ဆော၊ မေ ၁၊ ၂၀၂၅။

မကွေးတိုင်း၊ ဂန့်ဂေါခရိုင်၊ ဆောမြို့နယ်၊ အညာကတင်းကျေးရွာကို စစ်ကောင်စီတပ်က မေ ၁ ရက်ဒီကနေ့မနက် ၁၁ နာရီခန့်မှာ လေကြောင်းကနေ ဗုံးကြဲတိုက်ခိုက်ခဲ့တာကြောင့် ကလေး ၁ ဦးအပါအဝင် အမျိုးသမီး ၄ ဦးသေဆုံးခဲ့တယ်လို့ ဒေသခံတွေဆီကသိရပါတယ်။

တိုက်ခိုက်ရေးလေယာဥ် ၁ စီးနဲ့ အညာကတင်းကျေးရွာရဲ့ အလယ်တန်းစာသင်ကျောင်းအနီးကို ပေါင် ၂၅၀ ဗုံးသီး ၂လုံး ကြဲချခဲ့တာလို့ ဆိုပါတယ်။

“သေဆုံးသူတွေက မိသားစု၀င်တွေတော့မဟုတ်ပါဘူးခင်ဗျ။ စာသင်ကျောင်အနီးမှာရှိတဲ့ အိမ်တွေက ပြည်သူတွေပါ။ အမျိုးသမီးကြီး ၃ ယောက်က ပွဲချင်းပြီးသေတာ။ ကလေးမလေးကတော့ ဆေးခန်းပို့တဲ့လမ်းမှာသေသွားတာ”လို့ ယောအလင်းတန်းမှတာဝန်ရှိသူ အမျိုးသားတဦးက ပြောပါတယ်။

သေဆုံးသူ ၄ ဦးမှာ ဒေါ်မကြည်လေး ၆၅ နှစ်၊ ဒေါ်တင်တင်ခိုင် ၅၂ နှစ်၊ မပြားသာ ၃၈ နှစ်နဲ့ မခွန်းဆက်ချို ၈ နှစ်တို့ဖြစ်ကြပါတယ်။

ဒါ့အပြင် ဗုံးကြဲမှုကြောင့် စာသင်ကျောင်းအဆောက်အဦအပါအဝင် လူနေအိမ် ၅ လုံး ပြိုကျပျက်စီးခဲ့တယ်လို့ သိရပါတယ်။

ပြီးခဲ့တဲ့ ၂၀၂၄၊ မေ ၁၄ ရက်ကလည်း ဆောမြို့နယ်၊ ကျင်းလိန်ကျေးရွာအုပ်စု၊ တောမကျေးရွာကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသား ၃ ဦး၊ အမျိုးသမီး ၄ ဦးသေဆုံးခဲ့တယ်လို့သိရပါတယ်။

စာတည်း – လင်း

ကလေး၊ မတ် ၂၅၊ ၂၀၂၅။

မကွေးတိုင်း၊ ဂန့်ဂေါမြို့နယ်၊ နှမ်းခါးကျေးရွာကို စစ်ကောင်စီရဲ့ဗုံးကြဲတိုက်ခိုက်မှုအတွင်း သေဆုံးသွားတဲ့ CDM ဆရာဝန် ဒေါက်တာမြစိုးအောင်မိသားစုသေဆုံးခဲ့ရမှုအတွက် ဝမ်းနည်းခြင်းသပိတ်တခုကို ကလေးမြို့နယ်တနေရာမှာ ပြုလုပ်ခဲ့ကြတယ်လို့ ကလေးမြို့လူထုတိုက်ပွဲဦးဆောင်ကာ်မတီဆီက သိရပါတယ်။

မတ် ၂၄ ရက်ညပိုင်းမှာ ကလေးမြို့လူထုတိုက်ပွဲဦးဆောင်ကာ်မတီက ဦးဆောင်းပြီး ညသပိတ် ပြုလုပ်ခဲ့တာဖြစ်တယ်လို့ ကော်မတီတာဝန်ရှိသူအမျိုးသမီးတဦးကဆိုပါတယ်။

မတ် ၂၂ ရက်မှာ နှမ်းခါးရွာဆေးပေးခန်းဗုံးကြဲခံရလို့ သေဆုံးသူ ၁၁ ဦးအထဲမှာ ဒေါက်တာ မြစိုးအောင်၊ ကိုယ်ဝန်လေးလရှိနေတဲ့ ဇနီးဖြစ်သူ အထက်တန်းသူနာပြု ဒေါ် ခိုင်နှင်းဝေ၊ သားဖြစ်သူ ၅ နှစ်အရွယ် ကလေးငယ်တို့ တနေရာတည်းမှာပဲ သေဆုံးခဲ့ကြတာပါ။

