စလင်း

စလင်း ၊ ဇူလိုင် ၄၊ ၂၀၂၅။

မကွေးတိုင်း၊ စလင်းမြို့နယ်၊ ကညှပ်ရွာကို စစ်တပ်ဝင်‌ရောက်စီးနင်းပစ်ခတ်ခဲ့တာမို့ တော်လှန်ရေးတပ်ဖွဲ့ဝင်တဦး ကျဆုံးကာ ဒေသခံတွေလည်း ဖမ်းဆီးခံလိုက်ရတယ်လို့‌ဒေသခံတွေဆီက သိရပါတယ်။

မိုးဝန်းရွာကနေထွက်လာတဲ့ အင်အား ၁၀၀ ပါစစ်ကောင်စီစစ်ကြောင်းက ဇူလိုင် ၄ ရက်၊ ဒီနေ့ မနက် ၈ နာရီခွဲလောက်မှာ ကညှပ်ရွာကိုဝင် ရောက်လာချိန်မှာ ထမင်းစားနေတဲ့ ကျေးရွာပကဖတွေကိုတွေ့ပြီး ဝင်ရောက်ပစ်ခတ်ခဲ့တာလို့ သိရပါတယ်။ ဒီပစ်ခတ်ခံရမှုမှာ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌ရဲဘော်တဦးကျဆုံးခဲ့တယ်လို့ သိရပါတယ်။

အဲဒီနောက် ရွာထဲမှာရှိနေတဲ့ ဒေသခံတွေကိုလည်းဖမ်းဆီးကာ ကျေးရွာကို မီးရှို့ဖျက်ဆီးခဲ့တယ်လို့ သိရပါတယ်။

“မိုးဝန်းရွာကနေ စလင်းမြို့ဘက်ကို အပြန်ပြပြီး ပြန်ဝင်လာတာ။အရင်တခါလည်း အရှို့ခံရပြီးပြီ၊ အခုဟာက ဒုတိယအကြိမ် မီးရှို့ခံရတာ၊ ရဲဘော်တွေလည်း ထမင်းစားတုန်းအဝိုင်းခံလိုက်ရတယ်။ စလင်း ပကဖ ပါ။ရဲဘော်တဦးလည်း ကျတယ်။ဓါးစာခံအဖြစ် လူကြီး၊ လူငယ်နဲ့ ကလေးတွေကို ဖမ်းခေါ်သွားပါတယ်၊ ကညှပ်ရွာက ပြည်သူတွေ ပါသွားတာ၊ လူဦးရေတော့ အတိအကျမသိရသေးဘူး၊ တော်တော်များများတော့ပါသွားတယ်”လို့ စလင်းမြို့ခံ အမျိုးသမီးတဦးက ပြောပါတယ်။

ကညှပ်ရွာဟာ အိမ်ခြေ ၁၂၈ အိမ်၊ အိမ်ထောင်စု ၁၉၅ စု၊ လူဦးရေ ၅၀၂ ဦးရှိပြီး လက်ရှိမှာတရွာလုံးစစ်‌ဘေးရှောင်နေရတယ်လို့ သိရပါတယ်။

လက်ရှိမှာတော့ စစ်ကောင်စီတပ်ဖွဲ့ဝင်တွေက စလင်းမြို့နယ်၊ ပေါင်လောင်ရွာ ပဲဝယ်တဲ့ဂိုဒေါင်မှာ လက်နက်ကြီးဆင်ပြီး အထိုင်ချတပ်စွဲထားသလို နောက်ထပ်စစ်ကား ၃ စီးလည်း သာစည်ရွာမှာ တပ်ဖြန့်ထားတယ်လို့ သိရပါတယ်။

စလင်းမြို့နယ်ထဲကို စစ်တပ်စစ်ကြောင်းတွေ မကြာခဏဝင်မွှေနေပြီး ဂုန်ကုန်းရွာ၊ တပ်ပြင်ရွာ၊ ပေါင်လောင်ရွာ၊ မင်းတဲရွာ၊ ကျက်သကိုင်ရွာ၊ တောတွင်ရွာ၊ သာစည်ရွာ၊ မိုးဝန်းရွာ၊ မြောင်းမကုန်းရွာ၊ သရက်ချဉ်ရွာ၊ သမြင်ကင်းရွာ၊ အုံးတောရွာ၊ ကျီးသိုက်ရွာ၊ ကညှပ်ရွာ၊ နောင်တော်ကြီးရွာ၊ နောင်တော်လေးရွာ၊ ဥယာဉ်စုရွာတို့က ဒေသခံ ၆,၀၀၀ ကျော်လည်း စစ်ဘေးရှောင်နေရတာ ၆ လလောက်ရှိပြီလို့ သိရပါတယ်။

