ဒဏ်ရာရ

နွားထိုးကြီး၊ စက်တင်ဘာ ၁၀၊ ၂၀၂၅။

မန္တလေးတိုင်း၊ နွားထိုးကြီးမြို့နယ်၊ မကျီးကန်ရွာကို စစ်ကော်မရှင်တပ်က စက်တပ်လေထီးနဲ့ ဗုံးကြဲချခဲ့တာကြောင့် ပြည်သူ ၅ ဦးဒဏ်ရာရတယ်လို့ မကျီးကန်တိုက်နယ်ပကဖ ရပ်ကျေးတာဝန်ရှိသူတွေဆီက သိရပါတယ်။

စက်တင်ဘာ ၉ ရက် မနက် ၉ နာရီခွဲမှာ စစ်ကော်မရှင်ဘက်က စက်တပ်လေထီး ၅ စီးအသုံးပြုပြီး ကျေးရွာထဲကို ဗုံးသီး ၅ လုံးကြဲချခဲ့တယ်လို့ဆိုပါတယ်။

“ရွာအရှေ့ဘက် ၂ လုံး။ ရွာထဲကို ၃ လုံး။ ရွာထဲကျချိန် ပြည်သူ ၄ ယောက်ဒဏ်ရာရတယ်။ ရပ်ကျေး ၁ ယောက်ဒဏ်ရာရတယ်။ ဒေါ်ပိုတို့ အိမ်ဝိုင်းထဲကို တည့်တည့်ကျတာ။ တဲတွေဘာတွေပျက်စီး၊ ကားတွေဆို စုတ်ပြတ်သတ်သွားတာ”လို့ မကျီးကန်တိုက်နယ်ပကဖရပ်ကျေးတာဝန်ရှိသူတဦးက ပြောပါတယ်။

ဗုံးပေါက်ကွဲမှုကြောင့် အသက် ၂၀ အရွယ် ရပ်ကျေးပကဖအဖွဲ့ဝင် ၁ ဦး၊ အသက် ၆၀ အရွယ် ဒေါ်ပိုနဲ့ဦးလှတင့်၊ အသက် ၃၀ အရွယ် အမျိုးသား ၂ ဦး တို့ဟာ လက်၊ ဦးခေါင်းနဲ့ ခန္ဓာကိုယ်တွေမှာ အစမှန်ဒဏ်ရာရခဲ့တယ်လို့ ဆိုပါတယ်။

ဒါ့အပြင် နေအိမ် ၂ လုံး၊ ကား ၁ စီးပျက်စီးပြီး နွား ၄ ကောင်သေဆုံးသွားတယ်လို့ သိရကာ ဗုံးကြဲခံရချိန် ကျေးရွာကို စစ်ကြောင်းထိုးနေတာမျိုး၊ တိုက်ပွဲဖြစ်ပွားနေတာမျိုးမရှိဘူးလို့ သူကဆက်ပြောပါတယ်။

ဩဂုတ် ၂ ရက်ကလည်း နွားထိုးကြီးမြို့နယ်၊ သန်းပင်လှကျေးရွာမှာ စစ်ကော်မရှင်ဘက်က Y12 နဲ့ လေကြောင်းကနေဗုံးကြဲခံရလို့ ကလေး ၁ ဦးသေဆုံးပြီး ၄ ဦးဒဏ်ရာရတယ်လို့ သိရပါတယ်။

စာတည်း – လင်း

စေတုတ္တရာ၊ သြဂုတ် ၁၀၊ ၂၀၂၅။

မကွေးတိုင်း၊ စေတုတ္တရာမြို့နယ်၊ မကြီးစုကျေးရွာက အမျိုးသား ၁ ဦး မိုင်းနင်းမိပြီး ထိခိုက်ဒဏ်ရာရခဲ့တယ် လို့ စေတုတ္တရာမြို့နယ်ပြည်သူ့ကာကွယ်ရေးတပ်ဖွဲ့ သတင်းနဲ့ပြန်ကြားရေးတာဝန်ခံဆီက သိရပါတယ်။

