စစ်ကိုင်း

ကောလင်း၊ ဧပြီ ၂၉၊ ၂၀၂၃။

စစ်ကိုင်းတိုင်း၊ ကောလင်းမြို့နယ်၊ သဲကောရွာမှာ ကောလင်းခရိုင် တပ်ရင်း ၁ တပ်ရင်းမှူး ဒူဂျွန်ခလန်ဇော်ဆိုင်း (၃၁ နှစ်)နဲ့ ဘော်ဒီဂတ်ရဲဘော် နှစ်ဦးဟာ ဧပြီလ ၂၆ ရက် ညနေပိုင်းမှာ စစ်ကောင်စီစစ်ကြောင်းနဲ့ ထိပ်တိုက်တိုးပြီး ဖမ်းဆီးသတ်ဖြတ်ခံခဲ့ရတာလို့ ဆိုပါတယ်။

စစ်ကောင်စီရဲ့ ဖမ်းဆီးသတ်ဖြတ်ခြင်းခံရတဲ့ တပ်ရင်းမှူး ဒူဂျွန်ခလန်ဇော်ဆိုင်းဟာ အမျိုးသားညီညွတ်ရေးအစိုးရ သယံဇာတနဲ့ ပတ်ဝန်းကျင်ထိန်းသိမ်းရေးဝန်ကြီး ဒေါက်တာတူးခေါင် ဇနီးရဲ့ တူဖြစ်တယ်လို့ သူတို့နဲ့ နီးစပ်တဲ့အသိုင်းအဝန်းက ဆိုပါတယ်။

ဒေါက်တာတူးခေါင်အနေနဲ့လည်း သူရဲ့လှုမှုကွန်ရက်ပေ့ချ်မှာ “ငါ့တူ စစ်ကိုင်းမှာ အသက်ပေးသွားတယ်။ လေးလေးနက်နက် အလေးပြုပါတယ်” လို့ ရေးသားထားပါတယ်။

တပ်ရင်းမှူး ဒူဂျွန်ခလန်ဇော်ဆိုင်းနဲ့ ရဲဘော်နှစ်ဦး ဖမ်းဆီးသတ်ဖြတ်ခံခဲ့ရပြီးနောက်ရက် ဧပြီလ ၂၇ ရက် မနက် ၃ နာရီဝန်းကျင်မှာ သဲကောရွာနဲ့ တရွာအကျော်က ဘုမ္မရာဇာကုန်းပေါ် မှာ မြို့နယ် ပအဖ၊ ပကဖ နဲ့ ပလဖ အသီးသီးက ရဲဘော် ၇ ဦး ထပ်မံသတ်ဖြတ်ခံခဲ့ရပါသေးတယ်။

“ရင်းမှူးက ဘော်ဒီဂတ်ကလေးနဲ့ စစ်ကြောင်းသွားထောက်တာ။ စစ်မရောက်သေးဘူး ထင်ပြီး သဲကောရွာကို ဖြတ်တာ။ စစ်တွေက ရွာထဲမှာ အရင်ရောက်နှင့်နေပြီး အဖမ်းခံလိုက်ရတာ။ နယ်မြေမကျွမ်းတာလည်း ပါမှာပေါ့။ ရင်းမှူးက ပြောင်းလာတာ မကြာသေးဘူး။ သူတို့ နှစ်ယောက်ကိုက ရွာထဲမှာ ကြိုးတုတ်ပြီး ရက်ရက်စက်စက် မီးရှို့သတ်သွားတယ်။ ရဲဘော်တွေက ရင်းမှူးအဖမ်းခံလိုက်ရတယ်ကြားလို့ စစ်ကူလာဖြည့်ရင်း မိပြီး ပစ်သတ်ခံရတာ” လို့ ဒေသခံတဦးက ပြောပါတယ်။

သေဆုံးရဲဘော်တွေရဲ့ အလောင်းတွေကိုတော့ ဧပြီ ၂၇ ရက်ကပဲ ကောက်ယူကာ သဂြိုလ်ပြီးသွားပြီလို့လည်း သိရပါတယ်။

စစ်ကောင်စီရဲ့ ခလရ ၃၆၉ စစ်ကြောင်းဟာ ဧပြီလ ၂၃ ရက်ကတည်းက ဝန်းသိုဘက်ကနေ ကောလင်းမြို့နယ်ထဲ ဝင်လာတာဖြစ်ပြီး သဲကော၊ တုံးတင်တပ်၊ နှောကုန်း၊ ကုက္ကိုကုန်းရွာတို့ကိုလည်း မီးရှို့ဖျက်ဆီးသွားပြီး အခုလက်ရှိ ဇီးကုန်းရွာဘက်မှာ ရောက်နေတယ်လို့ သိရပါတယ်။

