တောင်သာ

မြေလတ်အသံ၊ ဖေဖော်ဝါရီ ၇၊ ၂၀၂၅။

မန္တလေးတိုင်း၊ တောင်သာမြို့နယ်၊ ညောင်ချောင်းကျေးရွာမှာ ဂျက်ဖိုက်တာနဲ့ဗုံးကြဲခံရလို့ နေအိမ် ၅ လုံးပျက်စီးသွားတယ်လို့ ဒေသခံတွေထံက သိရပါတယ်။

ဖေဖော်ဝါရီ ၆ ရက် ညနေ ၃ နာရီကျော်ခန့်မှာ ညောင်ချောင်းကျေးရွာကို စစ်ကောင်စီဘက်က Y-12 လေယာဉ်နဲ့ကင်းထောက်ပြီးနောက် ဂျက်ဖိုက်တာနဲ့ ဗုံး ၂ လုံးကြဲချခဲ့တယ်လို့ဆိုပါတယ်။

“ပထမ Y 12 နဲ့ကင်းထောက်လုပ်တယ်။ ဒုတိယ ဖိုက်တာနဲ့ လာကြဲတာပဲ။ ဖိုက်တာကတော့ လုံးဝပျံဝဲတာမရှိဘဲ တိုက်ရိုက်ကြဲချတယ်။ နေအိမ်တလုံးရဲ့ရှေ့ တလင်းဝိုင်းထဲကျတယ်။ အဲဒီအိမ်က တော်တော်ပျက်စီးတယ်။ အိမ်နီးချင်းအိမ်ကတော့ နံရံတွေပွင့်ထွက်ကုန်တယ်။ အခြားအိမ်တွေက သွပ်လန်သွားတာတွေရှိတယ်ဗျ။”လို့ ဒေသခံတဦးက ပြောပါတယ်။

ဂျက်ဖိုက်တာနဲ့ဗုံးကြဲခံရလို့ ကျေးရွာအတွင်းရှိ နေအိမ် ၂ လုံး ထိခိုက်ပျက်စီးမှုများပြီး ၃ လုံးကတော့ အမိုးလန်ပျက်စီးသွားကာ ခွေး ၂ ကောင်သေဆုံးသွားခဲ့ပေမယ့် ရွာခံတွေကတော့ Y-12 လေယာဉ်လာပတ်စဉ်ကတည်းက နေအိမ်ဝန်းထဲက ဗုံးခိုကျင်းတွေမှာ ဝင်ရောက်ပုန်းခိုနိုင်လိုက်တာကြောင့် ထိခိုက်မှုမရှိခဲ့ဘူးလို့ ဆိုပါတယ်။

ညောင်ချောင်းကျေးရွာဟာ အိမ်ခြေ ၁၂၀ ခန့်၊ လူဦးရေ ၆၀၀ ခန့်ရှိကာ ဒေသကာကွယ်ရေးတပ်ဖွဲ့တွေ နေထိုင်တာမရှိဘဲ ရွာခံတွေသာရှိပြီး လေကြောင်းကနေဗုံးကြဲခံရပြီးချိန် ကြောက်လန့်နေတဲ့ရွာခံအချို့ ရွာအနီးက လယ်တောတွေထဲ ပြောင်းရွှေ့နေထိုင်ကြတာ ရှိခဲ့သလို ရွာထဲမှာပဲ ပုံမှန်နေထိုင်နေကြသူတွေလည်း ရှိတယ်လို့ သိရပါတယ်။

ဖေဖော်ဝါရီ ၃ ရက်ကလည်း တောင်သာမြို့နယ်၊ ရုံးစည်ကြီးကျေးရွာမှာ လေကြောင်းနဲ့ပစ်ခံရလို့စစ်တပ်က ဗိုလ်မှူးကြီးအငြိမ်းစားမိသာစုဝင် နေအိမ်အပါ ၄ လုံးထိခိုက်ပျက်စီးခဲ့သလို သံဃာ ၁ ပါးနဲ့အမျိုးသား ၁ ဦးလည်း ထိခိုက်ဒဏ်ရာရခဲ့သေးတယ်လို့ သိရပါတယ်။