သြဂုတ် ၈ ရက် မနက်ပိုင်းမှာ မကြီးစုကျေးရွာအရှေ့တောင်ဘက် စေတုတ္တရာ-စလင်းလမ်းပိုင်းမှာ မကြီးစုရွာက အမျိုးသားတဦး မိုင်းနင်းမိတာလို့ ဆိုပါတယ်။

“စလင်း-စေတုတ္တရာလမ်းဘေးလို့တော့ သိရတယ်။ (မိုင်းနင်း)မိတဲ့နေရာအတိအကျ မသိရသေးပါဘူး။ ပြည်သူက တောထဲမျှစ်ချိုးသွားတာလား ဘာလဲတော့မသိဘူးဗျ။ ၈ ရက်နေ့က မိုင်းကွဲသံတော့ ကျနော်တို့ဘက်က ကြားတယ်။” လို့ စေတုတ္တရာမြို့နယ်ပြည်သူ့ကာကွယ်ရေးတပ်ဖွဲ့ သတင်းနဲ့ပြန်ကြားရေးတာဝန်ခံက ပြောပါတယ်။

စစ်ကောင်စီသတင်းထုတ်ပြန်ရေးတယ်လီဂရမ် News Of Myanmar ရဲ့ထုတ်ပြန်ချက်အရ မိုင်းနင်းမိသူ မကြီးစုရွာသား အသက် ၆၀ အရွယ် ဦးကြည်စိုး ဟာ PDF တွေထောင်ထားတဲ့ မိုင်းကိုနင်းမိလို့ ဒဏ်ရာရရှိကာ စေတုတ္တရာမြို့နယ်ပြည်သူ့ဆေးရုံမှာ ဆေးကုသမှုခံယူနေကြောင်း စွပ်စွဲဖော်ပြထားပြီး ဓာတ်ပုံအရ မိုင်းနင်းမိသူဟာ ဘယ်ဘက်ခြေချင်းဝတ်ကနေ ပြတ်ထွက်ဒဏ်ရာရရှိတာကို တွေ့ရပါတယ်။

စစ်ကောင်စီတပ်တွေစိုးမိုးထားတဲ့နယ်မြေဖြစ်တဲ့ မကြီးစုကျေးရွာဟာ ကျွန်းတော စစ်ကောင်စီစခန်းနဲ့ မိုင်ဝက်လောက်ကွာဝေးကာ စေတုတ္တရာ-စလင်းလမ်းမပေါ်ကိုလည်း တော်လှန်ရေးတပ်တွေမလာနိုင်အောင် စစ်ကောင်စီဘက်က မိုင်းတွေထောင်ထားတာဖြစ်နိုင်တယ်လို့ သူကခန့်မှန်းပါတယ်။

“မကြီးစုရွာက စကစ စိုးမိုးနယ်မြေပါ။ ကျနော်တို့ မကပ်နိုင်သေးပါဘူး။ ကျနော်တို့က မကြီးစုရွာရဲ့ အရှေ့ဘက် ၁ မိုင်လောက်ဝေးတဲ့ ငါးမ၊ သံဆယ် စိုးမိုးထားတယ်ပေါ့။ အဲ့မှာ မကြီးစုနဲ့ ငမရွာကြားမှာ ကာမိုင်းတွေ ခင်းထားတယ်ပေါ့။ စကစက ကျနော်တို့ကို စေတုတ္တရာ- စလင်း လမ်းမပေါ် တက်လာမှာကို ကာတဲ့အနေနဲ့ သူတို့ဘက်ကထောင်ထားတဲ့မိုင်းလို့ ယူဆရပါတယ်”လို့ဆိုပါတယ်။

