ပညာတတ်တွေဖြစ်တဲ့ အလျောက် စစ်ကောင်စီကြိုးဆွဲရာမကကြဖို့နဲ့ ကိုယ်ရပ်တည်ချက်အတိုင်း ဆက်လျှောက်ကြဖို့ကိုလည်း ကထိကဆရာမက တိုက်တွန်းထားပါတယ်။
” ကိုယ့်အဆင့်အတန်းနဲ့ ကိုယ်နေကြဖို့ပဲ။ ခုန်မဆင်းစေချင်ဘူး။အမှန်တရားလမ်းကိုပဲဆက်လျှောက်စေချင်ပါတယ်။ဆရာ၊ဆရာမဆိုတာ ကမ္ဘာကိုအလင်းပေးသူတွေပါ။ အနာဂတ်တွေ အမှောင်ဖုံးပျက်စီးသွားမှာကိုတော့အားပေးအားမြှောက်ပြုမနေသင့်ပါဘူးလို့။ အားလုံးပဲအားတင်းထားကြပါလို့။” လို့ ပြောပါတယ်။
စစ်ကောင်စီကတော့ မျိုးဆက်သစ်လူငယ်တွေရဲ့ ပညာရေးကို ရှေုးရှုပြီး ပြီးခဲ့တဲ့ ၁၂ရက်က တက္ကသိုလ်တွေကို ဖွင့်လှစ်ခဲ့ပြီး ၆လပိုင်း ၂ရက်မှာ အခြေခံပညာကျောင်းတွေကို ဖွင့်တော့မှာဖြစ်လို့ ပညာရေနို့ အပြည်အဝသောက်စို့နိုင်ဖို့ အရည်အသွေးပြည့်ဝပြီး အတွေ့အကြုံရှိတဲ့ ဆရာတွေ လိုအပ်နေတယ်လို့ထုတ်ပြန်ထားပါတယ်။
CDM ပညာရေးဝန်ထမ်းတွေအနေနဲ့ အယူခံလွှာတင်ပြီး ပြန်ဝင်လာတဲ့ အခါမှာ လစာမဲ့ခွင့်အဖြစ်သတ်မှတ်ပြီး တာဝန်ပြန်ထမ်းဆောင်နိုင်ဖို့ ဆောင်ရွက်ပေးမယ်လို့ ထုတ်ပြန်ထားပါတယ်။
