မြေလတ်အသံ၊ ဇွန် ၂၊ ၂၀၂၅။

မန္တလေးတိုင်း၊ သပိတ်ကျင်းနဲ့ စဉ့်ကူးမြို့နယ်က စာသင်ကျောင်း၊ ဟိုတယ် နဲ့ လူနေအိမ်တွေကို စစ်ကောင်စီတပ်က ဇွန် ၁ ရက်မှာ တိုက်ခိုက်ရေးလေယာဥ်နဲ့ဗုံးကြဲတိုက်ခိုက်ခဲ့တယ်လို့ ဒေသခံတွေဆီကသိရပါတယ်။

သပိတ်ကျင်းမြို့နယ်၊ ၄ မိုင်ကံသာကျေးရွာရှိ နှစ်ထပ်ဆောင်စာသင်ကျောင်းကို ညနေ ၇ နာရီကျော်မှာ ပေါင် ၅၀၀ ဗုံး ၁ လုံးကြဲချခဲ့တာလို့ဆိုပါတယ်။

“စာသင်ကျောင်းဖွင့်လှစ်ပြီးသင်ကြားနေတာတော့မရှိဘူးဗျ။ မရှိလို့ လူထိခိုက်တာမရှိတာဗျ။ တိုက်ပွဲဖြစ်တာကတော့ လုံးဝကိုမရှိတာဗျ”လို့ ပြင်ဦးလွင်ခရိုင်ပြည်သူ့ကာကွယ်ရေးအဖွဲ့မှ တာဝန်ရှိသူတဦးကပြောပါတယ်။

ဗုံးကြဲခံရတဲ့ စာသင်ကျောင်းဆောင်မှာ အခြေခံပညာအထက်တန်းကျောင်းဖြစ်ပြီး ကျောင်းအဆောက်အဦ ၁ ခုလုံးပြိုကျပျက်စီးခဲ့တယ်လို့ ဆိုပါတယ်။

ဒါ့အပြင် နေ့လယ် ၁ နာရီနဲ့ ၂ နာရီကျော်မှာတော့ စဉ့်ကူးမြို့နယ်၊ နတ်တောင်ကျေးရွာရှိ Lucky 7 ဟိုတယ်နဲ့ နွယ်ရုံကျေးရွာတို့ကို ပေါင် ၃၀၀ ဗုံး ၁ လုံးစီ ကြဲချတိုက်ခိုက်ခံရတယ်လို့ အထက်ပါ တာဝန်ရှိသူကပြောပါတယ်။

Lucky7 ဟိုတယ်ဗုံးကြဲခံရမှုမှာ အနီးပတ်ဝန်းကျင်ရှိ အသက် ၂၀ နဲ့ ၃၀ ကျော်အရွယ်အမျိုးသမီး ၃ ဦးထိခိုက်ဒဏ်ရာရရှိခဲ့ပြီး နွယ်ရုံကျေးရွာမှာတော့ နေအိမ် ၂ လုံးပျက်စီးခဲ့ပေမယ့် လူအထိအခိုက်မရှိခဲ့ဘူးလို့ သူကဆက်ပြောပါတယ်။

အခုလိုစစ်ကောင်စီတပ်က လေကြောင်းကနေဗုံးကြဲတိုက်ခိုက်ခဲ့ချိန် သပိတ်ကျင်းနဲ့ စဉ့်ကူးမြို့နယ်တို့မှာ တိုက်ပွဲဖြစ်ပွားတာ လုံးဝမရှိဘူးလို့သိရပါတယ်။

ပြီးခဲ့တဲ့ ဧပြီ ၁ ရက်ကနေ မေ ၁၇ ရက်အထိ စစ်ကောင်စီတပ်က မတ္တရာမြို့နယ်၊ စဉ့်ကူးမြို့နယ်နဲ့ သပိတ်ကျင်းမြို့နယ်တို့ကို လေကြောင်းတိုက်ခိုက်မှု ၅၇ ကြိမ်ပြုလုပ်ခဲ့တာကြောင့် ပြည်သူ ၇၂ ဦး သေဆုံးကာ ၁၄၁ ဦး ထိခိုက်ဒဏ်ရာရရှိခဲ့တယ်လို့ ပြည်သူ့ကာကွယ်ရေးတပ်မတော် (မန္တလေး)ရဲ့ မှတ်တမ်းအရသိရပါတယ်။

