ခင်ဦး

ခင်ဦး၊ မတ် ၂၃၊ ၂၀၂၃။

စစ်ကိုင်းတိုင်း၊ ခင်ဦးမြို့နယ်၊ မြကန်ကျေးရွာကို စစ်ကောင်စီတပ်သားတွေက မတ်လ ၂၃ ရက် မနက် ၈ နာရီအချိန်မှာ ဝင်ရောက်မီးရှို့ပြီး အသက် ၆၀ ကျော် အမျိုးသားတဦးကိုလည်း သတ်ဖြတ်သွားခဲ့တယ်လို့ သိရပါတယ်။

အသတ်ခံရသူမှာ အသက် ၆၅ နှစ်အရွယ် ဦးညိုတင်ဖြစ်ပြီး၊ သေဆုံးနေတဲ့ရုပ်အလောင်းကို သူ့ရဲ့နေအိမ်ထွက်ဝမှာ စစ်ကောင်စီတပ်သားတွေ ထွက်သွားခဲ့ပြီးနောက် တွေ့ရှိခဲ့ရတာ ဖြစ်တယ်လို့ ခင်ဦးမြို့နယ်သတင်းမှန်ပြန်ကြားရေးအဖွဲ့မှ တာဝန်ခံက ပြောပါတယ်။

“ဦးညိုတင်ရဲ့ရုပ်အလောင်းမှာ မျက်နှာတွေ၊ လက်တွေမှာ ဒဏ်ရာတွေ တွေ့တယ်။ မျက်နှာမှာက သေနတ်ဒင်နဲ့ရိုက်ခဲ့တဲ့အရာတွေ၊ စစ်ဖိနပ်ခြေရာတွေ တွေ့ရတယ်။ သူကအိမ်ကနေ ဆိုင်ကယ်လေးနဲ့ ထွက်ဖို့ပြင်တဲ့အချိန်မှာ စကစတွေက ရှေ့ကနေ ဆောင့်ကန်လိုက်တဲ့အခြေအနေပါ” လို့ ဆိုပါတယ်။

စစ်ကောင်စီတပ်သားတွေဟာ မြကန်ရွာက လူမနေတဲ့ နေအိမ်တလုံးကို မီးရှို့ဖျက်ဆီးခဲ့ပြီးနောက် ရွာထဲပိတ်မိကျန်ခဲ့တဲ့ ဦးညိုတင်ကိုသတ်ကာ မနက် ၁၀ နာရီကျော်အချိန်မှာ ကျေးရွာက ထွက်ခွာသွားခဲ့တယ်လို့ အထက်ပါတာဝန်ခံက ပြောပါတယ်။

“စကစတွေရွာထဲကို ဝင်လာတဲ့အချိန်မှာလည်း သေနတ်ပစ်ခတ်လို့ဝင်လာတာ။ ရွာသားတွေ ပြေးတဲ့ဖက်ကိုလည်း ရေဦးမြို့တိုင်းဆေးရုံကနေ လက်နက်ကြီး ခြောက်လုံးနဲ့လှမ်းပစ်တယ်။ လူတွေတော့ တယောက်မှမထိခဲ့ဘူး။ ဒါပေမဲ့ လက်နက်ကြီးစမှန်လို့ နွား၂ ကောင်သေခဲ့တယ်” လို့ ဆိုပါတယ်။

အခုလို နေအိမ်ကိုမီးရှို့ပြီး ဦးညိုတင်ကိုသတ်သွားခဲ့သူတွေက မြကန်ကျေးရွာရဲ့ အနောက်ဘက်မှာရှိတဲ့ ရွာသစ်ကုန်း(ပျူ)စခန်းက အင်အား ၄၀ ခန့်ရှိ စစ်ကြောင်းဖြစ်တယ်လို့ သိရပါတယ်။

မြကန်ကျေးရွာမှာ အိမ်ခြေ ၂၀၀ ခန့်ရှိပြီး၊ စစ်ကောင်စီတပ်သားတွေဟာ ယခုအကြိမ်အပါ ၃ ကြိမ်အထိ ဝင်ရောက်မီးရှို့ခဲ့လို့ ပထမအကြိမ်မှာ နေအိမ် ၄ လုံး၊ ဒုတိယအကြိမ်မှာ ၁ လုံး၊ တတိယအကြိမ်မှာ ၁ လုံးစုစုပေါင်း လူနေအိမ် ၆ လုံး မီးရှို့ခံထားရတယ်လို့ သိရပါတယ်။