အဲဒီ့ ခလရ ၃၆၉ စစ်ကြောင်းထိုးနေလို့ ကျောက်ပြင်သာ၊ အင်ပင်လှ၊ မင်းကုန်း၊ သဲချောင်း၊ ချောင်းကွေ့၊ အလယ်ကုန်း၊ တုံးတင်တပ်၊ နှောကုန်း၊ သဲကော၊ ဝါးရုံခုံ၊ ပွဲခံ၊ ကပ်ဖလူး၊ ဇီးကုန်း၊ အင်ပင်သာ၊ စစ်တော၊ လက်ပံရှို၊ ကသစ်ကုန်း စတဲ့ရွာတွေ ထွက်ပြေးတိမ်းရှောင်နေရတယ်လို့ သိရပါတယ်။

စာတည်း – 007

စစ်ကိုင်း၊ ဧပြီ ၂၈၊ ၂၀၂၃။

စစ်ကိုင်းတိုင်း၊ ဝက်လက်မြို့နယ်၊ ရွာသာကြီးကျေးရွာနဲ့ လှတောကျေးရွာ အနီးတဝိုက်ကို စစ်ကောင်စီတပ်က လေ​ယာဥ်တစီးနဲ့ ဗုံးကြဲတိုက်ခိုက်ချိန် ရှောင်ပြေးတဲ့ ၈၀ ကျော်အရွယ် အဘိုးတဦး သေဆုံးခဲ့တယ်လို့ သိရပါတယ်။

ဧပြီလ ၂၇ ရက်ညနေ ၄ နာရီကျော် အချိန်ခန့်က တိုက်ခိုက်တာဖြစ်ပြီး သေဆုံးသူမှာ ကျီးကန်ကျေးရွာက ဦးညို ၈၅ နှစ်ဖြစ်ကာ လေကြောင်းတိုက်ခိုက်နေချိန် ကျေးရွာကနေ ထွက်ပြေးရာ အမောဖောက်ပြီး သေဆုံးခဲ့တာ ဖြစ်တယ်လို့ People’s Servant Revolution (Wetlet) မှ ရဲဘော်တဦးက ပြောပါတယ်။

“အဘိုးက ပြေးရင်းလွှားရင်း အမောဖောက်ပြီး သေသွားတာ။ မြေပြင်စစ်ကြောင်းတခုကလည်း ရွာအနီးနားကို ရောက်နေတော့ အဘိုးကို ချက်ချင်းမီးသင်္ဂြိုလ်လိုက်ရတယ်။ စကစက လေယာဥ်နဲ့ အဲရွာအနီးတဝိုက်ကို 81ရော့ကဒ်ဗုံးသီးတွေပဲ ပစ်တာ။ စက်လက်က သိပ်မပစ်ဘူး” လို့ ဆိုပါတယ်။

လှတောကျေးရွာမှာ အထိုင်ချတပ်စွဲနေတဲ့ စစ်ကောင်စီတပ်စခန်းကို ကာကွယ်ရေးပူးပေါင်းတပ်ဖွဲ့တွေက မနေ့က နေ့လည်ပိုင်းအချိန်မှာ နာရီဝက်ကျော်ကြာ လက်နက်ကြီးတွေနဲ့ပစ်ခတ်တိုက်ခိုက်ရာကနေ အပြန်အလှန်တိုက်ပွဲ ဖြစ်ပွားခဲ့ပြီးနောက် မုံရွာမြို့အခြေစိုက် အနောက်မြောက်ပိုင်းတိုင်းစစ်ဌာနချုပ် (နမခ)မှ Mi-35 ရဟတ်ယာဥ်တစီးနဲ့ အခုလိုလာရောက်ပစ်ခတ်ခဲ့တာဖြစ်တယ်လို့ သူက ဆက်ပြောပါတယ်။

“လေယာဥ်က လာပစ်တဲ့အချိန်မှာ ရဲဘော်တွေက တိုက်ခိုက်ပစ်ခတ်ပြီးလို့ စခန်းကို ရောက်နေတာကြာပြီ။ ဒါကြောင့် ရဲဘော်တဦးတယောက်မှ ထိခိုက်ဒဏ်ရာ မရခဲ့ကြဘူး။ ဗုံးလာကြဲလို့ ရွာအနီးဝန်းကျင် ဒေသခံတွေကတော့ အကုန်လုံး ထွက်ပြေးခဲ့ကြရတယ်” လို့ ဆိုပါတယ်။

