ညောင်ပင်ကြီးရဲစခန်း

စစ်ကိုင်း၊ ဇွန် ၁၄၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ ညောင်ပင်ကြီးရဲစခန်း စီးနင်းတိုက်ခိုက်ခံရပြီးနောက် စစ်ကောင်စီက အင်အားဖြည့်တင်းထားကာ ရဲစခန်းဧရိယာတွေလည်း ချဲ့ထွင်နေတယ်လို့ ဒေသခံတပ်ဖွဲ့တွေဆီက သိရပါတယ်။

ဇွန်လ ၉ ရက်ကနေ ဒီနေ့အချိန်ထိ ၅ ရက်ဆက်တိုက် ညောင်ပင်ကြီးတဝိုက်ကို မီးရှို့နေတာဖြစ်ပြီး မြစ်ကမ်းနားကနေ ရဲစခန်းနောက်ဘက်သင်္ချိုင်းကုန်းထိ တပ်နယ်မြေသတ်မှတ်မယ်ဆိုကာ နေအိမ်နဲ့လမ်းတွေကို မြေတူးစက်နဲ့ဖျက်ဆီးပြီး တပ်ပိုင်မြေဆိုင်းဘုတ်တွေ ကပ်ထားတယ်လို့လည်း ဓားမဆိုင်းတပ်မတော်တာဝန်ခံ ဗိုလ်စွမ်းက ပြောပါတယ်။

“ပတ်ဝန်းကျင်ကို ရှင်းလင်းရေးလုပ်ပြီး သူတို့တပ်နယ်ချဲ့မယ့်ပုံစံရှိတယ်၊ ကြားတာတော့ ညောင်ပင်ကြီးတရွာလုံးကို တပ်ပိုင်မြေလုပ်မယ်တဲ့၊ ခုလည်း ရွာအနီးအနားက မပြေးနိုင်တဲ့သက်ကြီးပိုင်းတွေ၊ မရှောင်ရသေးတဲ့သူတွေကို ကယ်ထုတ်နေရတယ်၊ မီးရှို့နေတာကတော့ ကျည်ကွယ်၊ မျက်ကွယ်မရှိတော့အောင် လုပ်တဲ့သဘောပဲ။” လို့ ကယ်ဆယ်ရေးလုပ်နေတဲ့ မိုးကြိုးကျည်ဆံပြောက်ကျားတပ်ဖွဲ့ဝင် ရဲဘော်တဦးက ပြောပါတယ်။

အခုလက်ရှိ ရဲစခန်းရဲ့ နောက်ကျောကပ်ရက်က သိမ်တော်ရပ်ကွက်၊ ရဲစခန်းအရှေ့ဘက်က ထန်းတောရွာ၊ ရဲစခန်းမြောက်ဘက်က နှင်းတောရွာနဲ့ ရွာရှည်၊ အိုမ၊ မင်္ဂလာကုန်း စတဲ့ရွာတွေကို မီးရှို့တာတွေ လုပ်ဆောင်နေတယ်လို့ သိရပါတယ်။

“အိမ်တွေ၊ လမ်းတွေကို ဘူဒိုဇာနဲ့ထိုးပြီး ဘန်ကာအခိုင်မာဆောက်နေတယ်၊ ဆောက်လို့ပြီးသွားရင်တော့ စစ်ကြောင်းပြန်ထိုးမယ်လို့ မျှော်လင့်တာပဲ၊ ရဲစခန်းပတ်လည်ကအိမ်တွေဆို ပြန်လို့မရတော့ဘူး၊ အိမ်လည်းမရှိတော့ဘူး၊ မြေလည်းမရှိတော့ဘူး အဲ့လိုဖြစ်သွားပြီ။” လို့ ဆားလင်းကြီးနယ်ခံတဦးက ပြောပါတယ်။

ပြီးခဲ့တဲ့ ဇွန်လ ၉ ရက် ညနေ ၅ နာရီက ညောင်ပင်ကြီးရဲစခန်းကို ကာကွယ်ရေးတပ်ပေါင်းစုနဲ့ လွိုင်ကော်အခြေစိုက် Buffalo PDFက သွားရောက်တိုက်ခိုက်ခဲ့ပြီး စစ်ကောင်စီဘက်က ၁၀ ဦးကျော်သေဆုံးကာ လက်နက်အများအပြား သိမ်းနိုင်ခဲ့တာလည်း ဖြစ်ပါတယ်။

