မြေလတ်အသံ၊ ဖေဖော်ဝါရီ ၂၅၊ ၂၀၂၂။

စစ်တပ်က အာဏာသိမ်းတဲ့ ၂၀၂၁ ခုနှစ် ဖေဖော်ဝါရီ ၂ ရက် ကတည်းက ဖမ်းဆီးခံရပြီး ထောင်ကျခဲ့တဲ့ ‌ဗကသများအဖွဲ့ချုပ်ရဲ့ ဗဟိုလုပ်ငန်းကော်မတီ တွဲဖက်အတွင်းရေးမှူးဟောင်း ကိုမင်းသွေးသစ် ဒီကနေ့မနက် ထောင်က လွတ်မြောက်ခဲ့ပြီဖြစ်တယ်လို့ မိသားစုဝင်တဦးက ပြောပါတယ်။

ပြီးခဲ့တဲ့နှစ် ဒီဇင်ဘာ ၃၀ ရက်က ထောင်ဒဏ် ချမှတ်ခံခဲ့ရတဲ့ ကိုမင်းသွေးသစ် ပြန်လွတ်လာခဲ့ပေမယ့် ကျန်းမာရေးအခြေအနေ မကောင်းဘူးလို့ မိသားစုဝင်တဦးက ပြောပါတယ်။

“လွတ်ပါပြီ သူနဲ့အခုတွေ့နေတာပါ ကျန်းမာရေး သိပ်မကောင်းလာဘူး၊ ခါးနာတာ ၊ အစာအိမ်အူလမ်းကြောင်းပြဿနာနဲ့ မျက်စိပြဿနာတွေ ဖြစ်လာတယ်”လို့ ပြောပါတယ်။

ယာဉ်အန္တရာယ်ကင်းရှင်းရေးနှင့် မော်တော်ယာဉ်စီမံခန့်ခွဲမှုဆိုင်ရာဥပဒေပုဒ်မ ၉၅ ဘနဲ့ ထောင်တွင်းတရားရုံးမှာ ထောင်ဒဏ် ၁ နှစ်ချမှတ်ခံခဲ့ရပြီ လွတ်မြောက်လာတာဖြစ်ပါတယ်။

မြေလတ်အသံ၊ ဇန်နဝါရီ ၈၊ ၂၀၂၂။

တရားစီရင်ရေးကိုအယုံအကြည်မရှိကြောင်းနဲ့ တက္ကသိုလ်ကျောင်းသားတွေ ကျောင်းမတက်ပဲ ဆက်လက်သပိတ်မှောက်ဖို့ ဗမာနိုင်ငံလုံးဆိုင်ရာကျောင်းသားသမဂ္ဂများ အဖွဲ့ချုပ် ဒုဥက္ကဌ ကိုထက်အောင်က ပဲခူးတိုင်း၊ ပြည်ခရိုင်၊ ပေါင်းတည်ထောင်ထဲကနေ သူ့ရဲ့ နိုင်ငံရေးမိတ်ဆွေတွေဆီကနေ သတင်းပါးလိုက်လို့သိရပါတယ်။

“၂၀၀၈ အ​ခြေခံဥပ​ဒေ​အောက်က ဆင်းသက်တဲ့ တရားစီရင်​ရေးစနစ်ကို အယုံအကြည်မရှိ သပိတ်​မှောက် ထားသည်။” လို့ ပြောဆိုထားပါတယ်။

ဒုတိယအချက်အနေနဲ့ တက္ကသိုလ်ကျောင်းသားတွေ ကျောင်းမတက်ပဲ ဆက်လက်သပိတ်မှောက်ဖို့ကိုလည်း “ဒီအ​ရေး​တော်ပုံ​ကြောင့် အသက်စ​တေးခဲ့ရတဲ့ ​ကျောင်းသားရဲ​ဘော်​တွေ၊​ ထောင်​ထဲ​ရောက်​နေတဲ့​ ကျောင်းသားရဲ​ဘော်​တွေနဲ့ တသားတည်းရပ်တည်တဲ့အ​နေနဲ့ ၆ ရက်​နေ့ တက္ကသိုလ်ပြန်ဖွင့်ရင် မတက်​ရောက်ဘဲ သပိတ်​မှောက်ကြ” ဖို့ ဗကသများ အဖွဲ့ချုပ် ဒုဥက္ကဌ ကိုထက်အောင်က တိုက်တွန်းထားပါတယ်။

ကိုထက်အောင်မှာ ပြည်ခရိုင်း၊ ပေါင်းတည်မြို့နယ်မှာနေထိုင်ကာ ပြည်တက္ကသိုလ်ကျောင်းသားများသမဂ္ဂ ဥက္ကဌဟောင်းတဦးဖြစ်ပြီး၊ ရခိုင်ပြည်နယ်အတွင်းက ပြည်တွင်းစစ်ဆန့်ကျင်ရေးလှုပ်ရှားမှုကြောင့်၂၀၂၀ အောက်တိုဘာလက ဖမ်းဆီးထိမ်းသိမ်းခံရကာ၊ အာဏာသိမ်းပြီး ၅ လအကြာမှာ ပြန်လည်လွတ်မြောက်ခဲ့ပြီး၊ စက်တင်ဘာလ ၆ ရက်နေ့က ထပ်မံဖမ်းဆီးခံခဲ့ရတာဖြစ်ပါတယ်။