စာတည်း – လင်း

စဉ့်ကူး၊ မေ ၅၊ ၂၀၂၅။

မန္တလေးတိုင်း၊ စဉ့်ကူးမြို့နယ်ရှိ ကျေးရွာ ၂ ရွာကို စစ်ကောင်စီတပ်က မေ ၃ ရက်မနက်ပိုင်းမှာ လေကြောင်းကနေ ဗုံး ၅ ကြိမ်ကြဲချတိုက်ခိုက်ခဲ့ရာ ပြည်သူ ၁ ဦးသေဆုံးပြီး ၄ ဦးထိခိုက်ဒဏ်ရာ ရရှိခဲ့တယ်လို့ ပြင်ဦးလွင်ခရိုင်ပြည်သူ့ကာကွယ်ရေးအဖွဲ့မှ တာဝန်ရှိသူတဦးဆီက သိရပါတယ်။

ဗုံးကြဲခံရတဲ့ကျေးရွာ ၂ ရွာမှာ လက်ပန်လှ နဲ့ ထုံးကြီးတို့ဖြစ်ပြီး လက်ပန်လှရွာ ပြည်စိုးအောင်ရပ်ကွက်၊ မူလအောင်မြေဘုန်းကြီး ကျောင်းအရှေ့မြောက်ဘက် လယ်ကွင်းကို ၁ ကြိမ်၊ တံတားအနီးကို ၁ ကြိမ်၊ ငြိမ်းချမ်းအောင်ရပ်ကွက်ကို ၂ ကြိမ်နဲ့ ထုံးကြီးကျေးရွာကို ၁ ကြိမ် အသီးသီးကြဲချခဲ့တာလို့ ဆိုပါတယ်။

“ဖိုက်တာနဲ့လာကြဲတာဗျ။ လက်ပန်လှကို ၄ ကြိမ်ကြဲတယ်။ တခါလာကြဲရင် ဗုံးသီး ၁ လုံးစီချတာ။ ထုံးကြီးရွာကိုကြဲတဲ့အခါမှာတော့ ၂ လုံးကျဲချခဲ့တယ်”လို့ ပြင်ဦးလွင်ခရိုင်ပြည်သူ့ကာကွယ်ရေး အဖွဲ့မှတာဝန်ရှိသူတဦးက ပြောပါတယ်။

ထုံးကြီးကျေးရွာဗုံးကြဲခံရမှုမှာ အသက် ၃၀ အရွယ် အမျိုးသား ၁ ဦးသေဆုံးပြီး နောက်ထပ်အမျိုးသား ၃ ဦးထိခိုက်ဒဏ်ရာရရှိခဲ့ကာ လူနေအိမ် ၅ လုံးလည်း မီးလောင်ပျက်စီးခဲ့တယ်လို့ သူကဆက်ပြောပါတယ်။

လက်ပန်လှကျေးရွာဗုံးကြဲခံရမှုမှာတော့ အမျိုးသမီး ၁ ဦးဒဏ်ရာရရှိခဲ့ကာ လူနေအိမ် ၂ လုံး ပြိုကျပျက်စီးပြီး သေဆုံးမှုမရှိခဲ့ဘူးလို့ အထက်ပါတာဝန်ရှိသူကဆက်ပြောပါတယ်။

“စကစကပြည်သူကိုညှာတာရမယ့်အစား ဗုံးကြဲချနေတယ်။ သူက (စကစ) နိုင်ငံတကာအမြင်မှာတော့ ပြည်သူတွေကိုကူညီနေတယ်ဆိုပြီးတော့ ဝါဒဖြန့်နေတယ်။ တကယ်တမ်းကျတော့ ပြည်သူကို သတ်ဖြတ်နေတယ်။ အဲ့တာကြောင့် ဗုံးခိုကျင်းတွေတူးကြဖို့နဲ့ အမြဲသတိရှိကြဖို့လိုတယ်”လို့ သူကဆိုပါတယ်။