ပြီးခဲ့တဲ့ ဇူလိုင် ၃ ရက်ကလည်း စစ်ကောင်စီတပ်ဖွဲ့အင်အား ၁၀၀ ခန့်ပါ စစ်ကြောင်းက မကွေးတိုင်း၊ စလင်းမြို့နယ်၊ ကျီးသိုက်ရွာနဲ့ သမြင်ကင်းရွာတို့က နေအိမ်တွေကို မီးရှို့သွားခဲ့ပါသေးတယ်။

စာတည်း – မြတ်

စလင်း၊ ဇွန် ၂၉၊ ၂၀၂၅။

မကွေးတိုင်း၊ စလင်းမြို့နယ်၊ ပန်းတိမ်ကုန်းရွာကို စစ်ကောင်စီတပ်ဖွဲ့ဝင်တွေက ဇွန် ၂၉ ရက် နေ့လယ်ပိုင်းမှာဝင်ရောက်ပြီး ရွာကိုမီးရှို့ဖျက်ဆီးနေတယ်လို့ စလင်းမြို့ခံတွေဆီက သိရပါတယ်။

အမြောက်နဲ့သံချပ်ကာကား ၅ စီးအပါ တပ်ဖွဲ့ဝင်အင်အား ၁၀၀ ခန့်ပါစစ်ကြောင်းက အိမ်ခြေ ၂၀၀၊ အိမ်ထောင်စု ၂၀၀ ရှိတဲ့ ပန်းတိမ်ကုန်းရွာကို ဒီညနေပိုင်းအထိ မီးရှို့နေတာကြောင့် ပျက်စီးဆုံးရှုံးမှုမသိရသေးဘူးလို့ ဆိုပါတယ်။

“ပန်းတိမ်ကုန်းရွာထဲဝင်တာက နေ့လယ် ၁၀ နာရီလောက်ကဝင်တာ၊ ကနဦးစရှို့တာက ကောက်ရိုးပုံကို ရှို့တာ၊ လွန်ခဲ့တဲ့ ၁ နာရီလောက်ကတော့ ရွာကိုရှို့နေပါတယ်၊ မီး‌ရှို့ခံရတဲ့ အိမ်ခြေကတော့ အတည်ပြုလို့ မရသေးပါဘူး၊ အခုအချိန်ထိ စစ်တပ်မီးရှို့နေတုန်းပါ၊” လို့ စလင်းမြို့ခံတဦးက ပြောပါတယ်။

ဒါ့အပြင် ဒီညနေပိုင်းမှာပဲ ကြည်တော်စုရွာက အသက် ၁၈ နှစ် အရွယ် စိတ်ကျန်းမာရေးချို့တဲ့သူ ကိုဖိုးထူးကိုပစ်သတ်ခဲ့သေးတယ်လို့ ဆိုပါတယ်။

အဲ့ဒီစစ်ကြောင်းဟာ ဇွန် ၂၈ ရက် မနေ့ကလည်း မြောင်းမကုန်းရွာမှာစခန်းချပြီး ရွာသား ၂ ဦးကိုဖမ်းဆီး ကာ ဒေါ်အောင်ဆန်းစုကြည်ပုံတက်တူးထိုးထားတဲ့နေရာတွေကို ဓါးနဲ့မွန်းပြီး ပြန်လွှတ်ပေးခဲ့တယ်လို့ သူကဆက်ပြောပါတယ်။

“အဲ့ဒီစစ်တပ်က မနေ့ကတဲ့က ဂုံကုန်းရွာဘက်မှာ ကားတွေထားပြီး ဆည်မြောင်းဘောင်လမ်းအတိုင်း တက်လာတာ၊ မနေ့က တောတွင်ရွာထဲဝင်ပြီးတော့ မွှေနှောက်သွားတယ်၊ နောက်တခါ မြောင်းမကုန်းရွာကထွေအုပ်စာရေးအိမ်မှာ စစ်ကြောင်းကစခန်းချပြီးတော့နေတယ်၊ ရွာသား ၂ ဦးကိုလည်း ဖမ်းတယ်၊ သူတို့က ရင်ဘတ်မှာ အမေစုပုံထိုးထားတယ်၊ အဲ့ဒီနေရာကိုလည်း ဓါးနဲ့မွှန်းသွားတယ်”လို့ စလင်းမြို့ခံ အမျိုးသမီးတဦးက ပြောပါတယ်။

ဒါ့အပြင် ဒီမနက်ပိုင်းမှာလည်း မိုးဝန်းရွာကနေ သရက်ချဥ်ရွာကိုသွားချိန်လမ်းမှာတွေ့တဲ့ မိုးဝန်းရွာသား ၅ ဦးကိုဖမ်းဆီးကာ သရက်ချဥ်ရွာအရောက်မှာပြန်လွှတ်ပေးခဲ့ပြီး ပန်းတိမ်းကုန်းရွာဘက်ကိုဆက်လက် စစ်ကြောင်းထိုးလာချိန်မှာလည်း နောက်ထပ်ဒေသခံ ၄ ဦးထပ်မံဖမ်းဆီးခဲ့ကာ လက်ရှိအချိန်ထိ ပြန်မလွှတ်သေးဘူးလို့ ဆိုပါတယ်။

