စစ်တပ်သတင်းပေး

မလှိုင်၊ ဒီဇင်ဘာ ၂၈၊ ၂၀၂၅။

မန္တလေးတိုင်း၊ မလှိုင်မြို့နယ်၊ ဆည်တိုကျေးရွာအုပ်စု၊ ညောင်ကုန်းကျေးရွာမှာ စစ်ကော်မရှင် သတင်းပေးဆိုသူ ၂ ဦးကို ပစ်ခတ်ခဲ့တယ်လို့ မလှိုင်မြို့နယ်ပကဖ တာဝန်ရှိသူတွေဆီက သိရပါတယ်။

ပစ်ခတ်ခံရသူတွေဟာ ညောင်ကုန်းကျေးရွာနေ အသက် ၆၀ အရွယ် ဦးမော်နဲ့ အသက် ၅၀ အရွယ် ကိုမောင်မောင်ကြီး (ခ) ငသက်တို့ကို ဒီဇင်ဘာ ၂၇ ရက်မနက် ၆ နာရီခန့်မှာ ကျေးရွာချင်းဆက်လမ်းပေါ်မှာ ပစ်ခတ်ခဲ့တာလို့ ဆိုပါတယ်။

“သူတို့အိမ်ထဲမှာ ဝင်ဆွဲတယ်။ ရွာအပြင်ဘက် ညောင်ကုန်းနဲ့ရွာသစ်ကြားမှာ ပစ်ခတ်ခဲ့တာ။ သေနတ်နဲ့ပစ်ခဲ့တာ။ ၄ ချက် ၁ ယောက် ၂ ချက်စီပစ်ခဲ့တာ။”လို့ မလှိုင်မြို့နယ်ပကဖ တာဝန်ရှိသူတဦးက ပြောပါတယ်။

ပစ်ခတ်ခံရသူ ၂ ဦးကနေရာမှာတင်သေဆုံးသွားပြီး စစ်ကော်မရှင်ဘက်က လာကောက်တာမျိုး၊ လာစစ်ဆေးတာမျိုးမရှိတာကြောင့် မိသားစုဝင်တွေက အလောင်းကိုကောက်ယူပြီး သင်္ဂြိုဟ်ခဲ့ရတယ်လို့ ဆိုပါတယ်။

ဦးမော်နဲ့ ကိုမောင်မောင်ကြီး (ခ) ငသက်တို့ ၂ ဦးဟာ စစ်ကော်မရှင်တပ်ဆီ သတင်းပေးတာ၊ စစ်ကြောင်းထိုးဖို့ လမ်းပြလုပ်ဆောင်ပေးတာတွေကြောင့်ပစ်ခတ်ခဲ့တာလို့ သိရပါတယ်။

ဒီဇင်ဘာ ၁၉ ရက်ကလည်း မလှိုင်မြို့နယ်၊ လယ်ကြီး၊ မျက်သီးကျင်း၊ ရုံးတောကျေးရွာတွေမှာ ၁ ရက်တည်း အုပ်ချုပ်ရေးမှူးအပါအဝင် ၆ ဦးကို မလှိုင်ပကဖအဖွဲ့ဝင်တွေက ပစ်သတ်ခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ စက်တင်ဘာ ၇၊ ၂၀၂၅။

ပဲခူးတိုင်း၊ သာယာဝတီခရိုင်၊ အုတ်ဖိုမြို့နယ်က စစ်ကော်မရှင်တပ်ကိုသတင်းပေးနေတဲ့ အမျိုးသား ၁ ဦးကို ပစ်ခတ်ရာ သေဆုံးခဲ့တယ်လို့ သာယာဝတီခရိုင်တပ်ရင်းအမှတ် ၃၈ဝ၂၊ တပ်ခွဲ ၆ က စက်တင်ဘာ ၇ ရက် ဒီနေ့မှာထုတ်ပြန်ပါတယ်။

သေဆုံးသူဟာ ဖလန်ပင်ကျေးရွာမှာနေထိုင်တဲ့ အသက် ၅၇ နှစ်အရွယ် ဦးမြင့်ရွှေဖြစ်ပြီး စက်တင်ဘာ ၅ ရက် ည ၆ နာရီကျော်မှာ ပစ်ခတ်ခဲ့တာလို့ ဆိုပါတယ်။