ပြီးခဲ့တဲ့ဇွန်လထဲမှာ ဒေသခံကာကွယ်ရေးတပ်ဖွဲ့ဝင် ၁ ဦး မကြီးစုကျေးရွာအနီး နယ်မြေလေ့လာရေးသွားချိန် မိုင်းနင်းမိပြီးခြေထောက်ဖြတ်ခဲ့ရသလို ငါးမကျေးရွာက ဒေသခံ ၁ ဦးလည်း အဲ့ဒီလပိုင်းမှာပဲ မိုင်းနင်းမိပြီး ဒဏ်ရာရရှိခဲ့ပါသေးတယ်။

အဲ့ဒီလိုမိုင်းနင်းမိတဲ့ဖြစ်စဥ်တွေဖြစ်နေတာကြောင့် ဇူလိုင်လပိုင်းမှာ စေတုတ္တရာမြို့နယ်ပြည်သူ့ကာကွယ်ရေးအဖွဲ့က မကြီးစုကျေးရွာအနီး ငါးမရွာလမ်းပိုင်းကို အသုံးမပြုကြဖို့ သတိပေးထုတ်ပြန်ထားခဲ့ပါတယ်။

စာတည်း – လင်း

ကျော်ကြီး၊ အောင်စိုး

ကောလင်း၊ ဇူလိုင် ၁၅၊ ၂၀၂၅။

စစ်ကိုင်းတိုင်း(အထက်ပိုင်း) ကောလင်းမြို့နယ်အရှေ့ခြမ်း၊ ဒိုးပင်ကျေးရွာ ရွှေဘို-မြစ်ကြီးနားလမ်းပေါ်ကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သား ၄ ဦးဒဏ်ရာပြင်းထန်ရရှိခဲ့တယ်လို့ ကောလင်းခရိုင်အမှတ် ၁ တပ်ရင်းထံက သိရပါတယ်။

ရွှေဘို-မြစ်ကြီးနားလမ်းပေါ်ကို ဇူလိုင် ၁၄ ရက် ညနေ ၄ နာရီ ၃၈ မိနစ်မှာ တိုက်လေယာဥ် ၁ စီးနဲ့ ဗုံး ၃ လုံးကြဲချတိုက်ခိုက်ခဲ့တာဖြစ်ပြီး လမ်းနံဘေးထမင်းဆိုင်နဲ့ ဆိုင်အနီးရပ်နားနေတဲ့ စက်သုံးဆီတင်ကားတွေအနီးကျရောက်ပေါက်ကွဲခဲ့တာလို့ ဆိုပါတယ်။

” ထမင်းဆိုင်ရဲ့အနီးလမ်းမပေါ်ရပ်ထားတဲ့ ဆီဘောက်ဆာ ၂ စီးကိုအစမှန်ပြီး မီးလောင်ပျက်စီးတယ်။ ကျတာက ဆီဘောက်ဆာကားတွေရပ်တဲ့ ကွင်းလိုမျိုးမ ဟုတ်ဘူး။ လမ်းမတန်းထမင်းဆိုင်ဘေးကိုချ (ရပ်)ပြီး ထမင်းဝင်စားကြတာ” လို့ ကောလင်းခရိုင်အမှတ် ၁ တပ်ရင်းတာဝန်ရှိသူတဦးက မြေလတ်အသံကို ပြောပါတယ်။

ဗုံးကျပေါက်ကွဲတာကြောင့် စစ်ဘေးရှောင်ရင်း ထမင်းဆိုင်ဖွင့်ထားတဲ့ အသက် ၃၀ ကျော် အမျိုးသမီး ၁ ဦး၊ ၎င်းရဲ့သမီးဖြစ်သူ အသက် ၁၂ နှစ် မိန်းကလေး ၁ ဦး၊ အသက် ၃၀ ကျော် စက်သုံးဆီသယ်တွဲကားမောင်းနှင်သူ ၂ ဦးစုစုပေါင်း ၄ ဦးဒဏ်ရာရရှိခဲ့ပြီး စက်သုံးဆီတင်ကား ၂ စီး မီးလောင်ပျက်စီးခဲ့ကာ ထမင်းဆိုင်နဲ့ အနီးအနားကဆိုင်အချို့လည်းပျက်စီးတယ်လို့ သိရပါတယ်။

