မြေလတ်အသံ၊ ဇန်နဝါရီ ၁၄၊ ၂၀၂၆။

Chonburi ခရိုင်မှာ မြန်မာလုပ်သားအချင်းချင်း အုပ်စုဖွဲ့ခိုက်ရန်ဖြစ်ပွားခဲ့ကြပြီး ဒေသခံထိုင်းရဲတပ်ဖွဲ့က သွားရောက်စစ်ဆေးခဲ့ကြတယ်လို့ ထိုင်းဒေသတွင်းသတင်းတွေမှာ ဖော်ပြပါတယ်။

Chonburi ခရိုင်၊ Phan Thong မြို့နယ်၊ Ban Kao ရပ်ကွက်ရှိ အဆောင်တခုမှာ ဇန်နဝါရီ ၁၃ ရက် ည ၁၁ နာရီအချိန်က မြန်မာလုပ်သား ၁၀၀ ခန့် လမ်းမပေါ်မှာ ရန်ပွဲဖြစ်ပွားခဲ့တာကြောင့် ဒေသခံတွေ ထိတ်လန့်ခဲ့ရပြီး ရဲတပ်ဖွဲ့နဲ့ ကယ်ဆယ်ရေးအဖွဲ့တို့က အခင်းဖြစ်နေရာကို သွားရောက်ခဲ့ကြတယ်လို့ ဖော်ပြပါတယ်။

အခင်းဖြစ်တဲ့နေရာမှာ မြန်မာလုပ်သား ၂ ဦး ထိခိုက်ဒဏ်ရာရရှိခဲ့ပြီး ကယ်ဆယ်ရေးအဖွဲ့က ကုသပေးခဲ့ရကာ ကယ်ဆယ်ရေးအဖွဲ့ရဲ့ပြောပြချက်အရ ဒဏ်ရာရရှိသူ ၁ ဦးမှာ မာကျောတဲ့အရာဝတ္ထုနဲ့ အရိုက်ခံရပြီး အခြား ၁ ဦးက ဓားနဲ့ခုတ်ခံရတာကြောင့် ဦးခေါင်းနဲ့ခန္ဓာကိုယ်မှာ ဒဏ်ရာတွေရရှိထားပြီး Phan Thong ဆေးရုံကို အရေးပေါ် ပို့ဆောင်ခဲ့ရတယ်လို့ ဆိုပါတယ်။

မျက်မြင်သက်သေ ၁ ဦးရဲ့ပြောကြားချက်အရ ဒဏ်ရာရသူ ၁ ဦးဟာ ဓားကိုင်ဆောင်ထားတဲ့ သူငယ်ချင်းဖြစ်သူနဲ့အတူ လမ်းတစ်ဖက်ကိုကူးသွားရာကနေ အဲ့ဒီနေရာမှာရှိတဲ့ အခြားမြန်မာအုပ်စုက ပြန်လည်လိုက်လံတိုက်ခိုက်ခဲ့ပြီး ရန်ပွဲစတင်ခဲ့ကာ အဆိုပါရန်ပွဲအတွင်း မြန်မာလုပ်သား ၁၀၀ နီးပါး ပါဝင်ပတ်သက်နေပြီး ရန်ဖြစ်ရတဲ့ အကြောင်းရင်းအတိအကျကိုတော့ မသိရှိရသေးဘူးလို့ ဆိုပါတယ်။

ရဲတပ်ဖွဲ့ရဲ့ ကနဦးသုံးသပ်ချက်အရ အဲ့ဒီရန်ပွဲဟာ အရက်သောက်စားရာမှ စကားများပြီး အုပ်စုဖွဲ့ ရန်ဖြစ်တာဖြစ်နိုင်ကြောင်းနဲ့ လက်ရှိမှာ အနီးအနားရှိ CCTV မှတ်တမ်းတွေကနေတဆင့် ပြစ်မှုကျူးလွန်သူတွေကို ဥပဒေအရ အရေးယူနိုင်ဖို့ လိုက်လံရှာဖွေနေတယ်လို့ သိရပါတယ်။

ဇန်နဝါရီ ၁၁ ရက်က Samut Prakan မှာဖြစ်ပွားခဲ့တဲ့ ထိုင်းလူမျိုး Delivery သမားတွေကို မြန်မာ ၆ ဦးက တိုက်ခိုက်ခဲ့မှုဖြစ်စဥ်အပြီး တင်းမာမှုတွေမြင့်တက်နေတာကြောင့် ထိုင်းရောက်မြန်မာတွေ သတိထားနေထိုင်သွားလာဖို့ အလုပ်သမားကူညီရေးအဖွဲ့တွေက သတိပေးပြောဆိုထားပါတယ်။