ပြီးခဲ့တဲ့ ဧပြီ ၁၈ ရက်ကလည်း စဉ့်ကူးမြို့နယ်၊ လက်ပန်လှကျေးရွာ၊ ပြည်စိုးအောင်ရပ်ကွက်ရှိ စာသင်ကျောင်းကို စစ်ကောင်စီတပ်ကဗုံးကြဲခဲ့တာကြောင့် အမျိုးသမီး ၁ ဦးသေဆုံးကာ ၂ ဦး ဒဏ်ရာရခဲ့တယ်လို့ သိရပါတယ်။

စာတည်း – လင်း

စဉ့်ကူး၊ မေ ၁၁၊ ၂၀၂၃။

မန္တလေးတိုင်း၊ စဉ့်ကူးမြို့နယ်၊ သာယာဝတီကျေးရွာအုပ်စုအုပ်ချုပ်ရေးမှူးနဲ့ ဆယ်အိမ်မှူး မေလ ၁၀ ရက်၊ နေ့လည် ၃ နာရီအချိန်လောက်မှာ သေနတ်ပစ်ခတ်ခံရပြီး အုပ်ချုပ်ရေးမှူး သေဆုံးသွားတယ်လို့ သိရပါတယ်။

ပစ်ခတ်ခံရသူတွေဟာ သာယာဝတီကျေးရွာနေ အသက် ၅၃ နှစ်အရွယ် ကျေးရွာအုပ်စု အုပ်ချုပ်ရေးမှူး ဦးကျော်လင်းနဲ့ မြစိမ်းကျေးရွာနေ အသက် ၂၆ နှစ်အရွယ် ဆယ်အိမ်မှူး ကိုမောင်စိုး တို့ဖြစ်ကြပြီး ဦးကျော်လင်း နေအိမ်အတွင်းရှိနေချိန် သေနတ်ကိုင်ဆောင်ထားတဲ့လူတစုက ဆိုင်ကယ်နဲ့ရောက်လာပြီး ပစ်ခတ်ခဲ့တာလို့ ဒေသခံအမျိုးသားတဦးက မြေလတ်အသံကို ပြောပါတယ်။

” သူတို့က စကစတွေနဲ့ပေါင်းနေတာ ကြာပြီဗျ။ အုပ်ကြီးအိမ်ကို မောင်စိုးကအလည်ရောက်နေတာလို့သိရတယ်။ သူတို့ကို စကစတွေကပဲ ရာထူးတွေအပ်ထားတာ။ လာပစ်တာက PDF တွေလို့တော့ ပြောကြတယ်။ ပြီးတော့ စကစတွေကို လိုက်ပို့နေတဲ့ အုပ်ကြီးရဲ့စပီးဘုတ်တစီးကို ဖောက်ခွဲခဲ့သေးတယ်” လို့ ပြောပါတယ်။

ပစ်ခတ်ခံရတာကြောင့် ကျေးရွာအုပ်စုအုပ်ချုပ်ရေးမှူး ဦးကျော်လင်းမှာ နေရာမှာတင် သေဆုံးခဲ့ပြီး ဆယ်အိမ်မှူး မောင်စိုးမှာ ပေါင်ကျည်ထိမှန်ဒဏ်ရာရရှိခဲ့တယ်လို့ သိရပါတယ်။

ဒါ့အပြင် ဦးကျော်လင်း အသတ်ခံရပြီးတဲ့နောက် သာယာဝတီကျေးရွာနဲ့ကပ်လျက်ရှိ စစ်ကောင်စီတပ်စွဲနေတဲ့ ထုံးကြီး(ပျူ)ရွာစခန်းက လက်နက်ကြီး၊ လက်နက်ငယ်တွေနဲ့ ၁၅မိနစ်ခန့်ကြာ ပစ်ခတ်ခဲ့တယ်လို့ ဒေသခံတွေကပြောပါတယ်။

ပစ်ခတ်မှုနဲ့ပတ်သက်လို့ ဒေသတွင်းတော်လှန်ရေးအင်အားစုတွေဘက်က ထုတ်ပြန်တာမျိုးမရှိသေးဘဲ စဉ့်ကူးမြို့နယ်ပကဖခေါင်းဆောင်ကို မြေလတ်အသံက ဖုန်းနဲ့ဆက်သွယ်ခဲ့ရာမှာ တိုက်ပွဲဖြစ်မယ့် အခြေအနေရှိနေတာကြောင့် ဖြေကြားနိုင်ခြင်းမရှိသေးကြောင်း ပြောဆိုပါတယ်။