လက်ရှိမှာ ဝက်လက်မြို့နယ်ကို အင်အား ၆၀ ကျော်ပါတဲ့ စစ်ကြောင်းတခုက စစ်ကြောင်းထိုးနေတာကြောင့် လှတော၊ ရွာသာကြီး၊ ကျီးကန်၊ အောင်ချမ်းသာ၊ သခွတ္တော၊ ဘင်တဲကုန်း၊ အောင်တက်ကုန်း၊ သဖန်းကုန်းစတဲ့ ကျေးရွာတွေက ဒေသခံ ၁ သောင်းကျော်ဟာ ဧပြီလ ၂၃ ရက်ကနေ ဒီနေ့အထိ ထွက်ပြေးတိမ်းရှောင်နေကြရဆဲ ဖြစ်တယ်လို့ သိရပါတယ်။

စာတည်း – 007

ယင်းမာပင်၊ ဧပြီ ၂၇၊ ၂၀၂၃။

စိုက်ပျိုးစရိတ်တွေကြီးမြင့်လာမှုနဲ့ စစ်ကောင်စီတပ်တွေ စစ်ကြောင်းထိုးတာတွေကြောင့် စစ်ကိုင်းတိုင်း၊ ယင်းမာပင်မြို့နယ်အတွင်းက ကြက်သွန်စိုက်ပျိုးကြတဲ့တောင်သူတွေဟာ ကြက်သွန်ပေါ်ချိန်မှာ အရှုံးနဲ့ရင်ဆိုင် နေကြရတယ်လို့ ဒေသခံတွေက ဆိုပါတယ်။

ကြက်သွန်နီတပိဿာကို ကျပ် ၂၀၀၀ လောက်ရမှ အမြတ်ကျန်နိုင်မှာဖြစ်သော်လည်း အခုလက်ရှိမှာ ကြက်သွန်နီ တပိဿာကို ၈၀၀ ကျပ်၊ ၈၅၀ ကျပ်လောက်သာရတာကြောင့် တောင်သူတွေဟာ သိန်းချီကာ ဆုံးရှုံးနေကြရပါ တယ်။

လက်ရှိ ရန်ကုန်ဘုရင့်နောင် ပေါက်ဈေးကတော့ ကြက်သွန်နီ တပိသာကို ၁၃၅၀ ကျပ်မှ ၁၆၀၀ ကျပ်အထိ ဈေးပေါက်နေပါတယ်။

ပုံမှန်ဆိုရင် ကြက်သွန်စိုက်တောင်သူတွေဟာ ကြက်သွန်ကို ဆောင်းရာသီမှာစိုက်ပျိုးကာ တန်ခူးလမှာ နှုတ်ကြပါ တယ်။ အဲဒီအချိန်ဟာ ကြက်သွန်ပေါ်တဲ့အချိန်ဖြစ်လို့ ဈေးကျတတ်တာကြောင့် တောင်သူအများစုက ဈေးကောင်းရတတ်တဲ့ ဝါဆို၊ ဝါခေါင်လအထိ သိုလှောင်ပြီး ရောင်းချလေ့ရှိပါတယ်။

“မီးရှို့ခံရတာတွေ ကြောက်ကြတော့ ဈေးမမျှော်တော့ဘဲ အရင်းလေးရရင်ဆိုပြီး ရောင်းပစ်ရတာ၊ လုံးလုံးဆုံးရှုံး မှာထက်စာရင် ရသလောက်လေးဆိုပြီး လက်လွှတ်လိုက်ရတာပေါ့။ မနှစ်က‌ဆို ကြက်သွန်တွေ စင်လိုက်ထားကြ တယ်။ မီးထဲပါသွားတယ်။ တလုံးမှ ရောင်းမစားလိုက်ရတဲ့အဖြစ်မျိုးထိရှိတယ်။ အဲ့လိုအတွေ့ကြုံတွေရှိခဲ့တော့ ကြာကြာမထားရဲဘူး”လို့ တောင်သူ အမျိုးသမီးတဦးက ပြောပါတယ်။

