တပ်မတော်နေ့

မြေလတ်အသံ၊ မတ် ၂၇၊ ၂၀၂၅။

PDF တွေနဲ့ EAO တချို့ လက်နက်စွန့်ပြီး ပါတီနိုင်ငံရေးလမ်းကြောင်းကို ရွေးချယ်ကြဖို့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောဆိုလိုက်ပါတယ်။

မတ် ၂၇ ရက် ဒီကနေ့ ညနေပိုင်းမှာပြုလုပ်တဲ့ စစ်ကောင်စီရဲ့ နှစ် ၈၀ ပြည့် တပ်မတော်နေ့မိန့်ခွန်းမှာ အခုလိုထည့်သွင်းပြောဆိုခဲ့တာ ဖြစ်ပါတယ်။

PDF အဖွဲ့တွေနဲ့ တိုင်းရင်းသားအဖွဲ့တွေအနေနဲ့ လက်နက်ကိုင်လမ်းစဉ်ကို စွန့်လွှတ်ပြီး ပါတီနိုင်ငံရေးလမ်းကြောင်းနဲ့ ရွေးကောက်ပွဲလမ်းကြောင်းတွေကတဆင့် နိုင်ငံရေးပြသနာကို နိုင်ငံရေးလမ်းကြောင်းနဲ့သာဖြေရှင်းနိုင်မှာကြောင့် ငြိမ်းချမ်းရေးဆွေးနွေးမှုတွေကို အမြဲတမ်းကြိုဆိုလမ်းဖွင့်ထားကြောင်း ထပ်မံအသိပေးတယ်လို့ စစ်ခေါင်းဆောင်က ဆိုပါတယ်။

ဒါ့အပြင် လွတ်လပ်ပြီးတရားမျှတတဲ့ ပါတီစုံဒီမိုကရေစီ ရွေးကောက်ပွဲ အောင်မြင်အောင်ကျင်းပနိုင်ရေးနဲ့ ရွေးကောက်ပွဲကထွက်ပေါ်လာတဲ့ အစိုးရကို နိုင်ငံတော်အာဏာလွှဲအပ်နိုင်ရေး ဦးတည်ထားပြီး ရွေးကောက်ပွဲကို သတ်မှတ်ကာလအတွင်း ပြန်လည်ကျင်းပပေးဖို့ လုပ်ဆောင်နေပြီးဒေသအလိုက် လုံခြုံရေးအပေါ်မူတည်ကာ ရွေးကောက်ပွဲကို ကျင်းပသွားမှာ ဖြစ်တယ်လို့ စစ်ခေါင်းဆောင်က ပြောပါတယ်။

ဒီကနေ့ ပြုလုပ်တဲ့ စစ်ကောင်စီရဲ့နှစ် ၈၀ ပြည့် တပ်မတော်နေ့အခမ်းအနားကို ညနေပိုင်းမှာ ပြုလုပ်ခဲ့ပြီး အင်အား ၇,၀၀၀ ကျော်နဲ့ စစ်ရေးပြခဲ့တယ်လို့ စစ်ကောင်စီလက်အောက်ခံ မီဒီယာတွေမှာ ဖော်ပြထားပါတယ်။

မကွေး၊ မတ် ၂၈၊ ၂၀၂၃။

မကွေးတိုင်းဒေသကြီး၊ ပခုက္ကူမြို့၊ မြို့ရှောင်လမ်း အမှတ် ၃ ဘက် တံတားအနီးမှာ တပ်မတော်နေ့က ကင်းလှည့်နေတဲ့ စစ်ကောင်စီအဖွဲ့တွေဟာ ဘီးလူးနဂါးစစ်ဆင်ရေးနဲ့ မိုင်းဆွဲခံရလို့ ၂ ဦးထက်မနည်း ထိခိုက်တယ်လို့ သိရပါတယ်။

မတ်လ ၂၇ ရက်နေ့ မနက် ၉ နာရီ ၄၅ မိနစ်လောက်မှာ အင်အား ၁၂ ဦးခန့်နဲ့ ကင်းလှည့်နေတဲ့ စစ်ကောင်စီအဖွဲ့ကို မိုင်း ၂ လုံးနဲ့ တိုက်ခိုက်ခဲ့တယ်လို့ People Defence Force Column 1က ဗိုလ် 7 က ပြောပါတယ်။

“ခါတိုင်းဆို သူတို့ဘက်က ယူနီဖောင်းတွေနဲ့ ကင်းလှည့်တာမရှိဘူး။ မနေ့ကတော့ ယူနီဖောင်းတွေနဲ့ လှည့်နေတာရှိတယ်။ မနေ့က သူတို့က စစ်တပ်အထိမ်းအမှတ်နေ့ဆိုတော့ လုံခြုံရေးကို သူတို့အလေးထားပြီး လုပ်နေတာဖြစ်မယ်။ သူတို့က မြို့ထဲကလာပြီးကင်းလှည့်ပြီး ပြန်အဝင်လောက်မှာ မိုင်းဆွဲလိုက်တာ။ အဓိကက စစ်ကောင်စီက ပြုလုပ်နေတဲ့ တပ်မတော်နေ့အထိမ်းအမှတ်ကို အသိအမှတ်မပြုဘူးဆိုတာ သိစေချင်လို့လုပ်တာ” လို့ ပြောပါတယ်။

