သေဆုံး

စစ်ကိုင်း၊ ဖေဖော်ဝါရီ ၁၊ ၂၀၂၃။

စစ်ကိုင်းတိုင်း၊ ရေဦးမြို့နယ်၊ မူးသာကုန်းကျေးရွာထဲကို စစ်ကောင်စီတပ်က ဖေဖော်ဝါရီ ၁ ရက် ဒီနေ့နေ့လယ်လောက်မှာ လက်နက်ကြီး နဲ့ပစ်ခတ်ခဲ့တာကြောင့် အသက် ၂၀ နှစ်အရွယ်အမျိုးသမီးတဦး ကျည်ထိမှန်သေဆုံးခဲ့တယ်လို့ သိရပါတယ်။

စစ်ကောင်စီတပ်ဖွဲ့ဟာ ရေဦးမြို့နယ် တိုင်းရင်းဆေးရုံထဲကနေ လက်နက်ကြီးတွေနဲ့ ပစ်ခတ်ခဲ့တဲ့အတွက် မူးသာကုန်ရွာသားတဦးရဲ့နေအိမ်ပေါ်ကျရောက်ခဲ့ရာ မိသားစု ၄ ဦးအနက် ၃ ဦးဒဏ်ရာရပြီး ၁ ဦးမှာသေဆုံးခဲ့တာလည်း ဖြစ်ပါတယ်။

“လက်နက်ကြီးနဲ့ ရမ်းသမ်းပစ်တာကတော့ နေ့တိုင်းဆိုသလိုပါပဲ။ အရင်ကတော့ လူထိခိုက်တာမျိုးတော့ရှိတယ်။ သေတဲ့အထိတော့မဖြစ်ဖူးဘူး။ ဒီတခေါက်တော့ မိသားစုလေးဦးလည်းထိသွားတယ်။ အငယ်ဆုံးသမီးကတော့ ဆုံးသွားတယ်။ ရွာထဲကကျွဲ ၂ ကောင်လည်းထိသွားတယ်”လို့ ရေဦးဒေသခံတဦးက ပြောပါတယ်။

သေဆုံးသူနာမည်နဲ့ နောက်ဆက်တွဲအခြေအနေတွေကိုတော့ အသေးစိတ်မသိရှိရသေးပါဘူး။
ပြီးခဲ့တဲ့နှစ် မေလ ပိုင်းလောက်ကလည်း မူးသာကုန်းကျေးရွာက နေအိမ် ၄ လုံးကို စစ်ကောင်စီတပ်ဖွဲ့တွေက မီးရှို့ဖျက်ဆီးသွားခဲ့သေးတယ်လို့ သိရပါတယ်။

မန္တလေး၊ ဖေဖော်ဝါရီ ၁၊ ၂၀၂၃။

မန္တလေးတိုင်း၊ မတ္တရာမြို့နယ်၊ မြွေမြစ်ရိုးရွာကနေ ဇီးကုန်းကျေးရွာကိုကူးလာတဲ့ စစ်ကောင်စီစစ်ကြောင်းကို ဖေဖော်ဝါရီလ ၁ ရက်ဒီနေ့လယ်ပိုင်းမှာ စနိုက်ပါနဲ့ပစ်ခတ်တိုက်ခိုက်ခဲ့တယ်လို့ သိရပါတယ်။

အင်အား ၈၀ ဝန်းကျင်ပါတဲ့ အဆိုပါစစ်ကြောင်းကို ပျောက်ကြားစနစ်နဲ့တိုက်ခိုက်ခဲ့ရာ စစ်သား ၁ ဦးသေဆုံးခဲ့တယ်လို့ တောကြီးမြွေပွေးအဖွဲ့မှ ဗိုလ်တီကပြောပါတယ်။

“မြွေမြစ်ရိုးရွာကနေ ဇီးကုန်းရွာအကူး ရွာ ၂ ရွာကြားထဲမှာ စနိုက်ပါနဲ့ပစ်ခတ်ခဲ့တာ၊ အင်အားက ၈၀ လောက်ပါတယ်၊ စစ်ကြောင်းနဲ့ထိပ်တိုက်မရင်ဆိုင်ပဲ ပျောက်ကြားစနစ်နဲ့လိုက်ပစ်တာ၊ ၁ ယောက် ထိမှန်ပြီးသေတယ်” လို့ ပြောပါတယ်။