အာဏာသိမ်းစကာလတုန်းက ပုလဲမြေဆီတအိတ်ကို ကျပ် ၇သောင်း၊ ပိုးသတ်ဆေး တဘူး ကျပ် ၃၀၀၀၊ ဓာတ်ဆီ တဂါလံ ကျပ် ၄၅၀၀၊ အလုပ်သမားငှားခ အမျိုးသား ကျပ် ၆၀၀၀၊ အမျိုးသမီး ကျပ် ၃၀၀၀ရှိပြီး အခုနှစ်မှာတော့ မြေဆီတအိတ် ကျပ် ၁သိန်းခွဲ၊ ပိုးသတ်ဆေးတဘူး ကျပ် ၁၂၀၀၀၊ ဓာတ်ဆီတဂါလံ ကျပ် ၁၂၀၀၀၊ အလုပ်သမားငှားက အမျိုးသား ၈၀၀၀ ကျပ်၊ အမျိုးသမီး ကျပ် ၄၀၀၀ထိ ‌မြင့်တက်လာခဲ့တယ်လို့ သိရပါတယ်။

ဒီလို ဓာတ်မြေဩဇာစရိတ်တွေ မြင့်တက်လာလို့ ဝယ်ယူမသုံးနိုင်တဲ့အခါ အရင်က တဧကကို သွန်ကြက်နီ ပိဿာ ၃၀၀၀ နီးပါးရာထွက်ရာမှ အခုကတော့ တဧကကို ပိဿာ ၁၀၀၀ လောက်သာထွက်တော့တယ်လို့လည်း တောင်သူတွေက ပြောပါတယ်။

ကြက်သွန်တရာသီကို မြေအမျိုးစားပေါ်မူတည်ပြီး သဲမြေဆိုရင် ၁၀ကြိမ်၊ နုံးမြေဆိုရင် ၅ကြိမ် မဖြစ်မနေ ရေသွင်းပေးရပေမယ့် ဓာတ်ဆီဈေးတွေက အဆမတန်တက်လာတဲ့အတွက် တရာသီကို ၃ ခါလောက်သာ ရေသွင်းစိုက်ပျိုးနိုင်တာကြောင့် အထွက်နှုန်း ထပ်ဝက်ကျော်ကျကာ အလုံးလည်း မလှတော့တဲ့အတွက် ဈေးအနှိမ်ခံရတာလည်း ဖြစ်ပါတယ်။

ဒါ့အပြင် မကြာခဏ စစ်ကောင်စီရဲ့ စစ်ကြောင်းတွေ ထိုးနေတာကြောင့် အရင်က အလုပ်သမား ၁၀ယောက်နဲ့ လုပ်ရမယ့်နေရာမှာ အမြန်ပြီးလိုတဲ့အတွက် အလုပ်သမား အယောက် ၂၀ လောက်ခေါ်ကာ လုပ်နေရလို့ စိုက်ပျိုးစရိတ်တွေ ပိုကုန်ချတယ်လို့ ဆိုပါတယ်။

“စိုက်ပျိုးရေးကို ပြေးရင်းလွှားရင်းလုပ်နေရတော့ မြေဆီမြေဩဇာတွေမထည့်နိုင်တော့ မှန်းသလောက်မထွက် ဘူး။ မစိုက်လို့ရှိရင်လည်း စားစရာမရှိမှာစိုးလို့။ ရှုံးတယ်၊ မြတ်တယ်မတွက်ဘဲ ကံစွန့်ပြီးလုပ်ကြရတာ”လို့ တောင်သူတဦးက ပြောပါတယ်။

တောင်သူတချို့ကတော့ အရင်က ကိုယ်တိုင်စိုက်ပျိုးပါက တနှစ်ကို ကျပ်သိန်း ၃၀ လောက်ဝင်ငွေရနိုင်တဲ့ လယ်ယာမြေတွေကို အခုအခါ စိုက်ပျိုးစရိတ်အရင်းအနှီးမတတ်နိုင်တော့တဲ့အတွက် ၃ နှစ်ကို ကျပ် ၁၀ သိန်းလောက်နဲ့ လယ်ယာတွေကို နှစ်ချုပ်သဘောမျိုး အငှားချကာ စားသောက်နေရတယ်လို့ ဆိုပါတယ်။

“အာဏာသိမ်းပြီးကတည်းက ကြက်သွန်မစိုက်နိုင်တော့တာ၊ မင်းဆိုးမင်းညစ်ကြားထဲမှာနေရတာဆိုတော့ ကျန်းမာရေးအတွက် ရတဲ့ဈေးလေးနဲ့တင်းတိမ်ပြီး နေရ‌တာပေါ့ရှင်။ အရင်ကတော့ ကိုယ်ကယာပိုင်ဆိုတော့ အလုပ်သမားတွေ ငှားပြီးလုပ်တာ၊ အခုကျ ကိုယ်တိုင်သူများဆီမှာ အလုပ်သမားလိုက်လုပ်နေရတဲ့ ဘဝရောက် သွားတယ်။ တနေ့လုံးလုပ်တာ ညီမ ၂ ယောက် ၈၀၀၀ ရတယ်။ အဲတာလေးနဲ့ပဲ ဒီတော်လှန်ရေးကာလမှာ ဖြစ်သလိုနေနေရတယ်”လို့ လယ်ထဲမှာ နေ့စားလုပ်နေရတဲ့ တောင်သူအမျိုးသမီးတဦးက ပြောပါတယ်။