Ref; Khaosod

မြေလတ်အသံ၊ နိုဝင်ဘာ ၁၆၊ ၂၀၂၅။

ထိုင်းနိုင်ငံ၊ ဘန်ကောက်မြို့၊ လကဘန်မြို့နယ်၊ ခလောင်ဆောင်တွန်းရပ်ကွက်မှာ စွန့်ပစ်ခံထားရတဲ့ မွေးကင်းစကလေးငယ်တဦးကို နိုဝင်ဘာ ၁၅ ရက် နေ့လယ် ၁၁ နာရီမှာ ကယ်ဆယ်နိုင်ခဲ့တယ်လို့သိရပါတယ်။

အဲ့ဒီကလေးငယ်ဟာ မွေးကင်းစမိန်းကလေးဖြစ်ပြီး အဆောက်အဦတခုရဲ့ တတိယထပ်ရှိ အိမ်သာရေဆွဲခွက်အတွင်း စွန့်ပစ်ခံထားရတာဖြစ်ပြီး သတင်းပေးပို့ချက်အရ လကဘန်ရဲတပ်ဖွဲ့မှ သွားရောက်စုံစမ်းစစ်ဆေး တွေ့ရှိခဲ့တာလို့ ဆိုပါတယ်။

စစ်ဆေးချက်တွေအရ ကလေးငယ်ဟာ အသက်ရှင်လျက်ရှိနေသေးတာကြောင့် ကယ်ဆယ်ရေးအဖွဲ့ကို ခေါ်ယူကာ ကလေးငယ် ဆေးကုသမှုခံယူနိုင်ရန် ဆေးရုံကိုပို့ဆောင်ပေးခဲ့ပြီး ရဲတပ်ဖွဲ့က သက်ဆိုင်ရာ စုံစမ်းစစ်ဆေးမှုတွေ ဆက်လက်လုပ်ဆောင်သွားမယ်လို့ သိရပါတယ်။

Ref: Matichon , Khaosod

မြေလတ်အသံ၊ မတ် ၁၇၊ ၂၀၂၃။

လယ်ယာစိုက်ပျိုးရေး တခုတည်းနဲ့ မိသားစုစားဝတ်နေရေး မပြေလည်တာကြောင့် ထိုင်းနိုင်ငံကို နည်းမျိုးစုံနဲ့ သွားရောက် အလုပ်လုပ်ကိုင်ကြသူတွေထဲမှာ လယ်သမား သားသမီးတွေလည်း ပါဝင်တယ်လို့ သိရပါတယ်။

အဲဒီလို သွားကြသူတွေထဲမှာ ပဲခူးတိုင်းက အများဆုံးဖြစ်ပြီး မြေလတ်ဒေသ မကွေးတိုင်း မင်းတုန်း၊ ကံမ၊ သရက်နဲ့ အခြားမြို့နယ်များ စစ်ကိုင်းတိုင်းတို့ကလည်း ပါဝင်လာတယ်လို့ ဆိုကြပါတယ်။

လယ် ၅ ဧကနဲ့ ၁၀ ဧကအထက် ပိုင်ဆိုင်ကြတဲ့ လယ်သမားတွေရဲ့မိသားစုဝင်တွေဖြစ်ပြီး အများစုမှာ စားဝတ်နေရေး မပြေလည်တာကြောင့် တရားဝင်နည်းလမ်းအပြင် တရားမဝင်နည်းလမ်းတွေကိုပါ အသုံးပြုသွားလာနေကြတာလို့ သိရပါတယ်။

“ကျတော်တို့မိသားစုက လယ် ၆ ဧက ပိုင်ဆိုင်ပါတယ်။ မိသားစု ၅ ယောက်လောက်နဲ့ အဆင်ပြေပါတယ်။ အာဏာသိမ်းပြီးနောက်ပိုင်းမှာ လယ်ယာမြေမှာ ထည့်သွင်းရတဲ့စိုက်ပျိုးစရိတ်တွေ အဆမတန် ခုန်တက်သွားတော့ လယ်ကပြန်ရတဲ့ငွေနဲ့ ထွက်ငွေနဲ့က မမျှဘူး ဖြစ်နေတယ်။ အာဏာမသိမ်းခင်နဲ့ အာဏာသိမ်းပြီး တော်တော်ကွာသွားလို့ အဆင်မပြေတော့လို့ အခုလို သူများတိုင်းပြည်မှာ အလုပ်သွားရောက် အလုပ်လုပ်ရတာပါ” လို့ ပဲခူးတိုင်း အနောက်ခြမ်းက လူငယ်တဦးက ပြောပါတယ်။

