သံတောင်

သံတောင်၊ မတ် ၁၀၊ ၂၀၂၅။

ပဲခူးတိုင်းနဲ့ ကရင်ပြည်နယ်အစပ် သံတောင်မြို့နယ်၊ ခူလောင်ကျေးရွာအနီးမှာ စစ်ကောင်စီရဲ့ရိက္ခာပို့ စစ်ကြောင်းကိုဒေသခံတော်လှန်ရေးတပ်ဖွဲ့တွေက ကြားဖြတ်တိုက်ခိုက်ခဲ့တယ်လို့ မြေပြင် အခြေအနေကိုသိရှိတဲ့ ဒေသခံကာကွယ်ရေးတပ်ဖွဲ့တာဝန်ရှိသူတဦးဆီက သိရပါတယ်။

မတ် ၉ ရက်မနက် ၉ နာရီကျော်မှာ ထန်းတပင်မြို့နယ်၊ ရေသုတ်ကြီးစစ်ကောင်စီတပ်စခန်းကနေ ခူလောင်ကျေးရွာအနီးရှိ နောစိုးစစ်ကောင်စီတပ်စခန်းကို ရိက္ခာလာပို့တဲ့ အင်အား ၅၀ ကျော်မှာ စစ်ကောင်စီစစ်ကြောင်းကို ကရင်အမျိုးသားလွတ်မြောက်ရေးတပ်မတော် – KNLA ပူးပေါင်းတပ်တွေက ကြားဖြတ်တိုက်ခိုက်ခဲ့တယ်လို့ ဆိုပါတယ်။

“တိုက်ပွဲဖြစ်တဲ့နေရာက မြန်မာအစိုးရအခေါ်ဆို သံတောင်မြို့နယ်မှာ။ KNU ဖွဲ့စည်းပုံရအခေါ်ဆို ထန်းတပင်မြို့နယ်ပါ။ တိုက်ပွဲဖြစ်တာက တောင်ပေါ်နားမှာဖြစ်တာ။ ထိတွေ့တိုက်ပွဲကတော့ သိပ်မကြာဘူး။ စကစအဖွဲ့တွေပြန်ဆုတ်သွားတာ”လို့ မြေပြင်အခြေအနေကို သိရှိထားတဲ့ ဒေသကာကွယ်ရေးအဖွဲ့ တာဝန်ရှိသူတဦးက ပြောပါတယ်။

ဒီကနေ့မတ် ၁၀ ရက်ထိစစ်ကောင်စီစစ်ကြောင်းဟာ ခူလောင်ကျေးရွာအနီးမှာရှိနေသေးပြီး စစ်ရေးတင်မာတဲ့အခြေအနေရှိနေသေးတယ်လို့ အထက်ပါတာဝန်ရှိသူကပြောပါတယ်။

ပစ်ခတ်မှုအတွင်း စစ်ကောင်စီအဖွဲ့ဝင်တွေကိုင်ဆောင်တဲ့ သေနတ် ၅ လက်ကို ပူးပေါင်းတပ်တွေဘက်ကသိမ်းဆည်းရမိပြီး ထိခိုက်သေဆုံးအခြေအနေကိုတော့ စုံစမ်းဆဲလို့ဆိုပါတယ်။

မတ် ၈ ရက်ကလည်း သံတောင်မြို့နယ်၊ သပြေညွန့်ကျေးရွာမှာတပ်စွဲထားတဲ့ စစ်ကောင်စီတပ်စခန်း ကို KNLA ပူးပေါင်းတပ်တွေက ဝင်ရောက်တိုက်ခိုက်ရာ စခန်းသိမ်းနိုင်ခဲ့ပြီးစစ်ကောင်စီဘက်က ထိခိုက်သေဆုံးသူများကာ သေနတ် ၇ လက်အပါအဝင် လက်နက်ကြီးဗုံးသီးနဲ့ မိုင်းတွေ သိမ်းဆည်းရမိခဲ့သေးတယ်လို့ သိရပါတယ်။