စစ်အာဏာသိမ်းပြီးနောက်ပိုင်း တောင်သူအများစုဟာ စိုက်ပျိုးစရိတ်တွေ အဆမတန်တက်နေတဲ့အပြင် စစ်ရှောင်ရတာတွေလည်းရှိနေတဲ့အတွက် စိုက်ပျိုးရေးကို တစိုက်မတ်မတ်မလုပ်နိုင်ကြတော့ဘူးလို့ ဆိုပါတယ်။

စာတည်း – လင်းဇေ

ခင်ဦး၊ ဧပြီ ၂၇၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်၊ မြို့သစ်ကျေးရွာကို စစ်ကောင်စီတပ်သားတွေက ၂ ရက်ဆက်တိုက် မီးရှို့ဖျက်ဆီးခဲ့တယ်လို့ သိရပါတယ်။

တပ်သားအင်အား ၁၀၀ ဝန်းကျင်ပါတဲ့ စစ်ကြောင်းက ဧပြီလ ၂၆ ရက်မနေ့ကညနေ ၆ နာရီလောက်မှာ မြို့သစ်ရွာကို ဝင်ရောက်လာပြီး ပထမအကြိမ် မီးရှို့ဖျက်ဆီးပြီးနောက် တပ်စွဲနေထိုင်ကာ ဧပြီလ ၂၇ ရက်ဒီမနက် ၇ နာရီလောက်မှာ ဒုတိယအကြိမ် ထပ်မံမီးရှို့ခဲ့တာလို့ Khin U Local Guerrilla Force ရဲ့တာဝန်ခံ ဂျက်စတင်က ပြောပါတယ်။

“အိမ်ခြေက ၉၀ ကျော် ၁၀၀ နီးပါးလောက် မီးရှို့ခံလိုက်ရတယ်။ ၂ ရက်ဆိုတော့လေ။ နောက်ပြီး သူတို့ရွာထဲကနေ ပြန်ထွက်ချိန် ကျနော်တို့ ဒရုန်းနဲ့ကြည့်တဲ့အထဲမှာ ပြည်သူလို့ထင်ရတဲ့ အရပ်သား ပြည်သူ ၁ ယောက် ၂ ယောက် ဖမ်းဆီးခံသွားရတယ်လို့လည်း သိရတယ်။ သူတို့စစ်ကြောင်းထိုးလာတဲ့အချိန် မရှောင်လိုက်နိုင်လို့ အဖမ်းခံရတယ် ထင်တယ်” လို့ ပြောပါတယ်။

အဖမ်းခံရသူတွေဟာ ဘယ်သူဘယ်ဝါဆိုတာ မသိရသေးဘဲ ဒီမနက် ၉ နာရီလောက်က စစ်ကောင်စီတပ်သားတွေ ရွာကပြန်ထွက်သွားချိန်မှာ သူတို့နဲ့အတူ ရေဦးမြို့ဘက်ကို ခေါ်သွားတယ်လို့ ဆိုပါတယ်။

အိမ်ခြေ ၆၀၀ နီးပါးရှိတဲ့ မြို့သစ်ကျေးရွာဟာ အခုလိုမီးရှို့ဖျက်ဆီးခံရတာ ဒုတိယအကြိမ်ဖြစ်ပြီး ၂၀၂၂ ခုနှစ်၊ ဖေဖော်ဝါရီလ ၁၇ ရက်ကလည်း အဲ့ဒီကျေးရွာအနီးမှာ ဒေသခံကာကွယ်ရေးတပ်တွေနဲ့ စစ်ကောင်စီတပ်တို့ တိုက်ပွဲဖြစ်ပြီးနောက် ရွာကိုမီးဝင်ရှို့ခဲ့တာလို့ သိရပါတယ်။

