မြေလတ်အသံ၊ နိုဝင်ဘာ ၁၆၊ ၂၀၂၅။

ထိုင်းနိုင်ငံ၊ ဘန်ကောက်မြို့၊ လကဘန်မြို့နယ်၊ ခလောင်ဆောင်တွန်းရပ်ကွက်မှာ စွန့်ပစ်ခံထားရတဲ့ မွေးကင်းစကလေးငယ်တဦးကို နိုဝင်ဘာ ၁၅ ရက် နေ့လယ် ၁၁ နာရီမှာ ကယ်ဆယ်နိုင်ခဲ့တယ်လို့သိရပါတယ်။

အဲ့ဒီကလေးငယ်ဟာ မွေးကင်းစမိန်းကလေးဖြစ်ပြီး အဆောက်အဦတခုရဲ့ တတိယထပ်ရှိ အိမ်သာရေဆွဲခွက်အတွင်း စွန့်ပစ်ခံထားရတာဖြစ်ပြီး သတင်းပေးပို့ချက်အရ လကဘန်ရဲတပ်ဖွဲ့မှ သွားရောက်စုံစမ်းစစ်ဆေး တွေ့ရှိခဲ့တာလို့ ဆိုပါတယ်။

စစ်ဆေးချက်တွေအရ ကလေးငယ်ဟာ အသက်ရှင်လျက်ရှိနေသေးတာကြောင့် ကယ်ဆယ်ရေးအဖွဲ့ကို ခေါ်ယူကာ ကလေးငယ် ဆေးကုသမှုခံယူနိုင်ရန် ဆေးရုံကိုပို့ဆောင်ပေးခဲ့ပြီး ရဲတပ်ဖွဲ့က သက်ဆိုင်ရာ စုံစမ်းစစ်ဆေးမှုတွေ ဆက်လက်လုပ်ဆောင်သွားမယ်လို့ သိရပါတယ်။

Ref: Matichon , Khaosod

မြေလတ်အသံ၊ ဇူလိုင် ၂၁၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်မှာ စစ်ကောင်စီတပ်က ပစ်ခတ်လိုက်တဲ့ လက်နက်ကြီးကျည်တွေ စာသင်ကျောင်းအနီးကို ကျရောက်ပေါက်ကွဲခဲ့တာကြောင့် ၇ နှစ်ကလေးငယ် ၁ ဦးသေဆုံးခဲ့တယ်လို့ ဒေသခံတွေက ပြောပါတယ်။

ဇူလိုင် ၂၁ ရက်မနက် ၉ နာရီကျော်မှာ ချောင်းဦးမြို့ ထွေအုပ်ရုံးရှိစစ်ကောင်စီအထိုင်စခန်းကနေ လက်နက်ကြီး ၄ လုံးပစ်ခတ်ခဲ့ရာ ကျည် ၂ လုံးမှာ မှန်ချိုကျေးရွာတောင်ပိုင်းရှိ စာသင်ကျောင်း(အလက) အနီး ကျရောက်ပေါက်ကွဲခဲ့တာလို့ ဆိုပါတယ်။

“တိုက်ပွဲမရှိပါဘူး။ ကျောင်းက မုန့်စားကျောင်းဆင်းချိန်ပါ။ ကျောင်းထဲမကျဘူး။ သေတဲ့ကလေးက လက်နက်ကြီးထုတယ်ဆိုလို့ အိမ်ပြန်ပြေးတာလမ်းမှာထိတာ။ တခြားကလေးနှစ်ယောက်က ကျောင်းနားတလုံးကျလို့ အစစင်တာ”လို့ မြေပြင်အခြေအနေကို သိရှိတဲ့ အမျိုးသားတဦးကပြောပါတယ်။

သေဆုံးသူမှာ ၇ နှစ်အရွယ်ကျောင်းသူဖြစ်ပြီး ဒဏ်ရာရသူတွေကတော့ ၅ နှစ်နဲ့ ၆ နှစ်အရွယ် ကျောင်းသား ၂ ဦးတို့ဖြစ်ပြီး ဒဏ်ရာမစိုးရိမ်ရဘူးလို့ ဆိုပါတယ်။

