တောင်သာ၊ ဒီဇင်ဘာ ၁၅၊ ၂၀၂၅။

မန္တလေးတိုင်း၊ တောင်သာမြို့နယ်၊ အင်းတဲကျေးရွာနဲ့ နတ်စောင့်ကျေးရွာကြားမှာ မြေမြှုပ်မိုင်းထိပြီး မိသားစုဝင် ၃ ဦးဒဏ်ရာရတယ်လို့ ကျေးရွာနဲ့နီးစပ်သူတွေဆီက သိရပါတယ်။

မိုင်းထိသူတွေဟာ အင်းတဲကျေးရွာနေ အသက် ၃၀ အရွယ် ကိုစိုးအောင်၊ ယောက္ခမဖြစ်သူ အသက် ၅၀ အရွယ် ဒေါ်လှဌေး၊ ခယ်မဖြစ်သူ အသက် ၁၃ နှစ်အရွယ် မနွယ်ဝင်းခိုင်တို့ ၃ ဦးဖြစ်ပြီး ဒီဇင်ဘာ ၁၃ ရက် မနက် ၁၀ နာရီခန့်မှာ အင်းတဲကျေးရွာအဝင်မှာ မိုင်းထိခဲ့တာလို့ ဆိုပါတယ်။

“အဲ့နားပတ်လည်မှာတော့ ** မိုင်းတွေလည်းရှိသလို ဌာနေမိုင်းတွေလည်းရှိတယ်။ သူတို့ရွာကို ဝင်လာတဲ့အချိန်မှာထိတာဆိုတော့ ဘယ်သူမိုင်းဆိုတာတော့သေချာမသိရဘူး။ ရွာထဲကိုပြန်ဝင်ကြချိန် ထိတာ။ သူ့ယောက္ခမရွာ အင်းတဲကနေလာကြတာ”လို့ ကျေးရွာနဲ့နီးစပ်သူတဦးက ပြောပါတယ်။

မိုင်းထိသူ ၃ ဦးစလုံးမှာ ခြေထောက် ၂ ဖက်စလုံးစီမှာ မိုင်းစဖောက်ဝင်ဒဏ်ရာတွေရပြီး တောင်သာမြို့နယ်ပြည်သူ့ဆေးရုံမှာ ဆေးကုသနေကာ အသက်အန္တရာယ်မစိုးရိမ်ရပေမယ့် ခြေထောက်မှာထိထားတဲ့ မိုင်းစတွေကြောင့် ဒီဇင်ဘာ ၁၅ ရက်အထိ ဆေးရုံကနေမဆင်းရသေးဘဲ ဆေးကုသမှုခံယူနေရတယ်လို့ ဆိုပါတယ်။

မိုင်းထိမှန်ခဲ့တဲ့ နတ်စောင့်ကျေးရွာအနီးတဝိုက်မှာ စစ်ကော်မရှင်တပ်ရော ဒေသကာကွယ်ရေးအဖွဲ့တွေဘက်ကပါ စစ်ရေးလှုပ်ရှားမှုတွေရှိတာကြောင့် ဘယ်အဖွဲ့ထောင်တဲ့မိုင်းလဲဆိုတာ မသိရဘူးလို့ အထက်ပါကျေးရွာနဲ့နီးစပ်သူက ပြောပါတယ်။

စက်တင်ဘာ ၂၈ ရက်ကလည်း ပဲခူးတိုင်း၊ ကျောက်ကြီးမြို့နယ်၊ မုန်းမြို့၊ ရေအိုးစင်ကျေးရွာအနီးမှာ ထင်းခုတ်သွားတဲ့အမျိုးသား မိုင်းထိပြီးသေဆုံးခဲ့ပါသေးတယ်။

