ကြို့ပင်ကောက်၊ ဖေဖော်ဝါရီ ၂၅၊ ၂၀၂၅။

ပဲခူးတိုင်း၊ သာယာဝတီခရိုင်၊ ကြို့ပင်ကောက်မြို့နယ်၊ ဂွေးကောင်းပင်ရွာအုပ်ချုပ်ရေးမှူးနဲ့ ဇနီးဖြစ်သူတို့ ပစ်ခတ်ခံရပြီးသေဆုံးသွားတယ်လို့ သာယာဝတီခရိုင်တပ်ရင်း အမှတ် ၃၈၀၁ တပ်ခွဲ ၅ ကြို့ပင်ကောက် Heroပျောက်ကျားတပ်ဖွဲ့ဆီမှ သိရပါတယ်။

သေဆုံးသူတွေမှာ ဂွေးကောင်းပင်ရွာအုပ်ချုပ်ရေးမှူး ဦးကံမြင့်နဲ့ ဇနီးဖြစ်သူ ဒေါ်ခင်ဝင်း တို့ဖြစ်ပြီး ဖေဖော်ဝါရီ ၂၄ ရက် ညနေ ၃ နာရီကျော်မှာ ၎င်းတို့နေအိမ်အတွင်းဝင်ရောက် ပစ်ခတ်ခဲ့တာလို့ ဆိုပါတယ်။

“ သူ့မိန်းမကိုတော့မလွှဲသာလို့သတ်လိုက်ရတာပါ၊ သူ့မိန်းမကိုတော့ သတ်ဖို့အစီအစဉ်မရှိဘူး” လို့ Hero ပြောက်ကျားတပ်ဖွဲ့တာဝန်ရှိသူတဦးက ပြောပါတယ် ။

ဦးကံမြင့်ကို ပစ်ခတ်ရှင်းလင်းပြီးချိန် ၎င်းရဲ့ဇနီးဖြစ်သူ ဒေါ်ခင်ဝင်းက ကာကွယ်ရေးတပ်ဖွဲ့ဝင်တွေကို ဓါးနဲ့ ခုတ်ဖို့လုပ်ဆောင်တာကြောင့် ထပ်မံပစ်ခတ်ခဲ့ရတာလို့ ဆိုပါတယ် ။

အုပ်ချုပ်ရေးမှူး ဦးကံမြင့် ဟာ စစ်ကောင်စီကပေးထားတဲ့ သေနတ်နဲ့လက်ပစ်ဗုံးတွေ ကိုင်ဆောင်ထားသူဖြစ်ပေမယ့် ရှာဖွေချိန်မရခဲ့လို့ သိမ်းဆည်းနိုင်ခဲ့တာမရှိဘူးလို့ ဆိုပါတယ်။

ဦးကံမြင့်မှာ ရပ်ရွာတွေအတွင်း ပေါ်တာဆွဲဖမ်းဆီးတာတွေမှာဦးဆောင်တာ၊ စစ်‌ကောင်စီတပ်ဖွဲ့နဲ့ပူးပေါင်းပြီး ဆက်ကြေးငွေကောက်ခံတာတွေအပြင် PDF အဖွဲ့ဝင်တွေကိုစုံစမ်းလေ့လာနေသူဖြစ်ကာ ဖေဖော်ဝါရီ ၂၅ ရက် ဒီကနေ့မှာ ကျေးရွာပျူစောထီးအယောက် ၂၀ ကို နေပြည်တော်ရှိ စစ်သင်တန်းကို ပို့ဆောင်ဖို့ လုပ်ဆောင်နေသူလည်းဖြစ်တယ်လို့ အထက်ပါတာဝန်ရှိသူက ပြောပါတယ်။

