မတ္တရာ၊ အောက်တိုဘာ ၃၁၊ ၂၀၂၅။

မန္တလေးတိုင်း၊ မတ္တရာမြို့နယ်၊ မြောက်တံငါကျေးရွာအနီး မန္တလေး-မတ္တရာ-မိုးကုတ် ကားလမ်းပေါ်ရှိ ကျောက်စရစ်ကုန်းတံတား မိုင်းခွဲခံရပြီး ပျက်စီးသွားတယ်လို့ ဒေသခံတွေဆီက သိရပါတယ်။

အောက်တိုဘာ ၃၀ ရက်မနက် ၁ နာရီခန့်မှာ မိုင်းခွဲခံရလို့ မြောက်တံငါကျေးရွာဘက်ခြမ်းက တံတားမှာ ပေ ၆၀ ခန့် ပြိုကျပျက်စီးသွားတယ်လို့ ဆိုပါတယ်။

“တံတားက မြောက်တံငါကျေးရွာနားမှာ ကျိုးသွားတာ။ မြောက်ဘက်အဖွဲ့အစည်းတွေရှိတဲ့ဘက် ကျိူးတာ။ တံတားက မြောက်တံငါနဲ့တောင်တံငါရွာကို ဆက်ထားတာ။ အဲဘက်ခြမ်းက အရင်တိုက်ပွဲတွေကတည်းကမရှိဘူး။ တံတားကတော့ ဒေသခံတွေအသုံးမပြုတာကြာပြီ”လို့ ဒေသခံတဦးက ပြောပါတယ်။

စစ်ကော်မရှင်အင်အား ၂၀၀ ခန့်ပါစစ်ကြောင်းက အောက်တိုဘာ ၂၉ ရက်ကတည်းက တောင်တံငါကျေးရွာဘက်ခြမ်းမှာ ရောက်ရှိတပ်စွဲနေတယ်လို့ ဆိုပါတယ်။

မိုင်းခွဲခံရတဲ့ ကျောက်စရစ်ကုန်းတံတားဟာ အကျယ်ပေ ၃၀၊ အရှည်ပေ ၃၆၀ ရှိတဲ့ သံကူကွန်ကရစ်တံတားအမျိုးအစားဖြစ်ပြီး ၂၀၀၀ ခုနှစ်က တည်ဆောက်ပြီးစီးခဲ့တာလို့ သိရပါတယ်။

အဆိုပါ ဒေသဟာ ၂၀၂၄ ခုနှစ်လောက်ကတည်းက ဒေသကာကွယ်ရေးပူးပေါင်းတပ်တွေဘက်က ထိန်းချုပ်ထားတဲ့ ဒေသတွေဖြစ်နေပြီး စစ်ကော်မရှင်တပ်တွေနဲ့မကြာခဏ ထိတွေ့တိုက်ပွဲဖြစ်နေတယ်လို့လည်း အထက်ပါဒေသခံက ပြောပါတယ်။

ပြီးခဲ့တဲ့ အောက်တိုဘာ ၂၈ ရက် ညပိုင်းကလည်း ရွှေဘို-ကျောက်မြောင်း- စဉ့်ကူး- လက်ပန်လှကို ဆက်သွယ်ထားတဲ့ ဧရာဝတီမြစ်ကူးတံတားဖြစ်တဲ့ ရတနာသိင်္ခတံတားကို မိုင်းခွဲခံရပြီး ပျက်စီးခဲ့ပါတယ်။

စစ်ကော်မရှင်ထောက်ခံတယ်လီဂရမ်တွေမှာတော့ အဆိုပါ တံတား ၂ စင်းလုံးကို MDY-PDF ပူးပေါင်းအဖွဲ့တွေက မိုင်းခွဲဖျက်ဆီးလိုက်တာလို့ ရေးသားဖော်ပြနေကြပြီး ဘယ်အဖွဲ့အစည်းကဖောက်ခွဲတယ်ဆိုတာကိုတော့ မြေလတ်အသံက သီးခြားအတည်မပြုနိုင်သေးပါဘူး။

စာတည်း – လင်း

စစ်ကိုင်း၊ မတ် ၈၊ ၂၀၂၃။

စစ်ကိုင်းမြို့၊ ဧရာဝတီတံတားပေါ်က ခုန်ချတဲ့ သံဃာတော်တစ်ပါးရဲ့ ရုပ်အလောင်းကို ဧရာဝတီမြစ်လယ်မှာ ယနေ့ မတ်လ ၈ ရက် ဒီနေ့မနက် ၈ နာရီခွဲလောက်က ပြန်လည်တွေ့ရှိခဲ့တယ်လို့ သိရပါတယ်။

ပျံလွန်တော်မူသွားတဲ့ သံဃာတော်ရဲ့ ဘွဲ့၊ သက်တော်ဝါတော်နဲ့ သီတင်းသုံးတဲ့ကျောင်းတိုက်အမည်တွေကိုတော့ မသိရှိရသေးဘူးလို့ မြို့ခံတဦးက ပြောပါတယ်။