စာတည်း – လင်း

တောင်သာ၊ ဒီဇင်ဘာ ၃၊ ၂၀၂၅။

မန္တလေးတိုင်း၊ တောင်သာမြို့နယ်၊ ပဲခင်းကျော်ကျေးရွာကို စစ်ကော်မရှင်စစ်ကြောင်းကမီးရှို့လို့နေအိမ် ၅၀ ကျော်မီးလောင်ပျက်စီးခဲ့တယ်လို့ ​ကျေးရွာနဲ့နီးစပ်သူတဦးထံက သိရပါတယ်။

ဒီဇင်ဘာ ၂ ရက်နေ့ မနက် ၁၁ နာရီ ၄၅ မိနစ်ခန့်မှာ တောင်သာမြို့ကနေ ဖောကား ၅ စီးနဲ့အင်အား ၁၅၀ ကျော်ပါ စစ်ကော်မရှင်စစ်ကြောင်းဟာ ကျေးရွာထဲကို ရောက်လာပြီး နေအိမ်တွေကိုမီးဝင်ရှို့ခဲ့တာလို့ ဆိုပါတယ်။

“အိမ်တွေကို ဒုံးတင်ပြီး(အမြန်)မီးရှို့သွားတာ။ ချက်ချင်းရောက်ချက်ချင်းရှို့တာ။ ရွာထဲမှာ တနာရီလောက်ကြာသွားတယ်။ စစ်ကြောင်းက ဒီအတိုင်းကြီးဝင်လာတော့ သူတို့ရောက်လာမှ ထွက်ပြေးရတာတွေရှိတော့ ရုန်းရင်းဆန်ခတ်တွေတော့ ဖြစ်သွားတယ်။ ဒီအတိုင်းအငိုက်ဖမ်းပြီးဝင်လာတာ။ စစ်‌ရေးလည်းမရှိဘူး”လို့ ကျေးရွာနဲ့နီးစပ်သူတဦးက ပြောပါတယ်။

ပဲခင်း‌ကျော်ကျေးရွာဟာ တောင်သာမြို့ရဲ့ အ ရှေ့ဘက် မကျီးအိုးဂိတ်နဲ့ ၂ မိုင်အကွာမှာရှိတာလို့ သိရပါတယ်။

စစ်ကော်မရှင်စစ်ကြောင်း ကျေးရွာထဲဝင် မီးရှို့ချိန် ဒေသကာကွယ်ရေးပူးပေါင်းတပ်တွေက တိုက်ခိုက်လို့ နှစ်ဖက်အပြန်အလှန်ပစ်ခတ်မှု ၁ နာရီခန့်ဖြစ်ပွားခဲ့တယ်လို့ သိရပါတယ်။ပူးပေါင်းတပ်တွေဘက်ကတော့ အထိအခိုက်မရှိဘဲ စစ်ကော်မရှင်တပ်ထိခိုက်မှုတော့မသိရသေးဘူးလို့လည်း ဆိုပါတယ်။

စစ်ကြောင်းကနေ မီးရှို့လို့ အိမ်​ခြေ ၂၀၀ ကျော်ရှိတဲ့ ကျေးရွာက အိမ်ခြေ ၅၀ ကျော်မီးလောင်ပျက်စီးခဲ့ရပြီး ကျေးရွာနေပြည်သူအားလုံးထွက်ပြေးခဲ့ရပါတယ်။

ကျေးရွာနေအိမ်တွေကို မီးရှို့ပြီးနောက် စစ်ကြောင်းဟာ တောင်သာမြို့ဘက်ကို ပြန်ထွက်သွားလို့ မနေ့ညနေပိုင်းမှာ ထွက်ပြေးနေတဲ့ရွာခံတွေက ကျေးရွာထဲကိုပြန်ဝင်လာကြပြီလို့ ဆိုပါတယ်။

နိုဝင်ဘာ ၂၁ ရက်နေ့ကလည်း တောင်သာမြို့နယ်၊ ညောင်တိုကျေးရွာကို စစ်ကော်မရှင်စစ်ကြောင်းထိုးပြီး မီးရှို့ရလို့ နေအိမ် ၅၀ ခန့် ပျက်စီးပြီး သံဃာ ၁ ပါး ပျံလွန်တော်မူခဲ့တယ်လို့ သိရပါတယ်။