စာတည်း – ကိုချမ်း

■ သံဃာ ၁ ပါးနဲ့ အရပ်သား ၁ ဦး ဗုံးစထိမှန် ဒဏ်ရာရ

မန္တလေး၊ ဖေဖော်ဝါရီ ၅၊ ၂၀၂၅။

မန္တလေးတိုင်း၊ တောင်သာမြို့နယ်၊ ရုံးစည်ကြီးကျေးရွာကို စစ်ကောင်စီတပ်ဖွဲ့ဝင်တွေက လေကြောင်းနဲ့ ဗုံးကြဲပစ်ခတ်ခဲ့တာကြောင့် စစ်တပ် အငြိမ်းစားဗိုလ်မှူးကြီးရဲ့ မိသားစုပိုင်ကုန်စုံဆိုင်အပါအဝင် နေအိမ် ၄ လုံးပျက်စီးခဲ့ပြီး သံဃာ ၁ ပါးနဲ့ အရပ်သား ၁ ဦးလည်း ဗုံးစထိမှန် ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဖေဖော်ဝါရီ ၃ ရက် ညနေ ၃ နာရီဝန်းကျင်က ကျေးရွာထဲမှာရှိတဲ့ ရဲစခန်းကို ကာကွယ်ရေးပူးပေါင်းတပ်တွေက တိုက်ခိုက်ဖို့လာခဲ့ပေမယ့် တိုက်ပွဲဖြစ်ပွားခြင်းမရှိဘဲ ပြန်သွားခဲ့ကာ ညနေ ၄ နာရီခန့်မှာတော့ စစ်ကောင်စီတပ်ဖွဲ့ဝင်တွေက ကျေးရွာထဲကို လေကြောင်းနဲ့ စတင်ပစ်ခတ်ခဲ့တာလို့ ဆိုပါတယ်။

“စကစဘက်က Mi 35 နဲ့ ပထမတခါ ရွာပတ်ပတ်လည်ကို စက်လက်နဲ့ ကုတ်(ပစ်)တယ်။ နောက်တခါကျတော့ ဂျက်ဖိုက်တာနဲ့ တက်လာပြီးတော့မှ အုတ်ကျောင်းတိုက်ကို ပစ်တယ်။ “လို့ ဒေသခံတဦးက ပြောပါတယ်။

လေကြောင်းနဲ့ ပစ်ခတ်ချိန် အုတ်ကျောင်းတိုက်မှာရှိတဲ့ သက်တော် ၃၇ နှစ်အရွယ် သံဃာ ၁ ပါးနဲ့ အသက် ၂၅ နှစ်အရွယ် အမျိုးသား ၁ ဦးတို့ ဗုံးစထိမှန် ဒဏ်ရာရခဲ့ပြီး ၂ ထပ်ကျောင်းဆောင် ၁ လုံးနဲ့ သံဃာတော်တွေ အသုံးပြုတဲ့ ကား ၂ စီး ပျက်စီးခဲ့တယ်လို့ သိရပါတယ်။

ကျောင်းတိုက်ကို လေကြောင်း တိုက်ခိုက်ပြီးနောက် ရုံးစည်ကြီးရွာထဲက မီးသတ်ရုံးနားနဲ့ ရွာသစ်ရပ်ကွက်တဝိုက်ကို လေကြောင်းနဲ့ ထပ်မံတိုက်ခိုက်ချိန် စစ်တပ် အငြိမ်းစား ဗိုလ်မှူးကြီးရဲ့ မိသားစုပိုင် ကုန်စုံဆိုင် အပါအဝင် နေအိမ် ၂ လုံးထိမှန် ပျက်စီးခဲ့တယ်လို့ ဆိုပါတယ်။

“ဝေကြီးဆိုင်ကို ပစ်ခတ်တာ၊ ကုန်စုံဆိုင်ဖြစ်တော့ ဓာတ်ဆီတွေရှိတော့ မီးလောင်တယ်။ နောက်တခါ ရွာသစ်ဘက်ကို ရော့ကတ်နဲ့ ပစ်တယ်၊ အိမ်တွေက အပေါက်တွေဖြစ်တယ်။ ရော့ကတ်အခွံတွေက မြေကြီးထဲ စိုက်ဝင်နေတာရှိတယ်။ အဲ့တညနေတည်းကို စုစုပေါင်း ၆ ကြိမ် တိုက်ခိုက်ခဲ့တာ။”လို့ အထက်ပါ ဒေသခံက ဆက်ပြောပါတယ်။

အဆိုပါ မီးလောင်ပျက်စီးခဲ့တဲ့ ဝေကြီးကုန်စုံဆိုင်ဟာ စစ်တပ်က အငြိမ်းစား ဗိုလ်မှူးကြီး ကျော်ကျော်ဦးနဲ့ ညီဖြစ်သူ အဂတိတိုက်ဖျက်ရေးကော်မရှင်ညွှန်ချုပ် ဦးလွင်လွင်တို့ရဲ့ မိသားစုပိုင် ဆိုင်ဖြစ်ပြီး လေကြောင်းတိုက်ခိုက်မှုဖြစ်ပြီးနောက် မိတ္ထီလာ တပ်မ ၉၉ က စစ်ကောင်စီတပ်ဖွဲ့ဝင်တွေ ရောက်လာကာ ကုန်စုံဆိုင်က လက်ကျန်ပစ္စည်းတွေကို ပြောင်းရွှေ့သွားတယ်လို့ သိရပါတယ်။

