ဒိန်းဂျား 
ဘုတလင်၊ ဩဂုတ် ၂၇၊ ၂၀၂၅။
စစ်ကိုင်းတိုင်း၊ ဘုတလင်မြို့နယ်၊ ပဲပြစ်တောအရှေ့ရွာကို စစ်ကြောင်းထိုးလာတဲ့ စစ်ကော်မရှင်တပ်ဖွဲ့ဝင်တွေကို ဩဂုတ် ၂၆ ရက်မှာ ပစ်ခတ်တိုက်ခိုက်ပြီး လက်နက်ခဲယမ်းတွေသိမ်းဆည်းခဲ့တယ်လို့ ဘုတလင်မြို့နယ်တပ်ပေါင်းစုဆီက သိရပါတယ်။
အဲ့ဒီစစ်ကြောင်းဟာ မုံရွာအခြေစိုက် နမခတပ်ကဖြစ်ပြီး နမခကတဆင့် ဘုတလင်မြို့ကိုဝင်ရောက်ပြီးနောက် ထပ်မံစစ်ကြောင်းထိုးလာချိန် ပဲပြစ်တောအရှေ့ရွာအရောက်မှာ ည ၇ နာရီလောက်ကနေ ၉ နာရီအထိ ၂ နာရီကြာ တိုက်ခိုက်ခဲ့တာလို့ ဆိုပါတယ်။
“စစ်ကြောင်းက နမခ ကထွက်လာတာ၊ နမခ ကထွက်ပြီးတော့ ဘုတလင်နဲ့ နမခ ကြားမှာ ကျနော်တို့နဲ့ တိုက်ပွဲတကြိမ် ဖြစ်သေးတယ်၊ အဲ့ဒီကနေ ဘုတလင်ရောက်တာ၊ ဘုတလင်မှာနားပြီးတော့ ဘုတလင်နားတဝိုက်ကရွာတွေကို စစ်ကြောင်းလှည့်ထိုးတယ်၊ ဘုတလင်နဲ့ ခပ်လှမ်းလှမ်း ပဲပြစ်တောရွာကို စစ်ကြောင်းထိုးတာမှာ ကျနော်တို့နဲ့ တိုက်ပွဲဖြစ်တာ”လို့ ဘုတလင်မြို့နယ်တပ်ပေါင်းစုမှ စစ်ကြောင်းမှူး ကိုကြွက်ကလေးက ပြောပါတယ်။
တိုက်ပွဲအတွင်း စစ်ကော်မရှင်တပ်ဖွဲ့ဝင် ၇ ဦးသေဆုံးတာကို အတည်ပြုနိုင်ပြီး MA 1 သေနက် ၁ လက်၊ MA 11 သေနက် ၁ လက်၊ အီကွေ့မန့်၊ ကျည်ကာဦးထုပ်နဲ့ အခြားခဲယမ်းပစ္စည်းတွေ သိမ်းဆည်းခဲ့တယ်လို့ ဆိုပါတယ်။
ဒီတိုက်ခိုက်မှုကို ဘုတလင်မြို့နယ် တပ်ပေါင်းစု စစ်ကြောင်းနဲ့အတူ မုံရွာခရိုင် တပ်ရင်း ၂၀ BOB တပ်ရင်း၊ ပုလဲမြို့နယ် အခြေစိုက် ဗိုလ်မျက်လုံးတပ်ဖွဲ့အပါအဝင် မဟာမိတ်တပ်ဖွဲ့တွေက ပူးပေါင်းတိုက်ခိုက်ခဲ့တာဖြစ်ပြီး တိုက်ခိုက်ပြီးနောက် စစ်ကော်မရှင်စစ်ကြောင်းဟာ ဘုတလင်ဘက်ကို ပြန်ဆုတ်သွားတယ်လို့ သိရပါတယ်။
ပြီးခဲ့တဲ့ ဩဂုတ် ၁၀ ရက်ကလည်း စစ်ကိုင်းတိုင်း၊ မုံရွာမြို့အခြေစိုက် အနောက်မြောက်တိုင်းစစ်ဌာနချုပ်-နမခ စစ်ကြောင်းကို ဘုတလင်မြို့နယ် တပ်ပေါင်းစုက ၂ ကြိမ်တိုက်ခိုက်ခဲ့ရာ စစ်ကောင်မရှင်တပ်ဖွဲ့ဝင် ၄၀ ဦးသေဆုံးပြီး ၁ ဦးအရှင်ဖမ်းမိခဲ့ပါသေးတယ်။
စာတည်း – လင်း