အုပ်ချုပ်ရေးမှူးလင်မယားပစ်ခတ်ခံရပြီးတဲ့နောက် စစ်ကောင်စီတပ်နဲ့ရဲတပ်ဖွဲ့ အင်အား ၂၀ ဝန်းကျင်ရောက်ရှိလာပြီး ရုပ်အလောင်းတွေကို ကြို့ပင်ကောက်မြို့ပေါ်ကို ယူဆောင်သွားကာ ဒီကနေ့မနက်မှာတော့ ဂွေးကောင်းပင်ရွာမှာ စစ်ကောင်စီတပ်ဖွဲ့အင်အား ၆၀ ဝန်းကျင် ရောက်ရှိနေတယ်လို့ ဆိုပါတယ် ။

ယမန်နေ့ ဖေဖော်ဝါရီ ၂၄ ရက် မနက်ပိုင်းမှာပဲ လက်ပံတန်းမြို့နယ်၊ မှောင်အင်းအုပ်စုအုပ်ချုပ်ရေးမှုး ဦးသန်းဦး ကို ဒေသကာကွယ်ရေးတပ်ဖွဲ့တွေက သေနတ်နဲ့ပစ်ခတ်ခဲ့လို့ သေဆုံးသွားပါသေးတယ်။

စာတည်း – ဟိန်းစံ

ပဲခူး၊ ဖေဖော်ဝါရီ ၂၄၊ ၂၀၂၃။

ပဲခူးမြို့၊ ရွှေမော်ဓောဘုရားအနောက်ဘက်မီးပွိုင့်မှာ စစ်ကောင်စီလက်အောက်ခံ ယာဥ်ထိန်းရဲတပ်ဖွဲ့က လိုင်စင်မဲ့ဆိုင်ကယ်တွေကိုဖမ်းဆီးပြီး ဆိုင်ကယ်အမျိုးအစား ပေါ်မူတည်ကာ ပိုက်ဆံတောင်းနေတယ်လို့ မြို့ခံတွေဆီက သိရပါတယ်။

ဖေဖော်ဝါရီလ ၂၄ ရက်ဒီနေ့မနက် ၉ နာရီလောက်မှာ ပဲခူးမြို့ပေါ်က မော်တော်ပီကယ်တပ်ဖွဲ့ဝင် ၁၀ ဦး ဟာ လိုင်စင်မဲ့ဆိုင်ကယ်ကိုတွေကိုဖမ်းဆီးတာအပြင် ဖုန်းတွေကိုစစ်ဆေးတာတွေလုပ်ပြီး အမျိုးသားအများစုကို ပိုမိုစစ်ဆေးတာတွေလုပ်ခဲ့တယ်လို့ ပဲခူးမြို့ခံတဦးက ပြောပါတယ်။

“လူငယ်တွေကို အဓိကဖမ်းတယ်။ ဘယ်သွားမှာလဲ၊ ဘယ်ကလာလဲ၊ ခန္ဓာကိုယ်ကိုစမ်းလို့ တခုခုမင်္သကာရင် ဆိုင်ကယ်သော့ဖြုတ်ထားလိုက်တယ်။ သူတို့လက်ထဲပစ္စည်း‌ရောက်သွားရင် ဘယ်တော့မှ အလကားပြန်မပေးဘူး။ ငွေအကြိုက်ညစ်တာ၊ တချို့ဆိုအရှုံးခံလိုက်တယ်။ ကျနော်ကိုယ်တွေ့မို့ပါ” လို့ ဆိုပါတယ်။

ဆိုင်ကယ်တစီးကို သိန်းဂဏန်းအထိတောင်းနေတာဖြစ်ပြီး၊ ဒီကနေ့မနက် ဖမ်းဆီးရမိထားတဲ့ ဆိုင်ကယ် ၁၀ စီးနီးပါးကို ပဲခူးမြို့ထဲက ရွှေမော်ဓောဘုရား အနောက်ဘက်မှာရှိတဲ့ သီရိဟံသာခန်းမဘေးကို သယ်သွားပြီး အကုန်ယူသွားကြတယ်လို့ အထက်ပါမြို့ခံက ဆက်ပြောပါတယ်။