ရပ်ကွက် ၆ ခုနဲ့ အိမ်ခြေ ၁,၆၀၀ ကျော်ရှိတဲ့ ရုံးစည်ကြီးကျေးရွာမှာ ပြည်သူ ၆,၀၀၀ ကျော် ဘေးလွတ်ရာကို ထွက်ပြေးတိမ်းရှောင်နေရပြီး တပ်မ ၉၉ စစ်ကြောင်းက တပ်ဖွဲ့ဝင် ၁၀၀ ခန့်ကတော့ ဒီကနေ့ထိ ကျေးရွာထဲမှာ တပ်စွဲထားတယ်လို့ ဆိုပါတယ်။

ပြီးခဲ့တဲ့ ဖေဖော်ဝါရီ ၁ ရက်ကလည်း တောင်သာမြို့နယ်၊ ရတနာပုံကျေးရွာအနီးတဝိုက်နဲ့ ဇရပ်ကြီးကျေးရွာကို လေကြောင်းတိုက်ခိုက်မှု ပြုလုပ်ခဲ့ပြီး ဒေသခံ ၁ ဦး၊ ကာကွယ်ရေးတပ်ဖွဲ့ဝင် ၁ ဦးနဲ့ ကာကွယ်ရေးတပ်ဖွဲ့တွေဘက်က ဖမ်းဆီးထားတဲ့ ပျူစောထီး ၁ ဦး ဒဏ်ရာရခဲ့တယ်လို့ သိရပါတယ်။

စာတည်း – ချယ်ရီ

■ ဗုံးခိုကျင်းတွေ ကြိုတင်ပြင်ဆင်နိုင်ခဲ့လို့ ထိခိုက်မှုနည်းခဲ့တယ်လို့ဆို

မန္တလေး၊ ဖေဖော်ဝါရီ ၂၊ ၂၀၂၅။

မန္တလေးတိုင်း၊ တောင်သာမြို့နယ်ပကဖရဲ့စစ်သင်တန်းဆင်းပွဲပြုလုပ်ခဲ့တဲ့ ရတနာပုံကျေးရွာအနီးနဲ့ ဇရပ်ကြီးကျေးရွာတွေမှာ ၁ ရက်တည်း ၃ ကြိမ်လေကြောင်းတိုက်ခိုက်ခံရပြီး ဒေသခံ ၁ ဦးအပါ ၃ ဦးဒဏ်ရာရတယ်လို့ တောင်သာမြို့နယ်ပကဖတာဝန်ခံထံက သိရပါတယ်။

ဖေဖော်ဝါရီ ၁ ရက် မနေ့မနက် ၁၀ နာရီကျော်မှာ တောင်သာမြို့နယ်ပကဖရဲ့ အမှတ်စဥ် ၇ စစ်အခြေခံသင်တန်းဆင်းပွဲပြုလုပ်နေချိန် စစ်ကောင်စီဘက်က တိုက်လေယာဉ်နဲ့ ဗုံး ၂ လုံး ကြဲချ၊ ပစ်ခတ်မှုတွေပြုလုပ်ခဲတဲ့အပြင် Y 12 လေယာဉ်နဲ့ဗုံးသီး ၁၆ လုံးချတိုက်ခိုက်ခဲ့တာလို့ ဆိုပါတယ်။

“သင်တန်းဆင်းပွဲမပြီးခင် လာချတာ။ ဗုံးသီးတွေကတော့ ဌာနေ(သင်တန်းဆင်းပွဲနေရာ) နေရာအနှံ့ကိုကျတာ။ ပကဖရဲဘော်တွေကတော့ ထိခိုက်မရှိဘူး။” လို့ တောင်သာမြို့နယ်ပကဖတာဝန်ခံက မြေလတ်အသံကို ပြောပါတယ်။

စစ်ကောင်စီတပ်က လေကြောင်းနဲ့ဗုံးကြဲတိုက်ခိုက်တာကြောင့် သင်တန်းဆင်းပွဲနေရာဝန်းကျင်မှာရှိနေတဲ့ နန်းမြင့်ကျေးရွာက အသက် ၄၀ ကျော်အရွယ် ကိုအောင်ကိုနဲ့ သုံ့ပန်းအဖြစ် ဖမ်းမိထားတဲ့ ကျွဲတလင်းရွာက အသက် ၇၈ နှစ်အရွယ် ပျူစောထီး ဦးသန်းရွှေဆိုသူတို့ ဒဏ်ရာရခဲ့တယ်လို့ ဆိုပါတယ်။