လက်နက်ကြီးကျရောက်လာခဲ့တာကြောင့် ချောင်းဦးမြို့နဲ့ ၃မိုင်ကျော်ကွာ၊ အိမ်ခြေ ၉၀၀ ခန့်ရှိတဲ့ မှန်ချိုကျေးရွာက ဒေသခံတွေထွက်ပြေးတိမ်းရှောင်နေကြရပါတယ်။

ပြီးခဲ့တဲ့ မေ ၁၅ ရက်ကလည်း ချောင်းဦးမြို့နယ် အထွေထွေအုပ်ချုပ်ရေးရုံးမှာ တပ်စွဲထားတဲ့ စစ်ကောင်စီတပ်က လက်နက်ကြီး ၃ လုံးပစ်ခတ်ခဲ့ရာ ၂ လုံးမှာ ငါးလုံးတင်ကျေးရွာကို ကျရောက်ပေါက်ကွဲခဲ့တာကြောင့် ဒေသခံ ၅ ဦးသေဆုံးခဲ့တယ်လို့ သိရပါတယ်။

စာတည်း – လင်း

ပဲခူး၊ ဇူလိုင် ၁၉၊ ၂၀၂၅။

ပဲခူးမြို့၊ ဥဿာမြို့သစ်၊ နယ်မြေ ၅၊ ရပ်ကွက်ကြီး ၁၊ ရေစက်လမ်းထိပ်မှာ ပြုတ်ကျနေတဲ့ ဓာတ်ကြိုးကို ခလုတ်တိုက်တဲ့ကလေးငယ်တဦး ဓာတ်လိုက်သေဆုံးသွားတယ်လို့ ဒေသခံအမျိုးသမီးတဦးဆီက သိရပါတယ်။

သေဆုံးသူဟာ ရွှေဘုန်းပွင့် ဘုန်းတော်ကြီးစာသင်ကျောင်းမှ Grade 1 တက်ရောက်နေတဲ့ ရပ်ကွက်ကြီး ၁ မှာနေထိုင်သူ အသက် ၇ နှစ်အရွယ်၊ မောင်ကျော်ကျော်မျိုး ဆိုသူဖြစ်ပြီး ဇူလိုင် ၁၈ ရက် ညနေ ၄ နာရီကျော်ခန့်မှာ သေဆုံးသွားတာလို့ ဆိုပါတယ်။

“ဓာတ်ကြိုး လမ်းမှာပြတ်ကျနေတာကို ကလေးက ခလုတ်တိုက်လဲကျပြီး ဓာတ်လိုက်နေတာ။ ဘယ်သူမှလည်း ဆွဲလို့မရဘူးထင်ပါတယ်။ သေမှပဲ သိကြတာ။ ကျောင်းကအပြန်ကို သူအမေက ခြင်ဆေးခွေဝယ်ခိုင်းတာ။”လို့ ဒေသခံအမျိုးသမီးတဦးက ပြောပါတယ်။

ပြုတ်ကျနေတဲ့ ဓာတ်ကြိုးက ရပ်ကွက်အတွင်းမီးတိုင်တွေကို သွယ်တန်းထားတဲ့ကြိုးမျိုးဖြစ်ပြီး ပြတ်ကျနေတာ ၃ ရက်ခန့်ရှိပြီလို့သိရကာ ရပ်ကွက်က သက်ဆိုင်ရာမြို့နယ် EPC ရုံးကို ဆက်သွယ် အကြောင်းကြားထားပေမယ့် လာရောက်ပြုပြင်ပေးတာမျိုးမရှိဘူးလို့ ဆိုပါတယ်။

သေဆုံးသွားတဲ့ ကလေးငယ်ရဲ့အလောင်းကိုတော့ ဒေသခံလူမှုကူညီရေးအသင်းကကောက်ယူပြီးနောက် ပဲခူးဆေးရုံကို ပို့ဆောင်ပေးရကာ စစ်ဆေးမှုပြုလုပ်ပြီး နေ့ချင်းနေအိမ်ကို ပြန်သယ်ခဲ့ရတယ်လို့ သိရပါတယ်။