“ကျနော် ဆိုင်ကယ်နဲ့သွားပတ်ကြည့်ချိန် ဖမ်းထားတဲ့ဆိုင်ကယ်တွေကို သူတို့(မော်တော်ပီကယ်) ကားပေါ်ကို အကုန်တင်သွားတယ်။ အစောင့်တွေကိုလည်း လေးနေရာလောက်ထားပြီး ကင်းချထားတယ်” လို့ဆိုပါတယ်။

ပဲခူးမြို့ပေါ်မှာ လိုင်စင်မဲ့ယာဉ်တွေကို စစ်ကောင်စီလက်အောင်ခံတွေက တလမှာ ငါးကြိမ်ထက်မနည်း ဖမ်းဆီးတာတွေပြုလုပ်နေပြီး တချို့ရက်တွေမှာဆိုရင် ယာဥ်ထိန်းရဲအပြင်၊ မီးသတ်၊ ရဲ နဲ့ စစ်ကောင်စီတပ်သားတွေကပါ စုပေါင်းပြီးဖမ်းဆီးတာတွေလုပ်တယ်လို့ သိရပါတယ်။

လက်ပံတန်း၊ ဖေဖော်ဝါရီ ၂၄၊ ၂၀၂၅။

ပဲခူးတိုင်း၊ သာယာဝတီခရိုင်၊ လက်ပံတန်းမြို့နယ်မှာ စစ်မှုထမ်းစုဆောင်းပေးနေတဲ့ အုပ်ချုပ်ရေးမှူး ပစ်ခတ်ခံရပြီးသေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ ဆီက သိရပါတယ်။

လက်ပံတန်းမြို့နယ်၊ မှောင်အင်းအုပ်စု အုပ်ချုပ်ရေးမှူး သန်းဦး ကို ဖေဖော်ဝါရီ ၂၄ ရက် ဒီမနက် ၈ နာရီ လောက်မှာ ရန်ကုန်-ပြည်လမ်းပေါ်ရှိ လွှစင်ကုန်းတာဆုံမှာ ဒေသခံကာကွယ်ရေးတပ်ဖွဲ့ဝင်တွေက ပစ်ခတ်ခဲ့တာလို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ မှ တာဝန်ရှိသူက ပြောပါတယ်။

“သတင်းအရ ရဲဘော်တွေ လွှစင်ကုန်းတာဆုံမှာစောင့်နေတုန်း အုပ်ကြီးကဆိုင်ကယ် ၁ စီး၊ ပျူစောထီးနဲ့ ရာအိမ်မှူးက ဆိုင်ကယ် ၁ စီး အတူစီးလာကြတာတွေ့ပါတယ်။ ပစ်ကွင်းထဲရောက်တော့ အုပ်ကြီးကို သေနတ်နဲ့ ၁၂ ချက်ပစ်တာ ရင်ဘတ်နဲ့ ခေါင်းတွေရော တခြားနေရာတွေရောမှန်ပြီး နေရာတင် သေပါတယ်။” လို့ သူကပြောပါတယ်။

သူနဲ့အတူလာတဲ့ ပျူစောထီးနဲ့ ရာအိမ်မှူးကတော့ ထွက်ပြေးလွတ်မြောက်သွားပြီး ပစ်ခတ်ပြီးနောက် ဦးသန်းဦးဆီကနေ လက်ပစ်ဗုံး ၂ လုံး၊ ငွေသားကျပ် ၁ သိန်း၊ ဆိုင်ကယ် ၁ စီး၊ စည်းတံဆိပ်တုံး ၂ ခု၊ မှတ်ပုံတင် ၂ ခု၊ စစ်မှုထမ်းနဲ့ပတ်သက်တဲ့ စာရွက်စာတမ်းတွေကို သိမ်းဆည်းခဲ့တယ်လို့ အထက်ပါ တာဝန်ရှိသူကပြောပါတယ်။