စစ်ကောင်စီဘက်က ဗုံးလာချတဲ့ ဒိုးပင်ကျေးရွာအနီးမှာ တိုက်ပွဲဖြစ်ပွားနေတာမရှိဘဲ အရပ်သားပြည်သူထိခိုက်အောင် ရည်ရွယ်ချက်ရှိရှိ ဗုံးလာချတာဖြစ် ကြောင်း အထက်ပါတာဝန်ခံက ဆက်ပြောပါတယ်။

ဒေသတွင်းသတင်းအချက်အလက်တွေကို ဖော်ပြနေတဲ့ Kawlin Information အဖွဲ့ဝင်အမျိုးသားတဦးကလည်း ဗုံးကြဲခံရမှုဖြစ်စဥ်နဲ့ပတ်သက်ပြီးအခုလိုပြောပါတယ်။

” ဗုံးကြဲချိန် မိုးရွာနေတာဖြစ်လို့ လူနည်းတယ်။ အဲ့နေရာက ထမင်းဆိုင်နဲ့ဆီဆိုင်တွေ။ ရွှေဘို-မြစ်ကြီးနားလမ်းဘေးတင် စည်ကားနေတဲ့နေရာပေါ့။ အဲနားမှာဆီကား ၂ စီး။ ပြီးတော့ဆီရောင်းတဲ့ဆိုင် အဲ့တာကို မှန်တယ်။ ဆီကား ၂ စီးပျက်သွားတယ်။ ထိတာ ၄ ဦး၊ ၁ ဦးကတော့သေမယ်ထင်တယ်”လို့ ၎င်းက ပြောပါတယ်။

ဒိုးပင်ကျေးရွာဟာ အိမ်ခြေ ၁၅၀ ကျော် လူဦးရေ ၆၀၀ ခန့်နေထိုင်တဲ့ကျေးရွာဖြစ်ပြီး စစ်ကောင်စီတပ်က ဗုံးကြဲချပြီးနောက် ထပ်မံဗုံးကြဲခံရမှာစိုးရိမ်ပြီး ရွာလုံးကျွတ် ထွက်ပြေးနေရတယ်လို့ ဆိုပါတယ်။

ပြီးခဲ့တဲ့ ဇွန် ၉ ရက်ကလည်း ကောလင်းမြို့နယ်၊ ဖလဲကျေးရွာကိုလေကြောင်းကနေ ဗုံးကြဲတိုက်ခိုက်ခဲ့ရာ ပြည်သူ ၃ ဦးထိခိုက်ဒဏ်ရာရပြီး နေအိမ် ၆ လုံးပျက်စီးခဲ့တယ်လို့ သိရပါတယ်။

စာတည်း – ဟိန်းစံ

ရွှေဘို၊ ဇွန် ၂၇၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ရွှေဘို-ဆိပ်ခွန်သွားလမ်းပိုင်းပေါ်မှာ စစ်ကောင်စီတပ်ဖွဲ့ဝင်ပစ်တဲ့ လက်နက်ကြီးထိမှန်ပြီး ဒေသခံ ၃ ဦးဒဏ်ရာရခဲ့တယ်လို့ ရွှေဘိုမြို့နယ်ပြည်သူ့ကာကွယ်ရေးအဖွဲ့ ပြန်ကြားရေးတာဝန်ခံဆီက သိရပါတယ်။

ဇွန် ၂၆ ရက်ညနေ ၄ နာရီခန့်မှာ ရွှေဘိုမြို့တောင်ဘက်မုဒ်အထွက်မှာ အထိုင်ချထားတဲ့ စစ်ကောင်စီတပ်ဖွဲ့ဝင်တွေက ၈၁ မမ လက်နက်ကြီး ၁ လုံး၊ မင်းကုန်းရွာဘုန်းကြီးကျောင်းမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေက ၆၀ မမ ၁ လုံးပစ်ခတ်ခဲ့တယ်လို့ ဆိုပါတယ်။

