ကျော်ကြီး 
ပျော်ဘွယ်၊ အောက်တိုဘာ ၁၇၊ ၂၀၂၅။
မန္တလေးတိုင်း၊ ပျော်ဘွယ်မြို့နယ်၊ ပဲ့ကန်ကျေးရွာမှာ လမ်းအောင်ပွဲလုပ်နေချိန် သေနတ်သမားတွေက ဝင်ပစ်လို့ အုပ်ချုပ်ရေးမှူးအပါ ၈ ဦးသေဆုံးသွားတယ်လို့ ဒေသခံတွေဆီက သိရပါတယ်။
အောက်တိုဘာ ၁၆ ရက်ည ၈ နာရီကျော်မှာ ပဲ့ကန်ရွာအနီး ကွင်းအမှတ် ၇၆၉ လယ်ကွက်အတွင်းမှာ ပဲ့ကန်ကျေးရွာအုပ်ချုပ်ရေးမှူး ဦးရဲမြင့်ဦးစီးပြီး ကျေးရွာကွန်ကရစ်လမ်းခင်းပြီးစီးမှု အောင်ပွဲအနေနဲ့ဇာတ်ပွဲ၊ လောင်းကစားဝိုင်းတွေထည့်သွင်းပြုလုပ်နေချိန် လက်နက်ကိုင်အဖွဲ့တွေက လာရောက်ပစ်ခတ်တာလို့ဆိုပါတယ်။
“သူတို့က လမ်းဖောက်တာ လမ်းဖွင့်ပွဲပြီးသွားလို့ ပျော်ပွဲရွှင်ပွဲလုပ်ကြတာ။ သေတဲ့အထဲတော့ အုပ်ချုပ်ရေးမှူးပါတယ်။ အုပ်ချုပ်ပိုင်းမဟုတ်တဲ့သူတွေလည်းသေတာ။ ပွဲလုပ်နေချိန်က လူကများတာပေါ့။ လာပစ်တာကတယောက်တည်း လာပစ်တယ်လို့တော့ သိရတယ်။ မဆိုင်တဲ့သူတွေပါထိကုန်တာ။”လို့ ဖြစ်စဥ်ကိုသိထားတဲ့ ဒေသခံတဦးကပြောပါတယ်။
ပစ်ခတ်မှုအတွင်း အုပ်ချုပ်ရေးမှူး ဦးရဲမြင့်အပါအဝင် ပွဲခင်းအတွင်းရှိနေသူ အသက် ၂၅ နှစ်ကနေ ၅၀ ကြားအမျိုးသား ၈ ဦးသေဆုံးသွားပြီး အမျိုးသမီး ၁ ဦးလည်းထိခိုက်သွားတယ်လို့ ဆိုပါတယ်။
“အဲဒါက ဂေါက်ဂဲ့ဝိုင်း(လောင်းကစားဝိုင်း)က ပဲ့ကန်ရွာသူကြီးကိုစပစ်တာ။ လာပစ်တာက နှစ်ယောက် အရှည်နဲ့ပစ်တာ။ အဓိကရည်ရွယ်ချက်က အုပ်ကြီးကိုပစ်တာနဲ့တူတယ်။ သေတာက ၈ ယောက်။ မြေပြင်မှာ စုံစမ်းရသလောက်က လာပစ်တဲ့သူတွေက mask တပ်ထားတယ်တဲ့”လို့ နောက်ထပ်ဒေသခံတဦးကပြောပါတယ်။
ပစ်ခတ်မှုကို ဘယ်အဖွဲ့တွေကလာရောက်ပစ်ခတ်တယ်ဆိုတာထုတ်ပြန်ကြေညာထားတာမရှိသေးဘဲ အုပ်ချုပ်ရေးမှူး ဦးရဲမြင့်ဟာ ကျေးရွာအတွင်း စစ်မှုထမ်းကြေးကောက်တာ၊ သစ်တွေဖမ်းဆီးပြီး ငွေတောင်းတာတွေရှိတာကြောင့် ခုလို ပစ်ခတ်ခံရတာလို့ ဒေသခံတဦးကပြောပါတယ်။
“ပဲ့ကန်အုပ်ကြီးက လွန်ခဲ့တဲ့ ၆ လလောက်က စစ်မှုထမ်းကိစ္စရယ်၊ သစ်ဖမ်းတဲ့ကိစ္စရယ်။ ရောင်းဝယ်တယ်ဆိုတဲ့ သူဆီကဖမ်းတာမဟုတ်ဘူး။ အိမ်သုံးကအစဖမ်းလို့ နာမည်ထွက်နေတာ။ ခုလောင်းကစားဝိုင်းကလည်း လမ်းအောင်ပွဲအနေနဲ့လုပ်တာ”လို့ အထက်ပါဒေသခံက ဆက်ပြောပါတယ်။
သေဆုံးသူတွေနဲ့ပတ်သက်တဲ့အသေးစိတ်အချက်အလက်ကိုမသိရှိရသေးဘဲ လက်ရှိမှာ ရန်တောင်တိုက်နယ်ဆေးရုံကို ပို့ဆောင်ထားရပြီး စစ်ကော်မရှင်ဘက်ကစစ်ဆေးမှုတွေပြုလုပ်နေတယ်လို့ သိရပါတယ်။
အောက်တိုဘာ ၁၆ ရက်ကလည်း မန္တလေးတိုင်း၊ ညောင်ဦးမြို့နယ်၊ ထီးပုကျေးရွာမှာဘီယာဆိုင်ထိုင်နေတဲ့ အုပ်ကြီး ပစ်ခတ်ခံရလို့သေဆုံးသွားတယ်လို့ သိရပါတယ်။
စာတည်း – လင်း