“လင်မယား ၂ ယောက်နဲ့ မြေး ၂ ယောက်က အိမ်ထဲမှာရှိနေလို့ မြင့်ရွှေ ကို အိမ်အပြင်ခေါ်ထုတ် ရှင်းလင်း လိုက်ပါတယ်။ သူက ရွာကလူငယ် ၂ ယောက်ကို မှတ်ပုံတင်လုပ်ပေးမယ်လို့ လိမ်ခေါ်သွားပြီး **တပ်ထဲ ထည့်လိုက်တာ။ နောက်ပြီး ဘယ်အဖွဲ့တွေလာလာ ဂရုမစိုက်ဘူးဆိုပြီး စိန်ခေါ်တယ်” လို့ သာယာဝတီခရိုင်တပ်ရင်းအမှတ် ၃၈ဝ၂၊ တပ်ခွဲ ၆ မှ တာဝန်ရှိသူတဦးက ပြောပါတယ်။

ဦးမြင့်ရွှေဟာ တော်လှန်ရေးတပ်ဖွဲ့ဝင်တွေရဲ့ သွားလာလှုပ်ရှားမှုတွေကို စစ်ကော်မရှင်တပ်ထံ သတင်းပေးတာ၊ ဘယ်တော်လှန်ရေးအဖွဲ့လာလာ ဂရုမစိုက်ဘူးဟုဆိုပြီး စိန်ခေါ်တာ၊ လူငယ်တွေကို စစ်တပ်ထဲကိုလိမ်လည်ထည့်ကာ ရောင်းစားတာတွေကို လုပ်ဆောင်နေသူဖြစ်တာကြောင့် အခုလိုအရေးယူလိုက်ရတာလို့ အထက်ပါတာဝန်ရှိသူက ဆိုပါတယ်။

ပြီးခဲ့တဲ့သြဂုတ် ၂၇ ရက်ကလည်း အုတ်ဖို မြို့နယ်၊ စဉ့်ကူးကျေးရွာမှ စစ်ကော်မရှင်တပ်ဆီ သတင်းပေးလုပ်နေသူ မျိုးမင်းသူ ဆိုသူကို သာယာဝတီခရိုင် တပ်ရင်း ၃၈၀၂၊ တပ်ခွဲ ၅ က ပစ်ခတ်ရှင်းလင်းပြီး ၎င်းထံမှ ဆိုင်ကယ် ၁ စီး သိမ်းဆည်းရရှိခဲ့တယ်လို့ သိရပါတယ်။

စာတည်း – လင်း

ကြို့ပင်ကောက်၊ ဇွန် ၂၂၊ ၂၀၂၅။

ပဲခူးတိုင်း၊ ကြို့ပင်ကောက်မြို့နယ်၊ မှန်ပင်ထူးကျေးရွာမှာ စစ်တပ်သတင်းပေးဆိုသူ အမျိုးသားတဦး အသတ်ခံရတယ်လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၆ Black Dragon (GBK-PDF) က ဇွန် ၂၂ ရက်မှာ သတင်းထုတ်ပြန်ပါတယ်။

အသတ်ခံရသူဟာ မှန်ပင်ထူးကျေးရွာနေ အသက် ၅၀ ကျော်အရွယ် ကိုမိုးဆိုသူဖြစ်ပြီး ဇွန် ၂၀ ရက် ညနေ ၄ နာရီခန့်မှာ GBK-PDF တပ်ဖွဲ့ဝင်တွေကသတ်ခဲ့တာလို့ ဆိုပါတယ်။

“အိမ်မှာ မရှင်းဘူး။ ဖမ်းခေါ်ပြီးမှ ရွာလမ်းမှာ ရှင်းလိုက်တာ။ သူကို ဒီအတိုင်းဖမ်းခေါ်လာပြီး ဓားနဲ့ပဲ ရှင်းလိုက်တာ။ “လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၆ Black Dragon (GBK-PDF) တပ်ခွဲမှူးရိုးမနဂါးက ပြောပါတယ်။