“ပြည်သူထိတဲ့ အလုံးက ၈၁ ကျကွဲတာကနေ ထိကြတာ။ တိုက်ပွဲမဖြစ်ဘဲနဲ့ပစ်တာ။ ခါတိုင်းလည်း သူတို့က ဒီလိုဘဲ တော်လှန်ရေးအင်အားစုတွေရှိတဲ့ဘက်ကို ရမ်းသမ်းပစ်ခတ်နေတာပါပဲ”လို့ ရွှေဘိုမြို့နယ်ပကဖ ပြန်ကြားရေးတာဝန်ခံက ပြောပါတယ်။

လက်နက်ကြီးကျရောက်ပေါက်ကွဲတာကြောင့် လမ်းသွားလမ်းလာ ကင်းပြားရွာသား အသက် ၄၀ ကျော်အမျိုးသား ၂ ဦးနဲ့ အမျိုးသမီး ၁ ဦးတို့ ထိခိုက်ဒဏ်ရာရခဲ့ပြီး လက်ရှိမှာဆေးကုသမှုပေးနေတာကြောင့် စိုးရိမ်ရတဲ့အခြေအနေမရှိဘူးလို့ ဆိုပါတယ်။

ရွှေဘိုမြို့နယ်မှာ ရွှေဘိုမြို့ကလွဲပြီး ရွှေဘို-မြစ်ကြီးနားလမ်းပိုင်း၊ ရွှေဘို-ဆိပ်ခွန်လမ်းပိုင်းအပါအဝင် နေရာအများစုကို ဒေသကာကွယ်ရေးအဖွဲ့တွေဘက်ကထိန်းချုပ်ထားတာလို့လည်း ရွှေဘိုမြို့နယ်ပကဖ ပြန်ကြားရေးတာဝန်ခံက ပြောပါတယ်။

ဧပြီ ၂၈ ရက်ကလည်း ရွှေဘိုမြို့နယ်၊ ကွေ့တက်ကြီးကျေးရွာမှာ မခေါက်ကျေးရွာရှိ ပျူစောထီး အဖွဲ့ဝင်တွေကနေ ဒရုန်းအသုံးပြုပြီး ဗုံး ၁ လုံးကြဲချခဲ့တာကြောင့် မိသားစုဝင် ၃ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ ဇွန် ၂၁၊ ၂၀၂၅။

စစ်ကိုင်းတိုင်း၊ ပင်လည်ဘူးမြို့နယ်၊ အင်္ဂါးကျေးရွာစာသင်ကျောင်း ဇွန် ၂၀ ရက်ညနေ ၄ နာရီခန့်မှာ ဗုံးကြဲတိုက်ခိုက်ခံရတာကြောင့် ဆရာမ ၁ ဦးသေဆုံးပြီး ကလေး ၃ ဦးအပါအဝင် ၈ ဦးဒဏ်ရာ ရရှိခဲ့တယ်လို့ ဒေသခံတွေကပြောပါတယ်။

စစ်ကောင်စီတပ်က တိုက်ခိုက်ရေးလေယာဥ် ၁ စီးနဲ့ အင်္ဂါးရွာအလယ်တန်းကျောင်းကို ဗုံးသီး ၂ လုံးချတိုက်ခိုက်ခဲ့ရာ ဝန်ထမ်းအိမ်ရာအနီး ၁ လုံးနဲ့ ကျောင်းဆောင်နောက်ရှိ ရေစင်အနီး ၁ လုံး ကျရောက်ပေါက်ကွဲခဲ့တာလို့ ဆိုပါတယ်။

“ဗုံးက ၂ လုံးတွဲ တပြိုင်တည်းချသွားတာပါ။ ဝန်ထမ်းနေအိမ် ၃ လုံးတွဲထဲက အလည်လုံး ပျောက်သွားပါတယ်။ ၂ ထပ်ကျောင်းဆောင်က တံခါးအားလုံး ပျက်စီးပါတယ်။ တကျောင်းလုံးရှိတဲ့ မှန်ကွဲပြီး မှန်ကွဲစတွေချည်းပါပဲ။ ဗုံးကျတဲ့နေရာနဲ့မီတာ ၁၀၀ နီး ပါးဝေးမယ့် အိမ်မှာအိပ်နေတဲ့ ကလေးလေး ၂ ယောက်လည်း ဒဏ်ရာရပါတယ်” လို့ ဒေသခံအမျိုးသားတဦးကပြောပါတယ်။