သင်တန်းဆင်းပွဲမပြုလုပ်မီ ဇန်နဝါရီ ၃၁ ရက် ညပိုင်းမှာ သင်တန်းဆင်းပွဲပြုလုပ်မယ့်နေရာ သတင်းပေါက်ကြားပြီး စစ်ကောင်စီထောက်ခံတယ်လီဂရမ်ချန်နယ်တွေမှာ ဖော်ပြမှုတွေရှိခဲ့ပေမယ့် ဗုံးခိုကျင်းတွေကြိုတင်ပြင်ဆင်ပြီး သင်တန်းဆင်းပွဲကို ပြုလုပ်ခဲ့တာလို့ အထက်ပါတာဝန်ခံက ပြောပါတယ်။

လေကြောင်းကနေဗုံးကြဲခံရချိန် ရဲဘော်တွေနဲ့ သင်တန်းဆင်းပွဲလာပြည်သူတွေက ဗုံးခိုကျင်းတွေထဲ အချိန်မီဝင်ရောက်ပုန်းအောင်းလိုက်နိုင်တာကြောင့် ထိခိုက်သူတွေနည်းသွားခဲ့တာ လို့ဆိုပါတယ်။

ဒါ့အပြင် ယမန်နေ့ညနေပိုင်းမှာ အထက်ပါကျေးရွာတွေအနီးဝန်းကျင်ကို တိုက်လေယာဉ်နဲ့ ဗုံးသီး ၂ လုံးထပ်မံကြဲချခဲ့ရာ ရတနာပုံကျေးရွာလမ်းဆုံကို ကျရောက်ပေါက်ကွဲခဲ့ပြီး ဒေသခံတွေထိခိုက်တာမရှိဘဲ နေအိမ် ၃ လုံး ထိခိုက်ပျက်စီးမှုရှိခဲ့တယ်လို့ ဆိုပါတယ်။

ယမန့်နေ့ည ၁၂ နာရီခန့်မှာ ဇရပ်ကြီးကျေးရွာကို စက်တပ်လေထီး(ပါရာမိုတာ) ၂ စီးနဲ့ ၁၂၀ မမ ဗုံးသီး ၄ လုံးထပ်မံကြဲချခဲ့ရာ ကျေးရွာကာကွယ်ရေးအဖွဲ့ဝင် ၁ ဦးထိခိုက်ဒဏ်ရာရခဲ့တယ်လို့ သိရပါတယ်။

ဇန်နဝါရီ၂၈ ရက်ကလည်း တောင်သာမြို့နယ်၊ ရွာတန်းရှည်ကျေးရွာကို စစ်ကောင်စီတပ်က စက်တပ်လေထီးနဲ့ဗုံးချတိုက်ခိုက်လို့ အမျိုးသမီး ၁ ဦးသေဆုံးပြီး သားအဖ ၂ ဦးဒဏ်ရာရခဲ့တယ်လို့ သိရပါတယ်။

စာတည်း – ဟိန်းစံ

မန္တလေး၊ ဇန်နဝါရီ ၃၁၊ ၂၀၂၅။

မန္တလေးတိုင်း၊ တောင်သာမြို့နယ်၊ ဇရပ်ကြီးကျေးရွာကို စစ်ကောင်စီတပ်ဖွဲ့ဝင်တွေက လေကြောင်းကနေ ပေါင် ၅၀၀ ဗုံးကြဲချခဲ့တာကြောင့် နေအိမ် ၂ လုံးပျက်စီးခဲ့တယ်လို့ တောင်သာလူထုလှုပ်ရှားမှု ကော်မတီရဲ့ တာဝန်ရှိသူတဦးဆီက သိရပါတယ်။

ဇန်နဝါရီ ၃၀ ရက် မနေ့ည ၁၀ နာရီကျော်မှာ ဂျက်ဖိုက်တာ ၁ စီးက ဇရပ်ကြီးရွာထဲကို ပေါင် ၅၀၀ ဗုံး ၁ လုံးကြဲချခဲ့ရာ ကျေးရွာအစွန်ရှိတောစပ်အနီး စာသင်ကျောင်းအနောက်ဘက်ကို ကျရောက်ပေါက်ကွဲခဲ့တာလို့ဆိုပါတယ်။