မေလ ၄ ရက်နေ့ကလည်း စဉ့်ကူးမြို့နယ်နဲ့ သပိတ်ကျင်းမြို့နယ်အစပ် ခုနှစ်တဲစုကျေးရွာအနီးတပ်စွဲထားတဲ့ စစ်ကောင်စီတပ်ကို PDF တွေဘက်က အလစ်အငိုက်ဝင်ရောက်တိုက်ခိုက်ခဲ့သေးတယ်လို့သိရပါတယ်။

စာတည်း-ရင်ငြိမ်း

စဥ့်ကူး၊ ဧပြီ ၂၁၊ ၂၀၂၃။

မန္တလေးတိုင်း၊ စဥ့်ကူးမြို့နယ်ရှိ ကျေးရွာတရွာကနေအိမ် ၂၀၀ ကျော်ကို စစ်ကောင်စီအဖွဲ့က မီးရှို့ဖျက်ဆီးခဲ့ပြီး အမျိုးသမီးတဦးနဲ့ စိတ်ဝေဒနာသည်အမျိုးသားတဦးကိုပါ သေနတ်နဲ့ ပစ်သတ်ခဲ့တယ်လို့ သိရပါတယ်။

အင်အား ၄၀ ဝန်းကျင်ပါ စစ်သားနဲ့ပျူစောထီးတွေက ဧပြီလ ၂၀ ရက် မနေ့ကမနက် ၇ နာရီလောက်မှာ ဘုံသာကုန်းကျေးရွာထဲကို ဝင်ရောက်မွှေနှောက်ကာ ပစ္စည်းတွေကိုယူပြီး ရွာသား အသက် ၆၀ နှစ်အရွယ်စိတ်ဝေဒနာသည် ဦးကျော်တင်အေးကို သေနတ်နဲ့ပစ်သတ်သွားခဲ့တာလို့ စဥ့်ကူး ကင်းထောက်မြေပြင်သတင်းအဖွဲ့က တာဝန်ရှိသူတဦးက ပြောပါတယ်။

အဲ့ဒီနောက် ဘုံသာကုန်းကျေးရွာနဲ့ ၁ မိုင်သာသာဝေတဲ့ ခက်သင်ကျေးရွာကို စစ်ကြောင်းဆက်ထိုးသွားပြီး နေ့လယ် ၂ နာရီလောက်မှာတော့ နေအိမ်တွေကိုမီးရှို့ဖျက်ဆီးပြီး အသက် ၂၀ နှစ်အရွယ် မဆုမြတ်မြတ်ထက်ကိုလည်း သတ်သွားခဲ့ကာ၊ ခက်သင်ရွာသား ၁ ဦးလည်း ခုထိ ပျောက်နေသေးတယ်လို့ ဆိုပါတယ်။

“ရွာကိုမီးရှို့တဲ့အဖွဲ့ထဲမှာ ပျူတွေများတယ်။ ဘာလို့လည်းဆိုတော့ စဥ့်ကူးနယ်၊ မြစ်အရှေ့ဘက်ရွာတွေက ပျူစောထီးတွေအခြေချတဲ့ရွာတွေ များတယ်၊ ခက်သင်ရွာသား တယောက်လည်း ပျောက်နေတယ်။ ရွာသားတွေပြောတာတော့ သတ်လိုက်ပြီတဲ့ ကျနော်တို့လည်း မသိရတော့ အတိအကျပြောလို့မရဘူး”လို့ ဆိုပါတယ်။

ခက်သင်ရွာ မီးရှို့ခံရတာဟာ ခုတကြိမ်က ပထမဆုံးဖြစ်ပြီး၊ အိမ်ခြေ ၇၀၀ ကျော်ရှိတဲ့အနက် နေအိမ် ၂၀၀ ကျော်မီးလောင်ပျက်စီးခဲ့ပါတယ်။

