စစ်ကော်မရှင်တပ်ဖွဲ့

မြေလတ်အသံ၊ ဒီဇင်ဘာ ၁၅၊ ၂၀၂၅။

စစ်ကိုင်းတိုင်း၊ မော်လိုက်မြို့နဲ့ မင်းကွန်းတိုက်နယ်တို့မှာ ထိုးစစ်ဆင်လာတဲ့ စစ်ကော်မရှင်တပ်ဖွဲ့ဝင်တွေကို တိုက်ခိုက်ခဲ့တာကြောင့် စစ်သား ၆ ဦးသေဆုံးပြီး လက်နက်ခဲယမ်းတွေသိမ်းဆည်းနိုင်ခဲ့တယ်လို့ တော်လှန်ရေးတပ်ဖွဲ့တွေဆီက သိရပါတယ်။

ဒီဇင်ဘာ ၁၄ ရက်မနက် ၁၁ နာရီကျော်မှာ မော်လိုက်မြို့နယ်၊ ဆွတ်နန်းရွာနဲ့ မီတာ ၈၀၀ ဝေးတဲ့ ရန်ကင်းတောင်မှာ ၁ နာရီကြာ တိုက်ပွဲဖြစ်ပွားခဲ့ရာ တိုက်ပွဲအတွင်းစစ်သား ၆ ဦးသေဆုံးခဲ့တာလို့ ဆိုပါတယ်။

“ဆွတ်နန်းရွာက ပြည်သူ့စစ်ရွာ။ အဲ့ရွာကနေ ၉ ရက်နေ့က ကျနော်တို့ထိန်းချုပ်ထားတဲ့ ရန်ကင်းတောင်ကို အင်အား ၁၂၀ နဲ့စစ်ကြောင်းထိုးလာတာ။ အဲ့နေ့က ၁၀ မိနစ် လောက်တိုက်ပွဲဖြစ်တယ်။ ကျနော်တို့ဖက်က အင်အားနည်းလို့ပြန်ဆုတ်ခဲ့တယ်။ ၁၄ ရက်နေ့မှာ ကျနော်တို့ပြန်ပြီး တိုက်ခိုက်တာ။ အဲ့မှာ စကစ တွေသေဆုံးတယ်။ ပြန်ဆုတ်သွားတယ်။ အလောင်းတွေကို အခုထိလာမကောက်သေးဘူး”လို့ Mawlaik Revolution မှတာဝန်ရှိသူက ပြောပါတယ်။

တိုက်ပွဲအတွင်း ၁၂၂ မမ ရှော့တိုက်ဒုံး ၇ လုံး၊ MA-1 ၁ လက်၊ MA-3 ၁လက်၊ MA-15 ၁ လက်၊ G-3 ၁ လက်၊ ကျည်ဘောက် ၁၃ ခု၊ ကျည်မျိုးစုံ ၁၂၀၀ တောင့်တို့ကိုရရှိခဲ့တယ်လို့ သူက ဆိုပါတယ်။

တိုက်ပွဲဖြစ်ပွားခဲ့ပြီးနောက် စစ်ကော်မရှင်တပ်သားတွေက ဆွတ်နန်းကျေးရွာစခန်းနဲ့ မော်လိုက်မြို့ပေါ်ရှိတပ်ရင်းတွေကနေ ရန်ကင်းတောင်ကို ဟောင်ဝစ်ဇာလက်နက်ကြီးတွေနဲ့ ပစ်ခတ်ခဲ့သလို ဒရုန်းတွေနဲ့ပါ ဗုံးသီး ချတိုက်ခိုက်ခဲ့တယ်လို့ အထက်ပါတာဝန်ရှိ သူကပြောပါတယ်။

အလားတူဒီဇင်ဘာ ၁၀ ရက် ညနေ ၄ နာရီကျော်ကလည်း မင်းကွန်းနယ်မြေရဲစခန်းက နေ စစ်ကြောင်းထိုးထွက်လာတဲ့ အင်အား ၁၀၀ ခန့်ပါ တပ်မ-၃၃ စစ်ကြောင်းကို ချောင်းမကြီးကျေးရွာ အနီးမှာ တော်လှန်းရေးတပ်ဖွဲ့တွေက ကြားဖြတ်တိုက်ခိုက်ခဲ့တယ်လို့ ဆိုပါတယ်။

“စစ်ကြောင်းက အထိနာပြီးပြန်ဆုတ်သွားတယ်ဗျ။ သေဆုံး၊ ဒဏ်ရာရရှိနိုင်တယ်ဗျ။ တိုက်ပွဲဖြစ်ပြီး တရက်အကြာ ၁၂ ရက်နေ့မှာတော့ အဲ့စစ်ကြောင်းက တန်ပြန်ထိုးလာတယ်။ ထုံးဘိုရွာနဲ့ မယ်ဇလီရွာတွေမှာ ဝင်ရောက်တပ်စွဲထားတယ်ဗျ”လို့ People Servant Force မှတာဝန်ရှိသူတဦးက ပြောပါတယ်။