ပြီးခဲ့တဲ့ နှစ် ဇူလိုင် ၃၀ ရက်ကလည်း ပဲခူးမြို့ ရေကြီးနေချိန် ပဲခူးမြို့၊ အမှတ်(၁) ကျောင်းရှေ့၊ ရွှေမော်ဓောဘုရားလမ်းပေါ်မှာ စက်ဘီးစီးလာတဲ့လူငယ်တဦးက လမ်းကူးဖို့စောင့်နေရင်း အနီးကဓာတ်တိုင်ကို ကိုင်မိရာမှ ဓာတ်လိုက်သေဆုံးခဲ့သေးတယ်လို့ သိရပါတယ်။

စာတည်း – လင်း

ပခုက္ကူ၊ မေ ၄၊ ၂၀၂၅။

မကွေးတိုင်း၊ ပခုက္ကုမြိူ့နယ်၊ မီးသွေးကန်ကျေးရွာမှာ တပ်မ ၁၀၁ ကပစ်တဲ့ လက်နက်ကြီးမှန်လို့ ၂ နှစ်ခွဲအရွယ် ကလေးငယ်သေဆုံးပြီး ၃ ဦးဒဏ်ရာရကာ ရွာခံ ၇ ဦးကိုလည်း စစ်ကောင်စီတပ်သားတွေ ဖမ်းသွားတယ်လို့ ရွာခံတွေဆီက သိရပါတယ်။

မေ ၂ ရက်ညနေ ၄ နာရီခွဲမှာ ပခုက္ကူ အခြေစိုက် တပ်မ ၁၀၁ ကနေ မီးသွေးကန်ကျေးရွာကို လက်နက်ကြီး ၄ လုံးပစ်ခတ်ခဲ့ရာ ကျေးရွာထဲရှိ ဒေါ်မြင့်မြင့်ကြိုင်ရဲ့ နေအိမ်ခြံဝင်းအတွင်းကို ကျရောက်ပေါက်ကွဲခဲ့တယ်လို့ဆိုပါတယ်။

“လက်နက်ကြီး ၄ ချက်ရမ်းသမ်းထုတာမှာ နောက်ဆုံးအလုံးက ခြံထဲကျပြီး ၂ နှစ်ခွဲကလေးငယ်ရယ်။ သူ့အမေရယ်။ တူမလေးရယ်။ လမ်းသွားတဲ့အဒေါ်ကြီးတယောက်ရယ်ထိတာ။ တော်တော်လေး ဆိုးတယ်။ ကလေးကဆို ဗိုက်ထဲက အူထွက်ပြီးသေတာ။ သဂြိုဟ်ပြီးသွားပြီ” လို့ ရွာခံတဦး ကပြောပါတယ်။

လက်နက်ကြီးထိမှန်လို့ အသက် ၂၇ နှစ်အရွယ် မသဇင်မြင့် ပေါင်အသားစပဲ့ထွက်၊ သမီးဖြစ်သူ အသက် ၂ နှစ်ခွဲအရွယ် မဝေဇင်ထက်မှာ ဝမ်းဗိုက်အူထွက်ဒဏ်ရာရပြီးသေဆုံး၊ တူမဖြစ်သူ အသက် ၄ နှစ်အရွယ် မအိမ့်မှူးသွယ်နဲ့ လမ်းသွားလမ်းလာစျေးသည် အသက် ၄၀ နှစ်အရွယ် ဒေါ်ဝင်းမာတို့မှာ ထိခိုက်ဒဏ်ရာရသွားပါတယ်။

သေဆုံးဒဏ်ရာရသွားသူတွေကိုတော့ လက်နက်ကြီးမပစ်ခင်ကျေးရွာထဲကို ရောက်ရှိနေတဲ့ စစ်ကောင်စီ တပ်သား ၅၀ ခန့်က ပခုက္ကူဆေးရုံကိုခေါ်သွားပြီး အလောင်းကိုတော့ မေ ၃ ရက်မှာ နေအိမ်ကို ပြန်သယ်လာပြီး နာရေးပြုလုပ်ခဲ့တယ်လို့ ဆိုပါတယ်။