အကြမ်းမဖက်အာဏာဖီဆန်ကြရင်း အကြမ်းဖက်သတ်ဖြတ်ခံရသူတွေ၊ တပါးသူရဲ့အသက်ကို ကယ်တင်ရင်း အသက်ပေးဆပ်ခဲ့ကြရသူတွေအားလုံးရဲ့ ရဲစွမ်းသတ္တိနဲ့ပြတ်သားခိုင်မာတဲ့ စိတ်ဓါတ်၊ ခံယူချက်နဲ့ လုပ်ရပ်တွေအပေါ် CDM အားလုံးနဲ့ထပ်တူလေးစားဂုဏ်ယူကြောင်းကိုလည်း ကလေးမြို့ လူထုတိုက်ပွဲဦးဆောင်ကော်မတီက ဆိုထားပါတယ်။

ဒါ့အပြင် စစ်ရေးပစ်မှတ်မဟုတ်တဲ့ နှမ်းခါးရွာဆေးပေးခန်းကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တဲ့ဖြစ်စဉ်အပေါ် ပြည်သူလူထုက နည်းလမ်းပေါင်းစုံနဲ့ ဝိုင်းဝန်းရှုတ်ချကြဖို့လည်း တိုက်တွန်းထားပါသေးတယ်။

စာတည်း – လင်း

မကွေး၊ ဒီဇင်ဘာ ၂၃၊ ၂၀၂၂။

မကွေးတိုင်း၊ ဂန့်ဂေါခရိုင်၊ ဂန့်ဂေါမြို့နယ်အတွင်းရှိ ကြားကာလပညာရေးသင်ယူနေတဲ့ ကျောင်းသားကျောင်းသူတွေရဲ့ ပညာရေးစုံညီပွဲတော်ကို ဒီဇင်ဘာလ ၂၂ ရက်မနေ့ကပြုလုပ်ခဲ့တယ်လို့ သိရပါတယ်။

မုန့်ကိုက်၊ ထိုင်ခုံလု၊ အိတ်စွပ်၊ အပြေး၊ ဘော်လီဘောစတဲ့ အားကစားနည်း ၉ မျိုးပါဝင်ပြီး ကျောင်းသားကျောင်းသူစုစုပေါင်း ၄၀ ဦးခန့် ပါဝင်ကစားကြတယ်လို့ သိရပါတယ်။

“ကျောင်းသားကျောင်းသူတွေရဲ့ အားကစားစိတ်ဓာတ်ရှင်သန်ဖို့၊ စုပေါင်းလုပ်ဆောင်တတ်တဲ့အမူအကျင့်တွေရဖို့၊ အားကစားစည်းကမ်းကိုလေးစားလိုက်နာတတ်ပြီး အပြင်မှာလည်း ဥပဒေကိုလေးစားတတ်တဲ့ လူငယ်တွေဖြစ်စေဖို့၊ ကျန်းမာကြံ့ခိုင်ဖို့နဲ့ ကလေးတွေ စိတ်ရွှင်လန်းပျော်ပါးစေဖို့ ရည်ရွယ်ကျင်းပဖြစ်တာပါ” လို့ ဂန့်ဂေါမြို့နယ်ပညာရေးဘုတ်အဖွဲ့မှ တာဝန်ရှိသူက ပြောပါတယ်။

ပြည်သူတွေအနေနဲ့ ပြည်သူ့အစိုးရကိုသစ္စာခံပြီး ကြားကာလပညာရေးကို ယုံယုံကြည်ကြည်နဲ့ အပ်နှံပေးတဲ့အတွက်ကျေးဇူးတင်သလို ကုလသမဂ္ဂရဲ့ လုံခြုံရေးကောင်စီဆုံးဖြတ်ချက် NDAA အပါဝင် သံတမန်ရေးအောင်ပွဲတွေနဲ့ NUG&EROs တွေရဲ့ထိုးစစ်တွေကြောင့် စကစ မကြာမီကျရှုံးတော့မှာမို့ ပြည်သူအားလုံးဂရုစိုက်ပြီး အောင်ပွဲကို အတူတူဆင်နွှဲဖို့အားတင်းကြဖို့ကိုလည်း သူကဆက်ပြောပါတယ်။

အဲဒီကျောင်းမှာ အထက်တန်းအဆင့်အထိ ကျောင်းသူကျောင်းသား ၂၀၀ ကျော်ရှိပြီး CDM ဆရာ/ဆရာမ ၁၃ ဦး၊ စေတနာဝန်ထမ်း ၉ ဦးနဲ့ ပညာသင်ကြားပေးနေတာလို့သိရကာ စနစ်သစ်ပုံနိပ်စာအုပ်အခက်အခဲ ရှိနေတယ်လို့လည်း သိရပါတယ်။