ခင်ဦးမြို့နယ်တခုတည်းမှာ စစ်အာဏာသိမ်းပြီးချိန်ကစလို့ အခုမတ်လ ၂၃ ရက်နေ့အထိ ကျေးရွာပေါင်း ၆၈ ရွာက လူနေအိမ်ပေါင်း ၄၁၇၆ လုံးကို စစ်ကောင်စီတပ်သားတွေက မီးရှို့ဖျက်ဆီးထားပြီဖြစ်တယ်လို့ ခင်ဦးမြို့နယ် သတင်းမှန်ပြန်ကြားရေးအဖွဲ့ရဲ့စာရင်းအရ သိရပါတယ်။

စာတည်း – 007

ခင်ဦး၊ မတ် ၂၃၊ ၂၀၂၃။

စစ်ကိုင်းတိုင်း၊ ခင်ဦးမြို့နယ် အနောက်ခြမ်း၊ အင်းပတ်ကွေ့ဈေးမှာ အထိုင်ချနေတဲ့ စစ်ကောင်စီတပ်ဖွဲ့နဲ့ ရွာသစ်ကုန်းရွာက ပျူစောထီးအဖွဲ့တို့ပေါင်းကာ ရွာသားတွေကို လိုက်လံပစ်ခတ်ပြီး အနီးနားက ကျေးရွာတရွာကိုပါ မီးတင်ရှို့နေတယ်လို့ သိရပါတယ်။

မတ်လ ၂၃ ရက်ဒီကနေ့ မနက် ၇ နာရီခွဲလောက်က အင်အား ၄၀ လောက်ပါတဲ့ စစ်အုပ်စုဟာ ကင်းပုန်းဝပ်ပြီး လမ်းသွားလမ်းလာပြည်သူတွေကို လိုက်လံပစ်ခတ်ပြီးနောက် ၈ နာရီခွဲလောက်မှာ မြကန်ကျေးရွာကို စတင်မီးရှို့နေတာလို့ ဆိုပါတယ်။

“မနေ့ကလည်း ကင်းပုန်းတွေဝပ်ပြီး လမ်းသွားလမ်းလာတွေကို စစ်တယ်။ ပါလာတဲ့ ဖုန်းတွေ၊ ပိုက်ဆံတွေ သူတို့ဆီပေးခဲ့ရတယ်။ ဒီနေ့မနက်လည်း လာတဲ့ပြည်သူတွေကို အလာမခံဘဲ ပစ်လွှတ်တယ်။ လက်နက်ငယ်တွေနဲ့ လိုက်ပစ်တယ်။ ရေဦး တိုင်းရင်းဆေးရုံကနေ ပြည်သူတွေ ပြေးတဲ့နေရာတွေဆီ လက်နက်ကြီး ၆ လုံး ဆက်တိုက်ပစ်တယ်” လို့ ခင်ဦးသတင်းမှန်ပြန်ကြားရေးအဖွဲ့ တာဝန်ရှိသူတဦးက ပြောပါတယ်။

လက်နက်ကြီး ကျရောက်ပေါက်ကွဲလို့ တိရိစ္ဆာန်တွေထိမှန်ခဲ့ပြီး၊ ဒေသခံတွေ ထိခိုက်မှုကိုတော့ ဆက်လက်စုံစမ်းနေဆဲဖြစ်ကာ မီးရှို့ခံနေရတဲ့ မြကန်ကျေးရွာမှာလည်း တိမ်းရှောင်ဖို့အချိန်မရတော့တဲ့ သက်ကြီးရွယ်အိုတွေနဲ့ အမျိုးသမီးတချို့ ပိတ်မိကျန်ခဲ့တယ်လို့ ဆိုပါတယ်။

လက်ရှိအချိန်အထိ အဲ့ဒီကျေးရွာအနီးမှာ စစ်ကြောင်းရှိနေသေးတာကြောင့် မီးရှို့ခံရတဲ့အရေအတွက်နဲ့ နောက်ဆက်တွဲအခြေအနေတွေကို မသိရှိရသေးဘူးလို့ အထက်ပါတာဝန်ရှိသူက ဆိုပါတယ်။

အိမ်ခြေ ၂၀၀ ကျော်နဲ့ လူဦးရေ ၂ ထောင်ဝန်းကျင်ရှိတဲ့ မြကန်ကျေးရွာကို ပြီးခဲ့တဲ့ဇန်နဝါရီလ ၂ ရက်ကလည်း စစ်တပ်ကဝင်ရောက်မီးရှို့ခဲ့ပြီး၊ ဒီတကြိမ်နဲ့ဆိုရင် ၂ ကြိမ်မြောက်ရှိပြီလို့ သိရပါတယ်။

