မြေလတ်အသံ၊ ဖေဖော်ဝါရီ ၂၈၊ ၂၀၂၂။
ယင်းမာပင်မြို့နယ် ချင်းပုန်းကျေးရွာတွင် ဖေဖော်ဝါရီလ ၂၇ ရက်နေ့က ချင်းပုန်းဘုန်းကြီးကျောင်း၌ စာသင်နေသော ကလေး ၉၀ ကျော်နှင့်ဆရာ ဆရာမ ၁၀ ဦး PDF ၂၀ ကျော်အားဖမ်းဆီးထားကြောင်း ချင်းတွင်းရိုမ မဟာမိတ်တပ်ပေါင်းစုတာဝန်ခံက မြေလတ်အသံကိုပြောပါတယ်။
ဘုန်းကြီးကျောင်းမှာလာရောက် ကျူရှင်တက်နေသော မင်းရွာ၊ ချင်းပုန်း ရွာမှ ၂ နှစ်သားအရွယ်မှစကာ ၁၅ နှစ်ခန့်ရှိ ကွန်ပျူတာသင်နေသော လူငယ်များဖမ်းဆီးလိုက်ရတာဖြစ်ပါတယ်။
“လေယာဉ်ကရွာအနောက်မြောက်ထဲမှာ ၁ စီး မြောက်ပိုင်းကနေ ၁ စီး စစ်သားတွေကိုခွဲချတာ၊အဲဒီကြားထဲမှာ ညှပ်ပူးညှပ်ပိတ် မိသွားကြတာ၊ လေယာဉ်တွေနဲ့ ဗုံးတွေပစ်ကျဲလိုက်တော့ ကလေးတွေကကြောက်အားကြီးပြီး ဆရာမတွေကလည်း ၁၀ ယောက်လောက် ဘုန်းကြီးကျောင်းထဲမှာကလေးတွေကို စာသင်နေတာ၊ ကလေးတွေအန္တရာယ်ရှိတယ်ဆိုပြီး ဆရာမတွေက ဘုန်းကြီးကျောင်းအောက်ကမြေအောက်ခန်းထဲကိုပိတ်သွင်းလိုက်တာ၊အနောက်ဘက်ကစာသင်ကျောင်းထဲကနေ စစ်တပ်ကဝင်တာဆိုတော့ အကုန်ပိတ်မိပြီးဖမ်းဆီးခံလိုက်ရတာ၊မနေ့ညနေတုန်းကတော့ဘုန်းကြီးက ကလေးတွေဘာမှမလုပ်ဖို့ အသံချဲ့စက်နဲ့အော်သေးတယ်၊ ရွာထဲကနေထွက်ပြေးတဲ့ရွာသူရွာသားတွေကို စစ်တပ်က ကိုယ်အိမ်ထဲကိုယ်ပြန်ဝင်မဝင်ရင်ရွာမီးနဲ့ရှို့မယ်လို့ပြောတယ်၊ ကလေးတွေလည်းအကုန်ဖမ်းထားတာစစ်တပ်က၊” လို့ ချင်းတွင်းရိုမ မဟာမိတ်တပ်ပေါင်းစုတာဝန်ခံက ပြောပါတယ်။
ဖေဖော်ဝါရီလ ၂၆ ရက်နေ့ ကတည်းက ဝင်စီးနင်းခဲ့ကာ PDF ၂၀ လောက်လည်းအဖမ်းခံထားရပြီး စစ်ကောင်စီတပ်သားတွေက ကြိုးတွေနဲ့တုပ်ပြီးရှေ့ကနေအကာအကွယ်ယူကာ ချင်းပုန်းနဲ့ ညောင်းကိုင်းရွာဘက်သွားလိုက်လာလိုက်လုပ်ကာ အဖွဲ့များခွဲထားကြောင်း ပေါက်တိုက် PDF ခေါင်းဆောင်နဲ့ ချင်းပုန်း PDF ခေါင်းဆောင်ကိုသတ်ပစ်လိုက်ပြီလို့လည်း ဆိုပါတယ်။ လက်ရှိအချိန်ထိ ပြန်လည်ထွက်ခွါခြင်းမရှိသေးသလို အင်အားများလည်း ထပ်မံချထားကြောင်း သိရပါတယ်။