အဲ့ဒီစစ်ကောင်စီတပ်သားတွေဟာ မနေ့ကညနေ ၅ နာရီလောက်မှ စဥ့်ကူးမြို့နယ်၊ ထုံးကြီးရွာဘက်ကို ပြန်လည် ထွက်ခွာသွားခဲ့ပြီး စစ်ကြောင်းထိုးခံခဲ့ရတဲ့ရွာတွေက ဒေသခံတွေကတော့ ကျေးရွာထဲကို ဝင်ရောက်နေထိုင်ခြင်း မရှိသေးဘူးလို့ သိရပါတယ်။

စာတည်း – လင်း

စဥ့်ကူး၊ မတ် ၂၀၊ ၂၀၂၃။

မန္တလေးတိုင်း၊ စဥ့်ကူးမြို့နယ်၊ ရွာသာယာရွာက စစ်တပ်သတင်းပေးလို့လူသိများတဲ့ အမျိုးသမီးတဦး မတ်လ ၁၉ ရက် မနေ့ကနေ့လယ်ပိုင်းမှာ ပစ်ခတ်ရှင်းလင်းခံခဲ့ရပါတယ်။

အသက် ၄၃ နှစ်အရွယ် မယုခိုင်ဟာ စစ်တပ်ကို သတင်းပေးတိုင်ကြားတာတွေ လုပ်တာကြောင့် သူ့နေအိမ်ကနေ ဖမ်းလာပြီး ရွာအနောက်ဘက်ကမ်းရှိ သေနပ်ကျွန်းပေါ်အရောက်မှာ ပစ်ခတ်ရှင်းလင်းခဲ့တာလို့ Bo Tiger-ဗိုလ်ကျားကြီးအဖွဲ့ ခေါင်းဆောင် ဗိုလ်ကျားကြီးက ပြောပါတယ်။

“သူက PDF တွေ ဘယ်မှာရှိတယ်။ ဘယ်နေရာမှာနေတယ်ဆိုတာကို စစ်တပ်ကို ဖုန်းနဲ့သတင်းပေးတာ။ သူ့ရဲ့ဖုန်းစစ်‌ဆေးကြည့်လိုက်တော့လည်း စစ်တပ်နဲ့ဆက်သွယ်ပြီး ပြောဆိုရေးသားထားတာတွေ တွေ့တယ်။ သေချာတာကြောင့် သူ့ကိုနေအိမ်ကနေ ဖမ်းလာပြီး သေနတ်ကျွန်းပေါ်ရောက်မှ သေနတ်နဲ့ ၂ ချက် ပစ်ခတ်ခဲ့တာပါ” လို့ ပြောပါတယ်။

ဒီရှင်းလင်းမှုကို Bo Tiger-ဗိုလ်ကျားကြီးအဖွဲ့နဲ့ ရဲရဲတောက်အဖွဲ့တို့က ပူးပေါင်းလုပ်ဆောင်ခဲ့တာ ဖြစ်ပြီး၊ ဗိုက်နဲ့ နားထင်ကို ၁ ချက်စီပစ်ခတ်ခဲ့တာကြောင့် မယုခိုင်မှာ နေရာတင်ပွဲချင်းပြီး သေဆုံးခဲ့တယ်လို့ ဆိုပါတယ်။

ပြီးခဲ့တဲ့ မတ်လ ၁၇ ရက်ကလည်း မယ်ဇလီချောင်၊ အက်နံ၊ ရွှေခဲပြန်ရွာတွေကို စစ်ကြောင်းထိုးပြီးထွက်လာတဲ့ စစ်အုပ်စုကို ရွှေခဲပြန်ရွာအထွက်မှာ Bo Tiger အဖွဲ့က တိုက်ခိုက်ခဲ့ရာ စစ်သားသေဆုံးမှုတွေ ရှိခဲ့ပါသေးတယ်။

စာတည်း – လင်း

စဥ့်ကူး၊ ဖေဖော်ဝါရီ ၁၅၊ ၂၀၂၃။

မန္တလေးတိုင်းဒေသကြီး၊ စဥ့်ကူးမြို့နယ်၊ ရွာသစ်ကြီးကျေးရွာနဲ့ ငပြင်းအင်းကျေးရွာတွေက အမျိုးသား ၃ ဦး ပစ်သတ်ခံလိုက်ရတယ်လို့ သိရပါတယ်။

