ဒေသကာကွယ်ရေးတပ်ဖွဲ့

ဆားလင်းကြီး၊ ဖေဖော်ဝါရီ ၁၃၊ ၂၀၂၆။

စစ်ကိုင်းတိုင်း၊ ဆားလင်းကြီးမြို့နယ်မှာ အစည်းအဝေးလုပ်နေတဲ့ ဒေသကာကွယ်ရေးတပ်ဖွဲ့ဝင်တွေ ဗုံးကြဲခံရပြီး ၁၁ ဦးကျဆုံးခဲ့တယ်လို့ ဖြစ်စဥ်ကိုသိထားတဲ့ ဒေသကာကွယ်ရေးအဖွဲ့ဝင်တွေထံက သိရပါတယ်။

ဖေဖော်ဝါရီ ၁၂ ရက် ယမန်နေ့ နေ့လ​ယ် ၁၂ နာရီကျော်မှာ နမခစစ်ဌာနချုပ်က ပျံသန်းလာတဲ့ စက်တပ်လေထီး ၃ စီးက အစည်းအဝေးလုပ်နေတဲ့ ဖိုလ်ဝင်တောင်အနီး PDF စခန်းထဲကို ၁၂၀ ဗုံးသီးတွေကြဲချခဲ့တာလို့ ဆိုပါတယ်။

“အခြားက ခေါင်းဆောင်တွေလည်း ရောက်နေတယ်။ အစည်းအဝေးပုံစံမျိုး။ ပါရာမိုတာနဲ့လာကြဲတဲ့အတွက် ပြေးတဲ့သူကပြေး။ ကတုတ်ကျင်းထဲပုန်းတဲ့သူကပုန်း။ ဂျက်ဖိုက်တာနဲ့လည်း လာသေးတယ်။ မကြဲသွားဘူး။ အစည်းအဝေးလုပ်တာ သတင်းပေါက်တာဖြစ်နိုင်တယ်။ လိုကေးရှင်းက အရင်ကတည်းကပေါက်နေတာ။ အရင်ကလည်း လာဝဲတယ်။ ဘာမှမလုပ်ဘူး။ အခုလည်းလာဝဲတာ အခြားနေရာသွားမယ်ပဲထင်ကြတာ”လို့ဖြစ်စဥ်ကိုသိထားတဲ့ ဒေသကာကွယ်ရေးအဖွဲ့ဝင်တဦးက ပြောပါတယ်။

ဗုံးကျပေါက်ကွဲတာကြောင့် စခန်းအတွင်းရှိနေတဲ့ PDF အဖွဲ့စုံက တပ်ဖွဲ့ဝင် ၁၁ ဦးကျဆုံးပြီး ထိခိုက်သူအချို့လည်းရှိသလို စခန်းအဆောက်အဦတွေလည်းပျက်စီးခဲ့တယ်လို့ ဆိုပါတယ်။

ကျဆုံး PDF အဖွဲ့ဝင်တွေဟာ တပ်ဖွဲ့ ၃ ခုထက်မနည်းက အဖွဲ့ဝင်တွေဖြစ်ပြီး ၎င်းတို့ကို ယမန်နေ့မှာပဲ နေ့ချင်းသင်္ဂြိုဟ်လိုက်ကာ တပ်ဖွဲ့ဝင်တွေကျဆုံးမှုနဲ့ပတ်သက်ပြီး အသေးစိတ်အခြေအနေကို သက်ဆိုင်ရာတပ်ဖွဲ့တွေဘက်က သတင်းထုတ်ပြန်ပေးသွားဖို့ရှိနေတယ်လို့ သိရပါတယ်။

ဇန်နဝါရီ ၄ ရက်ကလည်း ဆားလင်းကြီးမြို့နယ်၊ မတောင့်တကျေးရွာရှိ တိုက်နယ်ဆေးရုံ ဗုံးကြဲခံရပြီး CDM ဆရာဝန် ၁ ဦးသေဆုံးပြီး ၃ ဦးဒဏ်ရာရတယ်လို့ သိရပါတယ်။