ခုလို စစ်ကြောင်းထိုးမီးရှို့နေတာကြောင့် ဂုံကုန်းရွာ၊ ကျက်သကိုင်ရွာ၊ မင်းတဲရွာ၊ ပေါင်လောင်ရွာ၊ တပ်ပြင်ရွာ၊ သာစည်ရွာ၊ မြောင်းမကုန်းရွာ၊ မိုးဝန်းရွာ၊ သရက်ချဉ်ရွာ၊ ပန်းတိမ်ကုန်း၊ ကျီးသိုက်ရွာ၊ ကညှပ်ရွာ တို့က ဒေသခံ ၅,၀၀၀ ကျော်လည်း ဘေးလွတ်ရာကို ထွက်ပြေးတိမ်းရှောင်နေကြရတယ်လို့ သိရပါတယ်။

စာတည်း – လင်း

စလင်း၊ ဇွန် ၃၊ ၂၀၂၅။

မကွေးတိုင်း၊ စလင်းမြို့နယ်၊ ဆွယ်တည်ရွာသစ်နဲ့ ဆွယ်တည်ရွာမကျေးရွာတွေက စာသင်ကျောင်းတွေ လေယာဥ်နဲ့ဗုံးကြဲတိုက်ခိုက်ခံရပြီး အမျိုးသား ၁ ဦး သေဆုံးကာ အမျိုးသမီး ၁ ဦးထိခိုက်ဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။

ဇွန် ၃ ရက် ဒီကနေ့ နေ့လယ် ၁၁ နာရီ ၃၄ မိနစ်လောက်မှာ ဆွယ်တော်ရွာမ စာသင်ကျောင်းကို ဗုံး ၁ လုံး၊ နေ့လယ် ၁၁ နာရီ ၃၅ မိနစ်မှာ ဆွယ်တည်ရွာသစ်စာသင်ကျောင်းကို ဗုံး ၁ လုံး ကြဲချတိုက်ခိုက်သွားတာဖြစ်ပြီး စာသင်ကျောင်းနဲ့ အနီးနားနေအိမ်တွေပေါ်ကျရောက်ပေါက်ကွဲခဲ့တယ်လို့ ဆိုပါတယ်။

“ စာသင်ကျောင်းတွေမှာ စာသင်ကြားနေတာမရှိပါဘူးရှင့်။ ဆွယ်တည်ရွာသစ်နဲ့ ဆွယ်တည်ရွာမက ကပ်နေတဲ့အတွက် ၁ မိနစ်အတွင်းမှာချတာပါ၊ ပေါင်(ဗုံးအမျိုးအစား)ကတော့ ဘယ်လောက်လည်း မသိဘူး၊ အသံကတော့တော်တော်ပြင်းပါတယ်။ လယ်ထဲကနေ မြက်ရိတ်ပြန်လာတဲ့ ဇနီးမောင်နှံ ၂ ဦးထိပါတယ်၊ အမျိုးသမီးကတော့ မြောင်းထဲက ပေါင်း(ဘောင်) အောက်မှာ ခိုလိုက်တဲ့အတွက် ဒဏ်ရာအနည်းငယ်ရပြီးတော့ အမျိုးသားကတော့ သေဆုံးပါတယ်” လို့ စလင်းမြို့ခံအမျိုးသမီးတဦးက မြေလတ်အသံကို ပြောပါတယ်။

ဗုံးပေါက်ကွဲမှုကြောင့် ဆွယ်တည်ရွာမကျေးရွာနေ အသက် ၃၀ နှစ်ဝန်းကျင်ရှိအမျိုးသားသေဆုံးခဲ့ပြီး ၎င်းရဲ့ဇနီးဖြစ်သူ အမျိုးသမီးမှာ ထိခိုက်ဒဏ်ရာရရှိခဲ့ကာ ဆွယ်တည်ရွာသစ် စာသင်ကျောင်းဆောင်တခုလုံး ပျက်စီးခဲ့တယ်လို့ သိရပါတယ်။

လေကြောင်းတိုက်ခံရမှုကြောင့် အိမ်ခြေ ၁၃၅၊ လူဦးရေ ၆၀၀ ကျော်ရှိ ဆွယ်တည်ရွာမ နဲ့ အိမ်ခြေ ၆၀၊ လူဦးရေ ၂၅၀ ရှိ ဆွယ်တည်ရွာသစ်က ဒေသခံတွေဟာ ဘေးလွတ်ရာကိုတိမ်းရှောင်နေကြတယ်လို့ သိရပါတယ်။

စာတည်း – ဟိန်းစံ