ဦးသန်းဦးဟာ လူငယ်တွေကိုစစ်မှုထမ်းအတွက်စုဆောင်းတာ၊ လက်ပစ်ဗုံးကိုင်ဆောင်ပြီး ဒေသခံတွေကိုခြိမ်းခြောက်တာ၊ ကာကွယ်ရေးတပ်တွေကိုစိန်ခေါ်ပြောဆိုတာတွေရှိပြီး သူ့ကြောင့်ဖမ်းဆီးခံရသူ အနည်းဆုံး ၁၀ ဦးလောက်ရှိတယ်လို့လည်း ဆိုပါတယ်။

သူဟာ ၂၀၂၁ ခုနှစ် စစ်အာဏာသိမ်းကတည်းက အုပ်ချုပ်ရေးမှူးလုပ်နေသူဖြစ်သလို မှော်အင်းရွာရဲ့ ပျူစောထီးခေါင်းဆောင်တဦးလည်းဖြစ်တယ်လို့ ဆိုပါတယ်။

ဒေသခံတွေနဲ့ တော်လှန်ရေးတပ်ဖွဲ့တွေကို ဒုက္ခပေးတဲ့ စစ်ကောင်စီအဖွဲ့ဝင်တွေနဲ့ ထောက်တိုင်တွေကို အရှိန်မြှင့်တိုက်ခိုက်သွားမှာဖြစ်တဲ့အတွက် ပြည်သူတွေအနေနဲ့ ၎င်းတို့အနီးမှာသွားလာနေထိုင်တာတွေ လုံဝမပြုလုပ်ဖို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ ရဲ့ထုတ်ပြန်ချက်မှာပါရှိပါတယ်။

ပြီးခဲ့တဲ့ ဖေဖော်ဝါရီ ၂၀ ရက်ကလည်း သာယာဝတီခရိုင် တပ်ရင်း ၃၈၀၂၊ တပ်ခွဲ ၂ ဟာ ဆားချောင်းရွာမှာနေထိုင်တဲ့ ထောက်ကြန့်အုပ်စုအုပ်ချုပ်ရေးမှူး ဝင်းလှိုင်နဲ့ ပျူစောထီး ကတုံး (ခ) ဇော်မင်းထွန်းကိုလည်း ပစ်ခတ်ရာသေဆုံးခဲ့သေးတယ်လို့ သိရပါတယ်။

စာတည်း – လင်း

မင်းလှ၊ ဖေဖော်ဝါရီ ၂၂၊ ၂၀၂၅။

ပဲခူးတိုင်း၊ သာယာဝတီခရိုင်၊ မင်းလှမြို့နယ်၊ ထောက်ကြန့်အုပ်စု၊ ဆားချောင်းရွာမှာနေတဲ့ အုပ်ချုပ်ရေးမှူးနဲ့ ပျူစောထီးဆိုသူတို့ကိုပစ်ခတ်ရာ သေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ ဆီက သိရပါတယ်။

ဖေဖော်ဝါရီ ၂၀ ရက်ည ၇ နာရီခွဲလောက်မှာ ဒေသခံကာကွယ်ရေးတပ်ဖွဲ့ဝင်တွေက ဆားချောင်းရွာ အနောက်ပိုင်းမှာနေထိုင်တဲ့ ထောက်ကြန့်အုပ်စုအုပ်ချုပ်ရေးမှူး ဝင်လှိုင်နဲ့ ရွာအရှေ့ပိုင်းမှာနေထိုင်တဲ့ ပျူစောထီး ကတုံး (ခ) ဇော်မင်းထွန်းတို့ကို ပစ်ခတ်ခဲ့တာလို့ဆိုပါတယ်။

“ပျူစောထီးကတုံးကို သွားရှင်းတော့ အိမ်မှာတင်တွေ့လို့ တခါတည်းရှင်းနိုင်တယ်။ အုပ်ကြီးဝင်းလှိုင်က အိမ်မှာမရှိဘဲ သူ့တအိမ်ကျော်က မင်္ဂလာဆောင်ရောက်နေတာ။ သူ့သမီးကို သွားခေါ်ခိုင်းရတယ်။ သူက ကျနော်တို့ရဲဘော်တွေကို PDF မှန်းမသိဘူး။ သူမင်္ဂလာဆောင်အိမ်ကအထွက် သူ့အိမ်မရောက်ခင် ကြားထဲက အိမ်ရှေ့မှာရှင်းလိုက်တာ။” လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ မှ တာဝန်ရှိသူက ပြောပါတယ်။

