ပေါက်ခေါင်း၊ ဒီဇင်ဘာ ၂၁၊ ၂၀၂၅။

ပဲခူးတိုင်း၊ ပေါက်ခေါင်းမြို့နယ်၊ အနောက်ကြို့ကုန်းအထက်တန်းကျောင်းမှာ Grade – 9 တက်နေတဲ့ ကျောင်းသား ၂ ဦး အွန်လိုင်းကနေအလုပ်ရမယ်ဆိုကာ လိမ်ညာခေါ်ခံရပြီးနောက် စစ်မှုထမ်းစုဆောင်းခံထားရတယ်လို့ မိသားစုနဲ့ နီးစပ်သူတွေဆီက သိရပါတယ်။

စစ်မှုထမ်းစုဆောင်းခံရသူတွေဟာ ဒန်းတောင်ရွာနဲ့ ကန်သာယာကျေးရွာနေ အသက် ၁၆ နှစ်အရွယ် မောင်တင်မျိုးအောင်းနဲ့ မောင်သော်ဇင်ဖြိုးတို့ဖြစ်ပြီး ဒီဇင်ဘာ ၁၈ ရက်မှာကျောင်းသွားမယ်ဆိုပြီး နေအိမ်ကနေထွက်သွားရာက ပျောက်ဆုံးသွားကြတာလို့ ဆိုပါတယ်။

“သူတို့(စစ်မှုထမ်းစုဆောင်းခံရသူ)တွေက သူငယ်ချင်းတွေဆီကို ဆက်သွယ်ပြီး အလုပ်ရမယ်ဆိုပြီး လိုက်သွားတာ စစ်သားစုဆောင်းရေးထဲရောက်နေတယ်ဆိုပြီးပြောတယ်။ သူတို့လည်း ဟိုကနေတဲ့သူတွေနဲ့ အဆင်ပြေအောင်နေရတော့ ဖုန်းသုံးရတယ်ပေါ့နော်။ သူတို့တပ်ထဲရောက်နေတဲ့ အကြောင်းကို သူငယ်ချင်းတွေဆီပြောပြတာ။ “လို့ မိသားစုနဲ့နီးစပ်သူတဦးက ပြောပါတယ်။

ဒီဇင်ဘာ ၁၉ ရက်မှာ သူတို့ ၂ ဦးဟာ ကပစ ၆ လို့ ယူဆရတဲ့တပ်မှာ စစ်သားစုဆောင်းခံထားရကြောင်းကို သူငယ်ချင်းတွေကိုပြောပြခဲ့တာကြောင့် အဲ့ဒီကတဆင့် မိသားစုတွေကပြန်လည်သိရှိခဲ့ကြတာလို့ ဆိုပါတယ်။

အဲ့ဒီနောက် ဒီဇင်ဘာ ၂၀ ရက်မှာ မိသားစုဝင်တွေက ပြည်မြို့ လလစ ၉၅၉ တပ်နဲ့ ပန်းတောင်းရှိ ကပစ ၆ တပ်တွေမှာ သွားရောက်စုံစမ်းရာမှာ စစ်ကော်မရှင်တပ်ရင်းတွေက သက်ဆိုင်ရာတပ်တွေမှာ စုဆောင်းထားတာမရှိကြောင်းငြင်းဆိုခဲ့တာကြောင့် လက်ရှိမှာစုံစမ်းရှာဖွေဖို့အခက်တွေ့နေကြတယ်လို့ မိသားစုနဲ့ နီးစပ်သူကပြောပါတယ်။

အဆိုပါ ကျောင်းသား ၂ ဦးဟာ သူငယ်ချင်းတွေနဲ့အဆက်အသွယ်လုပ်ပြီးနောက်ပိုင်း ဒီဇင်ဘာ ၂၁ ရက်အထိ အဆက်အသွယ်ထပ်မရတော့ဘဲ ဖုန်းတွေကို ပြန်လည်ဆက်သွယ်ရာမှာလည်း ဖုန်းစက်ပိတ်ထားတယ်လို့ ဆိုပါတယ်။