သေဆုံးသူမှာ စာသင်ကျောင်းဝန်းရှိ ဝန်ထမ်းအိမ်ရာမှာနေတဲ့ CDM ဆရာမ(မူပြ) အသက် ၃၀ အရွယ် ဒေါ်ဌေးဌေးမြင့် ဖြစ်ပြီး ဆေးရုံကိုသွားတဲ့လမ်းမှာအသက်ဆုံးရှုံးခဲ့ရတာလို့ ဆိုပါတယ်။

အသက် ၄ နှစ်နဲ့ ၇ နှစ် မိန်းကလေး ၂ ဦး၊ ၄ နှစ်ယောကျာ်းလေး ၁ ဦး၊ ၂၁ နှစ်နဲ့ ၄၀ နှစ်ကြားရှိ အမျိုးသား ၅ ဦးတို့ ဒဏ်ရာရခဲ့ပြီး အဲဒီထဲက ၄ နှစ်အရွယ် မိန်းကလေးမှာ ဘယ်ဖက်ခြေထောက် ဖြတ်လိုက်ရတယ်လို့ အထက်ပါအမျိုးသားကပြောပါတယ်။

ဒဏ်ရာရသူတွေထဲက အမျိုးသား ၅ ဦးဟာ စာသင်ကျောင်းဝန်းအတွင်း ယာယီစာသင်ဆောင်ဆောက်လုပ်ဖို့ သေဆုံးဆရာမရဲ့အိမ်ရှေ့မှာ ဝါးထရံယက်လုပ်နေကြတာကြောင့် ဗုံးကြဲချိန် ထိမှန်ခဲ့ကြတာလို့ သိရပါတယ်။

အင်္ဂါးကျေးရွာဟာ ပင်လည်ဘူးမြို့နဲ့ ၂၄ မိုင်အကွာ၊ အိမ်ခြေ ၂၂၀ ခန့်ရှိတဲ့ရွာဖြစ်ပြီး ဗုံးကြဲခံရတဲ့ စာသင်ကျောင်းဟာလည်း NUG ရဲ့ညွှန်ကြားချက်နဲ့ ပိတ်ထားတာ ၁ လလောက်ရှိပြီလို့ ဆိုပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅၊ ဇွန် ၂၀ အထိ စစ်ကောင်စီတပ်နဲ့ ၎င်းတို့ရဲ့လက်အောက်ခံတွေကြောင့် သေဆုံးတဲ့ပြည်သူ စုစုပေါင်း ၆,၈၁၀ ဦးရှိပြီလို့ နိုင်ငံရေးအကျဥ်းသားများ ကူညီ စောင့်ရှောက်ရေး အသင်း – AAPP ရဲ့အစီရင်ခံစာအရသိရပါတယ်။

စာတည်း – လင်း

ဆော၊ ဇွန် ၆ ၊၂၀၂၅။

မကွေးတိုင်း၊ ဆောမြို့နယ်၊ ညောင်ကန်ကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသား ၃ ဦးသေဆုံး၊ ၆ ဦး ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဇွန် ၅ ရက် နေ့လယ် ၂ နာရီခန့်မှာ ညောင်ကန်ကျေးရွာက ရခိုင်ပြည်နယ်ကိုထွက်ခွာမယ့် ကုန်တင်ကားတွေရပ်နားထားတဲ့နေအိမ်ကို တိုက်ခိုက်ရေးလေယာဥ် ၁ စီးနဲ့ ဗုံး ၁ လုံးကြဲချခဲ့ရာ နေအိမ်ပေါ်ကျရောက်ပေါက်ကွဲခဲ့တယ်လို့ ဆိုပါတယ်။