ပျူစောထီး ကတုံးဟာ အုပ်ချုပ်ရေးမှူး ဦးဝင်းလှိုင်ခိုင်းသမျှကို လုပ်ဆောင်ပေးနေသူဖြစ်ပြီး သူတို့ ၂ ဦးကြောင့် ဖမ်းဆီးခံရသူ ၁၀ ဦးထက်မနည်းရှိတယ်လို့ သူကဆက်ပြောပါတယ်။

အုပ်ချုပ်ရေးမှူး ဦးဝင်းလှိုင်ဆီကနေ လက်လုပ်သေနတ် ၁ လက်နဲ့ ကျည် ၁၀ တောင့် သိမ်းဆည်းရရှိခဲ့တယ်လို့ ဆိုပါတယ်။

ဒါ့အပြင် သူတို့ ၂ ဦးဟာ လူငယ်တွေကိုစစ်မှုထမ်းရန် ဖိအားပေးလူစုစောင်းတာ၊ စစ်မှုထမ်းကြေး ဆိုကာ ငွေအတင်းအကြပ်ကောက်ခံတာ၊ ငွေမပေးသူတွေကိုလည်း စစ်တပ်ခေါ် ဖမ်းဆီးခိုင်းတာ၊ လက်နက်ပြပြီး ဖိနှိပ်ဒုက္ခပေးတာတွေ လုပ်တဲ့အတွက် အခုလိုပစ်ခတ်ခဲ့တာလို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ က ထုတ်ပြန်ရေးသားထားပါတယ်။

အုပ်ချုပ်ရေးမှူး ဦးဝင်းလှိုင်ဟာ ယခင်ထောက်ကြန့်ကျေးရွာအုပ်စု အုပ်ချုပ်ရေးမှူးဖြစ်တဲ့ ကျော်ဦးကို စစ်ကောင်စီတပ်သားတွေဝိုင်းရိုက်လို့ ဆေးရုံတက်နေတဲ့အချိန်မှာ အုပ်ချုပ်ရေးမှူး ဝင်လုပ်ခဲ့သူဖြစ်တယ်လို့ဆိုပါတယ်။

သာယာဝတီခရိုင် တပ်ရင်း ၃၈၀၂၊ တပ်ခွဲ ၂ တပ်ဖွဲ့ဟာ ဖေဖော်ဝါရီ ၁၅ ရက်ကလည်း မင်းလှမြို့နယ်၊ ဇရစ်မျှောင်ကျေးရွာ၊ ခွက်မအုပ်စု အုပ်ချုပ်ရေးမှူးသန်းထွေးကို ၎င်းရဲ့နေအိမ်မှာ သွားရောက်ပစ်ခတ် ရှင်းလင်းခဲ့ပြီး မိုလ်ဘိုင်းဖုန်း ၁ လုံး၊ ဆိုင်ကယ် ၁ စီး၊ စည်းတံဆိပ်တုံး ၂ ခုနဲ့ ထောက်ခံစာ စာရွက်တွေကို သိမ်းဆည်းရရှိခဲ့တယ်သေးလို့ သိရပါတယ်။

စာတည်း – လင်း

စစ်ကိုင်း၊ ဧပြီ ၃၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်ထဲက ကံကုန်းရွာသားတဦးနဲ့ ကျေးရွာ ပကဖတပ်ဖွဲ့ဝင်တဦးကို စစ်ကောင်စီတပ်ဖွဲ့တွေက သတ်သွားတယ်လို့ ဒေသခံတွေဆီက သိရပါတယ်။