ကိုမိုးဟာ တော်လှန်ရေးတပ်ဖွဲ့ဝင်တွေရဲ့ သွားလာလှုပ်ရှားမှုတွေကို ဖုန်းနဲ့မှတ်တမ်းရိုက်ယူကာ ကြို့ပင်ကောက်မြို့ပေါ်ရှိ စစ်ကောင်စီတပ်ဖွဲ့ဝင်တွေဆီသတင်းပေးပို့တာ၊ ဒေသခံလူငယ်တွေကို PDF ဆိုပြီး သတင်းပေးဖုန်းဆက်တိုင်ကြားတာ၊ စစ်ကောင်စီတပ်ဖွဲ့ဝင်တွေနဲ့ ပူးပေါင်းပြီး ခြိမ်းခြောက်တာတွေလုပ်ဆောင်နေတာကို ဒေသခံတွေကတိုင်ကြားလာတဲ့အတွက် စိစစ်အတည်ပြုကာ အရေးယူခဲ့တာလို့ ဆိုပါတယ်။

အသတ်ခံရပြီးနောက် အဲ့ဒီနေ့မှာပဲ စစ်ကောင်စီတပ်ဖွဲ့ဝင်တွေက အလောင်းကိုလာကောက်သွားတယ်လို့ သိရပါတယ်။

ပြီးခဲ့တဲ့ မတ် ၈ ရက်ကလည်း ကြို့ပင်ကောက်မြို့နယ်၊ ရွှေပန်းတောကျေးရွာနေ စစ်ကောင်စီသတင်းပေး ပျူစောထီးဆိုသူ ကိုမြင့်လွင်ကို ပစ်ခတ်ရာသေဆုံးခဲ့သေးတယ်လို့ (GBK-PDF) ဆီက သိရပါတယ်။

စာတည်း – လင်း

နတ်တလင်း၊ မေ ၉၊ ၂၀၂၅။

ပဲခူးတိုင်းအနောက်ခြမ်း၊ နတ်တလင်းမြို့နယ်မှာ စစ်ကောင်စီတပ်သတင်းပေးဆိုသူ အမျိုးသား ၁ ဦး သေနတ်ပစ်ခံရပြီးသေဆုံးသွားတယ်လို့ ဒေသခံကာ ကွယ်ရေးအဖွဲ့တွေထံက သိရပါတယ်။

သေဆုံးသူဟာ ကျွန်းလေးပင်ကျေးရွာနေထိုင်သူ အသက် ၄၅ နှစ်ဝန်းကျင် ကိုစောလှိုင် ဖြစ်ပြီး မေ ၈ ရက် ယမန်နေ့မွန်းတည့် ၁၂ နာရီခန့်မှာ သူ့ရဲ့နေအိမ်မှာပဲ သေနတ်နဲ့ပစ်ခတ်ခံရပြီး သေဆုံးသွားတာလို့ ဆိုပါတယ်။

“ သူက စစ်**တွေနဲ့ကင်းပတ်တယ်။ စစ်မှုထမ်းကြေး ရွာသူရွာသားတွေဆီက အဓမ္မလိုက်ကောက်ပေးတယ်။ ပြည်သူကို အာဏာပါဝါအရမ်းပြနေတာ။” လို့ နတ်စစ်သည်တပ်ဖွဲ့မှူး ကိုအောင်က ပြောပါတယ်။

သေနတ်နဲ့ ၄ ချက်ပစ်ခံရတာကြောင့် ကိုစောလှိုင်ဟာ နေရာမှာပဲသေဆုံးသွားပြီး ယမန်နေ့ ညနေပိုင်းမှာ ၎င်းရဲ့အလောင်းကို နတ်တလင်းဘက်ကလာတဲ့ လူနာတင်ကားနဲ့ သယ်ဆောင်သွားတယ်လို့ သိရပါတယ်။

ကိုစောလှိုင်ဟာ ရွာမှာမနေဘဲ စစ်ကောင်စီတပ်ဖွဲ့နဲ့အတူ သွားလာလှုပ်ရှားနေသူဖြစ်ပြီး ယမန်နေ့ကမှ ကျွန်းလေးပင်ရွာကိုရောက်ရှိနေကြောင်း သတင်းရတာကြောင့် နတ်စစ်သည်တပ်ဖွဲ့နဲ့ Burma Revolution Army – BRA တပ်ဖွဲ့တို့ ပူးပေါင်းလုပ်ဆောင်ခဲ့တာဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။