“ပေါင် ၅၀၀ ဗုံးကျတာက စာသင်ကျောင်းအနောက်ဘက် ကမ်းပါးယံစောင်းပေါ်ကျတာ။ ကျတဲ့ အားကပြင်းတော့ မြောက်ဘက်ကလျှိုုချိုင့်ဘက်ကိုပဲ အစတွေက ပိုစင်သွားတယ်။ ထန်းပင်တွေ ဘာတွေပြတ်ကျ၊ သစ်ပင်တွေပြတ်ကျတယ်။ အဆောက်အဦတွေပျက်စီးတယ်။”လို့ တောင်သာ လူထုလှုပ်ရှားမှုကော်မတီ တာဝန်ရှိသူတဦးက ပြောပါတယ်။

ဗုံးကျပေါက်ကွဲလို့ စာသင်ကျောင်းအနီး လူနေအိမ် ၂ လုံး၊ ဆိတ်ခြံ ၁ ခြံပျက်စီးခဲ့သလို ဆိတ် ၁ ကောင်လည်းသေဆုံးခဲ့ပြီး လူတွေထိခိုက်မှုမရှိခဲ့ဘူးလို့ ဆိုပါတယ်။

တောင်သာမြို့နယ်အတွင်းမှာ စစ်ကောင်စီက လေကြောင်းကနေဗုံးကြဲတိုက်ခိုက်တာအပြင် စက်တပ်လေထီးတွေအသုံးပြုပြီး ပစ်ခတ်တိုက်ခိုက်မှုတွေကို မကြာခဏပြုလုပ်လာတာကြောင့် ဒေသခံထိခိုက်သေဆုံးမှုတွေလည်းရှိနေတာဖြစ်ပါတယ်။

ဇန်နဝါရီ ၂၈ ရက်ကလည်း တောင်သာမြို့နယ်၊ ရွာတန်းရှည်ကျေးရွာကို စစ်ကောင်စီက စက်တပ်လေထီးနဲ့ဗုံးချတိုက်ခိုက်ခဲ့တာကြောင့် အမျိုးသမီး ၁ ဦးသေဆုံးပြီး သားအဖ ၂ ဦး ဒဏ်ရာရခဲ့တယ်လို့ သိရပါတယ်။

စာတည်း – လင်း

မန္တလေး၊ ဇန်နဝါရီ ၂၈၊ ၂၀၂၅။

မန္တလေးတိုင်း၊ တောင်သာမြို့နယ်၊ ရွာတန်းရှည်ကျေးရွာမှာ စစ်ကောင်စီတပ်ဖွဲ့ဝင်တွေက စက်တပ်လေထီးနဲ့ ဗုံးချတိုက်ခိုက်ခဲ့တာကြောင့် အမျိုးသမီး ၁ ဦးသေဆုံးပြီး သားအဖ ၂ ဦး ဒဏ်ရာရခဲ့တယ်လို့ ကူညီကယ်ဆယ်ရေးလုပ်ခဲ့တဲ့ဒေသခံတဦးက ပြောပါတယ်။

ဇန်နဝါရီ ၂၈ ရက်ဒီမနက် ၁ နာရီမိနစ် ၄၀ ခန့်မှ မိတ္ထီလာလေတပ်ဘက်တက်လာတဲ့ စက်တပ် လေထီး ၂ စီးနဲ့ ရွာတန်းရှည်ကျေးရွာထဲကို ဗုံးသီး ၆ လုံးပစ်ခတ်ခဲ့ရာ ကျေးရွာအပြင်ဘက်ကို ၃ လုံးနဲ့ ကျေးရွာထဲကို ၃ လုံးကျရောက်ပေါက်ကွဲခဲ့တာလို့ ဆိုပါတယ်။

“အိမ်ဝိုင်းထဲကိုပဲ ၃ လုံးစလုံးကျတာ။ သူတို့အိမ်ကထရံကာအိမ်ပါ။ အိမ်ဘေးတွေကို ကျတာ။ အစတွေစင်ပြီးထိကုန်တာ။ ထရံတွေပေါက်ထွက်ကုန်တယ်။” လို့ ကူညီကယ်ဆယ်ရေးလုပ်ခဲ့ သူက ပြောပါတယ်။

ဗုံးချတိုက်ခိုက်ချိန် အသက် ၂၇ နှစ်အရွယ် မစန္ဒာဝင်း (ခ) မမိပုက ရင်ဘတ်နဲ့ဘယ်ဘက်နံရိုးထိမှန်ပြီး နေရာတင်သေဆုံးကာ အသက် ၃၃ နှစ်အရွယ် ခင်ပွန်းဖြစ်သူမှာ ပေါင်ထိမှန်ဒဏ်ရ၊ အသက် ၃ နှစ်အရွယ်သမီးဖြစ်သူမှာ တင်ပါးဗုံးစမှန်ဒဏ်ရာခဲ့တယ်လို့ ဆိုပါတယ်။