ပြီးခဲ့တဲ့ ဧပြီလ ၁ ရက်မှာ အင်အား ၈၀ နီးပါးရှိတဲ့ စစ်ကောင်စီစစ်ကြောင်းက ကံကုန်းကျေးရွာထဲကို စစ်ကြောင်း ၂ ကြောင်းခွဲကာ လက်နက်တွေပစ်ဖောက်ဝင်ရောက်လာပြီး နေအိမ်တွေကို မွှေနောက်သွားတဲ့အပြင် ရွာသား တဦးကိုသတ်ပြီး ပကဖအဖွဲ့ဝင်တဦးကိုတော့ ဖမ်းခေါ်သွားပြီးမှ လမ်းမှာသတ်ခဲ့တာလို့ ရွာသားတဦးက ပြောပါတယ်။

“ရွာထဲကို စစ်ကြောင်း၂ကြောင်းခွဲပြီးဝင်လာတာကို ရွာသားတယောက်ကတော့ မသိပဲရွာထဲဝင်မိတော့ အသတ်ခံရတာ။ ပကဖအဖွဲ့ဝင်ကတော့ ကင်းထောက်ရင်းနဲ့ စစ်ကြောင်း ၂ ကြောင်းနဲ့တိုးပြီး ဖမ်းဆီးခံလိုက်ရတာ။ ဖမ်းခေါ်သွားပြီးလမ်းမှာလည်းနှိပ်စက်သွားတယ်”လို့ဆိုပါတယ်။

အသက် ၄၀ နှစ်အရွယ် ကျေးရွာပကဖ ရဲဘော်ကို ဒုံးတောရွာဘက်ကို ဖမ်းခေါ်သွားပြီးမှ သတ်ခဲ့တာဖြစ်ပြီး၊ သူရဲ့အလောင်းကို ဧပြီလ ၃ ရက်ဒီနေ့မနက်ပိုင်းမှ ဒုံတောရွာမြောက်ပိုင်းရှိ ကိုင်းတောထဲမှာ တွေ့ရှိခဲ့တာပါ။

“ရွာသားတယောက်ကတော့ အသက် ၃၀ လောက်ရှိမယ်၊ ပကဖရဲဘော်ရဲ့ အသက်ကတော့ ၄၀ ကျော်ပေါ့။ သူတို့တွေကို သဂြိုလ်ပေးလိုက်ပါပြီ၊ ပကဖ ဦးလေးကိုတော့ သူတို့နှိပ်စက်လို့ ဝမှသတ်သွားတာ၊ ကံကုန်းရွာထဲကို စခ တွေက မကြာခဏဝင်တာမျိုးတွေရှိတယ်၊ အခုလိုလုပ်တာကတော့ ပထမအကြိမ်ပါ” လို့ ဆိုပါတယ်။

အသတ်ခံရသူတွေရဲ့ နာမည်နဲ့ အသေးစိတ်အချက်အလက်တွေကိုတော့ မြေလတ်အသံက ဆက်လက်စုံစမ်းနေဆဲပါ။

အဲ့ဒီစစ်ကောင်စီတပ်တွေဟာ မုံရွာအခြေစိုက် အနောက်မြောက်တိုင်းစစ်ဌာနချုပ်ကဖြစ်ပြီး လက်ရှိမှာတော့ မုံရွာ – ချင်းတွင်းတံတားအနောက်ဘက်ရှိ ရွှေတောင်ဦးဘုရားဘက်မှာ ရှိနေတယ်လို့ သိရပါတယ်။

စာတည်း – လင်း

ပဲခူး၊ ဧပြီ ၃၊ ၂၀၂၃။

စစ်ကောင်စီက ပဲခူးဗဟိုမဏ္ဏပ်ကို နှစ်စဉ်ဆောက်လုပ်နေကျနေရာမှာ မဆောက်လုပ်တော့ဘဲ အခြားနေရာတခုမှာ ပြောင်းရွှေ့ဆောက်လုပ်နေတယ်လို့ မြို့ခံတွေဆီက သိရပါတယ်။

