စစ်ကိုင်း၊ ဧပြီ ၂၁၊ ၂၀၂၅။

စစ်ကိုင်းတိုင်း၊ စစ်ကိုင်းမြို့ အမှတ် ၁၆ လုံခြုံရေးရဲတပ်ဖွဲ့ခွဲအနီးမှာ ယာဉ်တန်းလုံခြုံရေးတာဝန်ကျ စစ်ကောင်စီတပ်သားတွေကို တိုက်ခိုက်ခဲ့ရာ ထိခိုက်သေဆုံးမှုတွေရှိခဲ့တယ်လို့ လင်းယုံညီနောင်ပြောက်ကျားတပ်ဖွဲ့က သတင်းထုတ်ပြန်ထားပါတယ်။

စစ်ကိုင်းမြို့ တပ်မ ၃၃ မှ မုံရွာအနောက်မြောက်တိုင်းစစ်ဌာနချုပ် (နမခ)ကို ဧပြီ ၂၀ ရက် ညနေ ၄ နာရီကျော်လောက်မှာထွက်လာတဲ့ ကား ၁၀ စီးပါယာဉ်တန်းကို စစ်ကိုင်း-ရွှေဘို-မုံရွာလမ်းပေါ်ရှိ အမှတ် ၁၆ လုံခြုံရေးရဲတပ်ဖွဲ့ခွဲအနီးမှာလုံခြုံရေးယူပေးနေတဲ့ အင်အား ၁၃ ဦးပါစစ်ကောင်စီတပ်ဖွဲ့ဝင်တွေကို တိုက်ခိုက်ခဲ့တာလို့ ဆိုပါတယ်။

“သူတို့က လမ်းပေါ်မှာက ၆ ယောက် ၇ ယောက်လောက်။ ကင်းပုန်းက ၆ ယောက်လောက်ရှိတာကို ရုတ်တရက်ဝင်ပစ်တာ။ အမှတ် ၁၆ ရဲရုံးနဲ့ကလည်း မီတာ ၁၀၀ လောက်ပဲကွာတော့ အထဲက ၄၀ မမတွေနဲ့ ပစ်ကူလာလို့ နောက်ပြန်ဆုတ်လာရတာ တိုက်ခိုက်ချိန်က ၅ မိနစ်လောက်ပဲကြာတယ်” လို့ လင်းယုံညီနောင်ပြောက်ကျားတပ်ဖွဲ့ တာဝန်ရှိသူတဦးက ပြောပါတယ်။

တိုက်ခိုက်မှုအပြီးမှာတော့ အလောင်းနဲ့ဒဏ်ရာရစစ်သားတွေကို နာရေးကူညီမှုအသင်းကားနဲ့ လာသယ်သွားတယ်လို့ ဆိုပါတယ်။

တိုက်ပွဲအတွင်း စစ်ကောင်စီတပ်သား ၅ ဦးသေဆုံးပြီး ၃ ထိခိုက်ဒဏ်ရာရတယ်လို့ သိရပြီး ဒီအခြေအနေနဲ့ပတ်သက်လို့ မြေလတ်အသံက သီးခြားအတည်ပြုချက်မရသေးပါဘူး။

အဆိုပါစစ်ဆင်မှုအတွင်း တိုက်ခိုက်ရေးတပ်ဖွဲ့ဝင်တွေ အန္တရာယ်ကင်းခဲ့တယ်လို့ ဆိုပါတယ်။

လင်းယုံညီနောင်ပြောက်ကျားတပ်ဖွဲ့ဟာ ပြီးခဲ့တဲ့ မတ် ၂၁ ရက် ည ၉ နာရီ‌ကျော်ကလည်း စစ်ကိုင်းမြို့ အတွင်း ပျူစောထီးတွေ ကင်းပတ်နေချိန် စစ်ကိုင်း-မုံရွာ-ရွှေဘိုလမ်းပိုင်း ဆွမ်းချက်ရပ် စာသင်ကျောင်းအနီးကနေ မိုင်းဆွဲတိုက်ခိုက်ခဲ့ပါသေးတယ်။

ပုံစာ – လုံခြုံရေးယူနေသည့် စစ်ကောင်စီတပ်သားများကို တိုက်ခိုက်နေသည့် လင်းယုံညီနောင် ပြောက်ကျားတပ်ဖွဲ့ဝင်တဦး။

