မြေလတ်အသံ၊ ဒီဇင်ဘာ ၁၅၊ ၂၀၂၅။

အာဏာသိမ်းစစ်တပ်ရဲ့ ဖမ်းဆီးခြင်းခံထားရတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ ကျန်းမာရေးအခြေအနေနဲ့ပတ်သက်ပြီး သတင်းအချက်အလက်မရရှိတာကြောင့် မိခင်ဖြစ်သူကွယ်လွန်သွားပြီလားဆိုတာတောင် သိနိုင်မှမဟုတ်ဘူးလို့ ဒေါ်အောင်ဆန်းစုကြည်ရဲ့သားဖြစ်သူ ကင်မ်အဲရစ်က ရိုက်တာ သတင်းဌာနနဲ့အင်တာဗျူးမှာ ပြောဆိုလိုက်ပါတယ်။

ကင်မ်အဲရစ်က သူ့ရဲ့ အသက် ၈၀ အရွယ်မိခင်နဲ့ နှစ်အတော်ကြာ အဆက်အသွယ်မရခဲ့ကြောင်းနဲ့ ၂၀၂၁ ခုနှစ် ဖမ်းဆီးခံရပြီးတဲ့နောက်ပိုင်းမှာ ဒေါ်အောင်ဆန်းစုကြည်ဟာ နှလုံးရောဂါ၊ အရိုးနဲ့ သွားဖုံးရောဂါတွေ ခံစားနေရကြောင်းကို တဆင့်စကားနဲ့သာကြားသိရကြောင်း ဆိုပါတယ်။

“ကျနော်သိသလောက်ဆိုရင် အခုအချိန်မှာ သူက သေဆုံးနေပြီးသားလည်း ဖြစ်နိုင်ပါတယ်။ သူ့မှာ ကျန်းမာရေးပြသနာတွေ ရှိနေပါတယ်။ ၂ နှစ်ကျော်ကြာတဲ့အထိ ဘယ်သူမှ သူ့ကို တွေ့ခွင့်မရခဲ့ဘူး။ ရှေ့နေအဖွဲ့နဲ့တောင် တွေ့ခွင့်ပေးမထားဘူး။ မိသားစုနဲ့ဆိုရင် ပိုလို့တောင်ဆိုးသေးတယ်” လို့ ကင်မ် က ရိုက်တာသတင်းဌာနကို ပြောပါတယ်။

ဒီဇင်ဘာ ၁၄ ရက်က တိုကျိုမှာပြုလုပ်ခဲ့တဲ့ All In One Piece Movement (နိုင်ငံရေးအကျဉ်းသားအားလုံး အမြန်ဆုံးပြန်လွှတ်ပေးဖို့တောင်းဆိုတဲ့ လှုပ်ရှားမှု) မှာ ကင်မ် က ရိုက်တာသတင်းဌာနကို အခုလို ဖြေကြားခဲ့တာပါ။

အဲ့ဒီ လှုပ်ရှားမှုမှာ သမ္မတ ဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ အပါအဝင် မတရား ဖမ်းဆီးထိန်းသိမ်းခံထားရတဲ့ နိုင်ငံရေးအကျဉ်းသားအားလုံး အမြန်ဆုံးပြန်လွှတ်ပေးဖို့ တောင်းဆိုခဲ့တဲ့အပြင် ဂျပန်ခရီးစဉ်အတွင်းမှာ ဂျပန်နိုင်ငံရေးသမားတွေ အစိုးရအရာရှိတွေနဲ့တွေ့ဆုံခဲ့ပြီး စစ်ကော်မရှင်ကို ပိုမိုပြင်းထန်စွာဆန့်ကျင်ကန့်ကွက်ဖို့နဲ့ စစ်ကော်မရှင်ကပြုလုပ်မယ့် ရွေးကောက်ပွဲကို ဆန့်ကျင်ဖို့အတွက်လည်း ပြောဆိုခဲ့တယ်လို့ ဆိုပါတယ်။