“လက်နက်ကြီးမပစ်ခင်မှာ စစ်သား ၅၀ လောက်က ရွာထဲရှိနေတာ။ ပစ်ခတ်မှုလည်းပြီးကော ထိခိုက်သူတွေကို သူတို့ပဲခေါ်သွားတယ်။ ရွာသား ၇ ယောက်ကိုလည်း ဖမ်းသွားတယ်။ စကစ တပ်သားတွေရွာထဲရောက်လာချိန်မှာ သောက်စားပြီးမူးနေကြတာ”လို့ အထက်ပါရွာခံက ဆက်ပြောပါတယ်။

လက်နက်ကြီးပစ်ခတ်ပြီးနောက် အဲ့ဒီနေ့မှာပဲ ရွာခံအမျိုးသားတွေဖြစ်တဲ့ အသက် ၂၄ နှစ်အရွယ် ကိုအောင်ကျော်မိုး၊ ၄၅ နှစ်အရွယ် ကိုသိန်းမြင့်ထွန်း၊ ဦးတင်ထွန်းအောင်၊ ၁၂ နှစ်အရွယ် အာကာဘိုဘို၊ ၃၁ နှစ်အရွယ် ကိုစိုးစိုးသန့်၊ ၁၂ နှစ်အရွယ် စိုင်းထီဆိုင်၊ ၁၃ နှစ်အရွယ် ဟိန်းဝေယံထွန်း တို့ ၇ ဦးကို စစ်ကောင်စီတပ်သားတွေက ပခုက္ကူရဲစခန်းဆီ ဖမ်းဆီးသွားတယ်လို့ ဆိုပါတယ်။

ဖမ်းဆီးခံရသူတွေက မေ ၄ ရက် ဒီညနေပိုင်းထိပြန်မလွတ်လာသေးဘူးလို့ အထက်ပါရွာခံက ပြောပါတယ်။

မီးသွေးကန်ကျေးရွာက အိမ်ခြေ ၂၀၀ ဝန်းကျင် လူဦးရေ ၇၀၀ ကျော်ရှိတဲ့ကျေးရွာဖြစ်ပြီး ကျေးရွာထဲမှာ ယခုလိုလက်နက်ကြီးကျရောက်ပေါက်ကွဲပြီး လူထိခိုက်သေဆုံးတာလည်း ပထမဆုံးအကြိမ်ဖြစ်တယ်လို့ သိရပါတယ်။

စာတည်း – လင်း

စစ်ကိုင်း၊ ဖေဖော်ဝါရီ ၁၉၊ ၂၀၂၅။

စစ်ကိုင်းတိုင်း၊ ကနီမြို့နယ်နဲ့ ချောင်းဦးမြို့နယ်မှာ စစ်ကောင်စီတပ်ဖွဲ့ဝင်တွေက စက်တပ်လေထီးနဲ့ဗုံးကြဲတာ၊ လက်နက်ကြီးနဲ့ ပစ်ခတ်တာတွေ လုပ်ခဲ့ပြီး အရပ်သားပြည်သူ ၇ ဦးသေဆုံးကာ ဒဏ်ရာရရှိသူ ၂၀ ဝန်းကျင်ရှိတယ်လို့ ဒေသခံတွေဆီက သိရပါတယ်။

ဖေဖော်ဝါရီ ၁၈ ရက် မနေ့ နေ့လယ်ပိုင်းမှာ မုံရွာနမခကနေ တက်လာတဲ့ စက်တပ်လေထီးနဲ့ ကနီမြို့နယ်၊ ချောင်းမကျေးရွာကို ဗုံး ၂ လုံးကြဲချခဲ့ပြီး ပြည်သူ ၃ ဦး ပွဲချင်းပြီးသေဆုံးကာ ဆေးကုသနေရင်း ၂ ဦး ထပ်မံသေဆုံးခဲ့တာကြောင့် စုစုပေါင်း ၅ ဦးသေဆုံးခဲ့တယ်လို့ ဆိုပါတယ်။