ဒါ့အပြင် မန္ဒာဝင်းရဲ့ ထရံကာနေအိမ်နဲ့ အနီးရှိ ဆောက်လုပ်ဆဲတိုက်အိမ်တလုံးတို့လည်း ထိခိုက်ပျက်စီးသွားခဲ့တယ်လို့ သိရပါတယ်။

ဗုံးစမှန်ထိမှန်ဒဏ်ရာရသွားတဲ့ သားအဖ ၂ ဦးကိုတော့ ဒေသခံတွေက နီးစပ်ရာဆေးရုံကိုပို့ပြီး ဆေးကုသပေးနေတယ်လို့ ကူညီကယ်ဆယ်ရေးလုပ်ခဲ့သူက ပြောပါတယ်။

ဗုံးကျချိန်မှာ ရွာခံအချို့က ကျေးရွာပြင်ပကို ထွက်ပြေးခဲ့ရတာမျိုးရှိခဲ့ပြီး မနက်လင်းချိန်မှာတော့ ကျေးရွာထဲကို ပြန်ဝင်လာပြီးပုံမှန်အတိုင်းနေထိုင်နေကြတယ်လို့ သိရပါတယ်။

ပြီးခဲ့တဲ့ ဇန်နဝါရီ ၁၈ ရက်ကလည်း မြင်းခြံခရိုင်၊ တောင်သာမြို့နယ်၊ ညောင်ကုန်းကျေးရွာကို စစ်ကောင်စီက စက်တပ်လေထီးနဲ့ ဗုံးသီးချတိုက်ခိုက်ခဲ့ရာ ဒေသခံပြည်သူ ၄ ဦးသေဆုံးခဲ့သေးတယ်လို့ သိရပါတယ်။

စာတည်း – လင်း

မန္တလေး ၊ဇန်နဝါရီ ၁၇၊ ၂၀၂၅။

မန္တလေးတိုင်း၊ တောင်သာမြို့နယ်နဲ့ ၃ မိုင်ခန့်ဝေးတဲ့ ခြုံကြီးရွာမှာ ဇန်နဝါရီ ၁၄ ရက်က အမျိုးသား ၁ ဦး ဖမ်းဆီးခံခဲ့ရပြီး နောက်တနေ့မှာ အလောင်းပြန်တွေ့ခဲ့တယ်လို့ တောင်သာမြို့နယ် ပြည်သူ့ကာကွယ်ရေးအဖွဲ့ကတဆင့် သိရပါတယ်။

တောင်သာမြို့ကနေ အင်အား ၄၀ ဝန်းကျင်နဲ့ ထွက်လာတဲ့ စစ်ကောင်စီစစ်ကြောင်းဟာ ဇန်နဝါရီ ၁၄ ရက် မနက် ၁၀ နာရီခန့်မှာ ကျေးရွာထဲကို သေနတ်ပစ်ဖောက်ဝင်ရောက်ခဲ့ပြီး အသက် ၃၅ နှစ်အရွယ် ကိုဟိန်းဇော်ကို ဖမ်းဆီးခေါ်ဆောင်သွားခဲ့တာပါ။

အဲ့ဒီနောက် စစ်ကောင်စီတပ်ဖွဲ့ဝင်တွေက ခြုံကြီးရွာနဲ့ ၁မိုင်ခန့်ဝေးတဲ့ ဘုရားလှကျေးရွာ အနောက်ဘက်မှာ ကိုဟိန်းဇော်ရဲ့ ဝမ်းဗိုက်ကို မီးရှို့ကာ ဦးခေါင်းအနောက်ဘက်ကို သေနတ်နဲ့ ပစ်ခတ်သတ်ဖြတ်သွားတယ်လို့ ဆိုပါတယ်။

“ပိတ်မိနေတဲ့ သူတွေကြားမှ သူ့တယောက်တည်းကိုပဲ ဖမ်းသွားတာ။ သူတို့က သူတို့ထင်တာကို လုပ်တာ။ ကာကွယ်ရေးအဖွဲ့ဝင်နဲ့ ပတ်သက်သက် မပတ်သက်သက် သူတို့ထင်တာ ဆွဲဖမ်းပြီး သတ်သွားတာပဲ။ သေနတ်ကို အနောက်ကနေ တေ့ပစ်သွားတာ။” လို့ တောင်သာမြို့နယ် ပြည်သူ့ကာကွယ်ရေးအဖွဲ့ရဲ့ တာဝန်ရှိသူက ပြောပါတယ်။