မေ ၄ ရက်မွန်းလွဲ ၂ နာရီလောက်မှာလည်း မင်းလှမြို့နယ်၊ ဘန့်ဘွေးကုန်းရွာနေ ပျူစောထီးဆိုသူ အသက် ၅၀ ဝန်းကျင် ဒေါ်ယူပီနဲ့ ၎င်းရဲနောက်လိုက် ကိုမြဇော်ဦးတို့ကို သာယာဝတီခရိုင် တပ်ရင်း ၃၈၀၂၊ တပ်ခွဲ ၅ က သေနတ်နဲ့ပစ်ခတ်ရာက သေဆုံးခဲ့တယ်လို့ သိရပါတယ်။

သတင်း – မောင်ဆွေအင်း၊ စာတည်း ဟိန်းစံ

မန္တလေး၊ ဇွန် ၆၊ ၂၀၂၃။

မန္တလေးတိုင်း၊ မြင်းခြံခရိုင်၊ တောင်သာမြို့နယ်၊ ဇဂျမ်းတိုက်နယ်၊ အင်ကျင်းသာရွာမှာ နေထိုင်တဲ့ စစ်ထောက်လှမ်းရေး စစ်မှုထမ်းဟောင်းတဦး ဇွန်လ ၅ ရက် မနေ့ကနေ့လယ်ပိုင်းမှာ ပစ်ခတ်ရှင်းလင်းခံခဲ့ရပါတယ်။

ပစ်ခတ်ရှင်းလင်းခံရသူဟာ အသက် ၅၀ ကျော်အရွယ် ဦးလှမိုးဖြစ်ပြီး သူဟာ ကာကွယ်ရေးတပ်တွေရဲ့ အခြေအနေတွေကို စောင့်ကြည့်ပြီး စစ်ကောင်စီထံ သတင်းပေးတာတွေလုပ်နေတာကြောင့် သူ့ရဲ့နေအိမ်မှာတင် ပစ်ခတ်ရှင်းလင်းခဲ့တာလို့ မြင်းခြံခရိုင်၊ တပ်ရင်း အမှတ် ၃ တာဝန်ခံက ပြောပါတယ်။

စစ်ကောင်စီက သူ့ကို လက်နက်တပ်ဆင်ပေးထားတာဖြစ်ပြီး ရှင်းလင်းပြီးနောက် ကာဘိုင်သေနတ်တလက် သိမ်းယူခဲ့တယ်လို့ ဆိုပါတယ်။

“လှမိုးကို သူ့ရဲ့နေအိမ်ထဲမှာ သေနတ်အတိုနဲ့ ၁ ချက်ပစ်ခဲ့ပါတယ်။ သူ့ဆီက ကာဘိုင် M1 ၁ လက်သိမ်းဆည်းယူခဲ့တယ်” လို့ အတည်ပြု ပြောဆိုပါတယ်။

ဒီပစ်ခတ်မှုကို မြင်းခြံခရိုင်တပ်ရင်းအမှတ် ၃၊ တပ်ခွဲ ၃၊ Burmese Guerrilla Force-BGFအဖွဲ့ နဲ့ Scorpions People Defense Force တို့က ပူးပေါင်းလုပ်ဆောင်ခဲ့တာဖြစ်ပြီး ပစ်ခတ်ခံရတဲ့ ဦးလှမိုးဟာ နေရာတင် ပွဲချင်းပြီးသေဆုံးခဲ့တယ်လို့ ဆိုပါတယ်။

စာတည်း – လင်း

မကွေး၊ မေ ၂၉၊ ၂၀၂၃။

မကွေးတိုင်း၊ ရေနံချောင်းမြို့နယ်၊ မန်းကျည်းရိုးရွာက စစ်တပ်သတင်းပေး အမျိုးသားတဦး မေလ ၂၈ ရက် မနေ့ညပိုင်းမှာ သေနတ်နဲ့ပစ်ခံရပြီး သေဆုံးခဲ့ပါတယ်။

အသက် ၄၅ နှစ်အရွယ် ကိုစိန်ဦးဟာ စစ်ကောင်စီနဲ့ ပူးပေါင်းကာ သတင်းပေးတာတွေလုပ်သလို “PDF တွေကို အသေမလိုချင်ဘူး၊ အရှင်ဖမ်းမယ်” ဆိုပြီးလည်း ကြွေးကြော်ထားသူဖြစ်တဲ့အတွက် သူ့ကို မနေ့ည ၁၁ နာရီလောက်မှာ ပစ်ခတ်ရှင်းလင်းခဲ့တာလို့ မကွေးခရိုင် အမှတ် – ၂ တပ်ရင်း၊ တပ်ခွဲ ၁ People’s Defence Force Yenangyaung တာဝန်ရှိသူက ပြောပါတယ်။