တိုက်ခိုက်ခံရပြီးနောက် အဲဒီစစ်ကြောင်းဟာ ဇီးကုန်းရွာထဲမှာပဲတပ်စွဲနေပြီး လက်ရှိမှာတော့ မတ္တရာနယ်ထဲမှာ စစ်ကောင်စီဘက်က စစ်ကြောင်း ၄ ကြောင်းနဲ့ဝင်ရောက် အင်အားဖြန့်နေတာလို့ ဆက်ပြောပါတယ်။

ပြီးခဲ့တဲ့ဇန်နဝါရီလ ၂၉ ရက်ကလည်း မတ္တရာမြို့အနောက်ခြမ်းကို နယ်မြေရှင်းလင်းရေးလာတဲ့ စစ်ကောင်စီစစ်ကြောင်းကို ကောက်ရိုးပုံကျေးရွာနဲ့ မြွေပုံကန်ကျေးရွာအကြားမှာ တောကြီးမြွေပွေးအဖွဲ့က မိုင်းဆွဲတိုက်ခိုက်ခဲ့ရာ စစ်သား ၅ ဦး သေဆုံးခဲ့ပါသေးတယ်။

ကျောက်တံခါး၊ ဇန်နဝါရီ ၂၉၊ ၂၀၂၃။

ပဲခူးတိုင်းဒေသကြီး၊ ကျောက်တံခါးမြို့နယ်၊ သမင်အင်းကုန်းကျေးရွာက ပျူစောထီးဆိုသူ လမ်းလျှောက်ထွက်လာချိန် ပစ်ခတ်ခံရလို့ သေဆုံးသွားတယ်လို့ သိရပါတယ်။

ဇန်နဝါရီလ ၂၈ ရက်နေ့ မနက် ၆ နာရီလောက်မှာ သမင်အင်းကုန်းကျေးရွာနဲ့ဒိုးတန်းကျေးရွာလမ်းပေါ်မှာ ပျူစောထီး လှကြိုင် အသက် ၆၅ နှစ်ကျော်ဆိုသူကို ကျောက်တံခါးမြို့နယ် ပကဖအဖွဲ့က ပစ်ခတ်ရှင်းလင်းခဲ့တာဖြစ်တယ်လို့ ပဲခူးတိုင်းဒေသကြီး ပြည်သူ့ကာကွယ်ရေးတပ်ဖွဲ့ တာဝန်ရှိသူကပြောပါတယ်။

“သူက စကစက လုပ်မယ့် ရွေးကောက်ပွဲအတွက် မဲစာရင်းကောက်ရာမှာ အားတက်သရောပါဝင်လုပ်ဆောင်နေသလို စကစ ဒေါက်တိုင်သတင်းပေး ပျူတဦးဖြစ်လို့ သက်ဆိုင်ရာ အဖွဲ့က ရှင်းလင်းလိုက်တာဖြစ်တယ်”လို့ ပြောပါတယ်။

သေနတ်နဲ့ပစ်ခတ်ခံရလို့ ဦးလှကြိုင်ဟာ ညာဘက်ပါး၊ ညာဘက်ရင်အုံတွေမှာ ကျည်ဖောက်ဝင်ဒဏ်ရာတွေ ရရှိပြီး နေရာမှာဘဲ သေဆုံးသွားတယ်လို့ ဆိုပါတယ်။

သေဆုံးသွားတဲ့ ဦးလှကြိုင်အလောင်းကိုတော့ ဒေသခံတွေ အကူအညီနဲ့ ကျောက်တံခါးဆေးရုံကို ပို့ဆောင်ထားတယ်လို့ သိရပါတယ်။