” (ကုန်တင်)ကားတွေထားတဲ့ အိမ်ပေါ်တည့်တည့်ကြီးကိုကျတာ။ အဲ့ဒီအိမ်မှာကကုန်သည်တွေပဲ စုနေကြတာ။ ရခိုင်ကိုထွက်မယ့်ကားတွေ”လို့ ဆောမြို့ခံတဦးက မြေလတ်အသံကို ပြောပါတယ်။

လေယာဥ်ဗုံးကြောင့် (အမည်စိစစ်ဆဲ) ရခိုင်ကုန်သည်အမျိုးသား ၁ ဦး၊ ကုန်ကားမောင်းနှင်သူ ကိုဝင်းစိုး၊ ကုန်တင်ကုန်ချလုပ်သား ကိုကျော်သက် တို့ ၃ ဦးနေရာမှာ သေဆုံးခဲ့ကြကာ နောက်ထပ်အမျိုးသား ၆ ဦး ဒဏ်ရာရရှိခဲ့ပြီး အဲ့ဒီထဲက ၅ ဦးမှာ ဒဏ်ရာပြင်းထန်တယ်လို့ သိရပါတယ်။

ဒါ့အပြင် ဗုံးပေါက်ကွဲမှုကြောင့် နေအိမ်ဝန်းအတွင်းရှိ ကုန်ပစ္စည်းတွေတင်ဆောင်တဲ့ ၆ ဘီးကား ၂ စီးနဲ့ ဂျက်ပလူးအမျိုးအစား ကား ၁ စီး မီးလောင်ပျက်စီးခဲ့သလို နေအိမ်ပါပြိုကျပျက်စီးခဲ့တယ်လို့ အထက်ပါအမျိုးသားက ဆိုပါတယ်။

သေဆုံး ရခိုင်ကုန်သည်အမျိုးသားရဲ့ ရုပ်အလောင်းကို အခင်းဖြစ်နေရာကနေ ရခိုင်ပြည်နယ်ကို သယ်ယူသွားတယ်လို့ သူက ဆိုပါတယ်။

ပြီးခဲ့တဲ့မေ ၁ ရက်ကလည်း အညာကတင်းကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက် ခိုက်ခဲ့တာကြောင့် ၈ နှစ်အရွယ်ကလေး ၁ ဦးအပါ အမျိုးသမီး ၄ ဦးသေဆုံးခဲ့တယ်လို့ သိရပါတယ်။

စာတည်း – ဟိန်းစံ

ရွှေဘို၊ မေ ၂၇၊ ၂၀၂၅။

စစ်ကိုင်းတိုင်း၊ ရွှေဘိုမြို့၊ အမှတ် ၅ ရပ်ကွက်ရှိ ရွှေပလောင်ပုဂ္ဂလိကဆေးရုံဝန်းအတွင်း ပစ်ခတ်မှုတွေဖြစ်ပြီး ပျူစောထီး ၂ ဦးနဲ့ အရပ်သား ၂ ဦးဒဏ်ရာရခဲ့တယ်လို့ ဒေသခံတွေထံက သိရပါတယ်။

မေ ၂၆ ရက် မနေ့မနက် ၈ နာရီကျော်မှာ မေခွန်ရွာပျူစောထီးခေါင်းဆောင် ပေါသိန်းနဲ့အင်အား ၁၀ ဦးခန့်ပါ ပျူစောထီးအဖွဲ့က ရွှေပလာင်ဆေးရုံမှာ လာရောက်ကုသနေစဥ် လက်နက်ကိုင်အဖွဲ့တခုက လာရောက်ပစ်ခတ်ခဲ့ရာ အပြန်အလှန် ပစ်ခတ်မှုတွေဖြစ်ပွားခဲ့တယ်လို့ ဆိုပါတယ်။