တိုက်ပွဲအတွင်း စစ်ကော်မရှင်တပ်တွေဆီကနေ ၇.၆၂ အမျိုးအစား G-3 ကျည် ၈၅၅ တောင့် ၊ ၅.၅၆ ကျည် ၇၉၆ တောင့်၊ ၆၀ မမ ဗုံးသီး ၅ လုံး၊ RPGအသီး ၃ လုံး၊ ပို့ကျည် ၃ တောင့်၊ အီနာဂါ M9 ၁ လုံး၊ ငါးကြင်းမှီးပြောင်း ၁ ပြောင်း၊ MA ကျည်ဘောက် ၃ ဘောက်၊ MA2 ဘောက်အဝိုင်း ၁ ခု နဲ့စစ်အသုံးအဆောင်တွေ သိမ်းဆည်းရရှိခဲ့တယ်လို့ သူကဆိုပါတယ်။

ဒီတိုက်ခိုက်မှုကို People Servant Force နဲ့ မဟာမိတ်တွေဖြစ်ကြတဲ့ မင်းကွန်းတိုက်နယ် ပ.က.ဖ၊ ယူနီကွန်းတပ်ဖွဲ့၊ ရတနာပုံတပ်ဦး၊ No More Dictatogrship-NMD၊ ချမ်းစည်ရိုင်ဖယ် တို့ ပူးပေါင်းလုပ်ဆောင်ခဲ့တာလို့ သိရပါတယ်။

စာတည်း – လင်း

ရွှေဘို၊ နိုဝင်ဘာ ၄၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ဘုန်းဘွဲ့ကျေးရွာကို စစ်ကော်မရှင်တပ်ဖွဲ့က ဝင်ရောက်စီးနင်းပြီး ထိန်းချုပ်လိုက်တယ်လို့ ဒေသကာကွယ်ရေးတပ်ဖွဲ့တွေထံက သိရပါတယ်။

နိုဝင်ဘာ ၄ ရက် ဒီကနေ့မနက် ၆ နာရီခန့်မှာ ရွှေဘိုဘက်ကနေ အင်အား ၁၅၀ ခန့်ပါ စစ်ကော်မရှင်တပ်ဟာ ဘုန်းဘွဲ့ရွာကို စစ်ကြောင်းထိုးလာတာကြောင့် ကျေးရွာထိပ်မှာဒေသကာကွ​ယ်ရေးတပ်တွေနဲ့ ၁ နာရီခန့်အကြာ ထိတွေ့တိုက်ပွဲဖြစ်ပြီးနောက် ကျေးရွာအတွင်းဝင်ရောက်ထိန်းချုပ်ခဲ့တာလို့ ဆိုပါတယ်။

” သာလွန်အင်အားနဲ့ထိုးတော့ ထိတွေ့တိုက်ပွဲဖြစ်ပြီးဝင်သွားတော့တာ။ သူတို့လာလို့ခံစစ်အနေနဲ့ပြင်ထားတဲ့နေရာရှိတယ်။ ကျေးရွာကာကွယ်ရေးအဖွဲ့တွေရှိတယ်။ တပ်ထိုင်ထားတာမရှိဘူး။ လက်ရှိတော့ စကစအဖွဲ့ကရွာထဲရှိနေတယ်”လို့ ဒေသကာကွယ်ရေးအဖွဲ့ဝင်တဦးက မြေလတ်အသံကို ပြောပါတယ်။

တိုက်ပွဲအတွင်းမှာဒေသကာကွယ်ရေးပူးပေါင်းအဖွဲ့က တပ်ဖွဲ့ဝင် ၁ ဦးကျဆုံးပြီး ၂ ဦးထိခိုက်ဒဏ်ရာရထားကာ စစ်ကော်မရှင်ဘက်ကတော့ ထိခိုက်သေဆုံးသူတွေရှိပေမယ့် အသေးစိတ်တော့စုံစမ်းနေတုန်းလို့ ဆိုပါတယ်။

စစ်ကော်မရှင်တပ်က သာလွန်အင်အားနဲ့ထိုးစစ်ဆင်လာတာကြောင့် ကာကွယ်ရေးတပ်တွေဘက်က ဘုန်းဘွဲ့ကျေးရွာကနေ ဆုတ်ပေးလိုက်ရပြီး လက်ရှိမှာ စစ်ကော်မရှင်တပ်က ကျေးရွာအတွင်း တပ်စွဲနေထိုင်ဖို့ လုပ်ဆောင်နေတယ်လို့ သိရပါတယ်။