ဇန်နဝါရီ ၁၅ ရက် မနက်ပိုင်းမှာတော့ ကိုဟိန်းဇော်ရဲ့ အလောင်းကို ပြန်တွေ့ခဲ့ပြီး သင်္ဂြိုဟ်ပေးခဲ့ရကာ သတ်ဖြတ်သွားတဲ့ စစ်ကောင်စီ စစ်ကြောင်းကတော့ မြင်းခြံမြို့နယ်နဲ့ တောင်သာမြို့နယ်ကြားမှာရှိတဲ့ သံမဏိစက်ရုံထဲကို ဝင်ရောက်သွားတယ်လို့ ဆိုပါတယ်။

အဆိုပါ စစ်ကောင်စီ စစ်ကြောင်းထဲမှာပါတဲ့ ရဲတပ်ဖွဲ့ဝင် ၁ဦးဟာ ခြုံကြီးကျေးရွာထဲကို ဝင်ရောက်ချိန် အိမ်သာတက်ရင်း စစ်ကြောင်းနဲ့ကွဲကျန်ခဲ့တာကြောင့် မြင်းခြံခရိုင်တပ်ရင်း ၃ က ဖမ်းဆီးခဲ့ပြီး သူနဲ့အတူ G 3 ၁လက်၊ ကျည် ၃၀၀၊ ကျည်ဘောက် ၄ ခု၊ အီကွေ့မန့်နဲ့ စစ်အသုံးအဆောင်ပစ္စည်းအချို့ကို သိမ်းဆည်းနိုင်ခဲ့ပါတယ်။

စစ်ကောင်စီတပ်ဖွဲ့ဝင်တွေက ကာကွယ်ရေးတပ်တွေ နယ်မြေမစိုးမိုးနိုင်သေးတဲ့ နေရာတွေကိုသာ စစ်ကြောင်းထိုးလေ့ရှိပြီး ကာကွယ်ရေးတပ်ဖွဲ့တွေ နယ်မြေစိုးမိုးထားတဲ့ နေရာတွေကိုတော့ စစ်ကြောင်းမထိုးရဲတဲ့အတွက် ဝေဟင်ကနေ မော်တာစက်တပ် လေယာဉ်တွေနဲ့ လှည့်ပတ်တာမျိုးတွေ လုပ်ဆောင်နေတယ်လို့ ဆိုပါတယ်။

“ခြုံကြီးတို့ ၊ ဘုရားလှတို့ ၊ ဖက်တောတို့ဆိုတာ ကျနော်တို့ နယ်မြေစိုးမိုးမှုရထားတဲ့ နယ်မြေမဟုတ်ဘူးလေ။ အဲတော့ မလုံခြုံဘူးလို့ ပြောရမှာပေါ့။ လုံခြုံပြီးသား နယ်မြေစိုးမိုးမှုရပြီးသား တပ်ရင်းတပ်ဖွဲ့တွေရော၊ ပကဖ အဖွဲ့တွေရော၊ နယ်မြေစိုးမိုးထားတဲ့ တောင်သာမြို့ရဲ့တောင်ဘက်ခြမ်းတို့ အရှေ့ဘက်ခြမ်းတို့ စစ်ကြောင်းမထိုးရဲပါဘူး။ စက်တပ်လေထီးယာဉ်နဲ့ပဲ ခြောက်လှန့်ပြီးတော့ လူတွေကြောက်အောင် ညတိုင်းလိုလို ထွက်တာပဲရှိတယ်။” လို့ သူက ဆက်ပြောပါတယ်။

ပြီးခဲ့တဲ့ ၂၀၂၄ စက်တင်ဘာ ၁၆ ရက်ကလည်း ခြုံကြီးကျေးရွာမှာ စစ်ကောင်စီစစ်ကြောင်းနဲ့တိုးပြီး ကာကွယ်ရေးတပ်ဖွဲ့ဝင် ၁ ဦးနဲ့ ဒေသခံ ၂ ဦး သတ်ဖြတ်ခံလိုက် ရတယ်လို့ သိရပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ ဇန်နဝါရီ ၁၆ ရက်အထိ စစ်ကောင်စီနဲ့ ၎င်းတို့ရဲ့ လက်ပါးစေတွေကြောင့် ထိခိုက်သေဆုံးခဲ့တဲ့ ပြည်သူ စုစုပေါင်း ၆,၁၈၂ ဦးရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – ချယ်ရီ

မန္တလေး၊ ဇန်နဝါရီ ၁၅၊ ၂၀၂၅။

မန္တလေးတိုင်း၊ တောင်သာမြို့နယ်၊ ခြုံကြီးကျေးရွာကို စစ်ကောင်စီတပ်ဖွဲ့ဝင်တွေက စစ်ကြောင်းထိုးချိန် အိမ်သာတက်ရင်းကျန်ခဲ့တဲ့ ရဲတပ်သား ၁ ဦးကို PDF တွေဘက်က ဖမ်းမိခဲ့တယ်လို့ မြင်းခြံခရိုင်တပ်ရင်း ၃ တပ်ရင်းမှူးထံက သိရပါတယ်။