“အဓိကကတော့ ရွာထဲမှာ လူစွာပေါ့ဗျာ။ စစ်တပ်နဲ့ပေါင်းပြီး ရေနံထုတ်တယ် ရေနံခိုးတယ်၊ ပျူတပိုင်း ဖြစ်နေတာပေါ့။ သူ့အိမ်ထဲဝင်ပြီး ရှင်းခဲ့တာ၊ ကျန်တဲ့ ၂ ယောက်က လွတ်သွားတယ်၊ နားထင်တည့်တည့်ကို ပစ်ခဲ့တာ” လို့ အတည်ပြု ပြောပါတယ်။

ကိုစိန်ဦးကို ပစ်ခတ်ချိန်မှာ သူနဲ့အတူရှိနေတဲ့ နောက်ထပ် စစ်တပ်သတင်းလို့ယူဆရသူ အမျိုးသား ၂ ဦးကတော့ ထွက်ပြေးလွတ်မြောက်သွားခဲ့တယ်လို့ ဆိုပါတယ်။

ပစ်ခတ်မှုကြောင့် ကိုစိန်ဌေးမှာ နေရာတင်ပွဲချင်းပြီး သေဆုံးခဲ့ပြီး အလောင်းကိုတော့ စစ်ကောင်စီတပ်သားတွေက လူနာတင်ကားနဲ့သယ်ကာ ရေနံချောင်းမြို့ပေါ်မှာပဲ သင်္ဂြိုဟ်ပေးခဲ့ကြတယ်လို့ သိရပါတယ်။

ပြီးခဲ့တဲ့ မေလ ၇ ရက်ကလည်း ရေနံချောင်းမြို့နယ်၊ ကုက္ကိုခွအုပ်စု၊ မုန်ကန်ကျေးရွာမှာ နေထိုင်တဲ့ စစ်ကောင်စီခန့်အုပ်ချုပ်ရေးမှူး ဦးခင်မောင်ရွှေနဲ့ ပျူစောထီးအဖွဲ့ဝင် ဦးခင်မောင်မြင့်တို့ကို မုန်ကန်ရွာအုပ်ချုပ်ရေးမှူးနေအိမ်မှာ မကွေးခရိုင် အမှတ် – ၂ တပ်ရင်း၊ တပ်ခွဲ ၁ People’s Defence Force Yenangyaung အဖွဲ့က ပစ်ခတ်ရှင်းလင်းခဲ့ရာ ၂ ဦးစလုံး သေဆုံးခဲ့တယ်လို့ သိရပါတယ်။

စာတည်း – လင်း

ပဲခူး၊ မေ ၁၆၊ ၂၀၂၃။

ပဲခူးတိုင်းဒေသကြီး၊ ရေတာရှည်မြို့နယ်၊ စည်ပိုင်းအုပ်စု၊ ရှမ်းစုရွာနေ စစ်တပ်သတင်ပေးဆိုသူ ပြည်သူ့စစ်ခေါင်းဆောင် အမျိုးသားတဦး ပစ်သတ်ခံရတယ်လို့ သိရပါတယ်။

မေလ ၁၅ ရက် မနေ့က ရှမ်းစုကျေးရွာ ပြည်သူစစ်ခေါင်းဆောင် အသက် ၄၀ နှစ်အရွယ် ဦးကျော်ဆွေဦး ကို နေအိမ်ကနေဖမ်းဆီးပြီး လမ်းတနေရာမှာ ရှင်းလင်းခဲ့တာလို့ ရေတာရှည် ပကဖ တာဝန်ရှိသူက ပြောပါတယ်။