လက်ရှိမှာ မြို့သစ်ကျေးရွာအပါအဝင် ခင်ဦးနယ်ထဲက ကံကြီးကုန်း၊ ရွှေယမင်း၊ သာဂရ၊ မြင်းဒေါင်းနဲ့ မြကန် စတဲ့ ကျေးရွာတွေက ဒေသခံပြည်သူ ၃၀၀၀ ကျော်လည်း ရွာကနေထွက်ပြေး တိမ်းရှောင်နေရတယ်လို့ ခင်ဦးမြို့နယ် သတင်းမှန်ပြန်ကြားရေးက ထုတ်ပြန်ရေးသားထားပါတယ်။

စာတည်း – လင်း

ရွှေဘို၊ ဧပြီ ၂၇၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ် အရှေ့ခြမ်း၊ တောင်လှတောင်ပေါ်မှာ တပ်စွဲထားတဲ့ စစ်သားနဲ့ ပျူစောထီး ပူးပေါင်းတပ်ဖွဲ့က ပစ်လိုက်တဲ့ လက်နက်ကြီးကျည်စ ထိမှန်ပြီး အမျိုးသားတဦး ထိခိုက်ဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။

ဧပြီလ ၂၆ ရက် မနေ့ည ၈ နာရီချိန်လောက်မှာ အဆိုပါ စစ်အုပ်စုက လက်နက်ကြီး ၂ လုံးနဲ့ ရမ်းသမ်းပစ်ခတ်ခဲ့လို့ ဝက်လက်မြို့နယ်၊ ထုံဘိုကျေးရွာက အသက် ၃၄ နှစ်အရွယ် ကိုကျောက်လုံးရဲ့လက်ကို လက်နက်ကြီးစ ထိမှန်သွားခဲ့တာလို့ Wetlet Informational Network မှ တာဝန်ရှိသူတဦးက ပြောပါတယ်။

“ကိုကျောက်လုံးက သူ့အိမ်မှာ ထမင်းစားနေရင်း ထိမှန်တယ်လို့ သိရတယ်။ သူရဲ့နွားတကောင်လည်း လည်ပင်းထိပြီး သေသွားတယ်။ အဲဒီတောင်ပေါ်မှာ သူတို့တွေ တပ်စွဲထားတာ ၂ လကျော်ပြီ။ အဲဒီမှာ လက်နက်ကြီးတွေ တပ်ဆင်ထားပြီးတော့ နေတိုင်းလိုလို ရွာတွေဘက်ကို ပစ်ထုတ်နေတာ” လို့ ဆိုပါတယ်။

တောင်လှတောင်ပေါ်မှာ စစ်အုပ်စုက အင်အားဘယ်လောက်နဲ့ တပ်စွဲထားတယ်ဆိုတာ မသိရပေမယ့် စစ်သားအင်အားထက် ပျူစောထီးအင်အားက များပြီး၊ လွန်ခဲ့တဲ့ ၂ လောက်ဝန်းကျင်ကတည်းက ညပိုင်းတွေဆိုရင် လက်နက်ကြီးတွေနဲ့ ကျေးရွာတွေဘက်ကို ပစ်လေ့ရှိတယ်လို့ သိရပါတယ်။

“သူတို့က ညရောက်တိုင်း လက်နက်ကြီးတွေနဲ့ ရမ်းသမ်းပစ်နေတာပဲ။ လူတွေထိတာထက် တိရိစ္ဆာန်တွေ ပိုထိတာများတယ်။” လို့ ပြောပါတယ်။

ဒါ့အပြင် အဲ့ဒီစစ်အုပ်စုဟာ ခုဧပြီလအတွင်းမှာပဲ ရွှေဘိုနဲ့ ဝက်လက်မြို့အစပ်မှာရှိတဲ့ မန်းကျည်းသုံးပင်ရွာက နေအိမ်တွေကို မီးရှို့ဖျက်ဆီးသွားခဲ့ပါသေးတယ်။

စာတည်း – လင်း

အင်းတော်၊ ဧပြီ ၂၆၊ ၂၀၂၃။

စစ်ကိုင်းတိုင်း၊ အင်းတော်မြို့နယ်၊ မံဟဲရွာကနေ စစ်ကောင်စီတပ်တွေဖမ်းသွားတဲ့ ဒေသခံရွာသား ၅ ဦးကို တလအကြာမှာ သေဆုံးလျက်ပြန်တွေ့ခဲ့တယ်လို့ သိရပါတယ်။

သူတို့ ၅ ဦးကို ဧပြီလ ၂၅ ရက်မနေ့ကနေ့လယ်ပိုင်းက မံဟဲရွာနဲ့ ၈ မိုင်ခန့်အကွာ မော်လူးမြို့တောင်ဘက် တောထဲမှာ အပိုင်းပိုင်းခုတ်ဖြတ်ပြီး မီးရှို့ခံထားရတဲ့အနေအထားနဲ့ ပြန်တွေ့ခဲ့တာလို့ Indaw Revolution-IR တာဝန်ရှိသူက ပြောပါတယ်။