စာတည်း – လင်း

လက်ပံတန်း၊ ဖေဖော်ဝါရီ ၂၄၊ ၂၀၂၅။

ပဲခူးတိုင်း၊ သာယာဝတီခရိုင်၊ လက်ပံတန်းမြို့နယ်မှာ စစ်မှုထမ်းစုဆောင်းပေးနေတဲ့ အုပ်ချုပ်ရေးမှူး ပစ်ခတ်ခံရပြီးသေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ ဆီက သိရပါတယ်။

လက်ပံတန်းမြို့နယ်၊ မှောင်အင်းအုပ်စု အုပ်ချုပ်ရေးမှူး သန်းဦး ကို ဖေဖော်ဝါရီ ၂၄ ရက် ဒီမနက် ၈ နာရီ လောက်မှာ ရန်ကုန်-ပြည်လမ်းပေါ်ရှိ လွှစင်ကုန်းတာဆုံမှာ ဒေသခံကာကွယ်ရေးတပ်ဖွဲ့ဝင်တွေက ပစ်ခတ်ခဲ့တာလို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ မှ တာဝန်ရှိသူက ပြောပါတယ်။

“သတင်းအရ ရဲဘော်တွေ လွှစင်ကုန်းတာဆုံမှာစောင့်နေတုန်း အုပ်ကြီးကဆိုင်ကယ် ၁ စီး၊ ပျူစောထီးနဲ့ ရာအိမ်မှူးက ဆိုင်ကယ် ၁ စီး အတူစီးလာကြတာတွေ့ပါတယ်။ ပစ်ကွင်းထဲရောက်တော့ အုပ်ကြီးကို သေနတ်နဲ့ ၁၂ ချက်ပစ်တာ ရင်ဘတ်နဲ့ ခေါင်းတွေရော တခြားနေရာတွေရောမှန်ပြီး နေရာတင် သေပါတယ်။” လို့ သူကပြောပါတယ်။

သူနဲ့အတူလာတဲ့ ပျူစောထီးနဲ့ ရာအိမ်မှူးကတော့ ထွက်ပြေးလွတ်မြောက်သွားပြီး ပစ်ခတ်ပြီးနောက် ဦးသန်းဦးဆီကနေ လက်ပစ်ဗုံး ၂ လုံး၊ ငွေသားကျပ် ၁ သိန်း၊ ဆိုင်ကယ် ၁ စီး၊ စည်းတံဆိပ်တုံး ၂ ခု၊ မှတ်ပုံတင် ၂ ခု၊ စစ်မှုထမ်းနဲ့ပတ်သက်တဲ့ စာရွက်စာတမ်းတွေကို သိမ်းဆည်းခဲ့တယ်လို့ အထက်ပါ တာဝန်ရှိသူကပြောပါတယ်။

ဦးသန်းဦးဟာ လူငယ်တွေကိုစစ်မှုထမ်းအတွက်စုဆောင်းတာ၊ လက်ပစ်ဗုံးကိုင်ဆောင်ပြီး ဒေသခံတွေကိုခြိမ်းခြောက်တာ၊ ကာကွယ်ရေးတပ်တွေကိုစိန်ခေါ်ပြောဆိုတာတွေရှိပြီး သူ့ကြောင့်ဖမ်းဆီးခံရသူ အနည်းဆုံး ၁၀ ဦးလောက်ရှိတယ်လို့လည်း ဆိုပါတယ်။

သူဟာ ၂၀၂၁ ခုနှစ် စစ်အာဏာသိမ်းကတည်းက အုပ်ချုပ်ရေးမှူးလုပ်နေသူဖြစ်သလို မှော်အင်းရွာရဲ့ ပျူစောထီးခေါင်းဆောင်တဦးလည်းဖြစ်တယ်လို့ ဆိုပါတယ်။

