မန္တလေး၊ ဒီဇင်ဘာ ၁၁၊ ၂၀၂၅။

မန္တလေးမြို့မှာ ဒီဇင်ဘာ ၁၀ ရက် ညနေနဲ့ ညပိုင်း၊ ဒီဇင်ဘာ ၁၁ ရက်မနက်အစောပိုင်းတွေမှာ ငလျင်ငယ် ၃ ကြိမ် ထပ်မံလှုပ်ခတ်ခဲ့တယ်လို့ မြို့ခံတွေဆီက သိရပါတယ်။

ဒီဇင်ဘာ ၁၀ ရက် မနေ့က ညနေ ၄ နာရီ ၆ မိနစ်မှာ ၄.၅ အင်အားရှိ ငလျင်ငယ်တခု မတ္တရာမြို့ရဲ့အနောက်မြောက်ဘက် ၆ မိုင်ခန့်အကွာ (ဆည်တော်ကြီးအနီး)ကို ဗဟိုပြုလှုပ်ခတ်ခဲ့တယ်လို့ မိုးလေဝသနဲ့ဇလဗေဒဌာနက ထုတ်ပြန်ထားပါတယ်။

ဒါ့အပြင် ယမန်နေ့ ည ၉ နာရီ ၆ မိနစ်မှာလည်း ပြင်းအားအသင့်အတင့်ရှိငလျင်ထပ်မံလှုပ်ခတ်ခဲ့ပြီး ငလျင်ပြင်းအားနဲ့ ဗဟိုပြုနေရာကို မိုးဇလဌာနက ထုတ်ပြန်လာတာ မရှိသေးသလို ငလျင်ပြင်းအားနဲ့တည်နေရာပြတဲ့ အက်ပလီကေးရှင်းတွေမှာလည်း ဖော်ပြထားတာ မရှိသေးပါဘူး။

” ညနေဘက်လှုပ်တဲ့ ငလျင်က ပိုပြင်းတယ်။ ၂ ခါလောက် စောင့်ပြီးရမ်းနေတာ။ အိမ်ပေါ်ကတောင် ဆင်းပြေးရတယ်။ ည ၉ နာရီက အရှိန်သိပ်မပါဘဲနဲ့ အသံကအရင်လာတာ”လို့ မန္တလေးမြို့ခံတဦးက မြေလတ်အသံကို ပြောပါတယ်။

ဒီကနေ့မနက် ၃ နာရီ ၂၄ မိနစ်မှာ ငလျင်ငယ်တခုထပ်မံလှုပ်ခတ်ခဲ့ကြောင်း မြို့ခံတွေထံကသိရပြီး အဲ့ဒီငလျင်က ၃.၇ အင်အားရှိကာ မန္တလေးနဲ့ မတ္တရာမြို့အကြားကို ဗဟိုပြုလှုပ်ခတ်သွားတယ်လို့ ငလျင်ပြင်းအားနဲ့တည်နေရာပြတဲ့ အက်ပလီကေးရှင်းမှာ ဖော်ပြပါတယ်။

ဒီဇင်ဘာ ၉ ရက်ကလည်း ပုသိမ်ကြီးမြို့အနီးကို ဗဟိုပြုပြီး ၃.၉အင်အားရှိ ငလျင်တခု လှုပ်ခတ်ခဲ့သေးပြီး လှုပ်ခတ်ခဲ့တဲ့ ငလျင် ၄ ကြိမ်စလုံးမှာ နေအိမ်နဲ့လူ ထိခိုက်ပျက်စီးတာမရှိဘူးလို့ မြို့ခံလူမှုကူညီရေးအသင်းတွေဆီက သိရပါတယ်။

သတင်း – မြတ်

သတင်း – မြတ်

မန္တလေး၊ အောက်တိုဘာ ၃၀၊ ၂၀၂၅။

မန္တလေးမြို့မှာ ဒီကနေ့မနက်ပိုင်းက ငလျင်ငယ်တခုထပ်မံလှုပ်ခတ်ခဲ့ပြီး ငလျင်ထိခိုက်ထားတဲ့ အဆောက်အဦဖြိုချရာက နံရံပြိုကျလို့ ကလေးငယ်တဦးထိ ခိုက်ဒဏ်ရာရခဲ့တယ်လို့ မြို့ခံတွေဆီက သိရပါတယ်။

အောက်တိုဘာ ၃၀ ရက် ဒီနေ့မနက် ၈ နာရီကျော်မှာ မန္တလေးမြို့ ၈၄ လမ်း၊ ၃၁ လမ်း နဲ့ ၃၂ လမ်းကြားရှိ အထပ်မြင့်အဆောက်အဦတခုကို ဖြိုချရာက လုပ်ငန်းခွင်ထဲက အလုပ်သမားတဦးရဲ့သမီးဖြစ်သူပေါ်ကို ပိမိခဲ့တာလို့ ဆိုပါတယ်။

” ငလျင်ထိထားတဲ့ တိုက်ကိုပန်းရံနဲ့ဖြိုချနေတာဗျ။ ဖြိုချတဲ့အချိန် နံရံကပြိုကျပြီး ပန်းရံသမားရဲ့ သမီးလေး ဒဏ်ရာရတာပါ” လို့ မန္တလေးမြို့ခံတဦးက မြေလတ်အသံကို ပြောပါတယ်။

ထိခိုက်ဒဏ်ရာရရှိသူမိန်းကလေး မန္တလေးဆေးရုံကြီးကို ပို့ဆောင်ကုသထားပြီး ဒဏ်ရာကစိုးရိမ်ရတဲ့ အခြေအနေမရှိဘူးလို့ သိရပါတယ်။