စာတည်း – 007

စစ်ကိုင်း၊ ဇွန် ၉၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ ညောင်ပင်ကြီးရဲစခန်းကို ကာကွယ်ရေးအဖွဲ့တွေက ဝင်ရောက်စီးနင်းတိုက်ခိုက်ခဲ့ပြီး စစ်ကောင်စီဘက်က လေကြောင်းပစ်ကူ၊ လက်နက်ကြီးပစ်ကူ အဆမတန်အသုံးပြုတာကြောင့် ပြည်သူတချို့ ထိမှန်တာတွေရှိတယ်လို့ သိရပါတယ်။

ဇွန်လ ၉ ရက် ဒီ‌နေ့ ညနေ ၆ နာရီလောက်မှာ ပစ်ခတ်မှုတွေ စတင်နေတာဖြစ်ပြီး ၆ နာရီ ၁၅ မိနစ်မှာ လေကြောင်းတက်လာကာ တိုက်ခိုက်မှုဖြစ်ရာ ဝန်းကျင်ကို ၅ ခေါက် လှည့်ပတ်ပစ်ခတ်သွားတာလို့ ဆိုပါတယ်။

“ပထမတော့ ကိုယ့်ဘက်က ဦးအောင်ပစ်တာပဲ၊ ပစ်တဲ့ချိန် ဝမ်ပေါင်ကလည်း မလှမ်းမကမ်းဆိုတော့ ကောင်တာပြန်ပေးတယ်၊ မုံရွာဘက်ကလည်း လက်နက်ကြီး ပစ်ကူပေးတယ်၊ ကျနော်တို့လည်း ပြန်ဆုတ်ခဲ့ရတာ၊ ပြည်သူတွေလည်း (ရွာထဲကနေ)ထွက်လို့ မရတာတွေရှိတယ်”လို့ ရဲဘော်တဦးက ပြောပါတယ်။

ရဟတ်ယာဉ်တစီးနဲ့ပစ်ခတ်ချိန် ရွာသားအမျိုးသမီးတဦး၊ အမျိုးသားတဦးထိမှန်ထားပြီး အမျိုးသမီးကတော့ မျက်စိထိမှန် ဒဏ်ရာရထားကာ ရဲဘော် ၂ဦးလည်း ဒဏ်ရာရထားတယ်လို့ ဆိုပါတယ်။

“လေယာဉ်နဲ့ ၄၅ မိနစ်လောက်တော့ ပတ်ပြီးပစ်သွားတယ်” လို့ ဒေသခံ တဦးက ဆိုပါတယ်။

ကျောက်မျက်တောင်ဘက်ကနေ ညောင်ပင်ကြီးရဲစခန်းဘက်ကို စစ်ကူစစ်ကြောင်းထွက်လာနေကာ မုံရွာဘက်ကနေလည်း လက်နက်ကြီးပစ်ကူတွေပေးနေလို့ ရဲစခန်းအနီးတဝိုက်မှာရှိတဲ့ ကျေးရွာ ၈ ရွာနီးပါးက ပြည်သူတွေကတော့ ဘုန်းကြီးကျောင်းတွေထဲမှာ ပုန်းခိုနေရတယ်လို့ သိရပါတယ်။

အခုအခါမှာ စစ်ကောင်စီဟာ ညောင်ပင်ကြီးရဲစခန်းမှာ အင်အားဖြည့် ပြန်လည်တပ်စွဲထားပြီး အနီးအနားက ကျေးရွာတွေကို မီးရှို့နေတဲ့သဘောရှိနေသလို တိုက်ပွဲမှာ ကျဆုံးသွားတဲ့ စစ်ကောင်စီတပ်ဖွဲ့ဝင်အလောင်းတွေကိုလည်း လိုက်လံကောက်ယူနေကြတယ်လို့ ဒေသခံတွေက ဆိုပါတယ်။

အခုတိုက်ပွဲဖြစ်တဲ့ ညောင်ပင်ကြီးရဲစခန်းဟာ စစ်ကိုင်းတိုင်း၊ မုံရွာမြို့နဲ့ ချင်းတွင်းမြစ်တခုသာ ခြားတာ ဖြစ်ပါတယ်။

စာတည်း – လင်းဇေ