စာတည်း- မြတ်

◼ ထွက်မပြေးနိုင်တဲ့ သက်ကြီးပိုင်း သံဃာ ၁ ပါးမီးထဲပါပျံလွန်

တောင်သာ၊ နိုဝင်ဘာ ၂၂၊ ၂၀၂၅။

မန္တလေးတိုင်း၊ တောင်သာမြို့နယ်၊ ညောင်တိုကျေးရွာကို စစ်ကော်မရှင်တပ်ကစစ်ကြောင်းထိုး မီးရှို့လို့ နေအိမ် ၅၀ ခန့်ပျက်စီးပြီး သံဃာ ၁ ပါးလည်း မီးထဲပါ ပျံလွန်တော်မူခဲ့တယ်လို့ ကျေးရွာနဲ့ နီးစပ်သူတွေဆီက သိရပါတယ်။

နိုဝင်ဘာ ၂၁ ရက်နေ့လယ် ၂ နာရီကျော်ခန့်မှာ တောင်သာမြို့ကနေလာတဲ့ စစ်ကော်မရှင် ပူးပေါင်း အင်အား ၃၀၀ ခန့်ဟာ စစ်ကြောင်း ၃ ကြောင်းခွဲပြီးနောက် ညောင်တိုကျေးရွာထဲကို ၁ ကြောင်း ဝင်ပြီးမီးရှို့ခဲ့ကာ နောက်ထပ် စစ်ကြောင်း ၂ ခုက ကျေးရွာအနီးရှိ ဒေသခံကာကွယ်ရေးတပ်တခုရဲ့ ဂိတ်စခန်းကိုမီးရှို့သွားတယ်လို့ ဆိုပါတယ်။

“ဘုန်းကြီးက အသက်ကြီးနေ မသွားနိုင်တော့ စစ်ရှောင်တွေကလည်း ဘုန်းကြီးကို သတိမေ့သွားကြတာဆိုတော့ မီးထဲပါသွားတဲ့သဘောပါ။ ဂိတ်မှာရဲဘော်တွေကျတာမရှိဘူး။ ဂိတ်ကိုက မီးရှို့သွားတာ။ အိမ်က ၅၀ လောက်ကုန်သွားတာ”လို့ ကျေးရွာနဲ့နီးစပ်သူတဦးက ပြောပါတယ်။

မီးရှို့ချိန်ထွက်မပြေးနိုင်တဲ့ သက်တော် ၈၀ ကျော်သံဃာ ၁ ပါးမီးထဲပါ ပျံလွန်တော်မူခဲ့ပြီး နိုဝင်ဘာ ၂၂ ရက်ဒီကနေ့မှာလည်း မြေဖြူကုန်းရွာဘက်ကိုစစ်ကြောင်းဆက်ထိုးနေလို့ အိမ်ခြေ ၂၀၀ ကနေ ၄၀၀ ကြားရှိတဲ့ ညောင်တို၊ မြေဖြူကုန်း၊ ဆည်ကုန်း၊ ချောင်းနားရွာတွေအပါအဝင် ကျေးရွာ ၇ ရွာလောက်က ဒေသခံ ၅,၀၀၀ ဝန်းကျင်လည်း ဘေးလွတ်ရာထွက်ပြေးနေရတယ်လို့ ဆိုပါတယ်။

စစ်ကော်မရှင်ထောက်ခံတယ်လီဂရမ်တွေမှာတော့ ညောင်တိုကျေးရွာအနီး တောင်သာ-ငါ့သရောက် လမ်းပေါ်က တောင်သာမြို့နယ်ပကဖ ဂိတ်စခန်းကိုတိုက်ခိုက်သိမ်းပိုက်နိုင်ခဲ့တယ်လို့ ရေးသားဖော်ပြထားကြပြီး သက်ဆိုင်တပ်ဖွဲ့တွေဘက်ကတော့ တစုံတရာထုတ်ပြန်တာမရှိသေးပါဘူး။