“သူက ရှမ်းစု ပြည်သူဌာနေခေါင်းဆောင်။ စကစ လမ်းပြ။ ရွာထဲမှာဆိုလည်း ဟိုခြိမ်းခြောက် ဒီခြိမ်းခြောက် လုပ်နေတာဆိုတော့ သူ့ကို ထိုက်သင့်တဲ့အပြစ်ဒဏ် ပေးလိုက်တာဖြစ်တယ်။ တပ်ဖွဲ့ကနေပြီး သူ့ကိုစီရင်ချက် ချမှတ်လိုက်တာဖြစ်တယ်” လို့ ပြောပါတယ်။

သေနတ်နဲ့ပစ်သတ်ခံရလို့ ဦးကျော်ဆွေဦးမှာ ဦးခေါင်းထိမှန်ဒဏ်ရာနဲ့ ရှမ်းရွာလေးတံတားပေါ်မှာ သေဆုံးခဲ့ကာ အလောင်းကိုတော့ ဒေသခံတွေကကောက်ယူပြီး ရေတာရှည်ဆေးရုံကို ပို့ထားခဲ့ရတယ်လို့ သိရပါတယ်။

မေလ ၁၄ ရက်နေ့ကလည်း ရေတာရှည်မြို့နယ်၊ မိကျောင်းအိုင်ကျေးရွာအုပ်စု၊ ကျောက်ပုံကျေးရွာနေ စစ်ကောင်စီသတင်းပေးဆိုသူ မောင်အေးစိုးမင်းကို ဖမ်းဆီးပြီး ကျေးရွာတနေရာမှာ ပစ်ခတ်ရှင်းလင်းခဲ့သေးတယ်လို့ သိရပါတယ်။

စာတည်း – လင်း

ရေတာရှည်၊ မေ ၂၊ ၂၀၂၃။

ပဲခူးတိုင်းဒေသကြီး၊ ရေတာရှည်မြို့နယ်၊ ဆွာမကြီးကျေးရွာက စစ်တပ်သတင်းပေး အမျိုးသားတဦး မေလ ၁ ရက်မနက် ၉ နာရီလောက်မှာ ပစ်ခတ်ရှင်းလင်းခံခဲ့ရပါတယ်။

ကူးတို့လုပ်ငန်းလုပ်ကိုင်သူ အသက် ၆၀ နှစ်အရွယ် ဦးကောက်ဆိုသူကို သူနေထိုင်တဲ့ မြစ်ဆိပ်နေအိမ်မှာ ပစ်ခတ်ရှင်းလင်းခဲ့တာလို့ ရေတာရှည်မြို့နယ် ပကဖ တာဝန်ရှိသူ တဦးက ပြောပါတယ်။

“စကစတွေ ဝင်လာရင် သူ့ကူးတို့ကနေ ကူးခိုင်းပြီ PDF တွေရှိတဲ့နေရာကို လမ်းပြပေးတာအပြင် ကျေးရွာအတော်များများရဲ့ PDF ထောက်ခံသူတွေကို သတင်းပေးနေသူ ဖြစ်တယ်။ ပြီးတော့ သူက စကစနဲ့ပေါင်းပြီး တနယ်လုံးကို ဒုက္ခပေးနေတဲ့ ဒလန်အကြီးစားဖြစ်လို့ ရှင်းလိုက်တာ” လို့ ပြောပါတယ်။

သေနတ်နဲ့ပစ်ခတ်ရှင်းလင်းခံရတဲ့အတွက် ဦးကောက်မှာ ဦးခေါင်းကျည်ထိဒဏ်ရာနဲ့နေရာမှာပဲ သေဆုံးသွားပြီးနောက် စစ်ကောင်စီတပ်သားတွေ လာရောက်စစ်ဆေးကာ အလောင်းကိုတော့ နေပြည်တော် ကုတင် ၁၀၀၀ ဆေးရုံကို ယူသွားတယ်လို့ ဆိုပါတယ်။

စစ်တပ်ဝါဒဖြန့် တယ်လီဂရမ်ချန်နယ်တွေမှာတော့ ဦးကောက်ဟာ NLD ပါတီထောက်ခံသူဖြစ်ပြီး ထောက်ပံ့ကြေးမပေးနိုင်လို့ လာရောက်သတ်ဖြတ်သွားတာဖြစ်တယ်လို့ ဖော်ပြနေကြပါတယ်။

