ညောင်ခါးရှည်ရဲစခန်း

ပဲခူး၊ ဇွန် ၁၇၊ ၂၀၂၃။

ပဲခူးတိုင်းဒေသကြီး၊ ဝေါမြို့နယ်၊ ညောင်ခါးရှည်ရဲစခန်း တိုက်ခိုက်ခံရပြီးနောက်မှာ စစ်ကောင်စီတပ်တွေက ဒေသခံ ၅၀ ကျော်ကို ဖမ်းဆီးစစ်ဆေးခဲ့ရာ အခုဆိုရင် စစ်ကြောရေးမှာသေဆုံးသူဟာ ၅ ဦးထိရှိလာပြီဖြစ်တယ်လို့ ဒေသခံတွေက ဆိုပါတယ်။

ဇွန်လ ၁၆ ရက်မှာ သေဆုံးသူ ၅ ဦးရဲ့ မိသားစုဝင်တွေကို နာရေးလုပ်လို့ရပြီဖြစ်တယ်လို့ ရဲဘက်ကအကြောင်း ကြားလာတယ်လို့ ဆိုပါတယ်။

သေဆုံးသူ ၅ ဦးအနက် ကျုံးပါကျေးရွာက ကိုအောင်မြင့်သိန်း အလောင်းကိုသာ မိသားစုက ဆေးရုံမှာသွားရောက်ကြည့်ရှုခွင့်ရခဲ့ပြီး ကျန် ၄ ဦးဟာ ဘယ်နေ့မှာ သေဆုံးတယ်ဆိုတာ အတိအကျမသိရဘဲ မနေ့ကမှ နာရေးလုပ်လို့ရပြီဖြစ်ကြောင်းကို မိသားစုဝင်တွေထံ အကြောင်းကြားလာတာ ဖြစ်တယ်လို့ ဒေသခံတွေက ဆိုပါတယ်။

“ခုက ရဲဘက်က သေဆုံးတယ်ဆိုတာ အတည်ပြုပေးလိုက်တဲ့ သဘောပါ။ သေဆုံးသူတွေထဲကမှာ တယောက်ပဲ မိသားစုဝင်တွေက ဆေးရုံမှာ အလောင်းသွားကြည့်ရတယ်။ ကျန်သူတွေက အလောင်းလည်း မမြင်ရဘူး။ ဘယ်နေ့မှာ ဘယ်လိုဆုံးသွားတယ်ဆိုတာလဲ မသိရဘူး”လို့ ဒေသခံတဦးက ပြောပြပါတယ်။

သေဆုံးသူတွေဟာ ဖိုးစပါယ်ကျေးရွာက ဦးဝင်းဇော်ဌေး ၃၅ နှစ်၊ ဇနီးဖြစ်သူ ဒေါ်တင်မျိုးခိုင် ၃၈ နှစ်၊ ကိုဆံရှည် ၃၀ နှစ်၊ ကျုံပါကျေးရွာက ကိုအောင်မြင့်သိန်း ၃၀ နှစ်နဲ့ ဦးမြသိန်း ၆၀ နှစ်တို့ဖြစ်ပါတယ်။

အဆိုပါ သေဆုံးသူတွေဟာ ညောင်ခါးရှည် ရဲစခန်း တိုက်ခိုက်ခံရပြီး ၅ ရက်အတွင်း ဖမ်းဆီးခံရသူတွေဖြစ်ပါ တယ်။

ဦးမြသိန်းကတော့ သေနတ်ဒဏ်ရာနဲ့ ဖမ်းဆီးခံရပြီး ၅ ရက်ခန့်မှာ သေဆုံးသွားပြီး မိသားစုဘက်က အလောင်းပြန်မရဘူးလို့ သိရပါတယ်။

ကိုအောင်မြင့်သိန်းကတော့ စစ်ကောင်စီဘက်က နှိပ်စက်မှုကြောင့် လက်နဲ့ခြေထောက်တွေမှာ ကျိုးကြေဒဏ်ရာ၊ မျက်နှာနဲ့ ခန္ဓာကိုယ်တခုလုံးမှာလည်း ဒဏ်ရာဒဏ်ချက်တွေနဲ့ သေဆုံးခဲ့ရပြီး မေလ ၂၂ ရက်မှာ အလောင်းကို ပဲခူးဆေးရုံမှာပဲ မိသားစုကြည့်ခွင့်ရခဲ့ကာ အလောင်းပြန်မရဘူးလို့ သိရပါတယ်။

ကျန်သူ ၄ ဦးကတော့ ဘယ်နေ့ဘယ်ရက်မှာ ဘယ်လိုသေဆုံးသွားတယ်ဆိုတာကို မသိရဘဲ ရဲဘက်ကလည်း ပြောပြမသွားဘူးလို့ ဆိုပါတယ်။