ဖေဖော်ဝါရီလ ၁၄ ရက်နေ့ မနက်ပိုင်းတွေမှာ အမျိုးသား ၃ ဦးကို လက်နက်ကိုင်အဖွဲ့တွေက နေအိမ်တွေကနေ ဖမ်းဆီးပြီး လမ်းပိုင်းမှာ ပစ်သတ်လိုက်တာဖြစ်တယ်လို့ ဒေသခံတဦးက ပြောပါတယ်။

“ဟုတ်ပါတယ်။ သူတို့တွေကို နေအိမ်တွေကနေ ဖမ်းသွားပြီး လမ်းမှာပစ်သတ်ခဲ့တာ။ ရွာသစ်ကြီးက အမျိုးသား ၁ ယောက်နဲ့ ငပြင်းအင်းက သားအဖ ၂ ဦးပါ။ ကျနော်တို့ သိရသလောက်တော့ သူတို့က ပုံမှန်ဒေသခံဘဲပေါ့။ ဒါပေမယ့် နောက်ကွယ်မှာ သူတို့ဘာလုပ်တယ်ဆိုတာကတော့ မသိရဘူး” လို့ ပြောပါတယ်။

ယမန်နေ့ မနက် ၉ နာရီခွဲ အချိန်ခန့်က ရွာသစ်ကြီးကျေးရွာနေ ဦးမင်းအောင်၊ ၄၃ နှစ်ဟာ နေအိမ်မှာရှိနေချိန်လက်နက်ကိုင်ဆောင်ထားသူ ၅ ဦးက ဆိုင်ကယ်တွေနဲ့ ရောက်လာပြီး ဦးမင်းအောင်ကို ခေါ်ဆောင်သွားကာ ကျေးရွာရဲ့အရှေ့ဘက်အရောက်မှာ ပစ်ခတ်ခဲ့ရာ ဦးမင်းအောင်မှာ ရင်ဘတ်၊ ပါးတို့မှာ ကျည်ဖောက်ဝင်ဒဏ်ရာတွေရပြီး နေရာမှာဘဲ သေဆုံးသွားတယ်လို့ သိရပါတယ်။

အဲဒီနောက် မနက် ၁၀ နာရီခွဲအချိန်မှာ စဥ့်ကူးမြို့နယ်၊ ငပြင်းအင်းကျေးရွာနေ ဦးမန်း ၅၃ နှစ်နဲ့ သားဖြစ်သူ မောင်မောင်ခင် ၂၅ နှစ် တို့ ၂ ဦးဟာ နေအိမ်မှာရှိနေချိန် သေနတ်သမားတွေ ရောက်လာပြီး ဖမ်းဆီးသွားတာလို့ ဆိုပါတယ်။

သားအဖ ၂ ဦးကိုတော့ ရှောက်ပင်ရိုးကျေးရွာနဲ့ ရွာသစ်ကြီးကျေးရွာကြား ဆည်မြောင်းဘောင်ပေါ်မှာ သေနတ်နဲ့ပစ်ခတ်ခဲ့လို့ ဦးမန်း နောက်စေ့ကျည်ဖောက်ဝင်ဒဏ်ရာ ၁ ချက်၊ မောင်မောင်ခင် နောက်စေ့ကျည်ဖောက်ဝင်ဒဏ်ရာ ၁ ချက်နဲ့ နေရာမှာဘဲ သေဆုံးသွားတယ်လို့ သိရပါတယ်။

အဲဒီပစ်ခတ်မှုတွေကိုတော့ ဘယ်အဖွဲ့က ဘာကြောင့်လုပ်သွားတယ်ဆိုတာ မြေလတ်အသံက စုံစမ်းနေပါတယ်။

ဖေဖော်ဝါရီလ ၁၃ ရက်နေ့ကလည်း မတ္တရာမြို့နယ်၊ လက်ကောင်းကြီးကျေးရွာအုပ်စု၊ ကန်ဖြူကျေးရွာအနီးမှာ စဥ့်ကူးမြို့နယ်၊ လက်ပန်းလှကျေးရွာက လူမှုကူညီရေးအသင်းကား ပစ်ခံရလို့ ယာဥ်မောင်းဒဏ်ရာရကာ ကားပျက်စီးခဲ့သေးတယ်လို့ သိရပါတယ်။