ဒေသခံတွေနဲ့ တော်လှန်ရေးတပ်ဖွဲ့တွေကို ဒုက္ခပေးတဲ့ စစ်ကောင်စီအဖွဲ့ဝင်တွေနဲ့ ထောက်တိုင်တွေကို အရှိန်မြှင့်တိုက်ခိုက်သွားမှာဖြစ်တဲ့အတွက် ပြည်သူတွေအနေနဲ့ ၎င်းတို့အနီးမှာသွားလာနေထိုင်တာတွေ လုံဝမပြုလုပ်ဖို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ ရဲ့ထုတ်ပြန်ချက်မှာပါရှိပါတယ်။

ပြီးခဲ့တဲ့ ဖေဖော်ဝါရီ ၂၀ ရက်ကလည်း သာယာဝတီခရိုင် တပ်ရင်း ၃၈၀၂၊ တပ်ခွဲ ၂ ဟာ ဆားချောင်းရွာမှာနေထိုင်တဲ့ ထောက်ကြန့်အုပ်စုအုပ်ချုပ်ရေးမှူး ဝင်းလှိုင်နဲ့ ပျူစောထီး ကတုံး (ခ) ဇော်မင်းထွန်းကိုလည်း ပစ်ခတ်ရာသေဆုံးခဲ့သေးတယ်လို့ သိရပါတယ်။

စာတည်း – လင်း

မကွေး၊ ဒီဇင်ဘာ ၁၀၊ ၂၀၂၁။

မကွေးတိုင်းဒေသကြီး၊ သရက်ခရိုင်၊ ကံမမြို့နယ် အထွက်ရှိ ဒန်းကိုင်း စစ်ကောင်စီ စစ်ဆေးရေးဂိတ်ကို ယနေ့ ဒီဇင်ဘာ ၁၀ ရက် မနက် ၂ နာရီခန့်တွင် ရှော့တိုက်ဒုံးဖြင့် ကံမ-သရက်ပူး​ပေါင်းအဖွဲ့က သွားရောက်ပစ်ခတ်တိုက်ခိုက်ခဲ့ကြောင်း သိရသည်။

မနက် ၂ နာရီခန့်တွင် ရှော့တိုက် တလုံးနှင့် အရင်စပစ်ခဲ့ပြီး သိပ်မကြာခင်မှာပဲ စစ်ကောင်စီဂိတ်မှ သေနတ်များနှင့် ရမ်းသမ်းပစ်ခတ်ခဲ့ကြောင်း ကံမ-သရက် ပူးပေါင်းအဖွဲ့မှ နောက်ထပ်ရှော့တိုက် တလုံးထပ်ပစ်၍ ဘေးကင်းစွာဆုတ်ခွာခဲ့ကြောင်း စစ်ကောင်စီတပ်သားများ ထိခိုက်သေဆုံးမှုရှိမရှိနှင့် နောက်ဆက်တွဲအခြေအနေကို မသိရသေးကြောင်း တာဝန်ရှိသူမှ ပြောသည်။

“အဓမ္မ စစ်သားစုဆောင်းတာ ရွာအချို့ကိုရည်ရွယ်ချက်ရှိရှိ လျှပ်စစ်မီး ဖြတ်တောက်တာတွေ လုပ်နေတဲ့အတွက် တိုက်ခိုက်ခဲ့တာပါ” ဟု အဖွဲ့တာဝန်ရှိသူမှ မြေလတ်အသံကို ပြောသည်။

ကံမ-သရက် ပူးပေါင်းအဖွဲ့သည် ပြီးခဲ့သည့် ဒီဇင်ဘာ ၇ ရက်နေ့ ကလည်း သရက်မြို့နယ် သာစည်ကျေးရွာအနီး Mytel Tower တိုင်ကို ဗုံးခွဲတိုက်ခိုက်ခဲ့ကြောင်း သိရသည်။