ယခင်က ဗဟိုမဏ္ဏပ်ကို ပဲခူးမြို့ပေါ်က ဆေးရုံကြီးရှေ့မှာ နှစ်စဉ်ဆောက်လုပ်ခဲ့ပေမဲ့လည်း ဒီနှစ်မှာတော့ ပြည်တော်သာထိပ်၊ အင်ဂျင်နီယာရုံးရှေ့ (ဆေးရုံအနောက်လမ်း ) မှာ ပြန်လည်ဆောက်လုပ်နေတယ်လို့ ပဲခူးမြို့ခံတဦးက ပြောပါတယ်။

“ဒီနှစ်ဆောက်တဲ့ ဗဟိုမဏ္ဏပ်က ကြီးလည်းကြီးတယ်။ တော်တော်လည်း ရှည်တယ်။ လမ်းစုံဖြစ်တဲ့နေရာလည်း ဖြစ်တယ်။ အရင်နေရာမှာ မလုပ်တော့တာက သူတို့ (စစ်ကောင်စီ)အဲဒီလမ်းတဝက်ကို တားဆီးတွေချထားတာ။ သံဆူးကြိုးတွေနဲ့လည်း ကာထားထယ်။ ဖြူ ၊ နီ အတုံးတွေနဲ့လည်း လမ်းတွေကာထားတော့ လမ်းက ကျဉ်းကျဉ်းလေးဖြစ်သွားလို့ မလုပ်တော့တာ” လို့ ဆိုပါတယ်။

မဏ္ဏပ်ဆောက်လုပ်တဲ့ အလုပ်သမားတွေကိုလည်း ထမင်းစားချိန်ကလွဲပြီး အနားမပေးသလို မဏ္ဏပ်ကို စစ်ကောင်စီတပ်ဖွဲ့ နဲ့အတူ ပဲခူးမြို့ပေါ်က လုပ်ငန်းရှင်တချို့က ပူးပေါင်းပြီးဆောက်လုပ်ခဲ့ကြတယ်လို့လည်း ဆိုပါတယ်။

“အဲဒီမဏ္ဏပ်ကိုဆောက်တာ ရပ်ကွက်လူတွေစီကနေ ကောက်ခံတဲ့ငွေတွေရော၊ စစ်ကောင်စီနဲ့ အကျိုးတူစီးပွားရေးလုပ်ငန်းရှင်တွေရော ပေါင်းပြီးဆောက်နေတာ။ အလုပ်သမားတွေကိုလည်း တချက်လေးတောင် နားခွင့်မပေးဘူး။ ထမင်းစားပြီးတာနဲ့ တန်းလုပ်ရတယ်။ လုံခြုံရေးတွေချထားတာမျိုးတော့ မရှိသေးဘူး” လို့ ဆိုပါတယ်။

စစ်ကောင်စီကျင်းပတဲ့ သင်္ကြန်ပွဲမှာ Non CDM ဝန်ထမ်းတချို့ကို ဗဟိုမဏ္ဏပ်မှာ ကပြဖျော်ဖြေဖို့အတွက် အထက်လူကြီးတွေက စေခိုင်းနေလို့ Non CDM ဝန်ထမ်းတချို့ကတော့ အကတိုက်နေပေမဲ့လည်း တချို့ကတော့ အဆိုပါသင်္ကြန်ပွဲမှာ မဖျော်ဖြေချင်တဲ့အတွက် ရွာပြန်ပြီး ဘုန်းကြီး၊ သီလရှင်တွေ ပြန်လည်ဝတ်ကြတယ်လို့လည်း သိရပါတယ်။

ပြီးခဲ့တဲ့ မတ်လ ၁၈ ရက်နေ့ကလည်း စစ်ကောင်စီခန့် ရာအိမ်မှူးနဲ့ အပေါင်းပါတွေက သင်္ကြန်မဏ္ဏပ်ဆောက်လုပ်ဖို့အတွက် ပဲခူးမြို့ပေါ်နေအိမ်တွေကနေ တအိမ် (၁၀၀၀)ကျပ် မထည့်မနေရဆိုပြီး ရာအိမ်မှူးနဲ့ နောက်လိုက် ၂ ယောက်က လိုက်လံကောက်ခံခဲ့ပါသေးတယ်။

စာတည်း – 007