” ပေါသိန်းက ခြေထောက်ကျိုးလို့ ဆေးရုံလာတက်တာ။ အဲ့ဒါက ပုဂ္ဂလိက ဆေးရုံလေ။ ခုက ဒုတိယအကြိမ်ခြေထောက်ကျိုးတာ။ ချော်လဲလို့ကျိုးတာ။ ပထမတခေါက်ကလည်း ကျိုးထားသေးတာ။ အသက်တောင်မပါတာကံကောင်းတယ်” လို့ ဖြစ်စဥ်ကိုသိရှိထားတဲ့ဒေသခံတဦးက မြေလတ်အသံကို ပြောပါတယ်။

အပြန်အလှန်ပစ်ခတ်မှုတွေကြောင့် ဆေးရုံလုံခြုံရေးဝန်ထမ်း အသက် ၄၀ ကျော်အရွယ် အမျိုးသား ၁ ဦးနဲ့ ပစ်ခတ်မှုဖြစ်ချိန် စက်ဘီးနဲ့ဖြတ်သန်းသွားတဲ့ လမ်းသွား၊ လမ်းလာ အသက် ၃၀ ကျော်အရွယ် အမျိုးသမီး ၁ ဦးတို့( မစိုးရိမ်ရ)ဒဏ်ရာရသွားကာ ပျူစောထီးတွေဘက်ကလည်း ၂ ဦးဒဏ်ရာရတယ်လို့ ၎င်းဒေသခံထံက သိရပါတယ်။

ဆေးရုံဝန်းအတွင်း ကင်းလာစောင့်ပေးတဲ့ ပျူစောထီးတွေကို ရွှေဘိုတိုက်နယ် ၅ ပကဖတပ်ဖွဲ့က သွားရောက်ပစ်ခတ်တိုက်ခိုက်ခဲ့တာဖြစ်ပြီး တိုက်ခိုက်မှုအတွင်း ပျူစောထီး ၂ ဦး ထိခိုက်ခဲ့တယ်လို့ ရွှေဘိုမြို့နယ်ပကဖတာဝန်ရှိသူတဦးက အတည်ပြုပြောပါတယ်။

“ မျက်မြင်တော့ ၂ ကောင်လဲကျသွားတာရှိတယ်။ သူတို့စီးလာတဲ့ ပါဂျဲရိုးကားကလည်း ပျက်စီးတာရှိတယ်။ အတွင်းထဲက လူထိ၊ မထိတော့မသိရဘူး” ၎င်းက ပြောပါတယ်။

ပစ်ခတ်မှုအတွင်း ပျူစောထီးတွေထိခိုက်တာကြောင့် ယမန်နေ့ ညနေပိုင်းထိ စစ်ကောင်စီအဖွဲ့တွေဟာ ရွှေဘိုမြို့အဝင်အထွက်နေရာတွေမှာ ပိတ်ဆို့စစ်ဆေးခဲ့တယ်လို့ သိရပါတယ်။

မေခွန်ကျေးရွာအုပ်ချုပ်ရေးမှူးဖြစ်တဲ့ ပျုစောထီး ပေါသိန်းဟာ မြို့နယ်ပျူစောထီးခေါင်းဆောင်တဦးလည်း ဖြစ်ပြီး ကျေးရွာမှာ စစ်မှုထမ်းကြေးကောက်ခံတာ၊ မြေယာတွေသိမ်းဆည်းရောင်းစားတာတွေ လုပ်ဆောင်နေတယ်လို့ ရွှေဘိုမြို့နယ်ပကဖက ပြောပါတယ်။

မေ ၁၅ ရက်ကလည်း ရွှေဘိုမြို့နယ်၊ ညောင်ပင်သာ စိုက်ပျိုးရေးသိပ္ပံတက္ကသိုလ်နဲ့ ပန်းရံကျေးရွာသွား လမ်းပေါ်မှာ ဒုရဲအုပ်အပါအဝင် ၂ ဦးပစ်ခတ်ခံရပြီး သေဆုံးသွားတယ်လို့ သိရပါတယ်။

စာတည်း – ဟိန်းစံ