ဖမ်းဆီးခံရသူတွေထဲက ၂၀ ဦးကျော်ကတော့ ပြန်လွှတ်လာခဲ့ပြီး ၂၀ ဦးခန့်က ရုံးတင်တရားစွဲ ရုံးထုတ်နေပေမယ့် ၄ ဦးကတော့ ပြန်လွတ်လာတာလည်း မတွေ့ရသလို ရုံးထုတ်မှာလည်း မတွေ့ရဘဲပျောက်ဆုံးနေတယ်လို့ ဆိုပါတယ်။

ပျောက်ဆုံးသူနေ ၄ ဦးက ကဒွတ်ရွာက ၂ ဦးနဲ့ ညောင်ခါးရှည်ရွာက ၂ ဦးဖြစ်တယ်လို့ သိရပါတယ်။

ဒါ့အပြင် ဖမ်းဆီးခံရသူတွေထဲက လူ ၆ ဦးပိုင်ဆိုင်တဲ့ ကဒွတ်ရွာ နေအိမ် ၂ လုံး၊ ဖိုးစပါယ်ရွာက နေအိမ် ၂ လုံးနဲ့ ကျုံပါရွာက နေအိမ် ၂ လုံး စုစုပေါင်း ၆ လုံးကို စစ်ကောင်စီဘက်က ချိတ်ပိတ်ထားပါတယ်။

ဧပြီလ ၂၇ ရက် ည ၇ နာရီလောက်မှာ ညောင်ခါးရှည်ရဲစခန်းကို ဝေါပကဖ တပ်ရင်း (၃၇၀၁)ပြောက်ကျား အဖွဲ့က ပူးပေါင်းတိုက်ခိုက်ခဲ့လို့ ရဲ ၁ ဦးသေပြီး ၂ ဦးဒဏ်ရာရခဲ့တယ်လို့ သိရပါတယ်။

စာတည်း – လင်းဇေ

ပဲခူး၊ မေ ၆၊ ၂၀၂၃။

ပဲခူးတိုင်း၊ ဝေါမြို့နယ်၊ ညောင်ခါးရှည်ရဲစခန်း တိုက်ခိုက်ခံရပြီးနောက် စစ်ကောင်စီတပ်တွေဟာ ကျေးရွာ ၄ ရွာက ဒေသခံ ၅၀ ထက်မနည်းကို ဖမ်းဆီးထားပြီး အသက်မပြည့်သေးသူ ၂ ဦးကိုသာ ပြန်လွှတ်ပေးခဲ့တယ်လို့ သိရပါတယ်။

ဧပြီ ၂၇ ရက်နေ့မှ မေ ၅ ရက်နေ့အထိ ၁၀ ရက်နီးပါးအတွင်း ၅၀ ကျော်ဖမ်းဆီးခံထားရတာဖြစ်ပြီး၊ စစ်ကောင်စီတပ်ဖွဲ့ဝင်တွေဟာ ကျေးရွာလမ်းဆုံတွေမှာ တားဆီးစစ်ဆေးတာနဲ့ နေအိမ်တွေကို ဝင်ရောက်ရှာဖွေမှုတွေလုပ်ပြီးနောက် ဖမ်းဆီးသွားတာဖြစ်တယ်လို့ ဝေါပကဖတာဝန်ရှိသူက မြေလတ်အသံကို ပြောပါတယ်။

“စဖြစ်တဲ့နေ့ကတည်းက မနေ့ကထိဆို ဖမ်းဆီးခံရသူက ၅၀ ကျော်လောက်ရှိလာပြီ။ လူငယ် ၂ ဦးကိုဘဲ ပြန်လွှတ်သေးတယ်၊ အသက်မပြည့်သေးလို့။ ကျန်တဲ့သူတွေကိုတော့ ဆက်ဖမ်းထားသေးတယ်။ မိသားစုဝင်တွေနဲ့တော့ ဘယ်သူမှတွေ့ခွင့်မရသေးဘူး”လို့ ပြောပါတယ်။

ဖမ်းဆီးခံရသူတွေမှာ ဖိုးစပါယ်ကျေးရွာနေ ဦးသန်းဇော်ဦး၊ မခိုင်မီမီစံ၊ ဦးကြည်နိုင်တို့အပါအဝင် ညောင်ခါးရှည်၊ ဖိုးစပယ်၊ ကျုံပါ၊ ကဒွတ် စတဲ့ရွာတွေက ဒေသခံ ၅၀ ထက်မနည်းဖမ်းဆီးခံထားရတာလို့ သိရပါတယ်။

လက်ရှိမှာလည်း စစ်ကောင်စီတပ်က ကျေးရွာတွေဘက်မှာ ကင်းပုန်းဝပ်၊ အစစ်ဆေးတင်းကြပ်နေသလို ဒေသခံတွေကိုလည်း PDFနဲ့ပတ်သက်သူတွေဆိုပြီး အကြောင်းပြဖမ်းဆီးတာတွေ လုပ်နေတယ်လို့ ဆိုပါတယ်။