သတင်း – အောင်ဆွေအင်း၊ စာတည်း – လင်း

မြင်းခြံ၊ မတ် ၂၃၊ ၂၀၂၅။

မန္တလေးတိုင်း၊ မြင်းခြံမြို့၊ ငါန်းဇွန်မြို့နယ်၊ မြို့သာစက်မှုဇုန် အင်းဝဘဏ်အနီးမှာတပ်စွဲထားတဲ့ စစ်ကောင်စီတပ်ဖွဲ့ဝင်တွေကို အနီးကပ်ဝင်တိုက်ခဲ့ရာ စစ်ကောင်စီတပ်သား ၄ ဦး သေဆုံးခဲ့တယ်လို့ နဂါးနီပြောက်ကျားတပ်ဖွဲ့-မြင်းခြံဆီက သိရပါတယ်။

မြို့သာစက်မှုဇုန်၊ အင်းဝဘဏ်အနီး အင်အား ၄၀ ဝန်းကျင်နဲ့တပ်စွဲထားပြီး ဘဏ်နဲ့မီတာ ၃၀၀ ခန့်အကွာ လမ်းမပေါ်တက်ကာ ပြည်သူတွေကိုပေါ်တာဆွဲ၊ ဆက်ကြေးကောက်နေတဲ့ ကောင်စီတပ်ဖွဲ့ဝင်တွေကို မတ် ၂၁ ရက် နေ့လယ် ၉ နာရီ ၄၅ မိနစ်မှာတော်လှန်ရေးပူးပေါင်းအဖွဲ့တွေက ပေ ၃၀၀ ခန့်အကွာကနေ ဝင်ရောက်တိုက်ခိုက်ခဲ့တာလို့ ဆိုပါတယ်။

“နေ့တိုင်းလိုလိုလုပ်နေတော့လေ၊ အဲ့ဒါ သတင်းရတာနဲ့သွားပစ်တာ။ ၅ မိနစ်လောက်ကြာတယ်။ ခန့်မှန်းခြေ ပေ ၃၀၀ လောက်ပဲဝေးတယ်။ ၁၅ ကောင်လောက် ဒီဘက်ကိုထွက်လာတာ၊ ထွက်ပြီးတော့ သူတို့ လာတဲ့သူတွေကို စစ်(ဆေး)တယ် တားတယ်၊ ပိုက်ဆံတောင်းတာတွေ လုပ်တယ်။ အဲ့ဒါကို သူတို့အလစ်အငိုက်မှာ အမှတ်မထင်ဝင်ပစ်တာ။ ၅ ကောင်မှာ ၁ ကောင်က အပြင်းအထန်ဒဏ်ရာရတယ်။ ၄ ကောင်ကတော့သေတယ်။” လို့ နဂါးနီပြောက်ကျားတပ်ဖွဲ့-မြင်းခြံ တာဝန်ခံက ပြောပါတယ်။

တိုက်ပွဲအတွင်း အပြန်အလှန်ပစ်ခတ်ခဲ့ကြပြီး တော်လှန်ရေးပူးပေါင်းတပ်ဖွဲ့ဝင်တွေ အထိအခိုက်မရှိ ပြန်လည်ဆုတ်ခွါလာခဲ့ကာ တိုက်ပွဲဖြစ်ပွါးပြီးချိန် စစ်ကောင်စီတပ်ဘက်က အနီးဝန်းကျင်နေရာတွေကို စစ်ကြောင်းထိုးတာတွေရှိပြီး ကင်းပုန်းချထားတာတွေ လုပ်နေတယ်လို့ သိရပါတယ်။

ဒီတိုက်ခိုက်မှုကိုတော့ နဂါးနီပြောက်ကျားတပ်ဖွဲ့ မြင်းခြံ၊ ငါန်းဇွန်မြို့နယ် တပ်ရင်း ၆ တပ်ခွဲ ၃၊ ငါန်းဇွန်းမြို့နယ် ပကဖတို့က ပူးပေါင်းလုပ်ဆောင်ခဲ့တာဖြစ်ပါတယ်။

စာတည်း – ကိုချမ်း

မင်းလှ၊ မတ် ၂၁၊ ၂၀၂၅။

ပဲခူးတိုင်း၊ မင်းလှမြို့နယ်၊ စစ်ကွင်းမြို့၊ အုတ်တွင်းကျေးရွာအနီး ရန်ကုန် – ပြည်ကားလမ်းဘေး အထိုင်ချတပ်စွဲထားတဲ့ စစ်ကွင်းတာဆုံ စစ်ဆေး‌ရေးဂိတ်ကို မတ် ၂၀ ရက်နဲ့ ၂၁ ရက်တွေမှာ ၂ ရက်ဆက်တိုက် တိုက်ခိုက်ခဲ့တယ်လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ ဆီက သိရပါတယ်။