ထိုင်းနိုင်ငံကို တရားမဝင်နည်းလမ်းမျိုးစုံ သွားရောက်အလုပ်လုပ်ကိုင်ရသူတွေဟာ တရားဝင်အလုပ်လုပ်ကိုင်ရသူတွေထက် ပင်ပန်းတယ်လို့ သူကဆက်ပြောပါတယ်။

“သူများတိုင်းပြည်မှာ တရားမဝင်သွားရောက်ရလို့ ခိုးပြီးနေရတာဆိုတော့ အလုပ်လုပ်ရတော့ သူများတွေ မလုပ်ရတဲ့ ဆောက်လုပ်ရေးလို အလုပ်ကြမ်းမျိုးကို လုပ်ရတယ်။ သူများတိုင်းပြည်ကို မလာချင်ဘဲနဲ့ မိသားစုနဲ့ခွဲကာ နေရမယ့်အခြေအနေမျိုး ဖြစ်လာလို့ မလာချင်ဘဲနဲ့ လာခဲ့ရတာ” လို့ ပြောပါတယ်။

ထိုင်းနိုင်ငံကို တရားမဝင်နည်းနဲ့ လာခဲ့ရပေမယ့် ထိုင်းဘတ်ငွေ ၂ သောင်း ၇ ထောင်ခန့် (လက်ရှိ မြန်မာငွေပေါက်စျေး ကျပ်သိန်းနှစ်ဆယ်ကျော်) ပွဲစားကို ပေးရပြီး အပေါင်းအသင်းတွေရဲ့ထောက်ပံ့မှုနဲ့ ပေးနိုင်ခဲ့ကာ နေရာဒေသအသီးသီးက လယ်သမားသားသမီးတွေ တွေ့ရသလို အခြေခံလူတန်းစား လူငယ်တွေလည်း အများအပြားရှိတယ်လို့ ဆိုပါတယ်။

ထိုင်းနိုင်ငံကို နည်းလမ်းမျိုးစုံနဲ့ သွားရောက် အလုပ်လုပ်ကိုင်ကြတာကြောင့် ပြည်တွင်းမှာလည်း လုပ်သားရှားပါးမှုနဲ့ ကြုံတွေ့ရတယ်လို့ ဒေသခံလယ်သမားတဦးက ပြောပါတယ်။

“လုပ်သားရှားပါးဆိုတာ ကျွမ်းကျင်လုပ်သား ရှားပါးတာကို ပြောတာပါ။ ပန်းရံမလုပ်ရ လက်သမားအလုပ် မဆင်းရတဲ့သူတွေလည်း ရှိပေမယ့် သူတို့တွေက လယ်ယာလုပ်ငန်းကိစ္စတွေမှာ မကျွမ်းကျင်ဘူး။ မကျွမ်းကျင်တော့ လုပ်ရတာအဆင်မပြေဘူး။ အလုပ်မရှိတဲ့လူတွေ ရှိတယ်။ လယ်ယာလုပ်ငန်းနဲ့ နီးစပ်တဲ့သူ မဟုတ်ကြဘူး” လို့ ပြောပါတယ်။

ထိုင်းနိုင်ငံကို တရားဝင်လုပ်သား ပို့ဆောင်ပေးနေတဲ့ အေဂျင်စီတခုက တာဝန်ရှိသူ အမျိုးသမီးတဦး ပြောတာကတော့ “ပို့ဆောင်ပေးနေရသူတွေထဲမှာ ပဲခူးတိုင်းနဲ့ မကွေးတိုင်းအပြင် စစ်ကိုင်းတိုင်းမြို့နယ်အချို့က လူငယ်တွေလည်း လာရောက်ကြတယ်” လို့ ဆိုပါတယ်။

ဒါ့အပြင် တရားမဝင်လာရောက်သူတွေလည်း အများအပြားရှိနေပြီး ထိုင်းအာဏာပိုင်တွေရဲ့ ဖမ်းဆီးခံရမှုတွေလည်း ရှိနေပါတယ်။

လက်ရှိမြန်မာနိုင်ငံမှာ စစ်တပ်က အာဏာသိမ်းပြီးချိန်ကစလို့ စီးပွားရေး ယိုယွင်းကျဆင်းကာ အခြေခံအလုပ်သမားအများစု စီးပွားရေးအကြပ်အတည်းနဲ့ ရင်ဆိုင်နေရတယ်လို့ သိရပါတယ်။

စာတည်း – 007