အဲဒီတိုက်ခိုက်မှုဟာ ဘီးလူးနဂါးစစ်ဆင်ရေးရဲ့ ပထမဆုံးအကြိမ်တိုက်ခိုက်မှုဖြစ်ပြီး နောက်ပိုင်းမှာ စစ်ဆင်ရေးကို ဆက်လက်အကောင်အထည်ဖော်တဲ့အနေနဲ့ စစ်ကောင်စီတပ်စခန်းနဲ့ လက်အောက်ခံအဖွဲ့တွေကို ဆက်လ​က်တိုက်ခိုက်သွားမယ်လို့ ဆိုပါတယ်။

မိုင်းဆွဲတိုက်ခိုက်မှုမှာ စစ်ကောင်စီအဖွဲ့ဝင် ၂ ဦးထက်မနည်း ထိခိုက်ဒဏ်ရာရပြီး ပြန်လည်ပစ်ခတ်တာတွေကိုတောင် မလုပ်နိုင်ဘဲ ကားကို မောင်းပြေးသွားတယ်လို့ သိရပါတယ်။

အဲဒီတိုက်ခိုက်မှုကိုတော့ People Defence Force Column 1၊ Middle TZ Zone UG တို့က ပူးပေါင်းတိုက်ခိုက်ခဲ့တာ ဖြစ်တယ်လို့ ဆိုပါတယ်။

မတ်လ ၂၁ ရက်နေ့ နေ့လည်ပိုင်းကလည်း ပခုက္ကူမြို့နယ်၊ အင်ပင်ကျေးရွာ ပခုက္ကူ-မြိုင်သွားလမ်းပေါ်က ဘုန်းကြီးကျောင်းအနီးမှာ တပ်စွဲထားပြီး လမ်းသွားလမ်းလာတွေကို စစ်ဆေးငွေတောင်းနေတဲ့ စစ်ကောင်စီတပ်​​နေရာ ဒရုန်းနဲ့တိုက်ခိုက်ခံရလို့ ၂ ဦးဒဏ်ရာရခဲ့သေးတယ်လို့ သိရပါတယ်။

စာတည်း – 007

စစ်ကိုင်း၊ မတ် ၂၇၊ ၂၀၂၃။

စစ်ကိုင်းတိုင်း၊ မုံရွာမြို့နယ်၊ မုံရွာ-ပုသိမ်လမ်းမှာ အညာပစ်တိုင်းထောင်လေးများ အဖွဲ့ကဦးဆောင်ပြီး မတ်လ ၂၇ ရက်ဒီကနေ့မှာ စစ်ကောင်စီကို ဆန္ဒပြခဲ့ကြပါတယ်။

“ဖက်ဆစ်စနစ်သပိတ်မှောက် ဖက်ဒရယ်လမ်းကိုရဲရဲလျှောက်” စာသားပါ ဘန်နာကိုကိုင်ဆောင်ပြီး တပ်မတော်ယူနီဖောင်းကို မီးရှို့ခဲ့ကြရာ မုံရွာလူငယ်များအစည်းအရုံးဝင်တွေကလည်း ပူးပေါင်းဝန်းရံခဲ့ကြပါတယ်။

“တပ်မတော်နေ့မှာ ပြည်သူလူထုအနေနဲ့ စစ်တပ်ကိုမထောက်ခံကြောင်း ဆန္ဒထုတ်ဖော်ခဲ့တာပါ။ ပြည်သူလူထု မထောက်ခံတဲ့စစ်တပ်ဟာ ကြာကြာမခံပါဘူး။ ခုဆို တဖြည်းဖြည်း ယိုင်လဲလာပါပြီ။ အရေးနိမ့်လာပြီ ဖြစ်တဲ့အတွက် ပြည်သူလူထုအနေနဲ့ ဆက်လက် တောင့်ခံခုခံပေးကြဖို့ တောင်းဆိုလိုပါတယ်” လို့ အညာပစ်တိုင်းထောင်လေးများအဖွဲ့ ဦးဆောင်သူက ပြောပါတယ်။

အညာပစ်တိုင်းထောင်လေးများအဖွဲ့ဟာ သူတို့ဒေသအတွင်း ဆန္ဒဖော်ထုတ်တာတွေအပြင် ပြည်တွင်း၊ပြည်ပ အလှူရှင်တွေနဲ့ချိတ်ဆက်ပြီး မီးဘေးသင့် ပြည်သူတွေကို မီးဖိုဆောင်သုံးပစ္စည်းတွေနဲ့ ဆန်နဲ့ဆီတွေကိုပါ လှူဒါန်းနေတာလည်း ဖြစ်ပါတယ်။

စာတည်း – လင်း