ပွင့်ဖြူ၊ နိုဝင်ဘာ ၉၊ ၂၀၂၅။

မကွေးတိုင်း၊ ပွင့်ဖြူမြို့နယ်၊ မုန်းဇလဲကျေးရွာက မိသားစု ၃ စုကို ဒေသကာကွယ်ရေးတပ်ဖွဲ့တခုကဖမ်းဆီးသွားပြီး အမျိုးသား ၂ ဦးမှာ ၅ ရက်ကြာတဲ့အထိပြန်မလွတ်သေးဘူးလို့ ဒေသခံတွေထံက သိရပါတယ်။

နိုဝင်ဘာ ၅ ရက် မနက် ၁ နာရီခန့်မှာ မုန်းဇလဲကျေးရွာမှာနေထိုင်တဲ့ ဦးအောင်ခင်ညွန့်နဲ့ ဇနီး ဒေါ်ဇင်မို့မို့ထွန်း၊ သား မောင်မြတ်ဘုန်းခန့်၊ ဦးဇော်ဝင်းမောင်နဲ့ ဇ နီး ဒေါ်သန်းသန်းမူ၊ ဦးခင်မောင်အေးနဲ့ ညီမဖြစ်သူ ဒေါ်နှင်းရီ၊ ဒေါ်ခင်ပို စုစုပေါင်း ရွာခံ ၈ ဦးကို လက်နက်ကိုင်ဆောင်ထားတဲ့ ဒေသကာကွယ်ရေးတပ်ဖွဲ့ဝင် ၁၀ ဦးကျော်က လာရောက်ဖမ်းဆီးသွားတာလို့ ဆိုပါတယ်။

” ဖမ်းခံရတဲ့သူတွေကတောင်သူတွေ၊ ကျပန်းလုပ်တဲ့သူတွေချည်းပဲ။ ဦးခင်မောင်အေးဆိုကျပန်းလုပ်သား ထရံတွေဘာတွေယက်တယ်။ ကိုအောင်ခင်ညွန့်ဆို တောင်သူ၊ ဦးဇော်ဝင်းမောင်လည်း တောင်သူပဲ။ ကျန်သူတွေကလည်း ကျပန်းလုပ်သားတွေ။ ဘာကြောင့်ဖမ်းလည်းဆိုတာတော့ အကြောင်းအရင်းမသိဘူး။ PDF ကဖမ်းတယ်ပဲသိတယ်” လို့ ဖြစ်စဥ်ကိုသိရှိထားတဲ့ ပွင့်ဖြူဒေသခံတဦးက မြေလတ်အသံကို ပြောပါတယ်။

ဖမ်းဆီးသွားသူတွေအနက် နိုဝင်ဘာ ၅ ရက် ညနေပိုင်းမှာ ကလေးနဲ့အမျိုးသမီးတွေအပါ ၆ ဦး ပြန်လည်လွတ်မြောက်လာပြီး ဦးခင်မောင်အေးနဲ့ ဦးအောင်ခင်ညွန့် ၂ ဦးကို နိုဝင်ဘာ ၉ ရက် ဒီကနေ့မနက်ပိုင်းအထိ ဖမ်းဆီးထားဆဲဖြစ်တယ်လို့ သိရပါတယ်။

ဖမ်းဆီးသွားသူတွေဟာ မင်းဘူးခရိုင် PDFတပ်ရင်းတခုရဲ့တပ်ဖွဲ့ဝင်တွေဖြစ်ပြီး ဖမ်းဆီးထားတာမှန်ကန်ကြောင်း မင်းဘူးခရိုင်ပကဖသတင်းနဲ့ပြန်ကြားရေးတာဝန်ခံကလည်း အတည်ပြုပါတယ်။

မုန်းဇလဲရွာနဲ့ ၂ မိုင်ကျော်အကွာမှာ ကျောင်းကုန်းကြီးပျူစောထီးနဲ့စစ်ကော်မရှင်တပ်အထိုင်စခန်းရှိပြီး ကျေးရွာတွင်းစစ်တပ်ထောက်ခံသူတွေဟာ ကျေးရွာကနေ ရွှေ့ပြောင်းသွားကြတာ ၁ နှစ်ကျော်ကြာရှိပြီဖြစ်ပြီး လက်ကျန်ရွာခံအများစုမှာ လက်လုပ်လက်စားကျပန်းလုပ်ကိုင်သူအများစုဖြစ်ကြတယ်လို့ ရွာအခြေအနေကိုသိရှိထားတဲ့ အထက်ပါဒေသခံက ပြောပါတယ်။

စာတည်း – ဟိန်းစံ