စစ်ကော်မရှင်စစ်ကြောင်းဝင်ရောက်လာပြီးတိုက်ပွဲဖြစ်နေတာကြောင့် အိမ်ခြေ ၅၀၀ နဲ့အထက်ရှိတဲ့ ဘုန်းဘွဲ့၊ တာဂဏန်း၊ ရှားတော၊ ဇီးတော၊ ယင်းမာ၊ အောင်ချမ်းသာရွာသစ်တွေက ဒေသခံပြည်သူ ၁၀,၀၀၀ ကျော်စစ်ဘေးရှောင်နေရပါတယ်။

ရွှေဘိုမြို့နယ်အပြင် ဝက်လက်မြို့နယ်အတွင်းကိုလည်း စစ်ကိုင်းမြို့နယ်၊ ဆားတောင်ဒေသက စစ်ကော်မရှင်တပ်စစ်ကြောင်းတွေ ဝင်ရောက်စစ်ကြောင်းထိုးနေတာကြောင့် ဝက်လက်မြို့နယ်အတွင်းက ကျေးရွာဒေသခံတွေလည်း ဘေးလွတ်ရာထွက်ပြေးနေရတာလည်း ဖြစ်ပါတယ်။

စာတည်း – ဟိန်းစံ

မြေလတ်အသံ၊ စက်တင်ဘာ ၁၉၊ ၂၀၂၅။

စစ်ကိုင်းတိုင်း၊ ခင်ဦးမြို့နယ်အတွင်းကို စစ်ကြောင်းထိုးဖို့လာတဲ့ စစ်ကော်မရှင်တပ်ဖွဲ့ကို ကြားဖြတ်တိုက်ခိုက်ခဲ့ရာ ၂ ဦး သေဆုံးပြီး သေနတ် ၂ လက်နဲ့ စစ်အသုံးဆောင်ပစ္စည်းတွေကို သိမ်းဆည်းရရှိခဲ့တယ်လို့ ခင်ဦးမြို့နယ်ပကဖက ထုတ်ပြန်ပါတယ်။

ရွှေဘိုမြို့နယ်၊ ဘုတ်ကုန်းရွာစခန်းကနေ ခင်ဦးမြို့နယ်၊ မကျီးတုံကျေးရွာစခန်းဘက်ကို ထွက်ခွာလာတဲ့ အင်အား ၈၀ ခန့်ပါ စစ်​ကြောင်းကို စက်တင်ဘာ ၁၈ ရက် ည ၁၁ နာရီကျော်မှာ လမ်းတနေရာမှာ တိုက်ခိုက်ခဲ့တာလို့ ဆိုပါတယ်။

” တိုက်ပွဲက (ရွှေဘို-ခင်ဦး) နယ်စပ်မှာဖြစ်တာ။ သူတို့က ရွှေဘိုမြို့နယ်ကနေ ခင်ဦးမြို့နယ်စစ်ကြောင်းထိုးဖို့ရာအတွက် သူတို့ အချိန်းအပြောင်းတွေဘာတွေရှိတာပေါ့။ အဲ့တာကို ကိုယ့်အဖွဲ့တွေက ကင်းပုန်းဝပ်စောင့်ပြီး တိုက်ခိုက်ခဲ့တာ”လို့ ခင်ဦးမြို့နယ်ပကဖ တာဝန်ခံက မြေလတ်အသံကို ပြောပါတယ်။

တိုက်ပွဲအတွင်းအထိနာတာကြောင့် စစ်ကော်မရှင်တပ်သားတွေက ဘုတ်ကုန်းရွာစခန်းနဲ့ အမှတ် ၈ စစ်အခြေခံလေ့ကျင့်ရေးတပ်ဘက်ကို ဆုတ်ခွာထွက်ပြေးသွားခဲ့ပြီး တိုက်ပွဲဖြစ်ပွားရာနေရာကနေ MA 4 ဗုံးပစ်လောင်ချာ ၁ လက်၊ MA 5 ပစ္စတို ၁ လက်နဲ့ RPG စိန်ပြောင်းဗုံးသီး၊ အီနာဂါဗုံးသီး၊ ၄၀ မမ ဗုံးသီးတွေနဲ့ ကျည်ဆန်တချို့ စစ်အသုံးအဆောင်ပစ္စည်းတွေကို သိမ်းဆည်းရရှိခဲ့တယ်လို့ ဆိုပါတယ်။

တိုက်ပွဲအတွင်း ပူးပေါင်းတိုက်ခိုက်ခဲ့တဲ့ ရွှေဘိုခရိုင် အမှတ် ၃ တပ်ရင်း၊ ခင်ဦးမြို့နယ် ပကဖ၊တိုက်နယ် ပကဖ၊ မြို့နယ် ပလဖတို့ ပူးပေါင်းတိုက်ခိုက်ခဲ့တာဖြစ်ပြီး ကာကွယ်ရေးတပ်ဖွဲ့တွေဘက်က အထိခိုက်မရှိခဲ့ဘူးလို့ သိရပါတယ်။