“လက်ရှိက ပိုင်ရှင်မဲ့ဖြစ်နေတယ်။ ရတနာပုံတံတားရဲ့ရေမိုင် ၅ မိုင်အကွာလောက်မှာ စစ်ကိုင်းအပိုင် မြစ်လယ်မှာ ပေါလောပေါ်နေတာကို ကယ်ဆယ်ရေးအဖွဲ့တွေက အလောင်းကို ရေထဲက ဆွဲလာတာကို တွေ့ရတယ်” လို့ ပြောပါတယ်။

မနက် ၉ နာရီခွဲလောက်မှာ အလောင်းကို ကမ်းပေါ်အရောက် သယ်ယူနိုင်ခဲ့ပြီး အလောင်းကို အိတ်ထဲထည့်ကာ သုခကာရီလူမှုကူညီရေးအသင်းကားနဲ့ စစ်ကိုင်းဆေးရုံ ရင်ခွဲရုံကို ပို့ဆောင်ခဲ့တယ်လို့ သူကဆက်ပြောပါတယ်။

သံဃာတော်ဟာ မတ်လ ၅ ရက်ညနေ ၄ နာရီလောက်က ဧရာဝတီတံတား(ရတနာပုံ) စစ်ကိုင်းဘက်ခြမ်းက ခုန်ချသွားတာဖြစ်ပြီး ဒေသခံလူမှုကယ်ဆယ်ရေးအသင်းတွေက ဆယ်ယူခဲ့တာဖြစ်ပါတယ်။

အဲဒီနေ့ညနေမှာပဲ စစ်ကိုင်းမြို့ ဧမြဝတီရပ်ကွက် ဝါဆိုကျောင်းက ကိုရင် ၃ ပါး ဧရာဝတီမြစ်အတွင်း ရေကစားရာက အသက် ၁၂ အရွယ် ကိုရင်တပါး ရေနစ်ကာ ပျံတော်မူခဲ့ရပါသေးတယ်။

စာတည်း – 007

ပဲခူး၊ ဖေဖော်ဝါရီ ၁၀၊ ၂၀၂၃။

ပဲခူးတိုင်းဒေသကြီး၊ ညောင်လေးပင်မြို့နယ်၊ ရန်ကုန် – မန္တလေး အမြန်လမ်းဟောင်း ထိန်တပင်နဲ့ ထော်နွတ်ကျေးရွာကြားရှိ စစ်ကောင်စီရဲ့ ထောက်ပို့ဆက်သွယ်ရေးအဖြစ် အသုံးပြုနေတဲ့ တံတားကို ဒေသခံကာကွယ်ရေးတပ်တွေက မိုင်းခွဲဖျက်ဆီးခဲ့တယ်လို့ သိရပါတယ်။

အဲ့ဒီတံတားကို ဖေဖော်ဝါရီလ ၉ ရက် မနေ့ညနေ ၃ နာရီခန့်မှာ မိုင်း ၅ လုံးထောင် ဖောက်ခွဲလိုက်တာလို့ ပဲခူးတိုင်းဒေသကြီး ပြည်သူ့ကာကွယ်ရေးတပ်ဖွဲ့ တာဝန်ရှိသူက ပြောပါတယ်။

“ဒီလမ်းက ဒေသခံပြည်သူတွေ သွားလာတာထက် စကစ ဘက်က ပဲခူးရိုးမထဲမှာရှိနေတဲ့ သူတို့တပ်တွေအတွက် ရိက္ခာပို့လမ်းကြောင်းအနေနဲ့ အဓိကသုံးနေတာ ဖြစ်တယ်။ ဒါကြောင့် သူတို့ရဲ့ ဆက်သွယ်ရေးလမ်းကြောင်းကို ဖြတ်တောက်တဲ့အနေနဲ့ တံတားကို မိုင်းခွဲလိုက်တာဖြစ်တယ်” လို့ ပြောပါတယ်။

မိုင်းခွဲခံရလို့ ပေ ၆၀ အရှည်ရှိ တံတားဟာ ချင်းကပ်လမ်းတခြမ်း ပြိုကျ ပျက်စီးသွားခဲ့ပြီး ကားတွေသွားလာဖို့ အဆင်မပြေတော့ဘူးလို့ သိရပါတယ်။

ဒီဖောက်ခွဲမှုကို ညောင်လေးပင်နဲ့ ကျောက်တံခါး ပကဖတို့က ပူးပေါင်းပြီး နန်းထိုက်အောင်စစ်ဆင်ရေးအနေနဲ့ လုပ်ဆောင်ခဲ့တာလို့လည်း ဆိုပါတယ်။

ပြီးခဲ့တဲ့ ဇန်နဝါရီလ ၁ ရက်နေ့ကလည်း ညောင်လေးပင်မြို့နယ်၊ ခင်ကန့်လန့်ရွာနဲ့ ကညင်ကျိုးရွာကြားရှိ စစ်ကောင်စီအသုံးပြုနေတဲ့ တံတားတစင်း မိုင်းခွဲခံရပြီး ပျက်စီးသွားခဲ့ပါသေးတယ်။