စာတည်း – လင်း

ယင်းမာပင်၊ ဧပြီ ၂၇၊ ၂၀၂၃။

ပဲခူးတိုင်းနဲ့ကရင်ပြည်နယ်အစပ် သံတောင်မြို့၊ ၇ မိုင်လမ်း(ကျောက်တိုင်လမ်းခွဲ)ရှိ စစ်ကောင်စီတပ်စွဲထားတဲ့နေရာနဲ့ ကင်းပုန်းနေရာတိုက်ခိုက်ခံရလို့ ထိခိုက်သေဆုံးမှုတွေရှိတယ်လို့ သံတောင် PDF အဖွဲ့ဆီက သိရပါတယ်။

ဧပြီလ ၂၅ ရက် ည ၇ နာရီလောက်မှာ အင်အား ၅၀ ကျော် တပ်စွဲထားတဲ့စခန်းနဲ့ အင်အား ၁၀ ဦးကျော် ကင်းပုန်းဝပ်နေတဲ့နေရာတွေကို လက်နက်ကြီး ၃ လုံးနဲ့ ပစ်ခတ်တိုက်ခိုက်ခဲ့တာလို့ People Defence Force – Thandaung တပ်ဖွဲ့တာဝန်ရှိသူက မြေလတ်အသံကို ပြောပါတယ်။

“သူတို့စခန်းက ကျောက်တိုင်လမ်းခွဲမှာထားထားတာ လမ်းသွားလမ်းလာစစ်ဆေးဖို့။ သူတို့ကင်းပုန်းကလည်း စခန်းနဲ့ သိပ်မဝေးဘူးချထားတာ။ ကျနော်တို့ဘက်က စခန်းထဲကို ၂ လုံး၊ ကင်းပုန်းဘက်ကို ၁ လုံးပစ်ခဲ့တယ်” လို့ ပြောပါတယ်။

အဲ့ဒီပစ်ခတ်မှုမှာ စစ်ကောင်စီတပ်စခန်းအတွင်း ကျရောက်ပေါက်ကွဲလို့ စစ်ကောင်စီဘက်က ဒု-ဗိုလ် ၁ ဦး အပါအဝင် ၃ ဦးသေဆုံးပြီး ၄ ဦးဒဏ်ရာရသွားတာကို တပ်တွင်းဖရဲသီးတွေကနေတဆင့် ပြန်လည်သိရတယ်လို့ သူကဆိုပါတယ်။

ဒီသေဆုံးမှုနဲ့ ပတ်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

စစ်ကောင်စီနေရာတွေကိုပစ်ခတ်ပြီး ပြန်လည်ဆုတ်ခွာလာချိန်မှာ စစ်ကောင်စီဘက်က လက်နက်ကြီး ၈ လုံးအပါအဝင် လက်နက်ငယ်တွေနဲ့ပါ ပြန်လည်ပစ်ခတ်ခဲ့တာကြောင့် သံတောင်မြို့အနီးကို ကျရောက်ပေါက်ကွဲခဲ့ကာ အသက် ၆၀ အရွယ်အဖွားအိုတဦး မစိုးရိမ်ရဒဏ်ရာရရှိခဲ့တယ်လို့ ဆိုပါတယ်။

မတ်လ ၂ ရက်နေ့ကလည်း သံတောင်မြိုနယ်၊ ဘိုတဲကုန်းကျေးရွာကို စစ်ကြောင်းထိုးလာတဲ့ စစ်ကောင်စီတပ်နဲ့ People Defence Force – Thandaung တပ်ဖွဲ့တို့ တိုက်ပွဲဖြစ်ပွားပြီး စစ်ကောင်စီဘက်က ၂ ဦး သေဆုံးခဲ့လို့ အဆိုပါစစ်ကောင်စီအဖွဲ့က ရွာထဲဝင်ပြီး ဒေသခံဆိုင်ကယ် ၅ စီးကို မီးရှို့သွားတယ်လို့ သိရပါတယ်။

စာတည်း-ရင်ငြိမ်း