မတ်လ ၂၈ ရက်ကလည်း ရေတာရှည်မြို့နယ်၊ ကျွဲရိုင်းပြင်ကျေးရွာအုပ်စု၊ ကရင်ချောင်းရွာနေ စစ်ကောင်စီသတင်းပေး အသက် ၂၈ နှစ်အရွယ် ကိုလွင်မင်းဦးကို People Defence force – Yedeshe က ပစ်ခတ်ရှင်းလင်းခဲ့သေးတယ်လို့ သိရပါတယ်။

စာတည်း – လင်း

ပဲခူး၊ မတ် ၃၁၊ ၂၀၂၃။

ပဲခူးတိုင်းအရှေ့ခြမ်း၊ တောင်ငူမြို့နယ်က စစ်တပ်သတင်းပေးဆိုသူ ၃ ဦးကို အခုမတ်လအတွင်းမှာ ရှင်းလင်းခဲ့တယ်လို့ ပြည်သူ့ကာကွယ်ရေးတပ်ဖွဲ့ (ရေတာရှည်)က သတင်းထုတ်ပြန်ထားပါတယ်။

တောင်ငူမြို့နယ်၊ ကျီးအင်းကျေးရွာက အသက် ၃၈ နှစ်အရွယ် ကိုနိုင်လင်းစိုး၊ ၄၁ နှစ်အရွယ် ကိုအောင်ကျော်ဇောနဲ့ ၃၅ နှစ်အရွယ် ကိုဖြိုးတို့ကို စစ်တပ်နဲ့ ပတ်သက်ဆက်နွယ်ပြီး သတင်းပေးတယ်ဆိုတာ ပြစ်မှုထင်ရှားတဲ့အတွက် ခုလို ရှင်းလင်းခဲ့တာလို့ ပြည်သူ့ကာကွယ်ရေးတပ်ဖွဲ့ (ရေတာရှည်)ရဲ့တာဝန်ရှိသူက ပြောပါတယ်။

“ကျနော်တို့ ပျူစောထီးအယောက် ၃၀ လောက် ခေါ်စစ်တာမျိုးရှိတယ်။ ၂၀ ကျော်ကို ပြန်လွှတ်ပေးတယ်။ ခံဝန်ကတိ ထိုးခိုင်းတယ်။ အေးဆေးနေရင် ဘာမှပြဿနာမရှိဘူး။ အခုကောင်တွေက ပြစ်မှုထင်ရှားလို့ပါ” လို့ ပြောပါတယ်။

သူတို့ ၃ ဦးကို မတ်လ ၂၉ ရက်ညနေ ၆ နာရီလောက်က ကျီးအင်းရွာထိပ်မှာ ဖမ်းဆီးခဲ့ပြီး၊ မတ်လ ၃၀ ရက်မနေ့ကမနက် ၅ နာရီလောက်မှာ ရှင်းလင်းခဲ့တာလို့ ဆိုပါတယ်။

သူတို့ ၃ ဦးဟာ တော်လှန်ရေးရဲဘော်တွေရဲ့ စစ်မြေပြင်လှုပ်ရှားမှုနဲ့ပတ်သက်ပြီး စစ်တပ်ကိုသတင်းပေးတာ၊ လမ်းပြနဲ့ရိက္ခာထောက်ပို့လုပ်တာ၊ သစ်စက်တွေကနေ ရဲကို ဆက်ကြေးတောင်းပေးတာအပြင် PDF နဲ့ဆက်သွယ်ပါက အရေးယူခံရမယ်လို့ခြိမ်းခြောက်တာတွေအပြင် လောင်းကစားဝိုင်းထောင်တာ၊ ပရဟိတအမည်ခံကာ ပြည်သူ့ငွေတွေကို အလွဲသုံးစားလုပ်တာတွေကိုလည်း စစ်ဆေးတွေ့ရှိရတယ်လို့ ထုတ်ပြန်ချက်မှာ ဖော်ပြထားပါတယ်။

ဒါ့အပြင် ပျူစောထီးသင်တန်းဆင်းစာရင်းကိုလည်း ပြုစုထားကာ စစ်ဆေးမှုတွေနဲ့ ပတ်သက်တဲ့ မှတ်တမ်းတွေအပြင် အသံဖိုင်တွေကိုလည်း ပြုစုထားတယ်လို့ ပြည်သူ့ကာကွယ်ရေးတပ်ဖွဲ့(ရေတာရှည်)ရဲ့တာဝန်ရှိသူက ပြောပါတယ်။