အဆိုပါစစ်အုပ်စုဟာ ရေဦး-ခင်ဦး နယ်စပ်ဖြစ်တဲ့ အင်းပတ်၊ ညောင်ပင်ကြီးစု၊ မူးဘောင်လမ်းပိုင်းမှာလည်း ဂိတ်ချနေရာယူထားပြီး အင်းပတ်၊ ချမ်းသာကုန်း၊ မြကန်၊ အင်တိုင်းမြောက်ရွာ၊ မြင်းဒေါင်းစတဲ့ အနီးဝန်းကျင်က ကျေးရွာတွေကို တလကို ၂ ကြိမ်လောက်ဝင်ပြီး ရိက္ခာရှာတာ၊ မီးရှို့တာတွေ လုပ်လေ့ရှိတယ်လို့လည်း သိရပါတယ်။

စာတည်း – လင်း

ရွှေဘို၊ မတ် ၈၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်ထဲက ကျေးရွာ ၃ ရွာပေါင်းပြီး ဒီနေ့မတ်လ ၈ ရက်မှာ ကျရောက်တဲ့ “အပြည်ပြည်ဆိုင်ရာ အမျိုးသမီးများနေ့” အထိမ်းအမှတ် ပညာပေး အကြိုဟောပြောပွဲကို ဒေသတွင်း တော်လှန်ရေးအင်အားစုတွေက မနေ့ကမတ်လ ၇ ရက်မှာ ပြုလုပ်ခဲ့ပါတယ်။

သက်ဆိုင်ရာဝန်ကြီးဌာနတွေရဲ့ ယန္တရားတွေ သိသာထင်ရှားစွာ တရားဝင်လည်ပတ်နေမှု (အသက်ဝင်နေမှု)ကို သိရှိကြစေဖို့နဲ့ အမျိုးသမီးတွေအတွက် အခွင့်အရေးတန်းတူညီမျှစွာ ရရှိရေးတွေကို သိကြဖို့ “ညီမျှခွင့်တူ ဖမ်းဆုပ်ယူ Embrace Equity” စတဲ့ ခေါင်းစဉ်နဲ့ ပြုလုပ်ခဲ့တာလို့ မြို့နယ်တာဝန်ခံတဦးက ပြောပါတယ်။

“လူတိုင်း ရသင့်ရထိုက်တဲ့ မွေးရာပါ လူ့အခွင့်အရေး၊ အမျိုးသမီးတွေရဲ့ အခွင့်အရေးတွေနဲ့အတူ ကလေးသူငယ်ဆိုင်ရာ အခွင့်အရေးစတဲ့ အမျိုးသမီးရေးရာ ရသင့်ရထိုက်တဲ့ တန်းတူညီမျှသော အခွင့်အရေးပိုင်းဆိုင်ရာတွေကို အကျယ်တဝင့် ရှင်းလင်းပြောဆို ဟောပြောခဲ့ကြတယ်” လို့ ပြောပါတယ်။

ဟောပြောပွဲကို မြို့နယ် ပအဖ ခေါင်းဆောင်၊ ပကဖ တာဝန်ခံ၊ လူသားစာနာရေးဆိုင်ရာ တာဝန်ခံ၊ အမျိုးသမီး ကလေးသူငယ် တာဝန်ခံ၊ သတင်းပြန်ကြားရေး၊ ပညာရေး စုမှူး တာဝန်ခံ၊ အခမ်းအနားမှူး ရုံးအဖွဲ့တွေနဲ့အတူ တိုက်နယ် (၄) ခေါင်းဆောင်နဲ့ အဖွဲ့၊ ရပ်ကျေး ပအဖ/ပကဖ တွေနဲ့ ကျေးရွာအသီးသီးက ဒေသခံတွေ ပါဝင်တက်ရောက်ခဲ့ကြပါတယ်။

ခင်ဦး၊ မတ် ၆၊ ၂၀၂၃။

ပျူစောထီးတပ်ဖွဲ့တွေက လက်နက်ကြီးတွေနဲ့ ပစ်ခတ်ပြီး စစ်ကြောင်းထိုးလာလို့ စစ်ကိုင်းတိုင်း၊ ခင်ဦးမြို့နယ်က အသက် ၈ နှစ်အရွယ် ကလေးတဦးဟာ ထွက်ပြေးတိမ်းရှောင်ရင်း ကျည်ထိမှန် သေဆုံးခဲ့တယ်လို့ သိရပါတယ်။