အဆိုပါ ဗုံးကြဲတိုက်ခိုက်မှုအတွင်း ကိုနေမင်းဝင်း၊ ကိုဟန်ကိုကို၊ ကိုချစ်ဦး၊ ဒေါ်မြတ်ဌေးနဲ့ အချက်အလက်စုံစမ်းဆဲ အမျိုးသား ၁ ဦးတို့ သေဆုံးခဲ့ကာ ၁၅ ယောက်ကျော် ဒဏ်ရာရရှိထားပြီး သေဆုံးသူတွေထဲမှာ အသက် ၁၇ နှစ်အရွယ် လူငယ် ၁ ဦးလည်း ပါဝင်တယ်လို့ သိရပါတယ်။

“ထိတာ တော်တော်များတယ်၊ ဘော်လန်ဒီယာဆရာမ ၁ ယောက်လည်း တကိုယ်လုံးအနှံ့ ဒဏ်ရာရတယ်။ G 11 ကျောင်းသား ၁ ယောက်တော့ (သေဆုံးတာ) သေချာတယ်။”လို့ ကနီဒေသခံ အမျိုးသမီးတဦးက ပြောပါတယ်။

ဒါ့အပြင် အဲ့ဒီနေ့ ညနေ ၆ နာရီဝန်းကျင်မှာလည်း ချောင်းဦးမြို့နယ်၊ မြပုလဲဂိတ်မှာရှိတဲ့ စစ်ကောင်စီတပ်ဖွဲ့ဝင်တွေက လက်နက်ကြီးနဲ့ပစ်ခတ်လို့ ကျီကုန်းကျေးရွာက ပြည်သူ ၂ ဦး ထိမှန်သေဆုံးခဲ့ပြီး အသက် ၅ နှစ်အရွယ် ကလေးငယ် ၁ ဦးအပါအဝင် ၃ ဦး ဒဏ်ရာရခဲ့တယ်လို့ ဆိုပါတယ်။

ပြီးခဲ့တဲ့ ဖေဖော်ဝါရီ ၁၂ ရက်ကနေ ၁၄ ရက်အထိ ၃ ရက်တာအတွင်း ကလေးမြို့နယ်၊ မုံရွာမြို့နယ်နဲ့ ချောင်းဦးမြို့နယ်မှာ စစ်ကောင်စီတပ်ဖွဲ့ဝင်တွေရဲ့ လေကြောင်းတိုက်ခိုက်မှုတွေကြောင့် ကလေးငယ် ၆ ဦးအပါ အရပ်သား ပြည်သူ ၁၅ ဦး သေဆုံးခဲ့တယ်လို့ သိရပါတယ်။

◼ ကလေးငယ် ၆ ဦးအပါ အရပ်သား ပြည်သူ ၁၅ ဦး သေဆုံး

စစ်ကိုင်း၊ ဖေဖော်ဝါရီ ၁၈၊ ၂၀၂၅။

စစ်ကိုင်းတိုင်း၊ ကလေးမြို့နယ်၊ မုံရွာမြို့နယ်နဲ့ ချောင်းဦးမြို့နယ်မှာ စစ်ကောင်စီတပ်ဖွဲ့ဝင်တွေက ၃ ရက်အတွင်း လေကြောင်းနဲ့ ဗုံးအလုံး ၂၀၀ ကျော် ကြဲချခဲ့တာကြောင့် ကလေးငယ် ၆ ဦးအပါ အရပ်သား ပြည်သူ ၁၅ ဦး သေဆုံးခဲ့တယ်လို့ အမျိုးသားညီညွတ်ရေးအစိုးရ လူ့အခွင့်အရေးဆိုင်ရာ ဝန်ကြီးဌာနက ဖေဖော်ဝါရီ ၁၇ ရက်နေ့မှာ ထုတ်ပြန်ထားပါတယ်။