ဇန်နဝါရီလ ၇ရက်နေ့က ကျောက်တံခါးမြို့နယ်၊ တောကျွဲအင်းကျေးရွာမှာ စျေးဆိုင်ဖွင့်ထားတဲ့ ပျူစောထီးခေါင်းဆောင် မင်းအောင်ဆိုသူကို သူ့ကိုယ်ပိုင်စျေးဆိုင်မှာဘဲ ကျောက်တံခါး ပကဖ၊ ဗိုလ်ကျောက်ခဲ မြို့ပြပြောက်ကျားအဖွဲ့တွေက ရှင်းလင်းခဲ့လို့ သေဆုံးသွားတယ်လို့ သိရပါတယ်။

အဲဒီပျူစောထီးခေါင်းဆောင်ရှင်းခံရတာကို လာရောက်စစ်ဆေးတဲ့ တောကျွဲအင်းရဲစခန်းက ရဲကားကိုလည်း မိုင်းဆွဲတိုက်ခိုက်ခဲ့လို့ ဒုရဲအုပ်အပါအဝင် ရဲ ၂ ဦး ထိခိုက်ဒဏ်ရာရခဲ့သေးတာပါ။

မြိုင်၊ ဇန်နဝါရီ ၂၉၊ ၂၀၂၃။

မကွေးတိုင်း၊ မြိုင်မြို့နယ်၊ သရက်ကန်ပျူစောထီးရွာအနီး PDF အဖွဲ့က သေနတ်ဖောက်လိုက်ရာ သေနတ်သံကြားပြီးထွက်လာတဲ့ စစ်သားနဲ့ပျူအင်အား ၃၀ ခန့်ရှိတဲ့အဖွဲ့ တိုက်မိုင်းထိသွားတာလို့ သိရပါတယ်။

ဇန်နဝါရီလ ၂၈ ရက်ညနေ ၄ နာရီ ၂၀ မိနစ်မှာ တိုက်မိုင်း ၄ လုံးနဲ့တိုက်ခိုက်ခဲ့တာလို့ ပြည်သူ့အားမာန်ကာကွယ်ရေးတပ်ဖွဲ့တာဝန်ခံက ပြောပါတယ်။

“မနေ့ညနေက သရက်ကန်ရွာကိုရောက်နေတဲ့ စစ်ဗိုလ်က နည်းနည်းစွာတယ်လို့ကြားတယ်၊ သေနတ်ဖောက်ရင်လည်း နောက်ကထွက်လိုက်တတ်တယ်လို့ကြားတယ်၊ အဲဒါနဲ့ကျနော်တို့မိုင်းကွင်းကိုဆင်တယ်၊ သေနတ်ဖောက်ပြီးမြူလိုက်တယ်၊ ဆိုင်ကယ် ၂ စီး ကား ၁ စီး ခြေလျှင် ၃၀ လောက်ထွက်လာတယ်၊ ရှေ့ကထွက်လာတဲ့ ဆိုင်ကယ် ၂ စီးက ကျနော်တို့ဆင်ထားတဲ့မိုင်းကွင်းထဲကို ရောက်လာတယ်၊ မိုင်းကွင်းထဲရောက်လာချိန် တိုက်မိုင်း ၄ လုံးခွဲလိုက်တယ်” လို့ သူကပြောပါတယ်။

ယနေ့မနက်ရရှိတဲ့ သတင်းအရ စစ်ဗိုလ် ၁ ဦး၊ တပ်ကြပ် ၁ ဦး အုပ်ချုပ်ရေးမှူးပျူခေါင်းဆောင် တို့သေဆုံးပြီး ၆ ဦးလောက်ဒဏ်ရာ ရသွားတယ်လို့ ဆိုပါတယ်။

အဲ့ဒီစစ်ကြောင်းဟာ တိုက်မိုင်းနဲ့တိုက်ခိုက်ခံရပြီး လက်နက်ကြီး၊ လက်နက်ငယ်တွေနဲ့ရမ်းသမ်းပစ်ခတ်ပြီးနောက်မှာ အော်ဟစ်ဆဲဆိုပြီး သရက်ကန်ပျူရွာထဲကို ပြန်ဝင်သွားကြတယ်လို့ သူကဆက်ပြောပါတယ်။