“သူတို့ဖမ်းဆီးခံရပြီး ပျောက်နေတာတနယ်လုံးနီးပါး သိကြတယ်။ မနေ့ကကျတော့ တောထဲသွားတဲ့ ပြည်သူတဦးက တွေ့ပြီး အကြောင်းကြားလို့ မိသားစုဝင်တွေက သွားကြည့်ကြတာ။ ဟိုရောက်တော့ ကြွင်းကျန်ရစ်တဲ့ပစ္စည်းတွေ တွေ့ရလို့ သူတို့ဆိုတာအတည်ပြုလို့ရခဲ့တာ။ ကျန်ရှိတဲ့ အပိုင်းအစတွေကိုတော့ မိသားစုဝင်တွေက ပြန်သယ်လာပြီး”လို့ ပြောပါတယ်။

ဒေသခံတွေဘက်က ပေးပို့လာတဲ့ ပုံတွေထဲမှာတော့ အသတ်ခံထားရသူအချို့မှာ ခြေ၊ လက်တွေပြတ်ပြီး ကိုယ်ခန္ခာတခုလုံးမှာလည်း မီးလောင်ကျွမ်းထားတာကို တွေ့ရပါတယ်။

အသက် ၂၅ နှစ်အရွယ် ကိုညီညီနဲ့ ကိုလောရှုပ်၊ ၃၈ နှစ်အရွယ် ကိုအောင်မင်းသိုက်နဲ့ ကိုနေလင်းထွန်း၊ ၄၈ နှစ်အရွယ် ကိုဖိုးရှမ်းတို့ဖြစ်ပြီး၊ သူတို့ကို ပြီးခဲ့တဲ့ မတ်လ ၂၄ ရက်မှာ ရွာကိုစစ်ကြောင်းထိုး ဝင်ရောက်လာတဲ့ စစ်ကောင်စီတပ်သားတွေက ဖမ်းသွားခဲ့တာပါ။

ဖမ်းဆီးသတ်ဖြတ်ခံရသူတွေဟာ နိုင်ငံရေးနဲ့ပတ်သက်သူတွေမဟုတ်ဘဲ သာမန်ရွာသားတွေသာ ဖြစ်သလို၊ စစ်အုပ်စုက ရွာကိုဝင်ချိန်မှာ အမျိုးသား၊ အမျိုးသမီးအပါ လူ ၂၀ လောက်ဖမ်းဆီးခဲ့ပေမယ့် ရွာက ပြန်ထွက်ချိန်ကျမှာတော့ အထက်ပါအမျိုးသား ၅ ဦးကိုသာ လူသားဒိုင်းအဖြစ် ဖမ်းဆီးသွားခဲ့တာလို့ ဒေသခံတွေက ပြောပါတယ်။

သူတို့ရဲ့ နာရေးကို ကျန်ရှိနေတဲ့ မိသားစုဝင်တွေက ဒေသဓလေ့ထုံးစံအတိုင်း ပြုလုပ်ဖို့စီစဥ်နေကြတယ်လို့ သိရပါတယ်။

ပြီးခဲ့တဲ့မတ်လအတွင်းမှာလည်း အင်းတော်မြို့နယ်ထဲမှာ မြို့နယ် ပကဖ အဖွဲ့ဝင် ၂ ဦးအဖမ်းခံရပြီးနောက် CDM ဆရာမ ၃ ဦးအပါအဝင် ဒေသခံ ၂၀ ကျော်ကိုလည်း PDF ထောက်ပံသူတွေလို့ဆိုကာ စစ်ကောင်စီတပ်သားတွေက ဖမ်းဆီးခဲ့ပါသေးတယ်။

စာတည်း – လင်း

စစ်ကိုင်း၊ ဧပြီ ၂၆၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်မှာ တနေ့ကို မီး ၁ နာရီလောက်သာ လာတဲ့အတွက် မြို့ပေါ်ရပ်ကွက်တွေ ရေအခက်ခဲ ကြုံနေရပြီး သောက်သုံးရေကအစ ရှားပါးနေတယ်လို့ ဒေသခံတွေကတဆင့် သိရပါတယ်။