ပြီးခဲ့တဲ့ စက်တင်ဘာ ၁၀ ရက်ကလည်း တောင်သာမြို့နယ်၊ ရုံးစည်ကြီးကျေးရွာက စစ်ကော်မရှင်စစ်ကြောင်းဝင်ရောက်ပြီး နေအိမ် ၁၅ လုံးကို မီးရှို့ဖျက်ဆီးခဲ့သေးတယ်လို့ သိရပါတယ်။

ပုံ – စစ်ကောင်ကော်မရှင်တယ်လီဂရမ်။

သတင်း – ကျော်ကြီး၊ စာတည်း – လင်း

ဒေသခံတချို့ပြန်လွတ်လာပြီး ဖမ်းဆီးခံအမျိုးသမီးတွေလည်း အဓမ္မပြုခံနေရဟုဆို

တောင်သာ၊ စက်တင်ဘာ ၁၂၊ ၂၀၂၅။

မန္တလေးတိုင်း၊ တောင်သာမြို့နယ်က ကျေးရွာတွေကို စစ်ကြောင်းထိုးနေတဲ့ စစ်ကော်မရှင် စစ်ကြောင်းက နေအိမ်တွေကိုမီးရှို့ခဲ့တဲ့အပြင် ဒေသခံတွေကိုဖမ်းဆီးပြီး အဲ့ဒီထဲက အမျိုးသမီး တချို့ကိုလည်း အဓမ္မပြုကျင့်မှုတွေလုပ်နေတယ်လို့ ဒေသခံတွေဆီက သိရပါတယ်။

စက်တင်ဘာ ၁၀ ရက် မနက် ၉ နာရီခန့်မှာ မလှိုင်မြို့နယ်ဘက်ကနေ အင်အား ၃၀၀ ခန့်ပါ စစ်ကော်မရှင်စစ်ကြောင်းဟာ လက်ပတောနဲ့ မကျီးကုန်းကျေးရွာသွားလမ်းပေါ်မှာ စစ်ကြောင်း သတင်းထောက်ဖို့သွားတဲ့ မကျီးကုန်းကျေးရွာသား အသက် ၃၀ ဝန်းကျင်အရွယ်အမျိုးသားတဦးကို ဖမ်းဆီးခဲ့ပါတယ်။

အဲ့ဒီနောက်စစ်ကြောင်းဟာ အဆိုပါအမျိုးသားကို ဖမ်းဆီးသွားပြီး ရုံးစည်ကြီးကျေးရွာကိုဖမ်းခေါ်သွားကာ ည ၇ နာရီမှာ ဖမ်းဆီးခံရသူရဲ့ ဖုန်းကနေတဆင့် သူရဲ့အမျိုးသမီးဖြစ်သူ အသက် ၂၇ ကျော်အရွယ်အမျိုးသမီးကို စစ်ကော်မရှင်တပ်သားတွေက ထမင်းလာပို့ခိုင်းပြီးနောက် ရောက်ရှိလာချိန်မှာ အဓမ္မပြုကျင့်ခဲ့တာလို့ ဆိုပါတယ်။

“စစ်ကြောင်းကိုထောက်ခိုင်းတဲ့ သူယောင်္ကျားကို ဖမ်းသွားတယ်။ အဲ့ဒါကိုညပိုင်းကျတော့ သူ့ယောင်္ကျား ဖုန်းနဲ့ ထမင်းလာပို့လို့ပြောတယ်။ သွားပို့တဲ့အချိန်မှာ အဓမ္မပြုကျင့်လိုက်တယ်။ အခုလည်းအမျိုးသမီးတွေဖမ်းထားပြီး သေတဲ့သူသေ၊ အဓမ္မပြုကျင့်ခံရသူတွေရှိနေသေးတယ်။ ထပ်သိရတာက ၁၂ ယောက် အဓမ္မပြုကျင့်ခံရသူတွေလည်းရှိသေးတယ်လို့ သိရတယ်”လို့ ရုံးစည်ကြီးရွာခံတဦးကပြောပါတယ်။