မြေလတ်အသံ၊ စက်တင်ဘာ ၇၊ ၂၀၂၅။

ဒေါ်အောင်ဆန်းစုကြည် ကျန်းမာရေးကောင်းမွန်တယ်လို့ စစ်ကော်မရှင်ပြောခွင့်ရ ဗိုလ်ချုပ် ဇော်မင်းထွန်းက ပြောဆိုလိုက်ပါတယ်။

စစ်တင်ဘာ ၆ ရက် ယမန်နေ့က တရုတ်နိုင်ငံကနေ ပြန်ရောက်လာချိန် နေပြည်တော်လေဆိပ်မှာ စစ်ကော်မရှင်ကို ထောက်ခံရေးသားနေတဲ့ မီဒီယာတွေကို ဒေါ်အောင်ဆန်းစုကြည်ကျန်းမာရေးနဲ့ ပတ်သက်ပြီး အခုလို ပြောဆိုခဲ့တာပါ။

လူထုခေါင်းဆောင် ဒေါ်အောင်ဆန်းစုကြည်ရဲ့ ကျန်းမာရေးအခြေအနေဆိုးရွားနေပြီး ဆေးကုသခွင့် ပိတ်ပင်ခံထားရကြောင်း ပြီးခဲ့တဲ့ရက်ပိုင်းမှာ သားဖြစ်သူ ကင်မ်အဲရစ် ခေါ် ကိုထိန်လင်း က ထုတ်ဖော် ပြောဆိုခဲ့ပြီးနောက် စစ်ကော်မရှင်ဘက်က အခုလိုတုံ့ပြန်လာတာလည်း ဖြစ်ပါတယ်။

ဒါ့အပြင် ဒေါ်အောင်ဆန်းစုကြည်ရဲ့ ကျန်းမာရေးသတင်းဟာ ၎င်းတို့စစ်ကော်မရှင်ခေါင်းဆောင်ရဲ့ တရုတ်ခရီးစဥ်သတင်းမှေးမှိန်အောင် သတင်းတုထုတ်လွှင့်တာဖြစ်တယ်လို့ သူက စွပ်စွဲပါတယ်။

“ဒီခရီးစဥ်(တရုတ်ခရီးစဥ်)ကို မှေးမှိန်လိုတဲ့အတွက် ကျနော်တို့ မြန်မာနိုင်ငံကို မလိုလားတဲ့ ကျနော်တို့ တိုးတက်မှာကို မလိုလားတဲ့သူတွေက ထုတ်လွှင့်တဲ့ ထုတ်လွှင့်ချက်ပဲ​ဖြစ်ပါတယ်” လို့ ဗိုလ်ချုပ် ဇော်မင်းထွန်းက ပြောပါတယ်။

စစ်အာဏာသိမ်းပြီးနောက် ဖမ်းဆီးထားတဲ့ လူထုခေါင်းဆောင် ဒေါ် အောင်ဆန်းစုကြည်ကို စစ်ကော်မရှင်က ပုဒ်မအများအပြားနဲ့ နှစ်ရှည်ထောင်ဒဏ်တွေ ချမှတ်ခဲ့ပြီး နေပြည်တော်မှာ ချုပ်နှောင်ထားတာပါ။

ပြီးခဲ့တဲ့ စက်တင်ဘာ ၅ ရက်မှာ မိခင်ဖြစ်သူ ဒေါ်အောင်ဆန်းစုကြည် နှလုံးရောဂါဆိုးရွားစွာခံစားနေရပြီး ဆေးကုသခွင့်တောင်းဆိုပေမယ့် ပိတ်ပင်ခံထားရကာ စိုးရိမ်ရကြောင်း သားဖြစ်သူက နိုင်ငံတကာသတင်းဌာနတွေကတဆင့် ပြောဆိုထားတာလည်း ဖြစ်ပါတယ်။