မတ် ၂၀ ရက် မနက် ၁ နာရီ ၃၀ မိနစ်မှာ စစ်ကွင်းမြို့၊ အုတ်တွင်းကျေးရွာအနီး ရန်ကုန် – ပြည်ကားလမ်းဘေး စစ်ကွင်းတာဆုံ စစ်ဆေး‌ရေးဂိတ်ကို တိုက်ခိုက်ခဲ့ပြီး အပြန်အလှန် ပစ်ခတ်မှု ၁ နာရီ ၄၅ မိနစ်ခန့်ကြာခဲ့ကာ မတ် ၂၁ ရက် နေ့လယ် ၁၀ မှာတော့ အဲ့ဒီစစ်ဆေးရေးဂိတ်ကိုပဲ အဝေးထိန်းဗုံးနဲ့ ထပ်မံဖောက်ခွဲတိုက်ခိုက်ခဲ့တယ်လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ တာဝန်ရှိသူတဦးက ပြောပါတယ်။

“အဲ့ဒီ စစ်ဆေးရေးဂိတ်မှာက စစ်ကောင်စီတပ်ဖွဲ့ဝင်တွေ၊ အုပ်ချုပ်‌ရေးမှူးနဲ့ ပျူစောထီးတွေ အင်အား ၂၀ ကျော် ၃၀ လောက်ရှိတယ်၊ အဲ့ဒီမှာနေတာ။ စစ်ကောင်စီ**ဘက်က ၇ ဦးသေဆုံးတယ်။ လက်နက်တွေနဲ့ ဒဏ်ရာရသူတွေကိုတော့ ဒရွတ်တိုက် အမှောင်ဘက်ကိုဆွဲသွားတယ်။ ကျန်တဲ့ ၆ ဦးလောက်လည်း ဒဏ်ရာအပြင်းအထန်နဲ့ ပြေးသွားရတယ်။ စစ်ကွင်းမြို့ထဲကိုလည်း သူတို့‌တတွေ အလံဖြူထောင်ပြီးပြေးရတယ်။ ပြေးရတော့လည်း ပုဆိုးမနိုင်ပဝါမနိုင်နဲ့ ပြေးသွားကြရတယ်။”လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ တာဝန်ရှိသူတဦးက ပြောပါတယ်။

မတ် ၁၉ ရက် တိုက်ခိုက်မှုမှာ စစ်ကောင်စီဘက်က သေဆုံးသူ ၇ ဦးနဲ့ ဒဏ်ရာရသူ ၆ ဦးရှိခဲ့ပြီး မတ် ၂၁ ရက် အဝေးထိန်းဗုံးနဲ့တိုက်ခိုက်မှုမှာ ၁ ဦးသေဆုံးပြီး ဒဏ်ရာရသူ ၄ ဦးမှာ ဝမ်းဗိုက်ထိ၊ မျက်လုံးထွက်ဒဏ်ရာရသူတွေပါပြီး မင်းလှဆေးရုံကိုခေါ်ဆောင်သွားတယ်လို့ သူက ဆက်ပြောပါတယ်။

အဲဒီ စစ်ဆေးရေးဂိတ်ကို တိုက်ခိုက်ပြီးနောက် ကာဘိုင်သေနတ် ၁ လက်၊ ကျည်ဘောက် ၁ ခု၊ ကျည် ၂၀ တောင့်၊ စစ်အသုံးအဆောင်တချို့နဲ့ ဆိုင်ကယ် ၁ စီး သိမ်းဆည်းရမိခဲ့ပြီး စခန်းကိုမီးရှို့ထားခဲ့တယ်လို့ သိရပါတယ်။

ပြီးခဲ့တဲ့ မတ် ၈ ရက်ကလည်း ပဲခူးတိုင်း၊ သာယာဝတီခရိုင်၊ မင်းလှမြို့နယ်၊ ထန်းပင်ကုန်းအုပ်စု၊ နတ်ထမင်းကျေးရွာ ရာအိမ်မှူး အငယ်လေး(ခ)သက်နိုင်စိုးကို သာယာဝတီခရိုင် တပ်ရင်း ၃၈၀၂၊ တပ်ခွဲ ၂ က ပစ်ခတ်ရှင်းလင်းခဲ့ပါသေးတယ်။

စာတည်း – ကိုချမ်း