ရေတာရှည်ပြည်သူ့ကာကွယ်ရေးအဖွဲ့ဟာ ပြီးခဲ့တဲ့မတ်လ ၂၈ ရက်ကလည်း တောင်ငူခရိုင်၊ ရေတာရှည်မြို့နယ်၊ ကျွဲရိုင်းပြင်အုပ်စု၊ ကရင်ချောင်ရွာက စစ်တပ်သတင်းပေးဆိုသူ ကိုမင်းလွင်ဦးကိုလည်း ရှင်းလင်းခဲ့ပါသေးတယ်။

စာတည်း – လင်း

ပဲခူး၊ မတ် ၃၀၊ ၂၀၂၃။

ပဲခူးတိုင်း၊ ရေတာရှည်မြို့နယ်က စစ်တပ်သတင်းပေးသူ တဦးကို ရှင်းလင်းခဲ့တယ်လို့ People Defence Force – Yedesheက သတင်းထုတ်ပြန်ထားပါတယ်။

ရေတာရှည်မြို့နယ်၊ ကျွဲရိုင်းပြင်အုပ်စု၊ ကရင်ချောင်ရွာက အသက် ၂၈ နှစ်အရွယ် ကိုလွင်မင်းဦး ဖြစ်ကာ စစ်ဆေးမေးမြန်းအပြီး မတ်လ ၂၈ ရက်နေ့လယ်က ရှင်းလင်းခဲ့တာလို့ ဆိုပါတယ်။

“မင်းလွင်ဦးကို စစ်ဆေးပေါ်ပေါက်လို့ ရှင်းလင်းခဲ့တာပါ။ သူနဲ့အတူ ဖမ်းဆီးခဲ့တဲ့ ကရင်ချောင်းရွာသား ၂ ဦးကိုတော့ အမှုပေါ်ပေါက်မှု မရှိတာရယ် သတင်းပေးအလုပ် ဆက်မလုပ်တဲ့အပြင် ရွာသားတွေရဲ့အာမခံမှုနဲ့ ခံဝန်ထိုးပြီး ပြန်လွှတ်ပေးခဲ့ပါတယ်” လို့ People Defence Force-Yedeshe အဖွဲ့က ပြောပါတယ်။

ကိုမင်းလွင်ဦးနဲ့အတူ ကရင်ချောင်းရွာသား အခြား၂ ဦးကို သူတို့ရွာရဲ့မြောက်ဘက်အထွက်မှာ မတ်လ ၂၇ ရက်ညနေ ၅ နာရီကျော်လောက်က ဖမ်းဆီးခဲ့တာလို့ ဆိုပါတယ်။

အကြိမ်ကြိမ်သတိပေးမှုတွေရှိခဲ့ပေမယ့် လိုက်နာမှုမရှိတဲ့အပြင် မကွေးတိုင်းအတွင်းက PDF တဖွဲ့ လက်နက်သယ်တာကို သတင်းပေးခဲ့သလို တောင်ငူမြို့နယ် စစ်တောင်းမြစ်တလျောက်က ကျေးအင်းရွာ၊ ထုံးဘိုရွာ၊ ကရင်ချောင်းရွာ၊ ကျွဲရိုင်းပြင်ရွာတွေကို စစ်တပ်က စစ်ကြောင်းထိုးရာမှာ လမ်းပြလုပ်ဆောင်ခဲ့တာတွေကိုလည်း စစ်ဆေးပေါ်ပေါက်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ပြီးခဲ့တဲ့ မတ်လ ၅ ရက်မနက်အစောပိုင်းက ရေတာရှည်မြို့နယ် ကျောက်အိုးရွာက PDF ထောက်ပံ့တဲ့မိသားစုကို တရွာတည်းနေ အသက် ၄၆ နှစ်အရွယ် ဦးကြည်နိုင်နဲ့ အသက် ၄၉ နှစ်အရွယ် ဦးမောင်နိုင်တို့ ၂ ဦးက နေအိမ်အတွင်း ဝင်ရောက်ကာ သေနတ်ပစ်ခတ်ခဲ့မှု စစ်ဆေးပေါ်ပေါက်တဲ့အတွက် မတ်လ ၂၄ ရက်က ရှင်းလင်းခဲ့ပါသေးတယ်။

စာတည်း – 007