မြေလတ်အသံ

ဒေါ်အောင်ဆန်းစုကြည် #ကျန်းမာရေး #ဗိုလ်ချုပ်ဇော်မင်းထွန်း #တရုတ်ခရီးစဉ်

မြေလတ်အသံ၊ ဩဂုတ် ၅၊ ၂၀၂၅။

ကျန်းမာရေးအခြေအနေဆိုးဝါးနေတာကြောင့် နေအိမ်မှာ ဆေးကုသမှုခံယူနေရတဲ့ ယာယီသမ္မတ ဦးမြင့်ဆွေ အထူးစိုးရိမ်နေရလို့ နေပြည်တော် အမှတ် ၂ စစ် ဆေးရုံ ကုတင် ၁၀၀၀ မှာစောင့်ကြည့်ကုသနေရတယ်လို့ စစ်ခေါင်းဆောင်တွေရဲ့ အမျိုးသားကာကွယ်ရေးနှင့်လုံခြုံရေးကောင်စီ (ကာလုံ)ရုံးကနေ ဒီကနေ့ ဩဂုတ် ၅ ရက်မှာ သတင်းထုတ်ပြန်ပါတယ်။

ဦးမြင့်ဆွေဟာ ဇူလိုင်လအတွင်းမှာ ကိုယ်အလေးချိန်လျော့ကျတာ၊ အစာကောင်းစွာမစားနိုင်တာ၊ အဖျားတက်တာ၊ ဦးနှောက်နိုးကြားမှုလျော့နည်းလာတာတွေကြောင့် ဇူလိုင် ၂၄ ရက်ကစတင်ကာ နေပြည်တော် ကုတင် ၁၀၀၀ စစ်ဆေးရုံကို ပို့ဆောင်ကုသနေရတာဖြစ်ပြီး လက်ရှိအခြေအနေက အထူးစိုးရိမ်ရတယ်လို့ ဆိုပါတယ်။

ဦးမြင့်ဆွေဟာ ၂၀၂၃ နှစ်ဆန်းပိုင်းက စတင်ကာ အာရုံကြောများနှေးကွေးတုံ့ဆိုင်းသည့်ရောဂါကို စတင်ခံစားခဲ့ရပြီး ၂၀၂၄ ဇူလိုင်လအတွင်း ကျန်းမာရေးအခြေအနေဆိုးဝါးလာတာကြောင့် နေအိမ်မှာ ဆေးခွင့်နဲ့ ကုသမှုခံယူနေရကြောင်း စစ်ကောင်စီက သတင်းထုတ်ပြန်ခဲ့ကာ အဲ့ဒီနောက် ယာယီသမ္မတရာထူးကို စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် က လွှဲပြောင်းရယူခဲ့ပါတယ်။

အဲ့ဒီနောက် ၁ နှစ်အကြာ ပြီးခဲ့တဲ့ ဇူလိုင် ၂၄ ရက်က စတင်ပြီး နေအိမ်ကနေ ဆေးရုံကိုပို့ဆောင်ကာ စောင့်ကြည့်ကုသနေရကြောင်း ကာလုံက ထပ်မံထုတ်ပြန်လာတာပါ။

ဦးမြင့်ဆွေဟာ စစ်တပ်အာဏာသိမ်းပြီးနောက် လူမြင်ကွင်းကနေ ပျောက်ကွယ်နေလေ့ရှိပြီး စစ်ခေါင်းဆောင်တွေ ၆ လတကြိမ် အရေးပေါ် ကာလသက်တမ်းတိုးချိန်ခေါ်ယူတဲ့ ကာလုံအစည်းတွေမှာသာ ထွက်ပေါ်အစည်းအဝေးတက်ရောက်တာဖြစ်ပါတယ်။

စစ်ကိုင်း၊ မတ် ၂၃၊ ၂၀၂၃။

စစ်ကိုင်းတိုင်းဒေသကြီး စစ်ဘေးရှောင်ပြည်သူတွေနဲ့ ကျေးလက်ကျောင်းတွေကို ကျန်းမာရေးကူညီစောင့်ရှောက်ပေးနေတာဟာ ကျောင်းပေါင်း ၂၂ ကျောင်းအထိ ရှိလာပြီဖြစ်တယ်လို့ AVSC Medical Team ဆီက သိရပါတယ်။