အထက်ပါ မကျီးကုန်ရွာသား ၁ ဦး၊ လက်ပတောရွာသား ၁ ဦး၊ ရုံးစည်ကြီးကျေးရွာထဲရှိ တောင်ရပ်၊ မြောက်ကွမ်းရပ်ကွက်တွေထဲက အမျိုးသား ၁ ဦးနဲ့ အမျိုးသမီး ၁၅ ဦးကျော်ဖမ်းဆီးခံထားရတာဖြစ်ပြီး အဲ့ဒီထဲက အမျိုးသမီး ၃ ဦးနဲ့ အထက်ပါ မကျီးကုန်းရွာသားရဲ့ အမျိုးသမီးကိုတော့ ပြန်လွှတ်ပေးလိုက်တယ်လို့ သိရပါတယ်။

ရုံးစည်ကြီးကျေးရွာထဲ အထိုင်ချထားတဲ့စစ်ကြောင်းက စက်တင်ဘာ ၁၁ ရက် နေ့လယ်ပိုင်းလောက်ကစတင်ပြီး ရွာထဲရှိဒေသကာကွယ်ရေးအဖွဲ့တွေနဲ့ သက်ဆိုင်သူတွေရဲ့နေအိမ်တွေအပါအဝင် ၁၅ လုံးကိုမီးရှို့ဖျက်ဆီးခဲ့တယ်လို့ ရုံးစည်ကြီးရွာခံတဦးက ပြောပါတယ်။

“ရွာထဲက ထောက်ပို့အိမ်တွေကို ဒလန်ကလိုက်ပြလို့ ကျနော်တို့ထောက်ပို့ အိမ်တော်တော်များများ ပါသွားတယ်။ ကျနော့်အိမ်၊ ကျနော့်အဒေါ်အိမ်ရယ် ထောက်ပို့တော်တော်များများရဲ့အိမ်ကို ဒလန်က လိုက်ပြခဲ့တယ်။ အဲ့ဒလန်ဘယ်သူဆိုတာလည်းသိထားပြီး။ စစ်ကြောင်းရှိနေလို့ မကာနိုင်သေးဘူး။ “လို့ အထက်ပါရွာခံက ဆက်ပြောပါတယ်။

စက်တင်ဘာ ၁၂ ရက်မနက်ထိ စစ်ကော်မရှင်စစ်ကြောင်းက ကျေးရွာထဲအထိုင်ချထားပြီး တန်ပိုကျေးရွာဘက်ကို လက်နက်ကြီးတွေနဲ့ပစ်ခတ်နေကာ အထိအခိုက်အပျက်အစီးကိုတော့ မသိရသေးဘူးလို့ ဆိုပါတယ်။

စစ်ကော်မရှင်စစ်ကြောင်းဝင်နေလို့ ရုံးစည်ကြီး၊ မကျီးကုန်း၊ ခပေါင်း၊ အနောက်တော၊ လက်ပတော၊ တန်ပိုကျေးရွာတွေက ဒေသခံ ၅,၀၀၀ ကျော်ထွက်ပြေးနေရတယ်လို့ သိရပါတယ်။

မတ် ၄ ရက်ကလည်း တောင်သာမြို့နယ်၊ နတ်စောင့်ကျေးရွာမှာ စစ်ကော်မရှင်ဘက်က လေကြောင်းကနေ ဗုံးကြဲခံရလို့ ဒေသခံ ၆ ဦးသေဆုံးပြီး နေအိမ် ၃၀ နီးပါး မီးလောင်ပျက်စီးသွားတယ်လို့ သိရပါတယ်။

စာတည်း – လင်း