တိုက်ခိုက်မှုကို ပြည်သူ့အားမာန်ကာကွယ်ရေးတပ်ဖွဲ့ ၊ MUGDF ၊ TYK ​ပျောက်ကြားတပ်ဖွဲ့ ၊ မုန်တိုင်းတပ်ဖွဲ့ နှင့် စင်္ကြာကာကွယ်ရေးတပ်ဖွဲ့ (မြိုင် ပ.က.ဖ (ခွဲ ၄)တို့မှ ပူးပေါင်းလုပ်ဆောင်ခဲ့တာလို့သိရပါတယ်။

ပြီးခဲ့တဲ့ဇန်နဝါရီလ ၁၉ ရက်ကလည်း ကိုင်းတောမရေစက်မှာစောင့်နေတဲ့ စစ်အုပ်စုကို ပြည်သူ့အားမာန် ကာကွယ်ရေးတပ်ဖွဲ့က ပစ်ခတ်တိုက်ခိုက်ခဲ့ရာ စစ်သား ၆ ဦး သေဆုံးတယ်လို့ သိရပါတယ်။

မကွေး၊ ဇန်နဝါရီ ၂၇၊ ၂၀၂၃။

မကွေးတိုင်း၊ ရေစကြိုမြို့က လက်ဖက်ရည်ဆိုင်မှာ အစည်းအဝေးလုပ်နေတဲ့စစ်အုပ်စုကို ဇန်နဝါရီလ ၂၇ ရက်ဒီနေ့မနက်က သွားရောက်တိုက်ခိုက်ခဲ့လို့ ပြည်သူ့စစ်အဖွဲ့ဝင် ၂ ဦးသေဆုံးခဲ့တယ်လို့ Myingyan Black Tiger (MBT) က သတင်းထုတ်ပြန်ထားပါတယ်။

အမှတ်၂ စည်ပင်သာယာရပ်ကွက်၊ နေရှင်နယ် လက်ဖက်ရည်ဆိုင်မှာ စစ်တပ်အရာရှိတွေနဲ့ ပြည်သူ့စစ်ခေါင်းဆောင်မြင့်ဆွေ(ခ)မောင်မြင့် ဦးဆောင်ပြီး အစည်းဝေးလုပ်နေချိန် မနက် ၈ နာရီခွဲလောက်မှာ တိုက်ခိုက်ခဲ့တာလို့ သိရပါတယ်။

“စစ်ကောင်စီကအကြီးပိုင်းတွေနဲ့ ပြည်သူစစ်ခေါင်းဆောင်မြင့်ဆွေ(ခ)မောင်မြင့်နဲ့ ပြည်သူ့စစ်အကြီးပိုင်းတွေ သူတို့တပည့်တွေအစည်းအဝေးလုပ်နေတာ၊ လူဦးရေတော့များတယ်၊ ကျနော်တို့ရုတ်တရက်ပစ်လိုက်တော့ ၂ ယောက်တော့အဲနေရာမှာပဲသေသွားတယ်၊ လက်ဖက်ရည်ဆိုင်ပိုင်ရှင်ကလည်း စစ်မှုထမ်းဟောင်းသူလည်းအတူတူပဲ” လို့ MBT အဖွဲ့ ခေါင်းဆောင်ဗိုလ်မိုက်ခဲ ကပြောပါတယ်။

စစ်အုပ်စုဘက်က ၆ ဦးလောက်လိုက်လံပစ်ခတ်ခဲ့လို ၅ မိနစ်ကြာပြန်လည်ပစ်ခတ်ရာမှာလည်း ဒဏ်ရာရရှိသူတွေရှိခဲ့ပြီး တော်လှန်ရေးရဲဘော်တွေ အန္တရာယ်ကင်းခဲ့တယ်လို့ သူကဆက်ပြောပါတယ်။

အဲဒီတိုက်ခိုက်မှုကို Myingyan Black Tiger (MBT) အဖွဲ့က ဦးဆောင်ပြီး ညီနောင်မဟာမိတ်တွေဖြစ်တဲ့The Volue Of Youngmen၊ ချောင်းဦး (ပ.လ.ဖ)၊ မုံရွာခရိုင်တပ်ရင်း ၁၂တပ်ခွဲ ၄၊ VOMDY-Front Warrior တို့ပူးပေါင်းတိုက်ခိုက်ခဲ့တာလို့ သိရပါတယ်။