ဖေဖော်ဝါရီ ၁၂ ရက်နေ့ မနက်ပိုင်းမှာ မုံရွာမြို့နယ်၊ ညောင်ဖြူပင်ရွာနဲ့ သစ်ဆိမ့်ရွာအနီးဝန်းကျင်က ကျေးရွာတွေကို ဗုံးသီး ၄၈ လုံး၊ ညပိုင်းမှာတော့ မုံရွာမြို့နယ်နဲ့ ချောင်းဦးမြို့နယ်ထဲက ကျေးရွာတချို့ကို ထောက်ပို့ယာဥ်နဲ့ ၉ ကြိမ် ဗုံးကြဲခဲ့သလို အဲ့ဒီနေ့တရက်ထဲမှာ ကလေးမြို့နယ် တောင်ပိုင်းက ကျေးရွာတွေကို ဗုံးသီး ၉၄ လုံး ကြဲချခဲ့တယ်လို့ ဆိုပါတယ်။

ဖေဖော်ဝါရီ ၁၂ ရက်နေ့ လေကြောင်းတိုက်ခိုက်မှုအတွင်း မုံရွာမြို့နယ် စစ်ရှောင်စခန်းတခုက ကလေးငယ် ၂ ဦးနဲ့ အမျိုးသား ၁ ဦး၊ ညောင်ဖြူပင်ရွာနဲ့ သစ်ဆိမ့်ရွာက ပြည်သူ ၃ ဦးသေဆုံးပြီး ၂၃ ဦး ဒဏ်ရာရခဲ့တဲ့အပြင် မုံရွာမြို့နယ် ဘုဘရွာမှာတော့ လက်နက်ကြီးကျည်ထိမှန်လို့ အသက် ၁၁ နှစ်အရွယ် ကလေး ၁ ဦးအပါ ၂ ဦး သေဆုံးခဲ့တယ်လို့ သိရပါတယ်။

ဖေဖော်ဝါရီ ၁၃ ရက်နေ့မှာတော့ မုံရွာမြို့နယ်၊ ကိုးရှင်းကျွန်းရွာကို လေကြောင်းနဲ့ ဗုံးကြဲလို့ အသက် ၁၃ နှစ်အရွယ် ကလေး ၁ ဦး၊ ချောင်းဦးမြို့နယ်၊ ညောင်ပင်သာရွာကို စက်တပ်လေထီးနဲ့ ဗုံးကြဲလို့ အသက် ၁၀ နှစ်အရွယ် ကလေး ၁ ဦးနဲ့ ပြည်သူ ၁ ဦးသေဆုံးကာ စုစုပေါင်း ပြည်သူ ၆ ဦး ဒဏ်ရာရခဲ့တယ်လို့ ဆိုပါတယ်။

အဲ့ဒီနေ့မှာပဲ ကလေးမြို့နယ် တောင်ပိုင်းက ဟားခါးလေး၊ ရှားဖို၊ အရှေ့စည်း၊ ဒိုးနွယ် စတဲ့ကျေးရွာတွေကိုလည်း Y12နဲ့ ဗုံးသီး ၄၀ ကျော် ကြဲချခဲ့တယ်လို့ ထုတ်ပြန်ချက်မှာ ပါရှိပါတယ်။

ဖေဖော်ဝါရီ ၁၄ ရက်နေ့ မနက် ၁၀ နာရီခွဲဝန်းကျင်မှာတော့ ကလေးမြို့နယ် တောင်ပိုင်းက နတ်ချောင်းတိုက်နယ်ဆေးရုံကို ဗုံး ၃၀ ကျော်ကြဲချခဲ့တာကြောင့် ဆေးရုံအဆောက်အဦတချို့ ပျက်စီးခဲ့ပြီး ည ၁၀ နာရီမှာတော့ သံဖိုရွာကို ဗုံးကြဲခဲ့ကာ ကလေးငယ် ၁ ဦးအပါအဝင် ပြည်သူ ၄ ဦး သေဆုံးခဲ့တယ်လို့ သိရပါတယ်။