ကျေးရွာပေါင်းစုံဦးဆောင်ကော်မတီ (AVSC Medical Team)ဟာ စစ်ကိုင်းတိုင်း ဆားလင်းကြီးနဲ့ ယင်းမာပင်မြို့နယ်တွေက စစ်ဘေးရှောင််ပြည်သူတွေနဲ့ ကျေးလက်ကျောင်းကျန်းမာရေးနဲ့ပတ်သက်ပြီး အဓိကလုပ်ဆောင်ပေးနေတာဖြစ်တယ်လို့ ကျန်းမာရေးအကြီးတန်း ၂ CDM သူနာပြုဆရာမ မအိက ပြောပါတယ်။

စစ်ရှောင်ပြည်သူတွေအနေနဲ့ ရက်တိုရက်ရှည် စစ်ရှောင်နေရပေမယ့် ကျန်းမာရေးနဲ့ပတ်သက်လို့ ဆက်သွယ်လာရင် သွားရောက်ကူညီသလို NUGရဲ့ ကြားကာလပညာသင်စနစ် ဖော်ဆောင်နေတဲ့ကာလမှာလည်း ကျောင်းကျန်းမာရေးအတွက် ကူညီစောင့်ရှောက်နေပါတယ်လို့ ဆိုပါတယ်။

“စစ်ရှောင်ပြည်သူတွေက အိမ်ပြန်နေရတဲ့သူ ရှိသလို တောထဲမှာသွားပြီး ဆေးကုရတာမျိုးတွေ ရှိပါတယ်။ များသောအားဖြင့် ဆီးချို သွေးတိုးရောဂါဖြစ်တဲ့ သက်ကြီးရွယ်အိုတွေ ကုရတာ များတယ်။ ခလေးငယ်တွေကတော့ ဖျားနာတာလောက်ပဲ ဖြစ်ကျတာ။ လိုအပ်တဲ့ ဆေးဝါးတွေက ရံပုံငွေရှာဖွေလို့ရတဲ့ငွေ၊ ပြည်သူတွေရဲ့လှူဒါန်းငွေနဲ့ ဝယ်ရပါတယ်” လို့ ပြောပါတယ်။

ကျေးလက်စာသင်ကျောင်းတွေရဲ့ ကလေးငယ်တွေကျတော့ နေ့စဥ်အစာအာဟာရဓာတ် ညီမျှအောင် မစားတတ်လို့ ပုံမှန်အားဖြင့် ဗီတာမင် B2 ချို့တဲ့တာအဖြစ်များပြီး မူလတန်းကလေးတွေကို သံချဆေးကျွေးတာ၊ အလယ်တန်းနဲ့ အထက်တန်း မိန်းကလေးတွေကို သံဓာတ်အားတိုးဆေးပေးတာဆိုရင် ကျောင်းပေါင်း ၂၂ ကျောင်းရှိပြီလို့ ဆိုပါတယ်။

ဆရာမ မအိဟာ စစ်ကိုင်းတိုင်း နာဂကိုယ်ပိုင်အုပ်ချုပ်ခွင့်ရဒေသ၊ လေရှီးမြို့နယ် ပြည်သူ့ကျန်းမာရေးအကြီးတန်း ၂ သူနာပြုဆရာမတဦးအဖြစ်နဲ့ CDM ပြုလုပ်ကာ ဆားလင်းကြီး၊ ယင်းမာပင် ကျေးရွာပေါင်းစုံဦးဆောင်ကော်မတီရဲ့ AVSC Medical Teamကို Volunteer ၇ ဦးရဲ့ကူညီပံပိုးမှုနဲ့ အခမဲ့ကျန်းမာရေး စောင့်ရှောက်မှုပေးနေတာ ဖြစ်ပါတယ်။

စာတည်း – ဇို