အခု ဧပြီလလယ်ကတည်းက တနေ့လုံးနီးပါး မီးမလာတော့တာကြောင့် လက်ရှိ စစ်ကိုင်း မြို့ပေါ်ရပ်ကွက် ၁၅ ရပ်ကွက်ကျော်လောက်မှာ ရေခက်ခဲမှုကြုံနေရကာ သုံးရေနဲ့သောက်ရေအတွက် ပရဟိတကားတွေ ဆီကယူပြီး ချိုးဖို့အတွက်ကတော့ မြစ်ဆိပ်ကိုသွားကြရတယ်လို့ ဆိုပါတယ်။

ပရဟိတ ရေအလှူကားတွေကလည်း မနက် ၇ နာရီ‌ကနေ ည ၇ နာရီထိ လိုက်လံလှူတန်းနေပြီး ရပ်ကွက် ၄ ခုစာအတွက် ဂါလံ ၈၀၀ ပါရေကားတစီးကို တနေ့ ၇ ခေါက် သယ်ယူပို့ဆောင် နေရတယ်လို့ ရေအလှူပေးနေတဲ့ ထုံးဘိုအရေးပေါ် ရှာဖွေကယ်ဆယ်ရေးအဖွဲ့မှ တာဝန်ရှိသူက ပြောပါတယ်။

“မီးက တရက်လုံးမှ ၁ နာရီကောင်းကောင်းတောင်မရဘူး၊ ရေက တမြို့လုံးကိုခက်ခဲနေပြီ၊ ဘယ်လောက်ထိတောင်ဆိုးလဲဆို အိမ်သာတတ်စရာရေတောင် မရှိကြဘူး၊ အမေကြီးတယောက်ဆို အိမ်မှာသောက်ရေကို မရှိတော့လို့ ရေကျန်လေးမရှိဘူးလားလို့ လာ‌မေးတယ်၊ ပြည်သူတွေ တော်တော် ခက်ခဲနေကြတာပါ”လို့ ပြောပါတယ်။

မီးမလာတဲ့အတွက် ‌စည်ပင်ရေလည်း မရတော့ဘဲ ရေပြတ်လတ်သွားကာ အဝီစီတွင်းရှိတဲ့ အိမ်တချို့ကတော့ အဆင်ပြေပေမယ့် အများစုက ရေပြတ်လတ်မှုနဲ့ ကြုံတွေ့နေရတာလည်း ဖြစ်ပါတယ်။

အခုလက်ရှိ သိမ်ကုန်း၊ မြို့သစ်၊ တကောင်း၊ ဇေယျာတိုးချဲ့၊ ပတ္တမြား၊ ရွှေမင်းဝံ၊ ပါရမီ၊ သာစည် စတဲ့ ရပ်ကွက်တွေနဲ့ တောင်ပေါ်ဘုန်းကြီးကျောင်းတွေမှာ ရေပြတ်လတ်မှု အဆိုးဆုံးဖြစ်ပြီး မြို့ပေါ်ရပ်ကွက် ၂၃ ခုမှာ ၁၅ ရပ်ကွက်ကျော်လောက် ရေဘေးဒုက္ခကြုံနေရတာ ဖြစ်တယ်လို့ သိရပါတယ်။

“စစ်ကိုင်းမှာက မီးကိုမလာတော့ဘူး၊ မနက်မိုးလင်းတာနဲ့ ကားကြီးကားငယ်တွေနဲ့ မြစ်ဆိပ်မှာလူစည်နေပြီ၊ ရေအတိမ်အနက် ကြိုးတားထားတာတွေလည်း မရှိတော့ အန္တရာယ်တော့များတယ်ဗျ၊ ရေနစ်သေဆုံးမှုတွေရှိလာမှာတော့ စိုးရိမ်ရတယ်”လို့ ဒေသခံတဦးက ပြောပါတယ်။

စစ်ကိုင်းမြို့မှာ နှစ်စဉ် နွေရာသီရောက်တိုင်း ရေရှားပါးမှု ကြုံရပေမယ့် ယခုနှစ်ကတော့ ရေပြတ်လတ်မှု အဆိုးဝါးဆုံးဖြစ်ကာ ပြီးခဲ့တဲ့ ဧပြီလ ၂၃ ရက်နဲ့ ၂၄ ရက်‌နေ့တုန်းကလည်း ရှင်ဖြူရှင်လှဘုရားအနီးမှာ ရေဆင်းခပ်တဲ့ ကိုရင်လေး ၂ ပါး ရေနစ်သေဆုံးမှုဖြစ်ခဲ့ပါသေးတယ်။

ပုံ – စစ်ကိုင်းဒေသခံတဦး။