စစ်ကောင်စီတပ်ဖွဲ့ဝင်တွေရဲ့ အရပ်သားပြည်သူတွေအပေါ် ပစ်မှတ်ထား လေကြောင်းတိုက်ခိုက်တဲ့ စစ်ရာဇဝတ်မှုတွေကို အမြန်ဆုံးရပ်တန့်နိုင်ဖို့အတွက် လေယာဥ်ဆီအပါအဝင် စစ်လက်နက်ပစ္စည်းတွေ၊ နည်းပညာတွေ၊ အထောက်အကူပစ္စည်းတွေကို တင်ပို့၊ သယ်ယူ ရောင်းချတာတွေကို အမြန်ဆုံးရပ်တန့်ဖို့၊ စစ်အုပ်စုကို အမြန်ဆုံးအရေးယူနိုင်ရေး လုပ်ဆောင်ပေးဖို့ ကုလသမဂ္ဂအပါအဝင် နိုင်ငံတကာ အစိုးရတွေကို တောင်းဆိုတယ်လို့လည်း ထုတ်ပြန်ချက်မှာ ပါရှိပါတယ်။

တောင်ငူ၊ ဧပြီ ၈၊ ၂၀၂၃။

ပဲခူးတိုင်းဒေသကြီး၊ တောင်ငူခရိုင်၊ ရေတာရှည်မြို့နယ်၊ ဆွာမြို့၊ အုန်းခြံရပ်ကွက်မှာရှိတဲ့ ရတနာအလင်းရောင်မိဘမဲ့ကျောင်းက ကလေးငယ် ၃၃၀ အတွက် အဟာရကုသိုလ်အလှူရှင်တွေ လိုအပ်နေတယ်လို့ သိရပါတယ်။

နေ့စဉ်ကျွေးမွေးနေရတာဖြစ်တဲ့အတွက် ရေရှည်ရပ်တည်ရေးမှာ အခက်ခဲများရှိနေပြီး အွန်လိုင်းကနေ လှူဒါန်းတာမျိုးတွေ ရှိနေပေမယ့် လုံလောက်မှုမရှိဘူးလို့ ယနေ့ မတ်လ ၈ ရက်နေ့မှာ ဦးဆောင်ဆရာတော်ဦးဇင်းဥူးကေတုက မြေလတ်အသံကို မိန့်ကြားပါတယ်။

“ဆန်တနေ့ကိုသုံးအိတ်လောက်ကုန်တယ်။ ဆန် ဆီ ဆား ကြက်သွန်နီ ငါးခြောက် ပဲ စတဲ့ကုန်ခြောက်တွေလည်း လိုအပ်ပါတယ်။ နေ့စဥ်နဲ့အမျှကျွေးမွေးနေရတော့ ရေရှည်ရပ်တည်ဖို့လုပ်ဆောင်နေရတယ်။ အွန်လိုင်းကနေလှူပေးတဲ့ အလှူရှင်တွေလည်း ရှိပါတယ်။ လုံလောက်တာမျိုးတော့ မရှိသေးပါဘူး။ အဲဒါကြောင့်ကလေးတွေအတွက် အာဟာရအလှူရှင်တွေ အထူးလိုအပ်နေတာပါ” လို့ ဆရာတော်က မိန့်ပါတယ်။

မိဘမဲ့ကလေးသီးသန့် ကျား/မ ၂၀၀ ကျော်ရှိပြီး တခြား စွန့်ပစ်တာ၊ လာရောက်အပ်နှံတာနဲ့ ဘုန်းတော်ကြီးသင်ပညာရေးကျောင်းသား၊ မသန်စွမ်းကလေးငယ်တွေလည်း ရှိနေတယ်လို့ သိရပါတယ်။

၂၀၁၆-၁၇ ခုနှစ်က နယ်မြေမအေးချမ်းတဲ့ ရှမ်း၊ ပလောင်၊ ရခိုင်တို့က တိုင်းရင်းသားကလေးငယ်တွေကိုလည်း ပညာသင်ပေးထားပြီး KG တန်းကနေတက္ကသိုလ်တက်တဲ့အရွယ်ထိ ကျွေးမွေးထားတယ်လို့ မိန့်ပါတယ်။