မတ်လ ၆ ရက် ဒီမနက် ၁၁ နာရီလောက်မှာ အင်အား ၁၀၀ ဝန်းကျင်ရှိတဲ့ ပျူစောထီးတပ်ဖွဲ့ဝင်တွေက ကျီစုရွာဘက်ကို စစ်ကြောင်းထိုးလာချိန်မှာ ထွက်ပြေးတိမ်းရှောင်နေကြတဲ့ မုံလှကျေးရွာက အသက် ၈ နှစ်အရွယ် မိန်းကလေးငယ်တဦး ကျည်ထိမှန် သေဆုံးခဲ့တာလို့ ခင်ဦးမြို့နယ် သတင်းမှန်ကြားရေး တာဝန်ခံတဦးက မြေလတ်အသံကို ပြောပါတယ်။

“တိုက်ပွဲလည်း မဖြစ်ဘဲနဲ့ ထွက်ပြေးနေတဲ့ ဒေသခံတွေကိုလက်နက်ကြီးတွေနဲ့ ပစ်တယ်။ စက်သေနတ်တွေနဲ့လည်း ပစ်တယ်။ အဲဒီမှာ ကလေးတဦးက ဆုံးသွားတယ်။ အသက် ၆၀ အရွယ် အဖိုးတဦးလည်း လက်နက်ကြီး ထိသွားတယ်” လို့ ဆိုပါတယ်။

အဲ့ဒီပျူစောထီးအဖွဲ့ဟာ ရေဦးမြို့နယ်၊ အောင်သာယာကျေးရွာက ဖြစ်ပြီး၊ ခုလိုစစ်ကြောင်းထိုးလာတဲ့အတွက် ခင်ဦးနယ်ထဲက ငါးရုံကြီး၊ ရှားတောရွာနဲ့ မုံလှရွာစတဲ့ ကျေးရွာကဒေသခံတွေ ရွာကနေ ထွက်ပြေးနေရတယ်လို့လည်း သိရပါတယ်။

အလားတူ မတ်လ ၅ ရက်မှာလည်း ခင်ဦးမြို့နယ်၊ အလယ်ရှိုရွာက ၁၂ နှစ်အရွယ် ကလေးငယ်တဦးဟာ နွားကျောင်းနေစဥ် မပေါက်ကွဲဘဲ ကျန်နေတဲ့ ၄၀ မမ လက်နက်ကြီးကျည်အဖူးကို ကိုင်မိရာမှ ပေါက်ကွဲမှုဖြစ်ပြီး ထိမှန်သေဆုံးခဲ့သေးတယ်လို့လည်း အထက်ပါတာဝန်ခံက ဆက်ပြောပါတယ်။

“ကလေးက ကျောင်းသားပါ။ ကျောင်းပိတ်လို့ နွားကျောင်းသွားရင်း လက်နက်ကြီးကိုတွေ့တော့ ကောက်ယူပြီး ရေကန်ဘောင်ပေါ်မှာ တင်ထားတယ်။ အဲဒါ မတော်တဆ ပြုတ်ကျပြီးတော့ လက်နက်ကြီးက ပေါက်သွားတယ်။ အသံကြားလို့ တောထဲက လူတွေ၊ ရွာထဲက လူကြီးတွေ လာပေမဲ့လည်း ကလေးက အသက်မမှီတော့ဘူး။ အဲဒီလက်နက်ကြီးက ဖေဖော်ဝါရီလကတည်းက စခတွေ ရမ်းသမ်းပစ်ခတ်ခဲ့တဲ့ဟာတွေပါ” လို့ ဆိုပါတယ်။

ခင်ဦးမြို့နယ်ထဲမှာ ပြီးခဲ့တဲ့ ၂၀၂၂ ခုနှစ်ကနေ ယခုနှစ် ၂၀၂၃ ခုနှစ်အထိ စစ်ကောင်စီတပ်ဖွဲ့ဝင်တွေရဲ့ လက်နက်ကြီးကျည် ထိမှန်မှုကြောင့် အသက်မပြည့်သေတဲ့ ကလေးငယ် ၁၀ ဦးထက်မနည်း သေဆုံးခဲ့တယ်လို့ ခင်ဦးမြို့နယ် သတင်းမှန်ကြားရေးတာဝန်ခံဆီက သိရပါတယ်။