ဖမ်းဆီးထားသူတွေကိုတော့ ဘုရားကြီးမြို့ အခြေစိုက် စစ်ကောင်စီအမြှောက်တပ် စစ်ကြောရေး၊ ဝေါမြို့မရဲစခန်းတွေမှာ စစ်ဆေးမှုတွေလုပ်ဆောင်နေတာလို့ သိရပါတယ်။

ဧပြီလ ၂၇ ရက်နေ့ည ၇ နာရီလောက်မှာ ညောင်ခါးရှည်ရဲစခန်းကို ဝေါပကဖ၊ ပဲခူးခရိုင်တပ်ရင်း(၃၇၀၁) ပြောက်ကျားအဖွဲ့က ပူးပေါင်းတိုက်ခိုက်ခဲ့လို့ ရဲ ၁ ဦးသေပြီး ၂ ဦးဒဏ်ရာရခဲ့တယ်လို့ သိရပါတယ်။

စာတည်း – ရင်ငြိမ်း

ညောင်ခါးရှည်၊ မေ ၁၊ ၂၀၂၃။

ပဲခူးတိုင်းဒေသကြီး၊ ဝေါမြို့နယ်၊ ညောင်ခါးရှည်ရဲစခန်း တိုက်ခိုက်ခံရပြီးနောက် စစ်ကောင်စီတပ်က ညောင်ခါးရှည်အနီး ဖိုးစပါယ်ကျေးရွာက ဒေသခံ ၃၀ ကျော်ကို ဖမ်းဆီးသွားတယ်လို့ သိရပါတယ်။

ဧပြီလ ၂၇ ရက်မှ ၃၀ ရက်ထိ အတောအတွင်း စစ်ကောင်စီတပ်ဖွဲ့ဝင်တွေဟာ ကျေးရွာလမ်းဆုံ၊ လမ်းခွတွေမှာ တားဆီးစစ်ဆေးတာနဲ့နေအိမ်တွေကို ဝင်ရောက်ရှာဖွေမှုတွေ လုပ်ပြီးနောက် ဖမ်းဆီးသွားတာဖြစ်တယ်လို့ ဝေါပကဖတာဝန်ရှိသူက ပြောပါတယ်။

“သူတို့တွေက ရဲစခန်းတိုက်ခံရတဲ့ နေ့ကစပြီးနေ့တိုင်းရွာတွေကို ဝင်မွှေ၊ လမ်းပိတ်ပြီး ဖမ်းတာ။ အဓိက ရွာအုပ်ကြီးတွေနဲ့ သူတို့သတင်းပေးတွေက သတင်းပေးလို့ လိုက်ရှာဖမ်းတဲ့သဘောမျိုးပါ။ ဖမ်းခံရတဲ့သူတွေထဲမှာ ဆိုင်ပိတ်ရတာမျိုး၊ သားကိုမမိလို့ ဖအေကိုဖမ်းတာမျိုးတွေလည်းရှိနေတယ်”လို့ ပြောပါတယ်။

ဖမ်းဆီးခံရသူတွေဟာ PDF တွေနဲ့မပတ်သက်တဲ့ ပြည်သူတွေသာဖြစ်ပြီး မဆိုင်တဲ့ ပြည်သူတွေ ဖမ်းဆီးခံရအောင် သတင်းပေးနေသူတွေကို စုံစမ်းပြီး ရှင်းလင်းသွားမယ်လို့ ဆိုပါတယ်။

ဖိုးစပါယ်ကျေးရွာမှ ဖမ်းဆီးခံရသူတွေမှာ အသက်မပြည့်သေးတဲ့ ကလေးငယ်တွေအပါအဝင် အမျိုးသား၊ အမျိုးသမီး ၃၀ ကျော်ပါတယ်လို့ သိရပါတယ်။

ဖမ်းဆီးထားသူတွေကိုတော့ ဘုရားကြီးရှိ စစ်ကောင်စီအမြှောက်တပ်စစ်ကြောရေးကို ပို့ထားပြီး စစ်ဆေးနေသလို မိသားစုဝင်တွေနဲ့လည်း တွေ့ခွင့်မရသေးဘဲ မေလ ၁ ရက်နေ့ မနက်ပိုင်းထိ ပြန်မလွတ်လာကြသေးဘူးလို့ သိရပါတယ်။

ဧပြီလ ၂၇ ရက် ည ၇ နာရီလောက်မှာ ညောင်ခါးရှည်ရဲစခန်းကို ဝေါပကဖ၊ ရင်း(၃၇၀၁)ပျောက်ကျားအဖွဲ့က ပူးပေါင်းတိုက်ခိုက်ခဲ့လို့ ရဲ ၁ ဦးသေပြီး ၂ ဦးဒဏ်ရာရခဲ့ပါတယ်။

စာတည်း – လင်း