လက်ရှိအနေနဲ့ မိဘမဲ့ကလေးနဲ့ ၊ ဘုန်းတော်ကြီးသင်ပညာရေးကလေးဆိုပြီး ရှိကာ အဟာရအလှူရှင်များအနေနဲ့ နံနက်စာ -၂ သိန်းကျပ်၊ နေ့လယ်စာ – ၃ သိန်းကျပ်၊ ညနေစာ – ၁ သိန်း ၅ သောင်းကျပ်တို့ကို လှူဒါန်းနိုင်တယ်လို့ သိရပါတယ်။

ပဲခူး၊ ဖေဖော်ဝါရီ ၄၊ ၂၀၂၃။

ပဲခူးတိုင်းဒေသကြီး၊ ကျောက်ကြီးမြို့နယ်၊ နတ်သံကွင်း – ကျောက်ကြီးသွားကားလမ်း ညောင်ကုန်ကျေးရွာတံတားအနီးမှာ စျေးရောင်းထွက်လာတဲ့ကား မိုင်းထိလို့ ကလေးငယ် ၁ ဦးအပါအဝင် ၄ ဦးဒဏ်ရာရသွားတယ်လို့ သိရပါတယ်။

ဖေဖော်ဝါရီလ ၃ ရက်မနေ့ကမနက် ၇ နာရီဝန်းကျင်မှာ ကျောက်ကြီးမြို့ဘက်ကနေ ပဲနွယ်ကုန်းဘက်ကို စျေးရောင်းဖို့ထွက်လာတဲ့ လိုက်ထရပ် အဖြူရောင်ကားဟာ ညောင်ကုန်းတံတား ရှောင်ကွင်းလမ်းအေရာက်မှာ မိုင်းထိခဲ့တာလို့ ဒေသခံတဦးကပြောပါတယ်။

“သူတို့က မိသားစုလိုက် စျေးရောင်းဖို့ထွက်လာတဲ့ကားပါ။ ကျောက်ကြီးဘက်ကနေ ရွာလှည့်ရောင်းတာပေါ့။ အဲဒါ ကားဘီးက မိုင်းနင်းမိတာ။ ကား ၁ စီး ပက်လက်လန်သွားတဲ့အထိ ဖြစ်သွားတယ်။ ကံကောင်းတာက ဒဏ်ရာရတာလောက်ဘဲရှိကြတယ်” လို့ပြောပါတယ်။

ကားမိုင်းထိတာကြောင့် ကားပေါ်ပါ ကျောက်ကြီးမြို့၊ ကပ်ကျေးရပ်ကွက်နေ ဒေါ်ဇာခြည်ဦး ၄၀ နှစ်ခန့်၊ မရှင်းသန့်လင်း ၇ နှစ်၊ ဦးလွင်ကိုအောင် ၄၀ နှစ်၊ မောင်အောင်သူရမျိုးလွင် ၂၃ နှစ်တို့ ထိခိုက်ဒဏ်ရာရသွားတယ်လို့ သိရပါတယ်။

အဲဒီမိုင်းကိုတော့ ဘယ်အဖွဲ့အစည်းက ထောင်ထားတယ်ဆိုတာကို မသိရသေးသလို ထိခိုက်ဒဏ်ရာရသူတွေကိုတော့ ဒေသလူမှုကူညီရေးအသင်းတွေက ကျောက်ကြီးမြို့နယ် ပြည်သူ့ဆေးရုံကိုတင်ပို့ကာ ဆေးကုသမှုခံယူနေတယ်လို့ သိရပါတယ်။

ဇန်နဝါရီလ ၁၄ ရက်ကလည်း ကျောက်ကြီး-နတ်သံကွင်းသွားလမ်း စစ်ပင်တံတားအနီးမှာ တံတားပြင်နေတဲ့ စစ်ကောင်စီအဖွဲ့နဲ့ လက်အောက်ခံဝန်ထမ်းတွေကို လက်နက်ကိုင်အဖွဲ့ ၁ ခုက ဒရုန်းနဲ့ဗုံးချတိုက်ခိုကိချိန် ဘေးနားကဖြတ်သွားတဲ့ ငါးဒိုင်က သုံးဘီးတစီးထိမှန်ခဲ့တာကြောင့် ထိခိုက်သေဆုံးမှုတွေရှိခဲ့တယ်လို့ သိရပါတယ်။