ဇန်နဝါရီလ ၁ ရက်ညကလည်း Myingyan Black Tiger (MBT)နဲ့မဟာမိတ်တွေဟာ ရေစကြိုမြို့၊ အမှတ် ၁ ရပ်ကွက် ကပ်ကျော်ကျောင်းတိုက်မှာ တပ်စွဲနေတဲ့ စစ်ကောင်စီတပ်သားတွေ ဝင်ရောက်တိုက်ခိုက်ခဲ့လို့ စစ်ကောင်စီဘက်က ၄ ဦးသေဆုံးခဲ့ပါသေးတယ်။

မန္တလေး၊ ဇန်နဝါရီ ၂၇၊ ၂၀၂၃။

မန္တလေးတိုင်း၊ မြင်းခြံမြို့နယ်မှာ ရွေးကောက်ပွဲအတွက် အိမ်ထောင်စုစာရင်းတွေကောက်ယူပြီး ပြန်လာတဲ့ စစ်ကောင်စီယာဥ်တန်း ဇန်နဝါရီ ၂၆ ရက် ည ၄ နာရီကျော်မှာ တိုက်ခိုက်ခံရတာကြောင့် ၃ ဦးသေဆုံးပြီး ၁ ဦးဒဏ်ရာပြင်းထန်ရသွားခဲ့တယ်လို့ သိရပါတယ်။

ကားအသေး ၂ စီး၊ လုံခြုံရေးလိုက်ယူနေတဲ့ ဆိုင်ကယ် ၇ စီးတို့က ယက်သာကျေးရွာမှစာရင်း​ကောက်ယူပြီး နဘူးအိုင်ကျေးရွာကိုပြန်လာချိန် လေးတန်းရွာနဲ့ဖက်ရင်းရွာအကြားကိုအရောက်မှာ မိုင်း ၆ လုံးခွဲပြီး တိုက်ခိုက်ခဲ့တာဖြစ်တယ်လို့ ရွှေခြံသားပြောက်ကြားတပ်ဖွဲ့မှ ပြန်ကြားရေးတာဝန်ခံလဂွန်းအိမ် က ပြောပါတယ်။

“မိုင်းဆွဲလိုက်တဲ့အချိန်မှာ ဆိုင်ကယ် ၃ စီးကိုထိသွားတယ်။ ဆိုင်ကယ် ၁ စီးမှာက ၂ ယောက်စီလိုက်စီးကြတာ။ အဲဒီထဲကမှ ကားပေါ်အရောက်မှာ ၃ ယောက်သေတယ်ဗျ။ နောက် ၁ ယောက်ကတော့ တော်တော်လည်းပြင်းထန်ဒဏ်ရာရသွားတယ်ဗျ” လို့ဆိုပါတယ်။

မိုင်းဆွဲတိုက်ခိုက်တဲ့အချိန်မှာလည်း မိုင်းတွေကို စနစ်တကျမြေမြုပ်ပြီး တိုက်ခိုက်ချိန်မရခဲ့တာ ကြောင့် ကား၂ စီးကိုမိုင်းမထိခဲ့ဘဲ ဆိုင်ကယ်တွေကိုသာ ထိမှန်သေဆုံးခဲ့ရတာဖြစ်တယ်လို့ ဆိုပါတယ်။

ပြီးခဲ့တဲ့ဇန်နဝါရီ ၁၇ ရက်နေ့မှာလည်း နဘူးအိုင်ကျေးရွာကနေ မြင်းခြံမြို့ပေါ်ကိုလာတဲ့ စစ်ကောင်စီဆိုင်ကယ် ၄ စီးနဲ့ကားသေးတစီးတို့ကို ထန်းတောကြီးကျေးရွာအနောက်ဘက်ကို အရောက်မှာ မိုင်းဆွဲတိုက်ခိုက်ခဲ့တာကြောင့် ၄ ဦးသေဆုံးခဲ့သေးတယ်လို့ သိရပါတယ်။