မန္တလေးမြို့မှာ ငလျင်ကြီးဒဏ်ထိထားပြီး ဆက်လက်နေထိုင်ဖို့မသင့်တဲ့ အဆောက်အဦတွေဖြိုချရှင်းလင်းရာက လူသေဆုံးတာနဲ့ ထိခိုက်ဒဏ်ရာရရှိတာတွေ မကြာခဏဖြစ်ပွားနေတာပါ။

လက်ရှိမှာ မန္တလေးမြို့က ငလျင်ဒဏ်သင့် အဆောက်အဦတွေကို ဖြိုချနေဆဲဖြစ်ပြီး ငလျင်ငယ်တွေလည်းဆက်တိုက်လှုပ်ခတ်နေကာ ဒီကနေ့ မနက် ၈ နာရီ ၅၉ မိနစ်မှာပဲ ငလျင်ငယ်တခုထပ်မံလှုပ်ခတ်သွားတယ်လို့ နောက်ထပ်မန္တလေးမြို့ခံတဦးက ပြောပါတယ်။

” (လှုပ်တာက) တချက်တည်းမို့သာပဲ အသံရော၊ ထပြေးရပြီတောင်ထင်တာ “ လို့ ပြောပါတယ်။

ငလျင်လှုပ်ခတ်ခဲ့မှုနဲ့ပတ်သက်ပြီး ဗဟိုပြုနေရာနဲ့ အင်အားဘယ်လောက်ဆိုတာကိုတော့ မိုးလေဝသက ထုတ်ပြန်တာမတွေ့ရသေးပါဘူး။

အောက်တိုဘာ ၂၁ ရက်နေ့ကလည်း မန္တလေးမြို့၊ ချမ်းအေးသာစံမြို့နယ်မှာ ငလျင်ထိ အဆောက်အဦ ဖြိုချရာကနေ အနီးနားကနေအိမ်တွေပိပြီး လူတဦး ပိတ်မိခဲ့ပါသေးတယ်။

မန္တလေး၊ အောက်တိုဘာ ၁၆၊ ၂၀၂၅။

မန္တလေးတိုင်းမှာ အောက်တိုဘာ ၁၅ ရက်နဲ့ ၁၆ ရက်ဒီကနေ့မနက်မှာ ငလျင်ထပ်မံလှုပ်ခတ်ခဲ့တယ်လို့ မန္တလေးမြို့ခံတွေဆီကသိရပါတယ်။

အောက်တိုဘာ ၁၅ ရက်ည ၁၂ နာရီ ၄၂ မိနစ်မှာ ပြင်ဦးလွင်မြို့နယ်၊ သုံးတောင်ရွာကို အခြေပြုပြီး ပြင်းအား ၃.၅ ရှိငလျင်လှုပ်ခတ်ခဲ့ပြီး ဒီမနက် ၉ နာရီ ၁၆ မိနစ်မှာ ငလျင်ငယ်တခုထပ်မံလှုပ်ခတ်ခဲ့တာဖြစ်ပြီး ထိခိုက်ပျက်စီးမှုတွေတော့မရှိခဲ့ဘူးလို့ သိရပါတယ်။

“မနက်ရော၊ ညရော လှုပ်တာဆိုတော့ အခုပြန်စိုးရိမ်နေရတယ်။ အသံနဲ့ပြင်းအားလည်း တော်တော်သိသာတယ်။ အိမ်ကို ကိုင်ပြီးဆွဲနှဲ့လိုက်သလိုပဲ”လို့ မြို့ခံအမျိုးသမီးတဦးက ပြောပါတယ်။

မနေ့ကငလျင်မလှုပ်ခင် ဆိုရှယ်မီဒီယာမှာ ငလျင်ကြီးထပ်မံလှုပ်ခတ်နိုင်ကြောင်း သတင်းတွေပျံ့နှံ့ခဲ့တာကြောင့် ဒေသခံတွေလည်းစိုးရိမ်ခဲ့ရပြီး ဒီငလျင်သတိပေးချက်နဲ့ ပတ်သက်ပြီးတော့ နောက်ထပ် ငလျင်ပညာရှင်တဦးကတော့ လတ်တလောငလျင်ကြီးလှုပ်ခတ်ဖို့ မရှိနိုင်သေးတာကြောင့် စိုးရိမ်စိတ်မလွန်ကဲကြဖို့ကို ပြန်လည်သတိပေးထားပါတယ်။

မတ် ၂၈ ရက်မှာလှုပ်ခတ်ခဲ့တဲ့ငလျင်ကြီးကြောင့် ‌မန္တလးမြို့မှာပျက်စီးခဲ့တဲ့ ဈေးနဲ့ အဆောက်အဦတွေ ယခုအချိန်ထိပြန်လည်ပြုပြင်တည်ဆောက်နေရဆဲဖြစ်ကာ နောက်ဆက်တွဲ ငလျင်ငယ်တွေလည်း ဆက်တိုက်လှုပ်ခတ်နေဆဲဖြစ်ပါတယ်။

ဒါ့အပြင် ငလျင်ကြောင့်လူအစုလိုက်အပြုံလိုက်သေဆုံးခဲ့ပြီး ပြိုကျပျက်စီးခဲ့တဲ့ SKY Villa ကွန်ဒို အောက်ကနေလည်း လူ ၂၀၇ ယောက် အလောင်းတွေပြန်တွေ့ခဲ့ပြီးနောက် စက်တင်ဘာ ၁၅ ရက်‌ကစလို့ အလောင်းရှာဖွေမှုကို ရပ်ဆိုင်းလိုက်တယ်လို့ သိရပါတယ်။

သတင်း – မြတ်