ဇန်နဝါရီ ၁၄ ရက် မနက် ၅ နာရီခန့်မှာ တောင်သာမြို့ဘက်ကနေ အင်အား ၅၀ ကျော်နဲ့ထွက်လာတဲ့ စစ်ကောင်စီတပ်ဖွဲ့ဝင်တွေနဲ့ ရဲတပ်ဖွဲ့ဝင်ပါတဲ့ စစ်ကြောင်းက ကျေးရွာထဲကိုဝင်ရောက်ပြီးနောက် PDF အဖွဲ့ဝင်တွေကိုရှာဖွေရာမှာ မတွေ့တာကြောင့် မနက် ၇ နာရီလောက်မှာ ကျေးရွာထဲကနေ ပြန်ထွက်သွားပါတယ်။

စစ်ကောင်စီစစ်ကြောင်းက ကျေးရွာထဲကနေ ပြန်ထွက်သွားချိန် အိမ်သာတက်ရင်းကျန်ခဲ့တဲ့ စစ်ကြောင်းနဲ့ပါလာတဲ့ မှော်ဘီရဲတပ်ရင်း ၅ က၊ ရဲတပ်သား အသက် ၂၀ ကျော်အရွယ် ဥက္ကာဖြိုးကို ဖမ်းမိခဲ့တာလို့ဆိုပါတယ်။

“သူက အိမ်သာတက်ရင်း နောက်ကျနေတာ။ သူကြည့်လိုက်တော့ စစ်ကြောင်းကမရှိတော့ဘူး။ နောက်ကနေ ပြေးလိုက်တဲ့အချိန်မှာ ကျနော်တို့နဲ့တွေ့ပြီး ဖမ်းမိလာတာ။ ကျနော်တို့လည်း စစ်ကြောင်းနောက်ကိုလိုက်နေတာကိုး။ သူက ရွာဘုန်းကြီးကျောင်းအိမ်သာမှာ အိမ်သာတက်ရင်းကျန်ခဲ့တာ။ “လို့ မြင်းခြံခရိုင် တပ်ရင်း ၃ တပ်ရင်းမှူးက ပြောပါတယ်။

ရဲတပ်သားကို ဖမ်းမိချိန်မှာ G 3 ၁ လက်၊ ကျည် ၃၀၀၊ ကျည်ဘောက် ၄ ခု၊ အီကွေမန့်နဲ့ စစ်အသုံးအဆောင်ပစ္စည်းအချို့ကို သိမ်းဆည်းရမိခဲ့တယ်လို့ ဆိုပါတယ်။

ဖမ်းဆီးရမိထားတဲ့ ရဲတပ်သားကိုတော့ စစ်သုံ့ပန်းဥပဒေနဲ့အညီ ထိန်းသိမ်းထားတယ်လို့ သိရပါတယ်။

ဖမ်းဆီးခံရတဲ့ ရဲတပ်သားက စစ်အာဏာသိမ်းပြီး ၂၀၂၂ ခုနှစ်လောက်မှ ရဲတပ်ဖွဲ့ထဲ ရောက်လာသူဖြစ်ပြီး ရဲတပ်ရင်း ၅ မှာ တာဝန်ကျနေစဥ် တောင်သာမြို့နယ်ကို ၂၀၂၄ ခုနှစ်အတွင်း လုံခြုံရေးတာဝန်ကျလို့ ရောက်ရှိလာသူဖြစ်ပါတယ်။

စစ်ကောင်စီစစ်ကြောင်းက ခြုံကြီးရွာကနေ ပြန်ထွက်သွားစဉ် ကျေးရွာအတွင်းက အသက် ၃၀ ကျော်အရွယ် ဒေသခံ ကိုဟိန်းဇော်ဆိုသူကို ဖမ်းဆီးသွားတယ်လို့ သိရပါတယ်။

ဇန်နဝါရီ ၁၃ ရက် နေ့လယ် ၁၂ နာရီကျော်မှာ အထက ၁ ကျောင်းဝန်းထဲက အင်အား ၂၀ ကျော်ရှိနေတဲ့ စစ်ကောင်စီအဖွဲ့ဝင်တွေကို PDF တွေဘက်က တိုက်ခိုက်ရာ စစ်ကောင်စီအဖွဲ့ဝင် ၄ ဦးသေဆုံးပြီး သေနတ် ၁လက် သိမ်းဆည်းရမိခဲ့သေးတယ်လို့ သိရပါတယ်။

စာတည်း – ဈာန်မြင့်